Cʼuppito Sikaapuyepa Kristoosettay Qaake
6
Lammi moʼo an payinaani?
Teexako Haallikkito qhamu naqaninu cʼuppo kodhetaakki an qaaknaani kati?
2 Yekodhdhintti!
Cʼupponukki an farrini,
lammi mala holleppa cʼuppottay qaakooni?
3 Ine he Kristoose Iyyesus qale toʼokke kodhdhenu shoxatte shoxanni,
fartte thuusu qale toʼokke kodhhenu qhaman shoxatte shoxanisa huni arte?
4 Hussa maallay Kristoose kaanaste Appattay qhamu farttatte haqi kula inekka qhamussa kula qagho qhawtitottay kittate qhaman aqaaknaaninnu shoxattettay an farrinippa Uso qalekka maayamaani.
5 Fartte Thuusu qale an toʼokke kodhdhini payni fartatte haqe huusu qalekka toʼokke an kodhdhinaani.
6 Lammi aylaadhdhe cʼuppito qhamu ini kodhdhinenu pishko haani cʼuppito qhamu haqhninu pishko haani keeshakko qhamu Uso qale maskʼalaama dhisamisa an araani,
ho fari cʼupo huusuna pare qaghunko ittayadhi
7 Moʼo maalla payni qhawho fari cʼuppito kalla hasi lighi.
8 Lammi Kristoose qale an farrini payni Uso qale qhaman qaaknanisa an dhukkaysadhaani.
9 Kristoose fartatte ihhaqi,
qhamu ye laanka holi farupa farttekka Usooma poghulumissa an araani.
10 Xinkessi iffarina laankka qhamu ye farrinu toʼo malekki cʼupponu fari,
naqharray xaynu koru qaghottay qaakeesi Haallikkonukki qaakini.
11 Cʼuppito kalla he qhamo qhawho fari kula sikaapuyteppa Kristoos Iyyesusettay he Haallikkonu qaagho sheegha kodhdhankusa he dhihindha.
12 Hussa maallay woʼoko maghaasi kodhettay pishko haahundhi farrasa cʼuppo qhaamu poghulumninu olo kodhe.
13 Meele pishko haahundhina mahxe maghnito olo kodheppa isa cʼupponu itʼtʼosanku,
laadhdhi qhamo koro farttenu karo qaghito lighghi kula kodhapa pukkaqe thaahundhiisi Haalikkonu itʼtʼoosanku,
meele hahundhikka maaxe pare qaghunkito kodhapa Haallikkonu itʼtʼosanku.
14 Hune teexakito Haallikkitona kalla dhishay hikkatte kalla qhooti huni kodhdhonku maallay cʼuppo ihhune rafise xura.
Aylaadhdhe Pare Qaghunkito
15 Lammi moʼo an paynaani?
Ine teexakko Haallikkitona kalla dhiishay hikkate kalla qandhi,
hussa maallay an cʼuppo konna payyo?
Ye kodhdhinti!
16 Qhawho tookonukki aʼaylaadhdhe he kotteppa texanku payni qhawhusa annu eeʼe paytena aylaadhdhe huusu qhama kodhdhitessa huni arte?
Qhamussa kula cʼupponukki aeeʼe payte payni cʼuppusa huneema farte okasnanu hune aylaadhdhe,
Haallikkonukki aeeʼe payte payni pare qaghunkosi qhama tayantesa huni arte?
17 Naqharray aylaadhe cʼuppito akkodhdhitekaki payni,
kolinkossi annu teexamtenu qhoota saqako hoqhqhottay eeʼe payte mallay Haallikko ho kaanasami ikkodhdha.
18 Ayilunko cʼuppitona kalla hasa lighteppa aylaadhdhe pare qaghunkito kodhdhanku.
19 Ano olhannu onke koronu xulintittay hune qalli qhoota dhihattoote taahundhi qhacʼa maallay;
qhama xayna qharaʼita meelle pishko haahundhina ayle lokmeetepa maghno padhawamapa isi ashshana kotteppa itʼtʼosanku kula hantu kapay pare qaghunko karo kʼulkʼullunkito kula korottay ashshanu aylaadhdhe kodhapa itʼtʼosanku.
20 Xinkessi aʼaylaadhdhe cʼuppito kodhdhitenna pare qaghunkonu kitte ye hunena qaghti.
21 Palanku hantu male xinkisana manna tayatte?
olissana dhikkatte thuusu fartte.
22 Hantu kapay cʼupppito kalla hasa lighteppa aylaadhdhe Haallikkito kodhdhanku,
awsho aʼilla hollsattekka karo kʼulkʼullinkito ihune intawni,
dhikkatte thuusukka qagho perre ye hume sheeghenna.
23 Hxaaye cʼuppito farte;
teexakko Haallikkito kapay Pogholho haani Iyyesus Kristoosettay qagho perre ye hume sheeghenna.