Dhukkaysatame Haallikkito
3
Emma Ayhudhitto koro ye koro Ayhudhatte kodhdhuna moottakki ghuli?
Karazamekka moʼo innakesti?
2 Karayka Ayhudhitto kodhdhe onke kishatakki ghuli,
Kʼaale Haallikkito olho kaasanna hu intawtipa dhukkaysatamettay nu teexami usundheesi.
3 Usundhena kittatte tookke tookke isi ye dhukkaysatame payni kati dhukaysatame Haallikkitoosi iʼhaqhasna?
4 Moʼokaki payni ye haqhasintikka!
qhawho kaasay ho aayya qalladha naqharray Haallikko pattakki dhukampakko.
Moʼo maalla payni hasi payamtipa tooxamoy:
“Qallite taahuna payyatti adhdhukampakko kodhdhinti,
qhawho adhdhehtisikka qhaqhitte miinta putay.”a
5 Naqharray pare qaghunko dhape haanikki pare qaghunko Haallikkitoosi hiʼaasa payni lammi moʼo an paynaani?
Haallikko cʼuppo haani maallay ineema qhaqhitte qhaqha payni ye pare qhaqhi payyo?
Hussa payyo qhamo dhihadhe qhawhito kula.
6 Karay hasa kodhdhe ye alkanikka!
Hasi kodhdhiti payni ahxay Haallikko mali qhaatʼema qhaqhitte qhaqhni?
7 Naqharray aayyolakko kodhdhe haayukki dhukunko Haallikkitoosi pareema hiʼaasapa kaanaste thuususikka isi naqisa payni haka hantusa cʼuppolakko payamettay maliya qhaqhaminti?
8 Koro tookko tookko qhamo qhawho:
“Olho xeesa tayadhenu olho maghaasi konni” payapa isan kollisa kulakki ye dhihipa isiye kasasa,
hussa maallay qhaqhite korussasa hxafna te dhukattatte.
Qhawho Kaasay Cʼuppoolakko
9 Lammi moʼo an paynaani?
Kati ine usundhena an ghulaani?
Ini ghullikka,
koro Ayhudhattekka ikkodhdha koro ye koro Ayhudhatte kodhdhukka usundhe kaasay qhamu cʼuppito kalla kodhdhesa an intoosnippa nu qallaani.
10 Moʼo maalla payni hasa payamtipa tooxamo:
“Yaxakka ho pare qagha ye qaghi,
qhawho toʼokokka,
11 hohela taaya ye qaghi.
Qhawho toʼokokka ho Haallikko gheeqa ye qaghi.
12 Kaasakki onke dhukattena dhappi,
usundhe kaasakka heye he tayte kodhdhonki,
qhawho olho xeesa kodha ye qaghi,
toʼokokka ye qaghi.b”
13 “Qalliite magha koro kottaʼana qalladhenu,
pakke huusundhi he qhamo hawleete qhaashame,
qarrappe huusundhitakki koro tatake,c”
“qallite hxibhbhe huusundhina te qhamo laahxe tawwito kula koro kottaʼa.d”
14 “Pakke huusundhisa qhiicʼopa qalliite raʼa na hoqhqhie.”
15 “Luhhe huusundhi he kʼeeqhte elisenu waadha,
16 onke thuusundhinakka patittepa qootʼo na qagha.
17 Onke nakayhitoosikka yeare.f”
18 “Moʼokka payni Haallikkoosi ye ghaape.g”
19 Lammi pako qhawhito kaasay qhamu kʼampaynipa koro qhatʼeete qagha kaasay qhaqhite Haallikkitona kalla kodhdhunu hikke huqallatti kaasay he hikkatte kalla qaghanu qhamu kodhdhisa an araani.
20 Hussa mallay yaxakka miinte Haallikkitona hikke tiqitadhettay ho pare qagha ye kodhdhini,
laadhdhi hikkettay cʼuppo qhamu moʼo kodhdhisa an arraani.
Pareqaghunko Dhukaysadhettay Tayama
21 Naqharray hantu pare qaghunkossi Haallikkito Hikkepa Hxuumampawhe masakarekki hikke Muuse malettay armadhi.
22 Hussa mallay Haallikko yaxaasikka ye reehuna he Iyyesus Kristooseesi dhukaysadhe kaasanu pare qaghunkoosi innuteexa.
23 Koro kaasakki cʼuppo kodhi,
kaanaste Haallikkitoosikka dhapu.
24 Hussa mallay koro kodhmosi dhinisatte Iyyesus Kristoose kodhi teexakko Haallikkitota pattaki pare qaghni.
25 Haallikko Iyyesus Kristooseesi olhu namaallay teexakko kodhipa itʼtʼoosu koro Uso dhukaysadha kaasay kʼeeqhte Thusuttay qhamu cʼuppito hxurako tayaninu.
Haallikko olhu namaallay hasa kodhi cʼupposi qharroosi dhuupayte Thuusuttay hoyeqaghi kodhenu qhaqhitessi Thuusu pare kodhdhiti hiʼaasenu.
26 Perre hantunakka Haallikko Pukaqate Thuusuna ho pare qagha qhamu kodhisa huhiʼaasi he Iyyesuse dhukaysadha kaasaasi he pare qagha kodhenu.
27 Lammi olho anhettay peepnaani moʼo qagha?
Olho anhettay peepanaani ini sheeghnikka!
Olho annamaallay hepeepane moʼo?
Qhoota olho hikke payti ankoninu?
Hasa qandhikka,
naqharray dhukaysadhettay.
28 Yaxakka qhooti olho hikke payti dhikkisi maallay ye kodhdhuna dhukkaysadhettay qhamu ho pareqagha kodhdhisa ankokisnipa isan hune qallaani.
29 Haallikko kati Waako koro Ayhutattena patta?
Korossi ye koro Ayhutatte kodhdhunakka Haallikko huusundhi qandhi?
Ee karay usundheesikka Haallikko.
30 Ho karrazamisi dhukkaysadhettay,
ho yekarrazamusikka dhukkaysadhisattay honu pare qaghunko teexa Haallikko toʼokko patta.
31 Eeppa kati dhukkaysadhe maallaki an hikkeesi hxurraani payyo?
Hasa qandhikka,
laadhdhi hikkeesi an kookisaneppa tiqitadhooni.