2
Hussa mallay ato ho koro pilema qhaqhitte qhaqha pukaqate thaahuna olha shantittay athusheeghti,
moʼo malla payni olha koro pileema qhaqhitte qhaqhiti kaasattay pukkaqte thaahusikki akkutumti,
atho ho qhaqhitte qhaaqha athokka olisaasi akkodhay.
2 He hasa kodhasa qhaqhitte Haallikkito pare qhamu kodhitisa an arani.
3 Atho ho koro pileema qhaqhitte qhaqha hola isa hussaasi kodhay,
qhaqhitte Haallikkitona kalla ho pinina ihho lighay?
4 Atam xorxuntte Haallikkito qhamu cʼupppito karo Huusu holenu ho intawtisa athu upadhunaki ahorxunttepa alkasepa shorokunkko dhuupaythe thuusuna dhafti?
5 Naqharray lule haahupa saqakussa haahu cʼuppito kalla ye holina payyatti xinke qhaqhitte dhukatattepa miira Haallikkito ximpadhina pukkaqte thaahusa ammiira illa holsatti.
6 Haallikko qhawho kaasannu qhamo kodhmo huusu kulakki nu teexni:
7 he kodhmo xeesasi kokkisadhetta kodhapa kaanastepa kalatha pana qhagho ye patiisi isi gheeqanu Haallikko qagho perre ye hume sheeghennakki nu teexni;
8 naqharray he pukkaqate thuusundhi cʼikadhettay,
dhukesi hxurapa isi maghno kala ashshasa qhaqhittepa miira usundhema hxafna.
9 Koro maghno kodha kaasassa rakkopa cʼinkʼe na okayna,
payyotatte koro Ayhdhattesa nakala koro ye koro Ayyhutatte kodhdhusa.
10 Naqharray koro olho xeesa kodha kaasannu koro Ayhudhattekka ikkodhdha koro ye koro Ayhudhatte kodhdhunu kalatapa kaanaste nakayhokka innu kodhdhina.
11 Haallikko yaxanukka ye lighghadhi.
12 Koro ye hikke sheeghina cʼuppo kodha kaasay hikke malekki panni,
koro inni hikke sheeghana cʼuppo kodha kapay hikkisattakki na qhaqhaminti.
13 Moʼo maalla payni he Haallikkito miinatte pare qagha ana payi he hikkenu eeʼe paya dhiishay he hikkeesi apaqhapa isi ye eeʼe paye qandhikka.
14 Korosi ye koro Ayhudhatte kodhdhu ye hikke sheeghipa olho hikke haytiisi isi kodha,
hikke ye sheeghe kakki payni hikkesi uumamettay qhooti sheeghe mallay usundhe pukkaqate thuusudhinu hikke.
15 Kʼalpe thuusundhi qhooti masakartipa dhihadhe thuusudhikka isi usundhe dheeha,
holuppa isinna kohxhxappa isi usundhe nyarisay maallay hayo hikkatte ho saqako huusudhisa tooxami qhamu kodhdhisi hiʼaasi.
16 Husakka hu kodhdhamanni qhamo Kʼaalesi Wonkelatte ano kolisi kula Haallikko Iyyesus Kristoosettay olhosi koro bhadhamtettay kodhisa kuyyaqku na qhaqhitte qhaqhnina.
Hikkepa Koro Ayhutatte
17 “Ano ayhudhittho” apaytipa hikkeema shannappa toʼokunko Ahaallikko qale sheeghtittay isa hepeepay.
18 Ato woʼoko Haallikkitoosi aʼaray,
qhoota hikke kollatti mallay olho xeesa kodheesi aʼaray.
19 Taafawhenu intawapakko he tukkankkito qaghanukka hammako qhama kodhitisa aʼarti payni,
20 arnopa dhuke kaasay hikkatte an tayadhi aʼiiti,
ladhdhi heye kolladhonkisi an dhihama miʼaadhesikka an kolisa iiti,
21 lammi atho ho koro pileesi kollisa pukaqate thaahuusi moonukki athu kollisti?
Olo kereqi kappaytipa atho kapay isa kereqay?
22 Atho ho korito olo maase paya,
atho holla isa maasay?
Atho ho killankoosi shikka,
aholla mannadhdhe killankitosi saray?
23 Atho ho hikkettay hepeepa hikkate sarpettakka Ahhaallikkoosi dhafasti?
24 Hussaka qhoota hahundhina paayyati:
“Makaxko Haallikkito koro ye koro Ayhudhatte kodhdhuna miinatte idhdhaghsamni” qhamu payamtipa tooxamo kula.
25 Hikkenukki aeeʼe payti payni karazame pare,
naqharray hikkenukki athu eeʼe payti payni qhamu athu karazamussa dhihamni.
26 Heye karazamoki olho hikke haytisikki kodhe payni qhamu karazamesa yenu dhihaminti?
27 Ato hikke tooxamtipa karazamesikkakki ashsheeghti payni qhoota athu hikkenu eeʼe payu maallay ho pishkottay ye karrazamu hikkenu eeʼe paye huusuttay qhaqhite ihooma qhaqhni.
28 Lammi ho makaxkottay patta Ayhudhittho kodhdhi Ayhudhitto dhukatte qandhikka,
holuppa karazame pishkito armadha karazame dhukatte qandhikka.
29 Naqharray qhawho hu Ayhudhawitto kodhdhi moʼunko kitte thuusunakki na Ayhudhitto dhukatte kodhdhi payni patta,
karazamekka hu karazame kodhdhe alkasinmti hikkesi tooxamtittay qandhimma Nasso Haallikkitotakki asaqakito karazami payni patta.
Kalata qhawho hasa lighana qhawhito kaanta qandhima Haallikkito kaanta.