Olho Erkampakko Gheeqasa
9
Ano qhawho hxurransadhe sheegha qandhi?
Ano erkampakko qandhi?
Pogholho Iyyesuseesi anu hiʼu inta?
Hunekka awsho an Pogholhonu tardhina qandhi?
2 Koro pilenu erkampakko annu kodhdhukakki payni huneesi kapay dhukeema ano erkampakko,
moʼo maalla payni hune yeesi Pogholhottay arame erkampawhunko haayyuna.
3 Heye dheehasi malise an hela kohxhxinittay thisi.
4 Emma keenni yiʼo yiʼepa qukte quke ye ine gheeqasti? a
5 Qhamo erkampawhe tookkepa qhamo qassawhe Pogholhitopa qhamo Kefab kula xiskato dhukkaysadha illay lallaghame ini alkanne?
6 Taakintti he kodhathadhettay kokkisadhepa qaake ine gheeqasti anopa Parnapaase patta?
7 Keeni qhawho pirradhdhe huusuttay woththadherunko kodhdhanna yaxa?
Taakkinti qhawho dhishtako woynatte dhishshadhdhinapa isi yena awusho yiʼi yaxa?
Qhawho qhole koshadhapa isi yena orxxe quki yaxa?
8 Husiisi ho an qalladhi dhihadhe qhawhitottay patta inta?
Hikke Muuse hasa qandhi payiti?
9 Hikke Mussesa hasi payamtipa tooxamoy:
“Qardho qhothana pako olona shapi.c
” Ata Haallikko hu hasa qalladhi qhoota qardhdhito?
10 Dhuke Haallikko hu hasa qalladhi qhoota haani dhihadhetta qandhi?
Qhawho qhothakka qhamu kippotta qhoththninu,
ho mangho thubhakka qhamu kippotta thubhnnu onke hasa lighattay kaasa qhamu pakayye thayaninu dhuke hu tooxamti qhoota hani.
11 Ine hune kitta podhdhahxo nasawinkito an pooxni paynippa olho qaakonu ine gheeqasa tayadhani payni hussa olho dhamma payyo?
12 Koro pile olho usundhe gheqasasi hunena kaanta tayadhe alkasi payni Ine ho ghulattay tayadhe yeine gheqasti?
Ine kapay Hussa kaasasi ini pakirsadhoni,
ladhdhi Wnkele Kristoose xeesannu kuthumatte qhamu ini kodhdhinennu olho kaasasi an dhupadhaani.
13 He Manne Kʼulkʼulawhatte kodhadha yiʼo huusundhiisi qhamu Manne Kʼulkʼulawhatena tayadhe kula,
he xayto ana teexakko itʼtʼoosina kodhadhakka teexakussana qhamu tayadhessa huni artte? d
14 Qhamussa kula he woonkele thoruyakka olho qaako huusundhinu gheeqasasi kodhmossi woonkelatte ikkodhadhenna qhamu taayyanenukki Pogholho hayi.e
15 Naqharray ano olho koro gheeqasana toʼokokakki anunna pakirsadhu,
hantukka husiisi an hune tooxana olho hasa lighooma qhamu ayye kontennu kippo kodhdheta qaandhi.
Qhawho olhossi an peepadhisi hu yela olho lathu konina kanta an farraki ye woyya.
16 Wonkele thoruyye thaayuttay anu hepeepni,
ho an thorruyi qhooti kitte yela qaghiti maallay,
wonkelesikki anu thorruyu payni anhe ooyadhi!
17 Woʼo hayyutakki an thorruyi payni shillimathe an taayanni,
woʼo hayyutakki yekodhdhu payni kapay hussa kodhimosi aʼatarattay yateexisi pattakki an dhikkisi payyo.
18 Emma shillimathe thaayyu moʼo?
Shillimathe thaayyukka wonkele thoorruyettay olho yegheqasasi anu pakirsadhuna wonkeleesi hxayye maale thorruye.
19 Ano qhawho hasa lighi,
ano ayyiliththo haaxakka qandhi,
naqharray he kishaasi karo Kristoose qhama holasninu pukkaqate thaayyuusi ayliththo koro kaasannakka an kodhi.
20 Koro Ayihudhattesi karo Kristoose holasenu Ayhudhadhe qale Ayhudhito an kodhdhi,
he Hikkate kalla qaghasi karo Kristoose holasenu pukaqate thaayusi Hikkate kalakki an kodhdhi,
he Hikkate kalla qaghanu ho Hikkate kalla qagha annu kodhdhi.
21 Ano ho hikke Haallkkitto sheeghapa hikke Kristoosenna kalla kodhdhakka payni hessi ye dhukayisadheppa isiye hikke sheeghesi karo Kristoose holasenu hoye hikke sheeghi kulakki an kodhdhi.
22 Hessi dhukkaysadhattay tardhdheesi karo Kristoose holasenu hessi tardhdhe qale anokka ho tardhdhi an kodhdhi,
qhamu ye alkasamti kulaghaqi he qhac’asi dhinisenu koro kaasa qale olho kaasattay naqale an kodhi.
23 Olho ana maallay hussa kaasay kodhi sakessi Wonkelette tayadhenu.
24 Koro hermatho xakkumtte hera qhamu koro kisha kodhdhdipa,
usundhissana kittatte ho shillimathe akkadha kapay qhawho toʼoko kodhdhussa huni arte?
Hussa maallay hunekka qhamo qhawho shillimathe tayanna kula hera.
25 Qhawho hunkakka ho xaakumenu gharsadha olho kaasanakki pukkaqe thuusu tiqadhi,
usundhe halalossi lighghinapa patu shapadhenukki tardhdhe,
ine kapay halalossi ye lighghinippa patu shapadhenukka an tardhine.
26 Hussa maalla qhawhossi xayyto inna hxafni ye ari kula thaythe anu herrikka,
holuppa qhawho hayyakko thubhbha kula thaythe anu oghamni
27 Naqharray koro pilenu an thorruyi tupettay pukkaqate thayyuna qhamu anu ranippa thayithe haqhninnu pishko hayyusi inna rakisana qhamu ye eʼee payninukki an konni.