10
Koro haayyu,
woʼoko saqko haayuna qaghapa isan Haallikko waathadha,
koro Israʼeelatte qhamu dhinninu.
2 He qhoota Haallikkito yookunte xeesa sheegha qhamu kodhdhessa anokka qhoota huusundhi masakare an alkasna,
yookkunte thuusundhi kapay te arnito qandhikka.
3 Pare qaghunkossi Haallikkito kaanta okaynaasi qhooti yearonkippa pare qaghunko huusundhiisi isi kodhe woʼa maallay,
pare qaghunko Haallikkitonu ye eeʼe payonki.
4 Moʼo maalla he dhukkaysadha kaasannu pare qaghunko qhamu kodhdhininu Kristoose Hikkeesi dhikkisi.
Dinko Koro Kaasannu
5 Muuse pare qaghunkossi Hikkettay tayamaasi iqqallana hasi payi:
“Qhawho olho Hikke paytiisi kodha isettakki qaakni.”a
6 Pare qaghunkossi dhukkaysadhatte kapay hasi payi:
“Saqko haahuttayb ‹Yaxa karo montito hadhdhina?›”
cOlo payi,
husa Kristooseesi oodhdhasenu.
7 Taakki “Yaxa karo hawuleete oodhdhina?”
dOlo payi,
husakka Kristoosesi he farrenna kitatte lihasenuye.
8 Holuppa hasi payamtipa tooxamoy:
“Kʼaale Haallikkito hola kaanta,
pakopa saqko haahuna kittatte”e Kʼaalesi dhukkaysadhettay an thorruyni haadhi thisi
9 “Iyyesuse Pogholho” appaytipa pako haahuttay masakara payni,
Haallikkokka qhamu farttatte Uso haqisisa saqko haahuttay dhukkaysadha payni adhdhinnay.
10 Ha pare qaghintikka saqako haahuttakki adhdhukkaysatti qhari,
ha dhintikka pako haahuttakki ammasakarti qhari.
11 Matʼaafa qhamu qalli kula:
“Ho Uso dhukkaysadha kaasay ye palamni.”f
12 Koro Ayhudhattepa koro ye koro Ayhudhatte kodhdhunna kittatte ille reehe ye qaghe,
Pogholho toʼokusa Pogholho kaasanna,
he Uso waatadha kaasasi uumatekki sakni
13 “Ho makaxkko Haallikkito ooqa kaasay idhdhinna.” g
14 Lammi huyye dhukkaysadhonkiisi mali ooqone?
Qhoota huusu ye apaqhonkinna mali dhukkaysanne?
Qhawho nu wonkele qallina ye qaghina mali apaqhe alkasne?
15 Olo usundhe erakunna mali qalle alkasne?
Hussakka:
“Okaye koro ote xeesa thorruyana the mala koro hxaseesa!”
Qhamu payamtipa tooxamo kula.h
16 Naqharray he otissa xeesa apaqhe kaasay ye akkadhonki,
Issayaasekka ippayi:
“Haallikko haayyu,
erkko haaniisi yaxa dhukkaysadhi?”i
17 Laami dhukkaysadhe hu tayamti erkkussa apaqhettay,
erkkussakka kʼaale Kristoosena.
18 Into an kasqadha,
kʼaalessi ye apaqhonki payyo kati?
Karay iʼapaqhe:
“Ikkitto huusundhi piyye kaasakki qhaskadhi,
kʼaale thuusundhikka piyye qhatʼe kaasakki qhaskatti.” j
19 Anna hollapa kasqadha,
Israeele ye hela thaayu perinna?
payyootatte Muuse hasi payi:
“Heye waarsho haayyu kodhdhonkitakki an usundhe yookisni,
waarsho hoye thaayho sheeghitakki an usundhe miiresni” k
20 Hxuumapakko Issayaasekka shahxumtettaki hasa payi:
“He ye ye gheeqonkinukki an tayami,
he ye ye kasqadhokinukki an pukkaqate taayyu hiʼaasi.” l
21 Qhoota Israʼeelatte kapay iʼiyyana:
“Warshossi ye hayo haayyu akkadhipa ye eeʼe payi,
kulakki an kuyyaqako kaasay xarghghe haayyu ghapadhi.” m