Killankonu Sakate qhamu Ye Gheeqastti
10
Koro haayyu,
appadhdhe haani kaasay urrathatte kalay qhamu kodhdheppa paso kitteʼithakka tahxonkissa qhama arttekka woʼi.
2 Usundhe kaasay Muuse qale qhamu kodhdhinennu urrathettappa pasitottakki shoxatte shoxadhe.
3 Usundhe kaaasay yiʼo nassawinkito toʼokito yiʼe,
4 usundhe kaasay qukte nassawinkito toʼotatte quke.
Hossi nakala ashsha awruko siimikossi nassawinkitonakki quke,
awruko siimikussakka Kristoose.
5 Ikkodhdhitama kapay Haallikko he kishattay qhooti ye hxasoodhu maallay piyye mandhitosa farreppa haqhonki.
6 Usundhe qhamu olho maghanu yooke kula inekka qhamu ini olho maghanu yooknennu olissa lighno ine kodhdhi.
7 Qhamu hasa payamtipa tooxamo kula:
“Waarshusakka yiʼepa qukenukki qakkadhi,
hiripenukka haqu”a usundhissana kittatte tookke tookke qhamu killankonu sakate kula hunekka killankonu olho sakate.
8 Usundhissana kittatte tookke tookke qhamu palakumeppa kuyyaqako toʼokito qhawho 23000 farronki kula inekka paalakume hxurri.
9 Usundhena kittatte tookke tookke qhamu Pogholho theemmeppa tawwidhdhe usundhe qhawwonnkippa farronki kula inekka Pogholhoossi theemme hxurri.
10 Usundhena kittatte tookke tookke qhamu qhurumrumeppa erkampattesi koro patisattay humonki kula hunekka olo qhurumrume.
11 Oli kaasay qhamu ine lighno kodhdhininukki usundheema dhaghghapi,
olhunna maallay tooxamikka inessi perre dhikkatatena qagha qhama he tiqitanenu.
12 Hussa maallay qhawho iyyana an dhikitpa shikkaaraki qagha payni qhamu ye raninnu ihhe tiqtadhi.
13 Themmatte koro kaasassa dhaghghapti malettay themmatte pile ye huna dhaghghapu.
Haallikko ho dhukkaysatama,
hussa maallay themmatte anna lighghe alkasintenna ghutay qhama themmamintennu ye hune hxurrikka,
naqharray xinke athemmamitenna qhama dhuupadhe alkasintenu onke anna lighinteesikki ihhune gharisni.
14 Lammi koro haayyu,
killankonu sakataatte kalla qoradha.
15 Husisi ho an hune thorruyi qhamo koro thayho sheegha kula qhoota hune dhihnu,
oli an qalladhinu hune qhaqhitte qhaqha.
16 Quktisa sakete an Haallikko kaanasnippa isan qukaani the kʼeeqhte Kristoose qale toʼokunko sheegha qandhi?
Dhilankusa aghodhinippa isa yiʼaani ho pishko Kristoose qale toʼokunko sheegha qandhi?
17 Dhilankusa qhamu toʼoko kodhdhi kula inekka he kisha an kodhdhinekka payni ine kaasay pishko toʼokko,
ine kaasay dhilantako toʼokkosinakki an ghoodhdhanaani.
18 Into waarsho Israeelatteesi eemindha,
he teexakoosi yiʼa xaytossi ana teexakko texi qale toʼokounko ye sheeghe?
19 Emma kati olho akillankonu oohxadhi ikkodhdha killankusa kakki olho dhukate payyo?
20 Hasa qandhikka!
Koro ye koro Ayhudhatte kodhdhu teexakko iʼitʼtʼoose Haallikkonu qandhima Seetʼananu,
hussa maallay hune qhama Setʼana qale kodhdhintenu anu woʼi;
21 qukte Pogholhitonakki qhukute payni the Seetʼanana qhuke huni alkasinte.
Yiʼo Pogholhitonakka yite payni ho Seetʼanana yiʼe huni alkaasinte.
22 Emma husisi kodhetta an Pogholhoo miresna katib?
Dhikitnottay Usona an ghulaani payyo?
Olho Kaasasi Kaanaste Haallikkitonu Kodhe
23 “Olho kaasay ippayami naqharray olho kaasay ho gheeqasa qandhi”,
olho kaasay ipayami naqharray olho kaasay ye koro ghupadhi.
24 Qhawho kaasay olho qhawho pilenu gheeqasaasi idhdhihadhi dhiishay huusu patta ighgheeqe hxura.
25 Kʼalpe thaahundhittay huni he ghadhonkunna sakanko amooratte lassi kaasaasi yiʼindha.
26 “Piyyepa olho nakittate qagha kaasay ho Pogholhitoye.”c
27 Qhawho ye dhukkayisadhiki yiʼonu hune ooqipa ashshonku payni kʼalpe thaahundhittay huni he ghadhonkunna olho ayiʼonu hune teexiisi yiʼindha.
28 Naqharray qhawho hunena payina:
“Husi ho akillankonu itʼtʼoosi” payni qhoota qhawhussa hune qallipa qhoota kʼalpe thaahundhi maallay olo yiʼe.
29 Olhanna maallay hasa payi qhoota kʼalpe qhawhusana maalla dhiishay qhoota haahu maalla qandhi,
hasa hxurransadhe thaayu moonukki kʼalpe qhawho piletettay dhafaminti?
30 Ano Haallikkoosikki an kaanasipa isa yiʼa payni olho an Haallikko kaanasittay moʼonukka qallamni?
31 Lammi ayiʼankunakka ikkodhdha aqukankuna,
takkinti olho kaasaasi akkodhankunna kaanaste Haallikkitonu kodha.
32 Koro Ayhudhatenukka ikkodhdha koro ye koro Ayhudhatte kodhdhu taakki toʼokunko koro dhukkaysadha Haallikkonu kuthumatte olo kodhdhe.
33 Ano koro kaasaasi olho kaasattay hxaseesenu qhama kokisadhi kula hunekka qhamussa kodha,
he kiisha qhamu dhinnennu olho usundheesi pakira an kodhe woʼi dhishay ho yeesi pakirko kodhdhina kodhe anu woʼi.