Hikkate Kalla Hasa Lighe
7
Koro haayyu,
koro hikke aranu an torruya,
hikke qhawho tookito sappeete hunna ghulno sheeghti iʼqaghottay qaghana patta qhamu kodhdhisa huni artte?
2 Lighnonu,
shette tootte te akkatti hu tʼiirakko hiisi qale te hikkettay shapamti kodhdhinti tʼirrakko hiisi haki qaghottay qaghi saasa patta,
naqharray tʼiirakussa hiisi fari payni hikke akkeetena kalla hasi ishghamti.
3 Naqharray tʼiirakko hiisi iqaghottay qaghanaki qhawho pile akkatti payni te mastiki payamintti;
naqharray tʼirrakko hiisi faripa tʼiraako pile akkadhi payni hikkesi ise shaptina kalla illighti;
the maastikka olona payni.
4 Lammi koro haayyu,
hune meelle pishko Kristoosena kodhdhiteppa qhamo koro farri kula hikkatte kalla sikapuyanku,
hussakka hossi farttatte haqinu qhama kodhdhintepa kodhmo Haallikkonu awusho awshaaninu.
5 Xinkessi woʼoko asakkankitottay lalaghaminina farttenu qhaman awsho awshinaaninu woʼokosi cʼuppito hikkettay ina haqsisi pishkko haaninakki kodhadhi ahxay.
6 Hantu kapay hikkesi ine shaptina kalla qhamo qhawho fari kula qhootanna kalla reehamini maallay shappe hikkatena kalla hasa lighni,
hussakka hikke keeshatesitta qandhimma thessi onke qhawtite kodhdhiti Nasso Kʼulkʼullitottay qhama kodhanaaninu.
Cʼuppo Qale Ohxmame
7 Lammi moʼo an paynaani?
Hikke iseeki cʼuppo?
Qandhikka!
Naqharray hikke kakorukki ye kodhdhu payni,
cʼuppo qhamu moʼo kodhdhisa anu arri ahxay.
Hikkeki “Olo yooki” ye payu payni ahxay yookuntte qhamu moʼo kodhdhitisa anu arri.
8 Naqharray cʼuppo hayossi Hikke okastitakki onke tayadhipa woʼokosi magha kitte taayyuna qaghaasi haqsisu;
cʼuppo kapay Hikke maley ho fari.
9 Qharro Hikke ye qaghtina ano ho qagho sheegha,
ihayo okayi tupettay cʼuppo ho qagho sheegha ikkodhdhi,
anokka fara.
10 Hayossi qaghonu apayipa teexu fartteesi qhamu okasisa an upadhi.
11 Hayosi Hikkatettakki cʼuppo onke tayadhipa ye tatakoy,
hayusattakka ye poghuy.
12 Hussa mallay Hikke Kʼulkʼullitte,
hayokka Kʼulkʼullittopa ho pare qaghapa ho xeesa.
13 Lammi olho xeesa yeema fartte okaasi?
Qandhikka!
Naqharray cʼuppo qhamu cʼupponkottay armaninu ollho xeesa kaakorukki farte ya okaasi;
hussa mallay cʼuppo haayo kaakoru qhamu uuma cʼuppo kodhdhininu.
Ohxmatto Qagho Qhawhitona
14 Hikke qhamu nassunko kodhdhtisa an araani,
naqharray ano sakanko ho cʼupponu qhamo aylete lasami.
15 Olhan kodhikka yeye xuli,
moʼo maallay payni ho anu kodhe woʼisikka an kodhi,
naqharray hossi an shikki usosikki an kodhi.
16 Lammi olho an kodhe woʼisikki anu kodhi payni Hikke qhamu texeesa kodhdhitisa anna ghara.
17 Hasi kodhdhiti payni,
ho husiisi kodha ano qandhimma cʼupposi yela kittatte qaaka.
18 Qhawunko haayyuna kittatte ollho xeesa qhamu ye qaghnissa an ara,
ollho xeesaasi kodhenu woʼoko an sheeghama naqharray kodhe anu alkasu.
19 Olhosi xeesa an kodhe woʼiisi anu kodhdhima naqharray hossi magha anu woʼiisiki an kodhi.
20 Olhossi anu kodhe woʼiisiki an kodhi payni ho husaasi kodha ano qandhimma,
cʼuppossi yela kittatte qaghaki kodha.
21 Hussa mallay hikkisay qhamu kodhattisa an upadhi;
lammi an olho xeesa kodhe awoʼana,
maghno yela qagha.
22 Kitte taayyu Hikke Haallikkitoottay ihxhxaasodha.
23 Naqharray Hikkesi cʼuppito meele hayyuna kittatte kodhadhay yeesi ho shaapami kodhettay,
Hikke pile the Hikke kʼallpe thaayyu qale qhipamay meele hayyuna kitatte kodhadhasikki an hiʼi.
24 Ano qhawho mala pirtte!
Pishko farttenu teexamina yahxa ye pehise alkasna?
25 Pogholho haani Iyyesus Kristoose kaakoru Haallikkonu kalata innu kodhdha!
Lammi ano kʼalpe thayuttay Hikke Haallikkitonu ayle an kodhdhina,
qhawhunko haayyuttay kapay Hikke cʼuppitonu ayle an kodhdhi.