Qagho Nasso Kʼulkʼulottay
8
Lammi he Iyyesuse Kristoosettay qaakana hantu kutunko yena qaghi.
2 Hikkesi Nasso Kʼulkʼullito qagho Iyyesus Kristoosettay tayama koro teexay hikke cʼuppitopa the fartatena hasi hune lihasti.
3 Hikke moʼunko malaale qhawhitona paayyatti olhossi kodhe ye alkasu Haallikko Miʼaye Huusuusi lighno qhawho cʼuppolakkitottay teexakko cʼuppito qhamu kodhdhininukki erakkipa dhikkisu.
Hussattakka cʼupposi sakanko huusuttay kutumuy.
4 Hussaka sakankottay qandhimma ine hessi Nasso Kʼulkʼullottay lalaaghamasa pare qaghunkosi Hikke kasqatti qhamu dhikaninu.
5 Moʼo mallay payni he qhamo sakankito qaaka saqqe huusundhiisi woʼoko sakankitosa ihxhxaysise;
he qhamo Nasso Kʼulkʼullito qaaka kapay saqqe huusundhiisi woʼoko Nasso Kʼulkullitosa ihxhxaysise,
6 olho sakankito dhihadhe fartte,
olho Nasso Kʼulkʼullito dhihadhe kapay qaghopa nakayho.
7 Moʼo maalla payni kʼalpe cʼupponu eeʼe paya Haallikko qale parakaritte;
Hikke Haallikkitonukka ye eeʼe payti,
eeʼe payekka ye alkasinti.
8 He sakankonu eeʼe paya Haallikkoosi hxaseese ye alkase.
9 Naqharray Nasso Haallikkito hunena kitatte qaaka payni woʼo Nassitottakki aqaakinte dhiishay ho sakankottay qandhikka.
Yaxakka Nasso Kristooseki ye sheeghi payni ho Kristoose qandhikka.
10 Naqharray Kristoose kitte thahundhina qagha payni,
pishkko haahundhdhi cʼuppito haqiti ho fari kodhdhi kakki payni,
Nasso haahunidhi pare qaghunkito haqiti ho qagho sheegha.
11 Nassosi Haallikkito Iyyesuseesi fartate haqisikki hunena kittatte qaaka payni,
hossi Kristoosesi he farrenna kittate haqisi,
Nassusa hunena kittatte qaakattay pishko haahundhi farinu qaghosiki teexxni.
12 Hussa mallay koro haayyu,
kitte inena qagha,
ikkodhdhitama kapay qhamo sakankito an qaakneenu ine he sakankito qandhdhikka.
13 Qhamo saakankito aqaakte payni affarrinaku,
naqharray kodhmoossi magha saakankitoosikki Anassoottay poghtte payni qaghottakka qaakte.
14 He Nasso Haallikkitoottay qaaka usundhisa miʼaadhe Haallikkito.
15 Hussa maallay:
“Nasso Appa,
Appa” an payneppa ooqanittay Nasso miʼayinkitoa an akkanni dhiishay ghaapkottay qaakenu laanka Nasso aylinkito huni akkadhonku.
16 Qhama miʼaadhe Haallikkito kodhdhinesa Nasso Haallikkito nasso haani qali kodhdhipa isi ine masakkara.
17 Lammi miʼaadhe Haallikkito an kodhdhini payni ine tayampawhe Huusu;
Kristoose qalekka an taynaani;
raako Kristoosekki an qhoottadhini payni hena qale kaanastte thuusu qhoottadhinakki an kodhdhinaani.
18 Hussa maallay rako xinki hantunna kaanasttesi karo miinate ineesi armanna qale ailla eema payni moʼo kakki qhamu ye kodhdhussa an dhihi.
19 Uumata kaasay armadhe miʼaadhe Haallikitonaki yorkko dhammattay tiqitadhi.
20 Umata kasaay olho taytenukki kodhdhi,
hussaka woʼoko husundhittay qandhimma qhamu kippottay tiqitannennu hossi huusundhi kodhdhina woʼoko husuna payyati.
