Cʼuppo Koro Palamisa Manne Dhukkayisadhattena
5
Karay hunena kittatte lokme palaghunkito qhamu qaghessa an apaqi,
lokme hasa ligha koro ye dhukkaysadhina kantakakki ye arame,
hussakka qhawho lammitte paappo husuna akki qagha.
2 Laadhdhi appeppodhanku,
ahxay asane hune gheeqasa,
qhawho olissa kodhisikka lihasepa patise ye hune gheeqasti ahxay?
3 Ano an hunena kaanta sikapuyakakki payni nassottay hune qale an qaghi,
qhamo qhawho hune qale qagha kulakki an kodhdhipa qhawho olissa kodhisa hantu pokoy na qhaqhitte qhaqha.
4 Xinke aʼilla holtenna anokka humna Pogholho Iyyesus Kristoosettay hunena kittatte qhoota nassotay tayamni maallay,
5 Woʼo sakankito magha qhamu na panipa kuyyaqakosi Pogholho Iyyesuse qhaqhittenu okaayina nasso huusukka dhinunu qhawho hasa lighaasi Seetʼananu alikkasapa teexu.
6 Lammi peepadhe thaahundhi pare qandhi.
Haqasisso takkaya qhamu pukeesa haqasisisa huni arte?
7 Qhamu ahantu haqasisso male kodhdhite kula pukeesa qhawthito qhama kodhdhinttennu haqasisso paʼakusa hela patisa,
orpo haani Faasikaa Kristoose ine saaqhamiye.
8 Hussa maallay paalisaasi an kanasanina haqasiso dhohumuntepa maghno na hoqhqhi paʼakkottay ye kodhdhunna,
xeesnopa dhukettay dhilanko haqasisso yena qaghittay kaanasni.
9 Erko xayna qharaʼitha an hune tooxina koro palakunkotta qaaka qale olo naqale kodhdhe an payipa hune tooxo.
10 An hasa payana kati hessi piyyate qaakapa isi mammaasa kaasay taakki yuyuʼe taakki he koro sara taakki he killankonu sakatadha qale olo kodhdhe payyo qandhi,
eemma hasi kodhdhiti payni piyyatte lighe hune gheeqasa ahxay.
11 Naqharray hantu olho ana maallay hune tooxi,
he kristanadhdhe kodhdhepa isi palakunkotta qaaka taakki isi yuuyuʼa,
taakki isi kilankonu sakata,
taakki he koro dhaghghisa taakki he hxayyoodha,
taakki he koro sara qale olo kodhdhe,
koro hasa ligha qale yiʼokakki olo naqale yiʼe.
12 He toʼokunko koro dhukkaysadhana seetottay qaghasa qhaqhitte qhaqhenu moʼo ye rakkisi?
He toʼokunko koro dhukkaysadhana kittatte qaghasa hune qhaqhitte qhaqhe huni alkasinte?
13 He toʼokunko koro dhukkaysadhana setottay qaghasa ho qhaqhitte qhaqhna Haallikko;
lammi “Qhawho maghno kodhiisi hela kittatte patisa.”