Teexakidhdhe Nasso Kʼulkʼullito
12
Koro haayyu,
hantukka qhoota teexakidhdhe Nasso Kʼulkʼullito qhama artekka woʼi.
2 Xinkessi huni Haallikko dhukkayisatenna hakoruppa haʼita yoqhadhettay qhama karo killankkidhdhessi ye qalladhe kula akkamttesa aʼaranku.
3 Hussa maallay yaxakka ho Nasso Haallikkittottay qalladhapa isi “Iyyesuse ho qhiicʼami” payna yeqaghi,
qhamussa kula Nasso Kʼulikʼullottakki ye kodhdhu payni yaxakka ho “Iyyesuse Poghollho!”
payna qhama ye qaghisa an hune qalla.
4 Teexakidhdhe he qawni qawni Nasso Kʼulkʼullo kapay toʼokko,
5 kodhmo Poghollhito ho qawni qawni Pogholho kapay toʼokko.
6 Kodhathame the qawni qawni naqharray ho olho kaasasi koro kaasattay kodhadha Haallikko toʼokko.
7 Naqharray Haallikko hu Nasso Kʼulkʼulloosi arase qhawho kaasannu teexi qhamu koro kaasannu pakriko kodhininu.
8 Qhawho tookkonu Nasso arnanettay qalladhe innu teexi,
qhawho pilenukka Nassusasa arnottay qalladhdhe innu teexi,
9 qhawho tookkonu Nassussa dhukkaysadhdhe innu teexi,
tookkonukka Nassussa teexakko dhinnisatte innu teexi,
10 tookkonu dhahxoote kodhe,
qhawho pilenu hxuuma qalladhdhe,
holuppa tookonu nassidhdhe maghasi reehe,
tookkonu pako piletta qalladhe,
tookonukka olhosi apako pilettay aqalladhiisi ishshighe innu teexi.
11 Usundhissa kaasay teexakaane Nasso toʼokussana,
qhawho kaasanu qhamo woʼo Huusu kulakki Innu theexi.
Pishko Toʼokito Melle Kisha Qhamu Qaghe
12 Pishkko toʼokkitto melle kishakki qagha payni uso kapay toʼokko,
naqharray melle he kisha ikkodhdhekka payni pishko toʼoko,
holluppa Kristoosekka qhamussa kula.
13 Koro Ayhudhatte taakki koro Krikkattekka an kodhdhina,
ayilladhe taakki koro hasa lighi an kodhdhinekka payni ine kaassay pishkko toʼokko qhama kodhdhinaninu Nasso toʼokotakki an shoxatte shoxanni,
ine kaasay qhama Nasso toʼokko quknenukki aʼine teexi.
14 Pishko meelle kishanakki kodhdhami dhiishay meelho toʼokkito qandhi.
15 Luhte paynana:
“Xarghgho qhoota anu kodhdhu mallay ano meelho pishkkito qandhi” payni hasa payettay meelho pishkkito kodhdhe inna haqhna?
16 Qhaamtekka ippaynay:
“Qhoota anu ehxtte kodhdhu maalla ano meeliho pishkkito qandhi” payni hasa payettay meelho pishkito kodhdhe inna haqhna?
17 Pishko kaasakki ehxxe kodhdhi payni mootakki aʼapaqhni ahxay?
Pishko kaasakki qhaame kodhdhi payni mootakki aʼoshoqsanni ahxay?
18 Naqharray Haallikko qhamu woʼi kula meelle kaasasi pishkito xayto uso woʼi samakki kodhdhi.
19 Meelle kaasakki meelho toʼokko kodhdhina payni pishko iqaghina ahxay?
20 Lammi meelle he kisha,
pishko kapay toʼokko.
21 Ehxxte,
xarghito “Athu ye gheeqasit” napaye ye alkasnti,
pukkaqatekka luhhtatte “Athu ye gheeqastti” napaye ye alkasnti.
22 Ladhdhi meelle pishkito heye dhikite lighooma uuma ighgheeqase.
23 Meelle pishko haanina he dhafame lighanu kaanastte dhammakki annu teexne,
holuppa meelle he ine palamisa lighoomaasi uuma an pankanni,
24 Naqharray meelle ye ini palamiseesi kapay husi ye gheqaasi,
naqharray Haallikko meelle pishkito xayto toʼokkomakki illa ghapsiisipa hessi kaanaste naqhacʼtiisi ghulasuppa kaanaste nu teexu,
25 hu hasa kodhikka meelle pishkito kitatte qaghana ille qhoqhoote qhamu ye qaghintippa pukkaqatte pukkaqatte qhamu ille dhihanenu.
26 Meelho tookko qootʼoodha payni meelle kaasay inna qale qootʼuyamna,
meelho tookko kanasamna payni meelle tookekka inna qale hxasonna.
27 Lammi hunekka pishko Kristoose,
hune pukkaqte pukkaqte meelle pishko Huusuna.
28 Haallikko koro dhukkaysadhana kittatte paayotatte erkampawheesi,
laankana hxumampawhe,
isxana kollisampawhe,
nakalakka he dhahxoote kodhasi,
he teexakko dhinsatte sheeghasi,
he teexakko koro kʼarkʼaaratte sheeghaasi,
he teexakko koro rafisatte sheeghasi,
he pako pile piletta qalladhatte teexakko sheeghasikki xawadhhi.
29 Emma hissa kaasay erkampawhe?
Emma hissa kaasay hxuumampawhe?
Emma hissa kaasay kollisampawhe?
Emma hissa kaasay he dhahxote kodha?
30 Emma hissa kaasay he teexakko dhiniisatteesi sheegha?
Emma hissa kaasay he pako pile pilettay qalladha?
Usundhe kaasay he ishshigha?
31 Naqharray teexakkossi ho kaasana ghulaasi kokisapa gheeqanku,
holuppa onkesi kaasanna ghulasikki an hune hiʼaasni.