Ille Kasase Koro Dhukaysadhana Kittatte Ye Gheeqasti
6
Hunena kittatte qhawho tookko qhawho pile ho dhukkaysadha qale dheekko sheegha payni dheekusa hu koro Kʼulkʼulawhe nu xaadhikumnina kaanta malaali koro qhaqhitatte hoye dhukkaysadhi kula ashshenu shaxuni?
2 Kʼulkʼullawhe qhamu piyye qhaatʼisa qhaqhitte qhaqhne huni arte?
Emma piyye qhaatʼeema qhaqhitte qhaqhinte payni oli takkayyasa qhaqhitte qhaqhe hune malaalla?
3 Koro piyyina qaakasa qhaqhitte qhaqhe hela hxurama erkampatadhdheema kakki qhama qhaqhnaani huni arte?
4 Lammi olho hasa ligha huneema hxafi payni malaala korossi dhafami toʼokunko koro dhukkaysadhana kitatte yeqaghi minteema itʼtʼooste?
5 Olho anna maalla hasa payi hune palamisenu,
emma peri hunena kittatte koro thaayho sheeghapa isi koro illena dhappiisi illa ararse alkasna ye qaghi?
6 Naqharray qhawho dhukkaysadha qhawho pile ho dhukkaysadhaasi qhaqhitte koro ye dhukkaysadhisa kasase ighgheeqasay?
7 Lammi ille kakasasisa hunena kittate qaghay rane haahundhiisikki hiʼaasti,
laadhdhi hunenaka dhappini payni ye woyyinti?
Hunesikki atatakni payni ye woyyinti?
8 Hune kapay adhdhappakuppa isa tatakanku,
hussakka koro dhukkaysadhasi.
9 Paqhitolawhe qhamu Axase Haallikkito ye tayne huni arte?
Husattay olo tatakame:
he paalakumapa he kilankonu sakatapa he mammaasapa tʼiire paalakumtettay rafay tʼiire ille akkappa xiske ille akka;
10 taakki kerqepa yuyuʼepa he hxahxayoodhapa he koro dhaghghisapa he koro sara Axase Haallikkito ye tayne.
11 Hunena kittatte tookke tookke qhamussa kula ahxay,
hantu kapay makaxko Pogholho Iyyesus Kristooseppa Nasso Haallikkitottay ashoxamteppa kʼulkʼulawankuppa he pare qagha kodhdhankuppa dhihamonku.
Pishko Haanisi Kaanaste Haallikkitonu Gharise
12 “Olho kaasay iyye payami” Ikkodhdhama kapay olissa kaasay hoye pakirra payyo qandhi:
“Olho kaasay iyye payami” Ikodhdhitama kapay olho toʼokonukka anu ayile kodhdhini.
13 Holuppa:
“Yiʼo karqithonu,
karqithokka yiʼonu.”
Naqharray Haallikko usundhe lakkiisasi ippatisna,
pishkokka Pogholhonu dhiishay palakuntenu qandhikka,
Pogholhokka pishkonu.
14 Haallikko qhamu Pogholhosi fartatte haqisi kula ineesikka humna huusuttay fartatte iʼine haqisna.
15 Pishko haahundhi qhamu meelle pishko Kristoose kodhdhisa huni arte?
Emma pishkosi meelho Kristoose kodhdhiisikki an akkinipa meelle xiskatho mammaasana qale toʼokke kodha?
Moʼokaki payni ye kodhdhinti!
16 Taakki qhawho xiskatho mammaasa qale rafi qhamu ise qale pishko toʼoko kodhdhi huni arte?
“Lakkinto pishko toʼoko ikkodhine”a kippayamtipa tooxamoy.
17 Naqharray qhawho Pogholho Iyyesuse qale kodhdhi Uso qale Nasso toʼoko ikkodhdhini.
18 Hussa maallay palakunkito kalla ghoradha,
qhawho cʼuppo pileesi pishko huusuna seetotakki kodhi,
naqharray qhawho palakuma pishko huususa icʼcʼuppo kodhi.
19 Emma pishko haahundhi qhamu Nasso Kʼulkʼullossi hunena kittatte qaakana manne Huusu Kʼulkʼulawhe kodhdhisa huni artte?
Nassusakka hossi Ahaallikko akkate.
Hussa maallay hune haahundhi qandhikka,
20 xortho shooshatakki appitmamte maallay pishshko haahundhitay Haallikko kaanasa.