Dhukkaysadhepa Pare Qaghunko Aprihaame
4
Lammi Aprihaamesi sakankottay paapo haani kodhdhi moʼo ittayadhi an paynaani?
2 Aprihaame kodhmota pare qaghunko tayadhi payni ahxay,
olhu peepanni iqaghna,
ikkodhdhitama kapay miinte Haallikkitona peepadhe ye alkasnikka.
3 Matʼaafa iʼiyyana:
“Aprihaame Haallikkoosikki dhukaysadhipa dhukkaysadhe thuusukka pare qaghunko kodhdhippa nu dhihamoy.”a
4 Qhawho kodhmo kodhadha hxaayye humna huusunu gheeqasa dhukateesikki tayadhi dhiishay teexako qandhikka.
5 Qhawho ye Haallikko ghaapiki qaghnapa Hossi cʼuppolawheesi pare qaghasattay dhukkaysadhu payni dhukaysadhe thuusu the pare qaghaki kodhdhitipa nu dhihamoy.
6 Taawitekka qhawho Haallikko kodhmo xeesa malettay pare qaghasi ho mala he poghadhi qhamu kodhdhisa itorruyana hasi payi:
7 “He dhappitte thuusundhi anu hxuripa
koro cʼuppo huusundhi nu shoxami;
ho he poghadhi!
8 Qhawho Pogholho yena cʼuppo huusu dhihu
hohe poghadhi! b”
9 Emma sakissa Taawite torruyi koro karrazaminu patta atam koro ye karrazamunuka?
“Aprihaame qhooti Haallikko dhukkaysadhi mallay dhukkaysadhe thuusu the pare qaghakki kodhdhitipa nu dhihamo” an payni.
10 Lammi dhukkaysadhe Aprihaame hu the pare qagha kodhdhitpa nu dhihamo paray?
Ye karrazamuna qharraʼitam ikkarrazami tupettay?
Ye karrasamuna qharaʼita dhiishay ikkarrazami tupeta qandhikka.
11 Aprihaame hannay ye karrazamunna qharraʼitta dhukaysadhe thuusu qhamu te pare qagha kodhdhitipa dhihamosa hiʼaasenu milikitepa maathama qhamu kodhdhintinukki karrazami,
hussa mallay Aprihaame;
koro hoye karrazamunna dhukkaysadhanu dhukkaysadhe thuusundhi te pare qagha kodhdhtipa nu dhihamo kaasannu uso pappo.
12 Holuppa heye karrazamonkinukka uso pappo,
karrazame patta ye kodhdhunna he dhukkaysadhessi pappo haani Aprihaame ye karrazamunna qharaʼita sheeghi kaleema ashsha kaasannukka.
13 Moʼo maalla payni Aprihaamepa sanynye thuusu qhamu piyye qhaatʼe taynenu Kʼaalesi kippitto Haallikko nu teexi pare qaghunkosi dhukaysadhettay tayadhi dhiishay hikkeesi tiqitadhettay qandhikka.
14 Koro hikkettay qaakakki tayampawhe kodhdhi payni dhukkaysadhepa kippo he latukki kodhdhine ahxay,
15 moʼo maalla payni hikke miira Haallikkitoosikki okaasti,
naqharray hikkekki ye qaghti payni,
Hikke pule ye qaghiti.
16 Hussa mallay kippo dhukaysadhetakki okayi,
hussakka kippossa qhamu teexakottay kodhdhinipa sanynye Aprihaame kaasannu waase kodhdhunu,
hussakka he hikkettay huusu kodhdhennu pattaa ye kodhdhuna he dhukkaysadhettay he Aprihaame kodhdhenukka;
usokka pappo ine kaasanna.
17 Hussakka:
“Paappo waarsho kishanaki anho kodhi”c qhamu payamtipa tooxamo kula,
usokka Haallikko he farenu qagho teexapa hoyeqaghiisika hoqagha isikodhattay qhooti dhukkaysadhinu.
18 “Sanynye thaahu hasi kodhdhintid” qhama payipa anu qallu kula,
ollhuna kippo koni yeqaghina Aprihaame kippoosikki dhkkaysadhipa paappo waarrsho kishana kodhdhu.
19 Uso ipperko dhippa hxafasina pishshko huusupa manne dhalito Saarakka qhamu he farre kula kodhdhessa inniaranakki dhukkaysadhettay dhikiti.
20 Laadhdhi dhukkaysadhetakki dhikitipa Haallikkonu kaanaste teexu dhiishay kippossi Haallikko nu teexisi ye tʼaratʼarukka.
21 Haallikko kippossi innu teexisi qhamu nu dhkkisnisa saqakottakki akkadhi.
22 Hussa maallay dhukkaysadhe thuusu pareqhaghunko ikkodhdhitipa nu dhihamoy.
23 Kʼaalisa iyyanna pare qhaghunko ikkodhdhtipa nu dhhamoy hu tooxamti usoosi patta qhandhikka.
24 Naqharray Haallikko hu pare qaghunko konnipa ine dhihoy ine hessi ho Pogholho haani Iyyesusesi fartate haqisi dhukkaysanninukka.
25 Uso qhoota cʼuppo haani maallay farttenukka alikasipa teexu,
ineesi hepareqagha kodhenukka farttatte haqu.