Qhoota Akkeete
7
Qhoota olissa ayye tooxtena kaaʼitha,
qhawho xiskathto thuusu male xiskathto pile qale rafe hxurria payni iwoyyay;
2 naqharray palakuntatte he tiqadhenu qhawho kaasay innaxaye akka,
xiskathto kaasakka itʼtʼiirakko akkatta.
3 Tʼirakko xiskatho thuusunu olho wooti kaasasi innu kodha,
qhamussa kula xiskathokka tʼiirakko hiisinu olhu woʼi kaasasi innu kotta.
4 Xiskatho pishko hiisina ghulno ye sheeghti,
ho pishko hiisina ghulno sheegha tʼiirako hiisi.
Qhamusa kula tʼiirako pishko huusuna ghulno ye sheeghi,
ho pishko huusuna ghulno sheegha xiskatho thussu.
5 Xeere qhacʼa ghissadhenu ille xule malettay pukkaqte pukkaqtenu ille qale rafe olo ille dhawre,
pukkaqte thaahundhi rafise malalettay Setʼana qhamu ye hune theemininnu lanka ille qale qaakonku.
6 Oli an hunena payi qhamo hayito qandhimma dhihamte.
7 Qhawho kaasay qhamo haayyu kulaki xiskatho ye akkunna ghayyini payni awoʼa,
naqharray qhawho kaasay teexako Ihaallikkito kaanta akkadhi sheeghi,
qhawho tooko teexakko akkeete ishsheeghi qhawho tookko kapayi teexakko akkeete yesheghi.
8 Heye akkonkippa ye akkadhonkippa xiske tʼiire na farritipa tʼiire xiske nafarena hasa an payi,
ye akkonkippa ye akkadhonkinakki qhamo haayyu ghayyine payni ixxeesay.
9 Naqharray pukkaqte thuusundhiisiki rafise ye alkasonki payni iʼakke,
woʼoko pishkitottay shaʼeete kaanta akke iwwoyya.
10 He akkennu kapay hayuusikki an teexni,
hayusakka ho Pogholhito dhiishay haayyu qandhi.
Xiskatho tʼiirakko hiisina kaanta irrehamme hxurta;
11 irreehamiti payni kapay ye akkadhunna ihasa gheyyiti,
taakkinti itʼtʼiirakko hiisi qale araramta tʼiirakkokka ixxiskatho bthuususi ishighe hxura.
12 Koro pilenukka hasannu qalli,
hussakka ano hasa paya dhiishay Pogholho qandhi.
Tʼiirakko xisikatho ye dhukkaysadhu sheeghakki qaghapa xiskatussa thuusukka uso qale qaakenu isi woʼa payni ishighe ye uso gheeqasti.
13 Xiskatho the tʼiirakko hoye dhukkayisadhu sheeghakki qagha paynippa uso isi ise qale qake woʼa payni ishighe ye ise gheeqasti.
14 Tʼiirakko ye dhukkayisadhi xiskatho thuusuttay Ikʼulkʼullawi,
xiskaththo theye dhukkayisattikka tʼiirakko hiisi dhukkayisadhattay Ikʼulkʼullawiti,
hasakki ye kodhdhu payni axayi dhelle haahundhi he lokimadhekki kodhdhne,
hantu kapay usudhe he Kʼulkʼullawe.
15 Naqharray qhawho hoye dhukkaysadhi reehamme iwwoʼi payni irrehamma,
tʼiirakko tooko taakki xiskaththo tootte olho hasa lighattay shapame ye gheeqasti,
Haallikko qhama nakayhottay qaaknaninukki ine ooqi.
16 Atho xiskatho dhukkaysadhay,
yaxara tʼiirakko haahi ye dhukkaysadhisikki adhdhinisintina moʼo aʼarti?
Atho tʼiirakko dhukkaysadha,
yexara xiskkatho taahu ye dhukkaysatisikka adhdhinisintina moʼo aʼarti?
Qhamossi Haallikko Hune Ooqi Miinta Qaakindha
17 Qhawho kaasay qhamo teexakkosi Pogholho nuteexi kulapa qhamo xinkesi Haallikko uso ooqina iʼqaghi kula iʼqaaki.
Olho ammanadhdhe kristaana kaasannu xawadhi husi.
18 Yaxakka ikkarrasami tupettakki ooqami payni qhamo qhawho ye karrasamu kula idhdhihadhe hxura,
hoye karrasamunna ooqamikka iukarrasameesi ghgheeqhe xura.
