11
Ano qhama lighno Kristoose kala ashshi kula hunekka lighno haayyu kala ashshindha.
Tampe Xeesattay Haallikko Kaanase
2 Olho kaasatay qhoota ye dhihatteppa tampe yela kollattesikka kokisankuppa ghapadhanku maallay an hune kaanasa.
3 Naqharray oliisi qhama arinteka an woʼi:
pukkqate tʼiire kaasanna Kristoose,
pukkqate xiskatitokka tʼiirako hiisi,
pukkaqate Kristoosekka Haallikko Appa. a
4 Tʼiirako hela pukkqate shudhipa isi ghissadha taakki isi hxuuma qaladha kaasay hossi usona pukkqate kodhdhi Kristoosesikki palamisi,
5 qhamusa kula xiskatho ye hela pukkaqte shudhdhunna ghisadha taakki hxuuma qaladhay kaasay tʼiirako hiisi isena pukkaqte kodhdhisikki palamisti,
the hela kaso ghunti kulakki dhihamti.
6 Xiskatho pukkaqtekki yehela shudhu payni kaso ihhela qhitʼtʼa,
kaso hela qhitʼe takinti hela ghune iseesi palanko ligha payni pukkaqte thiisisi ihela shudhta.
7 Tʼiirakko pukkaqte thuususi hela shudhe ye gheeqasti,
tʼiirakko lighnopa kaanaste Haallikkito,
xiskatho kapay kaanaste tʼiirakkito.
8 Moʼo maallay payni xiskatho tʼiirakito dhiishoy tʼiirako xiskatito qandhikka.
9 Holuppa xiskatho tʼiirakonu uumami dhiishoy tʼiirako xiskathonu ye ummamu.
10 Hussippa erkampatadhdhe maallay xiskatho qhamu ghulnito kalla kodhdhitesa hiʼasenu immilkite kodhdhatta.
11 Naqharray Pogholhito kaanta xiskatho tʼiirako male tʼiirakokka xiskatho male ye kodhdhinti.
12 Xiskatho qhamu tʼiirakto kodhdhiti kula tʼiirakokka xiskatito idhdhaladhi,
naqharray olho kaasay huttayami Haallikkito kanta.
13 Into hune qhaqhitte qhaqha,
xiskatho yehela pukkaqte shudhunna karo Haallikkito ghisadhe iʼise gheqasay?
14 Tʼiirako kaso huusu sikaposadhe qhamu adhawra kodhissa uumathakkakki yehune kollisi?
15 Naqharray xiskatho kaaso hiisiskki ghohosati payni kaanaste thiisi qandhi?
Kaso sikaapa hinnu teexami qhamu he shudhintitannu
16 Lammi yaxakakki olinna kaaʼitha tamakkadhe woʼa payni inekka an kodhdhina manadhdhe kristaana tampe pile ini sheeghne.
Eesse Pogholhito
17 Xinkessi aʼila holtenna olho uuma koro kottaʼanu dhiishay olho xeesanu qhooti ye kodhdhu maallay hayuusi an hune teexana hune kaanasettay qandhi.
18 Olho kaasanna qharrema alikkasipa xinkesi amane kristaanasa illa holtenna ille qhoqhqhoote qhamu hunena kittatte qaghitisa an apaqhi,
holuppa hussa qhamu kodhdhamanisa an hela sheegha.
19 Hunena kittatte dhukampawhe qhamu aramnennu ille qhoqhqhoote hunena kittatte qaghe kitte.
20 Xinke aʼilla holtenna yiʼo ayite Eesse Pogholhito qandhi.
21 Ayyiʼankunna qhawho tooko qhawho tookkoosi yetiqadhunakki yiʼi,
tooko ippufina tooko kapay ihxhxayyodha.
22 Emma keeni manne anna yiʼo yiiteppa isana qukanku huni sheeghite?
Atam toʼokunko koro Haallikko dhukkayisadhana dhafetakka heye olo sheeghesi palamiste?
Lammi moʼo an hunena paayni?
Olittay an hune kaanasna?
Mookakki payni anu hune kaanasni.
23 Ano tampessi an Pogholhito koladhiskka an hune likasi:
Pogholho Iyyesuse awnesi alikasipa teexunna dhilantako akkipa,
24 kalatesadhdhupa ghodhdhuppa na payunna:
“Haadhi husi sakankob haayyu qhoota haahundhinu kodhdhina hela ye tayenu kodha.”
25 Holuppa esse tupetaka qukteesi akkuppa napayu:
“Qukti the kʼeeqhte thayu kapa kodhdhina katape qhawthihte,
hussa maallay xinkessi aquktiisi qukankunna husisi hela ye thaayenu kodha.”
26 Xinke adhdhilankuusi yiiteppa isa quktiisikka quknku kaasanna haka Pogholho okayinisasa fartte Thuususikka aththoruyinte.
27 Lammi yaxaka ye uso gheeqastina dhilankusi taakki qukte Pogholhitosi quki payni,
sakankopa kʼeqhte Pogholhitosiki dhafi maallay innakapa kasqathamna.
28 Yaxakka ye yiʼunna yiʼupa quktinna ye qukunna qharaʼitha ipukkaqate thuusuusi ihela qhoththosadha;
29 moʼonu payni yaxakka ye upadhdhunakki sakanko Poghollhto iyʼipa isi kʼeeqhte Pogholhitho quka payni pukaqte thusussa qhaqhitte yiʼipa isi quka.
30 Hunena kittatte he kisha hu tardhdheppa udhamonki,
tooke tookeka farronki husi maallay.
31 Pukaqate thaaniskki an qhoththosane payni ahxay ye ina qhaqhamu.
32 Naqharray kuyyaqako dhikattattena hessi ye dhukkayesadhe qale qhamu ini kutumaminennu Pogholho hantu iʼine dheeha.
33 Hussa maallay koro haayyu kuyyaqako Aʼesse Pogholhito yiʼenu illa holtenna pukkaqatte pukkaqatte ille tiqqithadhindha.
34 Xinke aʼilla holtenna qhamu ye qhaghitenu hune kodhdhintinnu,
qhawho puffi qagha payni immanne huusuna yiʼi.
Olo haqhiisi xinke an karo haahundhi okayinakki anna hune dhikkisni.