Haallikko Israeelesi Miinakale Ye hxuru
11
Lammi Haallikko waarsho huususi ihxhxuri payyo?
Kampayipa isan kasqadha,
aʼa ye hxurukka!
Anoka pukkaqate thaayyuna Israeelito ho sanynye Aprihaamenna kodhdhi kafko Piniyaamenna,
2 Haallikko waarshosi huusu iqhqharaʼita inithoosipa qholadhuusi ye kʼurukka.
Eliyaase qhoota waarsho Israeelatte Haallikko miinta qhamu mala kisse itʼtʼoosisa,
Matʼaafa qhoota Eliyaase qhamu moʼo payesa huni arte?
3 “Haallikko haayyu,
hxumampawhe haahuusi ippaaxe,
xayto ana teexakko dhiliisikka ippule,
ano pattaki haqhi,
ye poghenukka isi ye gheeqa.”a
4 Haallikko kapay inna payi malapa nu holasu?
“He killankossi ana payi Paalenu ye sakatoonki qhawho 7000 ki an haqhsadhi.”b
5 Hantukka qhamussa kula he teexako Haallikkitottay qholameppa haqhonki he takkayaki qagha.
6 Lammi qhollame teexako Haallikkitotta payni kodhmotta qandhikka,
kodhmotta payni ahxay,
teexako Haallikkito olho lathukki kodhdhini.
7 Lammi husi moʼo?
Israeeladhdhe hossi gheeqesi ye tayadhonki,
hessi qholame kapay ittayadhe,
naqharray he haqhenna saqqe huusundhi inna lule.
8 Qhamu hasa payamtipa tooxamo kula:
“Ehxhxe huusundhi qhamu ye hiinenu,
qhaame huusundhikka qhamu ye apaqhnennu,
Haallikko haka hantu saasa
nasso usudhe fafisna innu teexi.”c
9 Taawitekka ippayi:
“Yiʼo huusunidhi ashkillapa siikkepana Kuttumatte iʼusundheema kodhdha,
maghno ikkodhekka iʼusundheema dhaghghapa.
10 Ehxhxe huusundhi qhamu ye hiinennu inna shudhame,
Kuudhadhdhe huusundhi kuyyaqqe kaasay inna konnoose.d”
Dhinko Koro Ye Koro Ayhudhatte Kodhdhunna
11 Into an kasqadha,
koro Ayhudhatte haki laanka ye haqe alkasni saasa rani?
Hasa qandhikka!
Laadhdhi usundhe yokisenukki dhapite thuusundhina payatti dhinko koro ye koro Ayhudhatte kodhunu okayi.
12 Naqharray dhappitte thuusundhiki piyye qhaatʼenu sake kodhdhi payni,
rane huusundhikka koro ye koro Ayihudhatte kodhdhunnu sake kodhdhonki payni,
koro Ayhudhatte dhini payni ahxay sakissa he mala ghaqitkki kodhdhine?
13 Hune he koro Ayihudhatte huni kodhdhonku,
an hune qalla,
qhamo an erkampakko koro ye koro Ayihudhatte kodhdhuna kodhdhi kula kodhmo haayyuusi kokisadhetakki an konni.
14 Husakka olhanna maallay kippo kodhi he dhaliththo haayyu kodhdhe qhamu yoknennuki an haqissisipa usundhena kittate he takkayya naʼaka dhinonkinu.
15 Hxurame thuusundhikki piyye qhaatʼenu araranko tayasi payni,
Haalliko kula hole huusundhi qhamo fartatte haqe kula ye kodhdhini!
16 Maangho awshinaki aqharo akkipa Haallikkonu itʼtʼoosu payni maangho haqhi kaasay ho kʼulkʼullawi,e
xisse kaarkito he kʼulkʼullawe payni tʼanne huusukka he kʼulkʼullaawe.