21 Huusaka umata aylinkosi tayytenna hasa lighnipa,
karo kaanstessi hasa ligheete miʼaadhe Haallikkitonu gharsamitisa qhamu dhaghghapnennu.
22 Haaka hantu saasa uumata kaasay qootʼossi xeere qhuqhaytattena qagha kula riiratte qhamu qaghisa an araani.
23 Hussa patta ye kodhunna payyotatte ine he awshe Nasito taayani pukkaqte thaanina hossi pishkko haanisi pehisina miʼaadhe Haallikkito kodhdhe haanisi kittetanittay inna hihadhanina kippottay isa tiqqitadhani.
24 Kipputtakki an dhinni,
kippussakki ho arrmadha payni hussa kippo qandhi,
ho arrmadhaasi yaxa kippanna?
25 Naqharray ho hannay ini hioonisikki an kippanni payni dhupaytettakki an tiqithanaani.
26 Ladhdhi Nasso maalalle thaanina iʼine kʼarkʼara,
qhama mala ghisanekka ini arre,
Nasso Kʼulkʼullo kapay shaʼe olo qalle alkasnitakki qhoota haani waathadhi.
27 Ho saqko haaniisi maramara Uso,
dhihatoote Nassitosikka iʼara,
moʼo maalla payni Nasso qhamo woʼoko Haallikkito kula kʼulkʼulawhenu iwwaathadha.
28 He Haallikkoosi cʼikadhapa qhamo woʼoko huusu kula ooqamonkki olho kaasay xeesnonu qhamu nu kodhdhamanisa an araani.
29 Hussa maallay Haallikko hessi inthoosipa aroosi lighno Miʼaye Husuna qhamu lighnennu iʼinthoosipa puqasu,
hussakka koro dhammana kittatte qhamu qharito kodhdhininu.
30 Hessi inthoosipa puqasuusi iʼooqi,
hessi ooqiskka he pare qagha kodhu,
hessi he pare qagha kodhisikka kaanasu.
Cʼikino Haallikkito
31 Lammi oli maallay moʼo an paynaani?
Haallikko ine qale qagha payni yaxa ine toora?
32 Ho Miʼaye huusuusi ye qhararsadhu,
naqharray ine kaasa maallay likkasuppa teexu,
malakki Uso qale ollho kaasasi horxuntettay ye ine teexni?
33 He Haallikko qholadhiisi yaxa kasaasnna?
Ho he pare qagha kodhi Haallikkoye,
34 lammi ho usundhe kutumna yaxa?
Hossi faripa farttatte haqu,
xarghgho Haallikkitona miskitooma qakkadhu Iyyesus Kristoose qhoota haani mallay iwaathadha.
35 Lammi ho cʼikno Kristoosenna ine reehina yaxa?
Rakkom ata qootʼo,
ata ghoghorame,
ata laaqem,
ata urkuyte dhapem,
ata ghaapkom,
ata koorate?
Moʼokka ye ine rehini.
36 Hussakka qhamossi hasa payamtipa tooxamo kula:
“Qhoota haahu maallakki akuyyaqako kaasay ine paaxi,
qhamo qeemmessi asaqhqhini kula dhihamooni.”b
37 Husi kaasattay ho ine cʼikadhittay hessi puta kaasanna an ghulaani.
38 Husasi an upadhi,
farttekka ikkodhdhita qaghokka ikkodhdha,
erkampattekka ikkodhdhita,
rafisampawhekka ikkodhdhe,
ho qaghakka ikkodhdha ho haannay okaynaka ikkodhdha,
humna hunkakaki ikkodhdha,
39 sikaapno moonto qilakka ikkodhdha ho piyyekataka ikkodhdha,
uumata hunkakka cʼiknossi Haallikkito Pogholho haani Iyyesus Kiristoosettay qaghana ye ine reehe alkasni.