Ille Qhoqhoote Koro Dhukkayisadha Manne K’oronthoosena
3
Koro hayyu,
hune Kristoosettay haannay qhoota miʼaadhe kodhdhite maallay,
qhamo koro ye Nassotty bhahxu kula dhiishoy koro nassottay bhahxi kula hune qalle anu alkasu.
2 Haannay qhoota huni Nassotta dhikkitonku maallay orhxe dhiishoy yiʼo dhikita anu hune yiʼashni.
Hantukka payni huni taamonkuy.
3 Hantukka hune Nassottay huni bhahxonku,
hunena kittatte dharraʼopa ille tamakadhe qagha,
emma hussa nasstotta qhamu huni bhahxonkunkukki hiʼaasi qandhi?
Kodhmo haahundhikka qhamo korossi ye Haallikko dhukkaysadhi kula qandhi?
4 Moʼo maala payni hunena kittatte qhawho tooko paya:
“Ano ho Pawlooe” tookokka isi paya:
“Ano ho Appiloose” payni hussa qhamo korossi ye Haallikko dhukkaysadhi kula payyo qandhi?
5 Emma Appiloose yahxa?
Pawloosekka yahxa?
Usundhe kodhampawhe pukkaqatte pukkaqatte kodhmo Pogholihonu tehxisi kodha,
hunekka ho akaro dhukkayisadhe kula okayte usundhettay.
6 Ano an dhishshi,
Appiloosekka qandhi qukisi,
ho ghohisi kapay Haallikko.
7 Huusa malla ho ghoohisa Haallikko dhiishay ho dhishshikka ikkodhdha ho qandhe qukisa lathu.
8 Ho dhishshipa ho qukisa toʼoke,
qhawho kaasay qhamo kodhmo huusu kula ghaqqikki hxaayye akkanni.
9 Hussa maallay ine he Haallikko qale kodhmo kodha,
hunekka pasho Haallikkitopa manne Haallikkito.
10 Teexakko Haallikkito kaanta ye teexami kula ghaqiti,
qhamo qhawho hayyitto manne ghupe ara kulaki an kiriththo xawwadhi,
qhawho pillekka kiriththussa sappeemi ighghupanni,
naqharray qhawho kaasay malaala qhamu ghupanisa ihhe tiqitadhe.
11 Moʼo maala payni kiriththussa athoʼona xawwadhi malettay yaxakka ho kiriththo pille xawana ye qaghi,
kiriththusakka Iyyesus Kristoose.
12 Yaxakka kiriththusasa werkʼe taakkinti sipilho pirre ana payi taakkinti awrughghe kaanasame taakkinti kaare taakkinti kampelo taakkinti kartale inna ghupadhi payni;
13 kodhmo huusu ho mala qhamu kodhdhisa iʼemmamina,
moʼo maalla payni kuyyaqakussa karo hammakkito iʼokaasni.
Haththettay qhooti emmamini maallay kodhmo qhawho kaasanna iththemmamina.
14 Yaxakka maanisa ighghupadhikki nu dhikiti payni hxaayye huususi iʼakkanna.
15 Qhawho kodhmo huusu na shaʼi kapay hxaayye huusu inna haqhna,
uso kapay idhdhinna,
ikkodhdhitama kapay dhinko huusu qhamo qhawho hatteʼitha raakkotta lighghi kula.
16 Hune qhama manne Haallikkito kʼulikʼulawhe kodhdhiteppa Nasso Haallikkitokka isi hunena kittatte qaakasa huni artte?
17 Yaxakkaki maanne Haallikkitoosii pulla payni,
Haallikko iʼuso pulla,
maanne Haallikkito he kʼulikʼullawe,
maannisakka huune.
18 Yaxakka ippukkaqhte thuusu tatake hxura,
hunena kittatte yaxakka ho arnane piyinna sheeghaki nu lighti payni arnanampakko kodhdhenu ippukaqhate thuusuusi qhamo qeepakito dhihi.
19 Arnane piyinna Haallikkito miinatte qeepunte,
hussa maalla hasi payamtipa tooxamoy:
“Uso arnanampawhessi dhohumunte thuusundhitakki ghapni.”a
20 Xayiito pileetekka hasi payamtipa tooxamoy “Pogholho dhihadhe arnanampawhatte the lathu qhamu kodhdhitsa iʼara.b”
21 Huusa maallay yaxakka inni qhawhottay he peepu,
olho kaasay haahundhiye.
22 Pawloosekka ikkodhdha,
Appiloosekka ikkodhdha,
Kefakka ikkodhdha,
piyye qhaatʼekka ikkodhdhita,
qaghe taakkinti farttekka ikkodhdhita,
hossi hantu qaghakka ikkodhdha ho karo miinatte okayina kaasay haahundhi;
23 Huneka he Kristoose,
Kristoosekka ho Haallikkito.