Qhoota Kristoosessi Maskʼalaama Dhisami Kollise
2
Koro haayyu,
xinkessi an hune kula okayina qhoota Haallikkito qalliithe dhikita taakkinti arnane uuma ghulattay hune qallenu anu okayu.
2 Hussa maallay xinkesi an hune qale qaghina Iyyesus Kristoosesi maskʼalaama dhisami thorruye malettay olho pile qhamu anu arrisa an qhutʼadhi ahxay.
3 Xinkesi an hune qale qaghina tardhinkopa ghaapko holuppa xotholho dhammattakki an hune qale kodhdhi.
4 Kʼaale an qallipa thorre haayyukka humna Nasso Haallikkitoottay dhishay arnanepa qallithe koro marisattay qandhdhikka.
5 Hussaka dhukkaysadhe thaahundhi humna Haallikkitottay dhiishay arnane koritottay qhamu ye kodhdhintinnu.
Arnane Haallikkito
6 Naqharay he qagho nassawnkitottay bhahxennu arnanettakki an qallanaani,
ikkodhdhitama kapay arnane perrinna taakkiti hessi dhikkatte thuusundhi patitte kodhiniti qhaatʼe rafisana arnane huusundhi qandhikka.
7 Naqharray ine ho an qallini arnanessi xashshatte Haallikkitona bhadhdhame,
perre qharaʼithana kaanaste thaaninu Haallikko gharisipa mughu arnane Haallikkito.
8 Rafisampawhe piyyina qhawho toʼokoka ho arnaniaasi upadhi ye qaghi,
iʼupadhe payni Pogholho kaanasamiisi maskʼalaama ye dhisonki.
9 Ikkodhdhitama kapay qhamu haasa payamtipa tooxamo kula:
“Ho ehxte qhawhito ye hiʼu,
Ho qhaamte qhawhito ye apaqhu
saqako qhawhito ye dhihadhu
Haallikko hessi cʼikadhinu ighgharisia.”
10 Naqharray Haallikko hussaasi Nasso huusutakki ineesi armateesi,
Nassusakka arno Haallikkito olo arripa ana hxafosikkaki ye haqhuna olho kaasasi qhothusadhi.
11 Nasso huusu usona kittatte qagha malettay dhihatoote qhawhitoosi ho arra yaxa?
Qhamusa kula Nasso Haallikkito malettay ho dhihatoote Haallikkito arra ye qaghi.
12 Olho Haallikko hasa ine teexi qhama arraninu Nasso Haallikkito dhiishay nasso piyyina ini akkadhooni.
13 Hussa maallay ine olho nassawinkitoosi hani koro nassawinkitoosi kollsini arnanesi an korito tayanittay qandhimma arnanessi Nasso Haallikkitona tayamattay.
14 Qhawho nassawitho ye kodhdhu olho Nasso Haallikkitona kodhdhiisi akkadhe ye alkasni,
moʼo malla payni olho hasa ligha usoosi qeepunte,
uso ho Nasso Haallikkitoottay qhoththusama qhooti kodhdhinu upadhe ye alkasni.
15 Qhawho nassawiththo kapay olho kaasasikki qhoththosadhi,
uso kapay yaxattakka ye qhoththusami.
16 Hussakka qhamu hasa payamtipa tooxamo kula:
“Yaxa saqko Pokolhito are alkasna?
Ho Usoosi dhihamna yaxa?”b
Naqharray ine saqko Kristosekka an sheeghni.