Qhawho Haallikkonu Kodhadha Qhamu Mala Qaake Uso Gheqasti
12
Lammi koro haayyu,
pishkko haahundhi ho kʼulkʼulaawipa ho Haallikkosi hxaasesapa teexakko qagho sheegha qhama konteppa itʼtʼoosankunnu horxunte Haallikkitottakki an hune waatadhi;
husakka qhamo qhawho kʼalpe sheegha kula Haallikkonu kodhadhe.
2 Woʼoko Haallikkito xeesapa,
isi koro hxaaseesapa isi ye meethe sheeghi moʼo qhamu kodhdhi themmepa arenu kʼalpe thaahundhi qhawthumettay iʼoohamta dhiishay piyye qhaatʼisi olo lighi.
3 Dhukkaysadhe Haallikko hune kaasannu teexittay pukkaqate thaahundhiisi paareema hibhbhadha dhishay ho akkottenna ghutay pukkaqe thaahundhiisi qhamu huni naqisinteppa he dhihonkonnuy teexakkossi aye teexittay huune kaasasi an dhihama.
4 Ine kaasay pishko haaniina meele kisha qhamu qaghe kula,
kodhmo meellisanakka toʼokko qhamu ye kodhdhu kula,
5 laadhdhi he kisha an kodhdhininna Kristoosettay ine pishko toʼokko.
Qhaman meele pishko toʼokito kodhine kula pukkaqate pukkaqatenu ine meelho pishko qhawho toʼokitona.
6 Qhamo teexakko Haallikko ine teexi kula teexakko qawni qawnikki an sheeghni.
Qhawho tookonu teexakko hxuuma qalladhatte nu teexami payni qhamo dhukkaysadhe thuusu kula iʼqalladha.
7 Kodhmu kodhi payni ikkodhadha;
kollise payni ikkollisa;
8 koro dhihame payni idhdhihama;
koro pilenu teexe payni ihxasottay teexa;
rafise payni ikkokisadhettay rafisa;
hxurakko hxure payni ihxhxasottay hxura.
9 Cʼikno haahundhi he pasese male ikkodha.
Olho magha kaasasi hela shikkindha,
olho xeesa qale kodhdha.
10 Qhamo miʼaadhe appa toʼokito kula ille cʼikadhindha,
uuma ille kaanasa.
11 Dhikitnottay kodhmo kodhapa olo dhaashalaqhumi,
he Nasso Kʼulkʼulottay shaʼa kodhdha,
Pogholhonu kodhadha.
12 Kippottay hxasodhindha;
rakkito dhuupadha;
hxinke kaasay ghissadha.
13 Kʼulkʼulawhesi olho usudhe gheqasattay kʼarkʼara,
hayhittoosikka akkadha.
14 He hune ghoghoranu sakindha!
Nu sakindha dhiishay olo qhiicʼe.
15 He hxasoodha qale hxasodhindha,
he ooya qalekka ooyindha.
16 Pukkaqatte pukkaqatte ille xulettay qaakindha.
Heghulasatte kaanta pepposi hela patisapa he teekuntettay qaaka qale toʼokunkottay qaakonku,
ine arnanampawhe olo paye.
17 Yaxanukka maghno kapa maghno olonu holase.
Koro kaasanna miinate olho xeesa kodha.
18 Ihune alkasamti payni karo haahundhittay koro kaasay qale nakayyhottay qaakindha
19 Dhaliththo haayyu,
miirasi Haallikkonu hxura dhishay hune olo haalo holase,
moʼo maalla payni Haallikko hasi payikki payamtipa tooxamoy “Haalo Hayyu,
ho pasante haalitosikka holasna Ano”a
20 Laadhdhi:
“Paarakara haahu puffi payni yiʼasha,
Idhdheepoodhikka payni qukis,
hussasikka kotti payni porhxo haththatte anna hoghti.”b
21 Maghnoosi xeesnottay put dhiishoy maghnottay olo putami.