17 Korossi Ayhudhatte qhamo tʼanne ekertakko lammito qaghana kula kodhdhi tʼannissa inna ghoghodhameppa hune hissi qhamo tʼanne ekertako mandhitona kula kodhdhite kapa xayto huusundhisa kodhdhankuppa sake huusundhiisi qhottadhdhanku payni;
18 hune he koro Ayhudhatte huni kodhdhonku korossi Ayhudhatte qhamo tʼannete ghoghodhamenu olo he peepe,
appeppoonnaku payni kapay hune qhoota tʼanne kodhdhite mallay patta xisissaki hune dhooqha dhishay hune qhamu huni xisse dhoqhtesa hela taaya.
19 Lammi:
“Tʼannissa hu ghoghondhame qhamu ano xullininukka” payti yaxaaray.
20 Pare,
usundhe hu ghoghondhame qhooti ye dhukkaysandhonki mallay,
Atokka dhukkaysadhettakki ashshikaarti,
ghaapa dhishay olo he peepi.
21 Haallikko hessi iʼuumamana tʼanne kodhdheesi kakki ye qhararsadhu payni,
hoosikka yeho qharaarsanni.
22 Lammi hoxorxuntepa shahxunte Haallikkitoosi eema,
shahxunte Thuusu he rane saama,
horxunte Thuusu kapay haka horxunte Thuusuna kittatte aqaghti saasa patta,
hasaki ye kodhdhu payni athokka aghghoxamnay.
23 Koro Ayhudhatte ihholla dhukkaysadhu payni xayto huusundhi qharro kula ihholla,
Haallikko xayto huusundhi qharassa iʼusundhe holasna.
24 Hune he uumatana ekertakkosi mandhitona tʼanne kodhiteppa xayto haahundhi malettay ekertakkosi lammitosa dhishshamme alkasanku payni,
usundhi he uumathana ekertakkosi lammitona tʼanne kodhdhe koro Ayhudhatte malakki xayto huusundhi qharrosa holepa dhishshamme ye alkanne.
Israeladhdhe Kaasay Idhdhinne
25 Koro haayyu,
hune he taayho sheegha inni hune lighu,
ollho bhadhdhamisi huni aronkunna qhama haqhte anu woʼi,
eeʼe paye hxure koro Ayhudhattena dhihakko koro ye koro Ayudhatte kodhdhu haka hoqhini saasa dhiishay dhikkatte saasa qandhikka.
26 Hussa mallay Israʼeele kaasay idhdhinnay,
qhamu hasa payamitipa atooxo kula:
“Dhinisampakko Tʼiyyoonenukki lighni
sanynye Yaykʼoopenakka maghno patisu.”f
27 “Xinke annu cʼuppo huusundhiisi hxurina,
katape anna qale xulli tisi.”g
28 Qhoota Wonkelatte usundhe hune maallay parkaraadhdhe,
qholame kaakoru kapay,
qhoota appadhdhete mallay usundhe he cʼikatame.
29 Haallikko iqhqholadhipa teexako Huusu teexu tupettay olhu kodhittay dhihattoote Thuusu ye oohi.
30 Hunekka xhayna qharaʼita he Haallikkonu huni eeʼe payte ahxay,
haantu kapay koro Ayhudhatte qhooti ye eeʼe payu maallay hune hxurakko Haallikkito attayatte.
31 Qhamusa hune hxurakko tayatte kula,
usundhekka qhamu hxurakko tayanennu hantu he Haallikkonu ye eeʼe payekki kodhdhe.
32 Haallikko hxurakko huusuusi qhamu konninu koro kaasay ye eeʼe payu maallay ikʼupi.
33 Haallikkito arnopa arnaane shorokunko Huusuna he mala dhamma!
Qhaqhitte Thuusu olo qhooththosadhi,
Onkaadhdhe huusukka ye arame.
34 “Ho saqko Haallikkitoosi ara yaxa?
Ho Uso dhihamakka yaxa?”h
35 “Haallikko qhamunu holasininu,
ho Haallikkonu pasani yaxa?”i
36 Olho kaasay Usona,
Usottay,
Usosi mallay,
kaanastte perre ye hume sheeghena Innu kodhdhe.
Amen!