Nakayihopa Hxaso
5
Lammi Uso dhukkaysadhettakki ine pare qaghasi mallay Pogholho haani Iyyesuse Kristoosettay Haallikko qale nakayho an sheeghni.
2 Usottay teexakusa hanntu anna shikkaari kula dhukkaysadhettay xulle alkasaani maallay kippusattay he kaanaste Haallikkito qhootanna kodhdhe haanittay isan peepadhaani.
3 Husitta patta ye kodhdhunna raako haanittakka an hxasodhaani;
moʼo maalla payni rakko qhamu dhuupaythe tayasisa an araani.
4 Dhuupaythe kokkisadheesi,
kokkisadhekka moʼunko themmammiisi,
moʼunko themmammikka kippoosikki tayasi.
5 Nasso Kʼulkʼullossi aʼine teexittay cʼikkno Haallikkito qhooti saqqe haani kitta eli maallay kippusa yeine palaamisnikka.
6 Anhe malaale kodhdhininakki xeeressi Haallikko payina Kristoose cʼuppo haani mallay fari.
7 Qhawho qhoota qhawho pare qagha kapa farra taye uumi koro rakkisi;
ikkodhdhitama kapay qhawho qhoota qhawho xorxampakko kapa farenu shahxumna ye dhapanni.
8 Naqharray an cʼuppolawhe kodhdhininakki Kristoose ine maallay fari;
husakka cʼiknossi Haallikko ine sheeghisikki hiʼaasi.
9 Lammi haantu kʼeeqhte Iyyesus Kristoosetakki an pare qaghni payni laadhdhi Usottay miira Haallikkitona kalla malakki ini dhinne!
10 An parakaaradhdhe Haallikkito kodhdhininakki an fartte miʼaye huusuttay Uso qale araaramni payni,
an araranko tayanni tupettay malakki qagho Huusuttay dhinko haani ho ghula ye kodhdhini!
11 Husi patta qaandhikka,
naqharray hossi an hantu araranko tayanittay Pogholho haani Iyyesus Kristoose kaakoru Haallikkotakka anpeepadhaani.
Fartte Attamettayi Qagho Kriistosettay
12 Hussa maallay cʼuppo qhawho toʼokko kaakoru qhamu piyye qhaatʼeema okayi kula farttekka cʼuppo kaakorukki okayti,
onkisattay koro kaasay qhooti cʼuppo kodhi mallay fartte koro kaasasa iʼokayti.
13 Hikke ye okayunna qharaʼita cʼuppo piyye qhaatʼete iqaghi,
naqharaay xinke hikke ye qaghtina cʼuppokka ye dhihami.
14 Ikkodhitama kapay he Attaamenu payyatti haaka Muuse saasa qagha qhamo Attaame kula hikke pulettay heye dhappitte kodhonkisakka fartte inna poghlumti,
Attaamekka Kristoosessi okaynana lighno huusu.
15 Naqharray teexakko qhamo dhapitatte kula ghaqi qandhikka;
dhapitte qhawho toʼokitotakki he kisha farre payni,
teexakko Haallikkitopa qhawho toʼokosi husakka teexakkosi Iyyesus Kristosettay okaayi he kishanu malakki ye naqani.
16 Holuppa teexakusa Haallikkito qhamo cʼuppo qhawho toʼoko okaasi kula qandhdhikka,
moʼo maalla payni qhaqhitte cʼuppo qhawho toʼokito kaleemi okaytipa kutunko okaasi;
teexakusa kapay cʼuppo kisha kaleemi okayipa pare qaghunko okaasu.
17 Dhappite qhawho toʼokitotakki fartte koro kaasassa poghlumti payni he teexakko Haallikkito puripa teexakko pare qaghunkito akkadhe qhawho toʼokossi Iyyesuse Kristoose kakoru malakki ye ghulleppa poghlumonki!
18 Lammi dhapitte Attaamenna payatti qhamu koro kaasasa kutunko okayi kula,
kodhmo pare qhaghunko Kristoose kodhittay he kishaasi qhaqhitatte kalla ippehisipa qagho nu teexu.
19 Eeʼe paaye hxure qhawho toʼokitottay qhamu koro kaasaay cʼuppolaawhe kodhdhi kula,
eeʼe paye qhawho tookitottay koro kaasaay ho pare qagha ikkodhdhi.
20 Qhooti hikke okayti maallay dhappitte naqi,
naqharray qhamu dhappitepa cʼuppo naqi kula ghaqi teexako Haallikkitokka ighghulipa naqu.
21 Hussakka hu hasa kodhdhi cʼuppo qhamu fartettay poghulumi kula;
Iyyesuse Kristoosettakka qagho perre ye hume sheeghenna qhamu tayamninu teexako pare qaghatakki poghlumi.