Sakanko Akilankonu Itʼtʼoosi
8
Qhoota sakanko akilankonu itʼtʼoosina kaaʼitha hasa payi,
ine kaasay arno an sheeghaani.
Ikkodhitama kapay arno peeppo kitteemi koro xulleesi,
cʼikno kapay ikkoro ghupadha.
2 Qhawho iyya an ara,
hu are uso gheeqasti kula ghaqiti haannay ye aru.
3 Qhawho Haallikkoosi cʼikadha kapayi Haallikko iʼuso ara.
4 Lammi qhoota sakanko akillankonu itʼtʼoosi yiʼe kaaʼitha hasa an payi,
hassa piyye qhaatʼinna killanko qhamu olho lathu kodhdhipa Haallikko toʼokko malettay waako pile isi ye qaghisa an araani.
5 Karaykka killankidhdhepa poghldhdhe kishakki qagha,
monthitokka ikkodhdha piyyatekka he waakidhdhe payameppa isi ooqama iʼqaghekka payni,
6 ineesi kapay ho olho kaasay Usona kaantakki ine kodhdhi,
inekka Usoosi kodhdhaanippa isan qaakani Haallikko toʼoko Appa an sheeghni,
holuppa ho olho kaasay Usottay ine kodhdhi,
inekka Usottay kodhdhaani Pogholho toʼokko Iyyesus Kristoose an sheeghni.
7 Naqharray he hussaasi ara koro kaasa qandhikka.
Koro tooko tooko haka hantu saasa killankonu sakate qhooti kolladhi maallay issakanko yi’a payni ho akillankonu itʼtʼoosisa idhdhihadhi,
kʼalpe thuusudhikka the qhacʼa qhooti kodhite mallay illokmadha.
8 Naqharray yiʼo Haallikko kula ye ine itʼtʼosnikka,
ini yiʼoonika payni olho inena qhacʼna ye qaghi,
ayyiinikka payni olho ine padhaawamna ye qaghni.
9 Ikkodhitama kapayi hxuransadhisa hune tayattenna haqati olho akkote heye dhukkaysadhettay dhikitonkinu kutumatte qhamu ye kodhdhininu he tiqitadhindha.
10 Atho “Arno an sheeghi” appaytipa qhawho dhukkaysadhettay ye dhikitu ammanne killankitona yiʼanna ho hiʼu payni yiʼossi akillankonu teexisi yi’enu ye shahxumni?
11 Hussa maallay qhawhossi Kristoose na maallay fari ye dhukkaysadhettay dhikitu arno haahuna haqati ippatna payyo.
12 Onke hasa lighattay koro dhukkaysadhe na qhacʼcʼtiisi dhappisepa kʼalpe thuusundhi qhacʼaasi qhootana payshesti mallay Kristoosenakka dhappite.
13 Lammi yiʼo ano yiʼikki qhawho dhukkaysadhaasi dhappisa payni usoosi dhappisatte kaanta moʼokakki payni sakanko anu yiini.