19 Karrasamekka ikkodhdhita,
karrasame xure olhu nakeesti ye qaghi,
olho gheeqasa hayo Haallikkitoosi dhikkise.
20 Hussa maallay qhawho kaasay qhamo Haallikko uso ooqi kula iqaaki.
21 Xinke Haallikko ho ooqina atho aylitho?
Husattay olo shoxxasi;
hasa lighesikka tayatti payni kapay hussa inni hola pinnu.
22 Moʼo maallay payni qhawho aylitho kodhdhipa ooqamu Pogholhotakki hasa lighi,
qhamussa kula qhawho ye ayliththo kodhdhunna ooqami ayiliththo Kristoosekki kodhdhi.
23 Haallikko hune hxorighi maallay aylaadhdhe korito olo kodhdhe.
24 Koro haayyu,
qhawho kaasay qhamossi ooqami kula ikkokisadhapa Haallikko qale qaakoy.
Kasqo Qhoota Koro Ye Akku Pana Ye Akkadhu
25 Qhoota koro ye akkupa ye akkadhu kaʼitha Pogholho hayo iyye teexi ye qaghi,
ikkodhdhitama kapay hxurakko Pogholhitona paayyati qhamo qhawho dhukayisathama kula dhihamte an sheeghi hisi.
26 Rakko peeri hantu anna qaghitenna haqti qhawho ye akkuppa ye akkadhunakki hasa ghayyini payni olho xeesakki ye lighti.
27 Xiskatto aʼakkiti payni olo ishighi,
athu akku payni olo xiskatto akke gheeqi.
28 Aʼakkiti payni cʼuppo akkotti payyo qandhikka,
shethisakka i’akkatti payni cʼuppo ye kodhu.
Naqharray koro ille akka rakko kisha na dhaghghapa,
anokka husi qhamu yehuna hxafninukka woʼi.
29 Koro hayyu,
ano hasa ahunena payi,
perre he mahxhxna’eye he xiskke sheegha qhamo he ye sheeghe kula kodheppa dhihadhonki;
30 he ooyakka qhamo heye ooye kula,
he xasoodha heye xasoodhe kula ikodhdheppa qaakonki;
he maahxe xorghadhakka maahxisa ixorghadhe qhamu huusundhi ye kodhdhonkkisa idhihadhdhe.
31 He shorokunkko piyye qhatʼinna pakkirsadha heye pakkirsadhe kula ikkodhdheppa qaakonki,
moʼo malla payni olho piyye qhatʼinna ho lighghina.
32 Anokka qhama shoxxase male qaakintenukki awwoʼi.
Qhawho ye akku olho Pogholho hxaasesna kodhenukki dhihadhi;
33 qhawho naxxaye akki kapay naxxaye thuusu hxaasesenu olho piyyinakki dhihadhdhi.
34 Husittay saqako huusu iqhootami.
Sheththe ye akkadhu qhoota olho Pogholhito idhdhihatti.
Dhihadhe thiisikka pishkopa nasso hiisittay Pogholhonu reehhame.
The akkatti kapay tʼiirakko hiisisi hxaasesenu olho piyyinakki dhihatti.
35 Olho anna maallay hasa payi olho hune gharraasi dhihadhettay dhiishay hunena kohxenu qandhikka;
ano ho an woʼi saqko haahundhi ye qhoqhotamunna Pogholhottay qhama qaakinteppa nu kodhadhankunnu.
36 Qhawho tooko sheththe rapadhipa akkeete olthisuppa sheththissay perre inna akkanti na hxafonpa isi ise akkenu woʼa dhamma sheegha payni iʼlle akkama yenu cʼuppo kodhdhiniyye.
37 Naqharray qhawho tooko saqko huusutakki kokkisadhipa olho uso kittesa isi ye qaghipa woʼoko huususikka tiqithadhe alkasuppa sheththessi rapadhiisi hxurenu puqasu payni olho xeesa ikkodhi.
38 Hussa maally qhawho shethisaasi akki olho xeesa ikkodhi,
hoye akku kapay olho uuma xeesa ikkodhi.
39 Xiskatho tootte tʼiirakko hiisi haki ye faru saasa hikke akketettay the shapamti,
tʼiirakko nafari payni kapay qhawhu wootisi akkadhenu the ishshghamti,
qhawhusa iʼakkatti kapay ho Pogholho dhukkaysadha kodhdhe gheeqasa.
40 Qhamo ano dhihadhi kula payni ye akkadhunakki ghayyinti payni the uuma hxasoodhakki kodhinti,
anokka ho Naso Haallikkito ye qale qaghikki ye lighti.