Erko Erkampakko Pawloose Koro Kathama Roomennu
1
Ano Pawloosesi aylitto Iyyesus Kristoose kodhdhipa erkampakko kodhdhenu ooqamapa Wonkele Haallikkitonu rehamma.
2 Wonkeli maallay Haallikko hxuumampawhe huusutakki matʼafaadhdhe kʼulkʼullawhe kakoru inthoosipa kippo teexu.
3 Wonkelisakka qhoota Miʼaye Haallikkito qhawhunkottay sanynye Taawithenna dhaladhi,
4 qhoota Nasso Kʼulkʼullawittay farttatte haqipa Miʼaye Haallikkito kodhdhuppa humnattay armadhu qhoota Pogholho haani Iyyesus Kristoosekki qalliti.
5 Uso kaakuru qhoota makaxko huusu maallay koro ye koro Ayhutate kodhdhu kaasanna kittatte ooqamessi dhukkaysadhettay tayama kula koroosi ooqenu teexakko Haallikkitopa kodhmo erkampawhunkito an akkanni.
6 Hunekka hessi he Iyyesus Kristoose kodhdhenu ooqamenna kittatte aʼaqaghte.
7 Hune hessi Haallikkottay cʼikatamteppa kʼulkʼullawhe kodhdhenu ooqamanku piyye Roomenna qaaka kaasnnu:
Paappo haani Haallikkopa,
Pogholho haani Iyyesus Kristoosena kaanta teexako Haallikkitopa nakayho ihune kodhdha!
Ghissoote Kalatay
8 An intoosipa dhukkaysadhe taahundhina qhooti piyye qhaatʼe kaasay qhaskatti mallay Haallikko haayyusi Iyyesus Kristoosettay hune kaasa maallay isan kalataysadha.
9 Kuyyaqako kaasay qhama mala ghaqqi ghissootettay hune dhihadhisa,
Haallikkosi saqako haayyu kaasattay wonkele miʼaye huusuna torruyettay annu kodhadhi yeesi misikire.
10 Hantukka qhamo woʼoko Haallikkito kula hune kula okayenu qhamu ye onke gheteeʼisunnu kuyaqako kaasakki an ghissadhi.
11 Teexakko Nasso Haallikkitona hune dhiktisna qhama hune kollisnipa hune hiʼanu ayyooka.
12 Hussakka anopa hune dhukkaysadhe taanittay qhama ille dhiktisnaaninu.
13 Koro haayyu!
Korossi ye koro Ayhutatte kodhdhunna kittatte qhaman koro kisha ho dhukkaysadha tayi kula hunena kittatekka koro dhukkaysadha tayenu xeere kishakki an hune kula okayenu dhihadhi,
naqharray haka kuyyu saasa qhamu ye ye allkasussa qhama arinttenukki awwoʼi.
14 Koro kirikksssattepa ho kirikkatte ye kodhdhuppa he arnane sheeghapa heye arnane sheegheesikka kollisenu dhooqhqho yela qagha,
15 Hussa maallakki hune hessi piyye Roomenna qaakanukka Wonkele qallenu ayyori.
Kʼaale Wonkelatte Humna Haallikkito
16 Ano wonkelettay anu palamni,
moʼo maallay payni ise qhawho dhukkaysadha kaasannu the dhinko kodhdhina humna Haallikkito,
hussakka qharitteema koro Ayhutattenu,
nakaleema koro ye koro Ayhutatte kodhdhunnu.
17 Pare qaghunko Haallikkito wonkelettakki armadhi,
pare qaghunkusakka payyotenu haka dhikkate saasa dhukkaysadhenu karo dhukkaysadhate kula Usottakki armadhi:
“Qhawho pareqagha dhukkaysadhettakki qaakia,”
qhamu payamipa tooxamo kula.
Maghno Korito
18 Haallikko he maghno huusundhittay dhukeesi bhadhasa,
miiratakki cʼuppo huusundhipa maghno huusundhi kaasasa moontonu armanna.
19 Hssakka qhoota Haallikko are kaaʼitha olho usundhe gheeqasa kaasay Haallikko pareema innu hiʼaasi maallay.
20 Moʼunkosi Haallikkito Qhaatʼe ye uumamonkinnu payyatti yekoro armi,
haadhi humna Huusu perre ye hume sheeghennapa Waakunko huusu uumatana uumi armadhi,
hussa mallay koro olhu shannittay ye sheeghi.
21 Haallikkoosi iʼarekkakki payni qhamo Waakunko huusu kula ye kaanasonki,
ye Uso kalataysadhonkikka,
naqharray dhihadhe thuusundhi the lathukki kodhdhiti,
saqqe huusundhi ye taayho sheeghekka inna thukkane.
22 “Ine arnanampawhe” ippaye kakki payni qeeppi kodhdhe;
23 kaanastesi Haallikkito yepate sheegheesi lighno qhawho farapa aaghe hoolottay haqapa aaghe luyhettay ashsha pana aaghe piyyaʼita kuqamattay oohonki.
24 Hussa mallay Haallikko yokkuntesi thuusundhi cʼuppottay saqakooma na hoqhqhitiisi qhamu pukkaqatte pukkaqatte dhakinte tuusundhiisi palmisnenukki onke ye pare kodhdhuttay illeqale rafnenu likkasipa usundhe teexu.
25 Hussakka dhuke Haallikkitoosi aayyatakki oohe,
qhoota Uumampakkito kapa uumatanu sakatonkippa nu kodhadhonkikka,
Haallikko kapay perre yehumesheeghe saasa ho kalataysami!
Amen.
26 Husattay Haallikko yokkunte palankitonukki likkasipa usundhe teexu,
xisske husundhikka hu tʼiire qale rafnenna kanta xiske qhamu xiske qale rafnenukki kodheppa oohonki.
27 Holuppa tʼiirekka xiske qale rafeesi ihxhxureppa pukkaqate pukkaqatenu yokkuntettay isi ille dharraʼa,
tʼiirekka tʼiire qali palanko kodhe,
kʼitʼaate kodhmo huusundhi maghana gheqasasi heema okasonki.
28 Moʼomallay payni Haallikkoosi are ye gheeqasi qhooti payeppa dhihadhonki maallay olhu kodhe ye gheeqasiisi qhamu konnenukki likkasipa kʼalpe lathunnu usundhe teexu.
29 He maghno qawni qawnittay hoqhqhe,
dhappittepa koqolunkopa kʼalpe xarkishamtipa yookuntepa napse poghghepa poghghathopa koro tatakepe dhohumuntepa he maghinottay hoqqe holuppa hxashathopa,
30 he makaxe korito patisapa he Waakko shikkapa he dhadhaghisamapa pepoolawhepa hehe paseesa,
maghno kodhenu he onke gheeqadhapa he ahxke huusundhinukka ye eeʼe paaye.
31 He ye hela thaaye,
he ule pula,
he horxunte ye sheegheppa,
shahxawhe.
32 Hikkesi Haallikkito iyyanna:
“He oliisi kodha kaasay fartte usundhe gheeqasa” iyyasi iʼarekakki payni usundhe pukkaqate thusundhina kodhe patta ye kodhunna,
he hussasi kodhasikka idhiktisa.