Haallikko Waarsho Israʼeelatte Qholladhdhi
9
Kristoosetakki an kodhdhipa isan dhuke qalladha dhiishay anu ayyoodhi kʼalpe thaayyukka Nasso Kʼulkʼllottakki ye qaliti.
2 Azane dhammappa shoxxase ye qhutʼamtikki saqko hayyuna qagha.
3 Hussa maallay he dhalitto haayu kodhdhe qhoota koro haayyu maallay ho qhiicʼamipa Kristoosena kalla reehamapa kʼurama kakki an kodhdhe woʼi ahxay.
4 Usundhisakka waarsho Israeelatte,
miʼaye kodhdhepa kaanastte Haallikunkitopa katapepa hikke akkadhepa kodhmosi Manne Kʼulkʼulawhattenapa kʼaalessi kippitokka thuusundhi,
5 appadhdhekka huusundhi,
sanitte sanynye dhalatha Kristoosekka hudhihamti usundhena;
Usokka ho kaasanna ghutay kodhdhi Haallikko perre ye hume sheeghe saasa ho kaanasami,
amen!
6 Naqharray Kʼaale Haallikkito ihaqhti payyo qandhikka,
moʼo maalla payni qhawho Israeelatte dhaladhi kaasay Israeelitto qandhi.
7 Qhooti sanynye Aprihamenna kodhdhe mallay,
usundhe kaasay miʼaadhe huusu qandhikka,
laadhdhi qhamu hasa payamti kula:
“Sanynye thaahu Yisakʼettakki ho oqamnti.”a
8 Hussa payyo he miʼaadhe Haallikkito payame miʼaadhe sakankito qandhi,
naqharray he miʼaadhe Aprihaame payame miʼaadhessi kʼaale kippitona.
9 Hussakka:
“Perko qhamma xeeri kulana an holla okaya,
Saarakka shampo idhdhalinti.”b
Qhama payipa anu kʼaale kippito teexu kula.
10 Hussa patta ye kodhdhunna,
miʼaadhe Ripkʼay appa tookko sheeghe,
ususakka pappohaani Yisaakʼe.
11 Sallaxmessi hannay ye dhaladhonkinna taakinti xeesnopa maghnoosi ye kodhonkinna dhihadhe Haallikkito qhollamettay qhamu dhikitintinu,
12 Kodhomottay ye kodhdhunna ooqamethottay qhamu kodhdhisa:
“Qharunko qasonukki kodhanni”c apayipa anu qallu.
13 Hussakka:
“Yaykʼoopeesi an cʼikadhi Esawoosi kapay an shikki”d qhamu payamtipa tooxamo kula.
14 Lammi moʼo an paynaani?
Inta Haallikko illighghadha?
Yaxanukka ye lighghadhi!
15 Moʼo maallay payni Haallikko Muusena inna payi:
“Ho Annu hxure woʼinu annu hxurra,
ho an qhararsadhe woʼiisikka an qhararsanna.”e
16 Lammi qholadhe Haallikkito hutaymatti woʼoko qhawhitopa kodhmo qhawhitottay qandhimma hxurakko Haallikkitottay.
17 Hussa maallay Matʼaafa qhoota Fereoone ippayi:
“Humna haayyu qhamu hooma armannipa,
makaxko haayyukka piyye qhatʼe kaasay qhaskadhunukki anho haqisi.”f
18 Hussa mallay Haallikko qhawho innu hxurakko hxure woʼinu innu hxurra,
hu tiyyampakko kodhe woʼiisikka tiyampakko ikkonni.
Miira Haallikkitopa Hxurakko Huusu
19 Yexaaray hunena kittatte qhawho tookko hasi yela payni:
“Hasi kodhdhiti payni Haallikko moonukki haaka hantu saasa dhappite inena qalli?
Emma woʼoko huusuusi yaxana kohxhxe alkasna?”
20 Naqharray ho Haallikkonu malse teexa ato yaxa?
Qhawho sighghe dhoopa sighghisa idhdhoopi:
“Monukki ahhasa ye dhoopti” na paye iʼalkasna?
21 Qhawhosi sighghe dhoopa cʼoqhqholusa idhdhioopina maahxatho tookkoosi kaanasttenu tookkoosikka kodhmo lathunnu kodhe ye allkasni inta?
22 Haallikko miira Huususi hiʼaasenu,
humna Hususikka arasenukki woʼi payni maahxesi miira huusuna armanni,
hessi patitenu gharsamennu dhupadhu payininna?
23 Hessi inthoosipa kaanastte Thuusunu gharisu,
maahxesi hxurakko Huusu na arrmanni,
shorokunko kaanastte Thuusuna qhamu armaninu husiisi kodhu payninna?
24 Ine he maahxhxe huusu hxurakkito kodhdhini,
hu ine ooqi koro Ayhudhattena patta ye kodhdhunna koro ye koro Ayhudhatte kodhdhunakka.
25 Hxuumampakko Hosiʼe qhamu hasa payi kula:
“Heye waarsho haayyu kodhdhonkiisi ‹waarsho haayu› an paynipa isan ooqa,
theye cʼikatamusi the ‹cʼikathamti› an paynipa isan ooqa.” g
26 Holu:
“Xaytossi hune waarsho haayyu qanidhi,
ana payisama xaytusaasa,
‹miʼaadhe Haallikkossi qagho sheeghana› ana payipa isa ooqa.” h
27 Issayyaasekka qhoota Isiraaʼelette hasi paypa isi riira:
“Dhihakko miʼaadhe Israʼeletattena qhamo thaxakko pasito hinaaseete qagha kula innaqa kakki payni,
usundhissana kittatte kapay he pinne pattakki dhinna.
28 Pogholho qhaqhitte Thuusuusi toʼomalekki piyyeema waadhettay dhikkisni.”i
29 Hussakka qhamossi xayna qharaʼitha Issayyaase qalli kula:
“Pogholho,
kodhampawhattekki ye ine poodhaxo haqhasu payyni,
Setoome kulakki an kodhine,
Keemoorasikka lighooni ahxay.”j
30 Lammi moʼo an paynaani?
Pare qaghunkossi dhukkaysadhattesi,
hessi ye pare qaghunko gheeqonki koro ye koro Ayyhudhatte kodhdhukki tayaadhi.
31 Naqharray Israelaadhdhessi pare qaghunko Hikkatte gheeqe ye tayadhonki.
32 Husi moonukki hasa kodhdhi?
Dhukkaysadhettay qandhimma kodhmottakki adhdhinikki payeppa isi dhihadha maallay:
“Ikaxkossi koro kuthumattakki kuthumadhe.”k
33 Hussakka:
“Ikaxkko koro kuthumna,
awrukko simmikossi koro rannisana,
an Tʼiyoonema xawanni;
ho Usottay dhukkaysadha ye palamni”l qhamossi paymtipa tooxamoy kula.