Erko Erkampakko Pawloose Payyootatte Koro Kathama Kʼorontoosennu
1
Ano Pawloosessi woʼoko Haallikkitottay erkampakko Iyyesus Kristoose kodhdhenu ooqamipa qhawho haani Sostinese.
2 Hune hessi Iyyesus Kristosettay kʼulkʼulaweteppa kʼulkʼulawehe kodhenu ooqamanku toʼokunkossi koro dhukkaysadha katama Kʼoronthosenna qaghananu,
holluppa he xayito kaasay hosi usundheesippa inesi Pogholho koodhdhi Iyyesus Kristoosena makaxko huusu ooqa kaasannu.
3 Paappo haani Haallikkopa Pogholho haani Iyyesus Kristoosena kaanta faroote xeesapa (teexakko Haallikkitopa) nakayho ihhune kodhdha.
4 Qhoota teexakkossi Haallikkito Iyyesus Kristoosettay ahune teexi maallay kuyyaqako kaasay qhoota haahundhinu Haallikkosi an kalatayisadha.
5-6 Kʼalessi qhoota Kristoose an hune qalli qhamu hune kiitta kokisattisa olho kaasattay qalithe arnaanetepa arno kaasattay Usottay aghghohte.
7 Hussa maallay okaye Pogholho haani Iyyesus Kristoosesi ayorkottay tiqithadhankuna teexakko nassawnkito hunkakki payni ye hunena erqini.
8 Kuyyaqako okaaye Pogholho haani Iyyesus Kristoosena meethe male qhama kodhdhintenu Uso haka dhikkatte saasa ihune dhiktisnapa hune tiqadhoy.
9 Ho karo toʼokunko Miʼaye huusu Pogholho haani Iyyesus Kristoose kula hune ooqi Haallikko ho dhukkayisathami.
Ille Qhoqhote Koro Dhukkkaysadhana
10 Koro haayyu,
hunena kittatte ille qhoqhoote qhamu ye qaghintinu,
saqko toʼokopa dhihadhe tootte qhama sheeghinteppa pukkaqte pukkaqte illa gherankunnu makaxko Pogholho haani Iyyesus Kristoosettay an hune waathadha.
11 Koro haayyu,
hunena kittatte ille thamakkadhe qhamu qaghtisa ahxke Kʼeloʼenakki an apaqhi;
12 husaka hunena kitatte qhawho tooko ippaya:
“Ano ho Pawloose” tooko ippaya:
“Ano ho Appiloose” tookoka ippaya:
“Ano ho Kefay” holuppa tookko ippaya:
“Ano ho Kristoose.”
13 Emma kenni Kristoose iqhqhoqhqhotami?
Pawloose ihhune maallay dhisami inta?
Taakki makaxko Pawloosetakki ashoxattey?
14 Ano Kʼerspoosepa Kayiyoose malettay hunena kittate yaxasikka qhoota anu shoxatte shoxu maallay Haallikkoosi an kalataysadha.
15 Hussa maallay qhawho qhamu makaxko hayyuttay shoxadhisa qallina ye qaghi.
16 Duke karay ahxke Istʼfanoseesi ano shoxatte shoxi,
usundhe malettay koro pileesi qhama shoxatte shoxisa anu hela sheeghi.
17 Kristoose olhunna maallay ye eraki qhama wonkele qallininu dhiishay shoxatte shoxenu qandhikka,
dhisame Kristoose the lathu qhamu ye kodhdhintinnu arnane koro qalladhittay anu thorruyni.
Kristoose Arnanepa Humna Haallikkito
18 Kʼaale maskalay he pananu qeepunte,
naqharray ine he dhinnanu humna Haallikkito;
19 hasi payamtipa tooxamoy:
“Arnanampawhatte arnane huusundhi anna patisna,
arnampawhatekka arno huusundhi ho taytekka an koni.a”
20 Arnanampakko ahaati qaghi?
Ho arno ghula sheeghakka ahaati qaghi?
Hossi perinna olo qhotusadha ahaati qaghi?
Haallikko arnane piyyina qeepunte ye kodhu inta?
21 Koro piyyinna arnane huusundhittay qhamu ye Haallikko arrinu Haallikko arnane huusuttay inna kʼuppi,
naqharray wonkelesi ine thoruyni aqhamo qeepuntatte dhihi he dhukkaysadheesi dhinisenu woʼoko Haallikkito ikkodhdhi.
22 Karay koro Ayhutate dhahxhxoti hiʼe woʼi,
koro Krikattekka arnani gheeqi.
23 Ine kapay Kristoosesi maskʼalaama dhisamsikki an thorruyni,
hussakka koro Ayhutattenu kuthumatte,
koro ye koro Ayyhudhatte kodhdhunnu qeepunte.
24 Naqharray hessi Haallikko ooqinu koro Ayhutattekka ikkodhdha,
koro Krikattenukka Kristoose humna Haallikkitopa arnane Haallikkito.
25 Moʼo maalla payni arnane qhawhitona kaanta qeepunte Haallikkito ighghulay,
dhikitno qhawhitona kaanta malaale Haallikkito idhdhikktay.
26 Koro haayyu,
xinkesi Haallikko hune ooqina he malay qhama kodhdhitessa hela thaaya.
Qhamo dhihadhe qhawhito kula hunena kittatte he kisha arnanapawhe taakinti kanoomo taakinti poghulaadhdhe ye oqamonki.
27 Naqharray Haallikko arnanampawhe palamisenu koro piyyinna aqeepawhe kula dhihisikki qholadhi,
Haallikko he dhikitoomaasi palamisenu hessi piyyinna he malale kula adhihisikki qholadhi.
28 Haallikko piyyinna olho korito miinatte kaanasamiisi ho lathu kodhenu hossi piyyinna qhacʼa adhafipa xaytokka olho nu teexisikki qholladhdhi;
29 hussakka yaxakka qhamu Haallikko minta yehe pepninnu.
30 Naqharray Haallikko qhama Iyyesus Kristoose qale toʼokunko sheeghintenukki hune kodhi,
husa maallay Uso Haallikkito kaanta ineesi;
arnane haanipa,
pare qaghunko haanipa kʼulkʼullunko haani pana dhinko haani kodhdhi.
31 Lammi qhamu hasa payamtipa tooxamo kula:
“Qhawho peepadha Ihhaallikkottay peepadha.”b