Erkampawhe Kristoose
4
Lammi koro ineesi qhamo kodhampawhe Kristooseppa he olho xashshate Haallikkitosi armathesenu atara sheegha kula ineesi dhihe gheeqasa.
2 He atara akkadhe he dhukkaysatame kodhdhe usundhe gheeqasa.
3 Hunetakka ikkodhdha koro qhaqhitte qhaqhatakaki ya qhaqhaminti payni mʼokka qandhi,
ano kaki pukkqate thaayyusa anu qhaqhite qhaqhni.
4 Kʼalpe thaayyu the xeesa,
husa kapay qhamu dhappitte yeyela qaghitisa ye arasi,
moʼo mallay payni hoya qhaqhna Pogholhoye.
5 Hussa malay xeeressi Pogholhito ye hxafonkinna yaxaamakka inna qhaqhitte qhaqhonku,
haka Pogholho okaynisa tiqithadhindha,
Uso ollho thukkankottay he mughisisi hammakko kulaki lihasni.
Xeerissana qhawho kaasay kalata uso gheeqasaasi Haallikkito kaantaki akkanni.
6 Lammi koro haayu,
pakirko hahundhinuka an payipa ano pukkaqate thaayyupa Appiloosesi lighnonu isan hune itʼtʼoosa,
husiisikka ho an kodhi:
“Kʼaale tooxamtina olo lighghi” iyyaasi qhama inena kollantennu.
Hussa maallay qhawho tookoosi tookito ghulasettay olo pepoodhe.
7 Emma yaxa koro pileete ho ghulasi?
Olho athu akkadhunna haahu kodhdhi moʼo qagha?
Ema moʼo maallakka qhawho ye olo akkadhu kula he peepti?
8 Hantu olho hune gheeqasa kaasasi attayatte!
Shorokumankukka!
inenakka reehamonkuppa poghlumanku!
Dhukeenukka poghlumte payni ahxay inekka hune qale an poghlumni!
9 Moʼo maalla payni Haallikkito ine erkampawhe Husuusi he qhamo korosi qhaqhitte fartatte na qhaqhamti kula koro kaasanna tupeema ine shikkarashikki ye lighiti,
piyye qhaatʼe kaasappa erkampattaadhdhepa koronukka xikko an kodhdhini.
10 Ine qhoote Kristoose maallakka paynippa qeepawhe kodhdhaani,
naqharray hune Kristoosettay arnanampawhe,
ine tardhampawhe an kodhdhini,
hune kapay he dhikitooma,
hune kapay he kaanasamtekka kodhdhite ine kapay he palamnekka an kodhdhine.
11 Haka hanthu saasa an puffaani,
an dheepodhaani,
urukuyte an dhapaani,
aʼine thubhbha,
manne qaakito dhapettakka an qootʼuyamaani.
12 Xarghghe haanitakki an kodhathannipa isan tardhaani,
iʼine qhiicʼana annu sakaani,
iʼine ghoghoranakka an dhuupadhaani;
13 makaxxe haani iʼinena patisanakka xesno annu holasni.
Haka hantu saasa ooshsho piyye qhatʼinnapa miise akappatte ooshi an kodhdhini.
14 Ano oliisi ho anna mallay hune tooxi qhamo miʼaadhe haayyu an cʼikadhi kula an hune kodhipa isan hune dhihama dhiishay huneesi palamisenu qandhi.
15 Kolisampawhe 10,000 kula ghaqiti kakki Akkristoosettay sheeghte payni kapay appadhdhe he kishaasi hune sheeghte,
naqharray ano wonkele Iyyesus Kristoosettakki an hune dhali.
16 Hussa maallay qhama yeesi lighintenu an hune waathadha.
17 Lammi hossi Pogholhottay cʼikathamipa isi dhukkaythasama miʼaye haayyu Tʼimothoosesi hussa maallakki an hune eraki;
uso Mannaadhdhe Kristaana xayto kaasay qaghaasi olho kolinkkossi an kollisi qale ghera ashshankkosi haayyu qagho Iyyesusi Kristoose qale qaghaasikki hune arasni.
18 Hunena kittatte tookke tookke ho anu hune kula okaynikki nu lightipa isi he peepa.
19 Ikkodhdhitama woʼoko Poghollhito kodhdhiti payni awannapa karo haahundhi okaypa pepolawhisana qalliite thuusundhi patta ye kodhdhunna qhamu humna mala ghaqqi sheegheesikki an hiʼe woʼi.
20 Moʼo maalla payni Ahxase Haallikkito qalite qandhimma humna Haallikkito.
21 Emma mawoote?
Thoolakko an ghapannipa okaya?
Taakinti nasso cʼiknitopa ho horxuntettakki an okayni?