Rafisampawhe Ahxaasattenu Eeʼe Paye Gheqasa
13
Yaxaka payni he manne ahxasattena waanunko sheeghanu eeʼe paye gheeqasa moʼo maalla payni Haallikkito kaantakki ye kodhdhu payni waanunko ye qaghi,
waannaadhe qaghakka he Haallikkotta xawthame.
2 Hussa mallay ho waannaadheesi thoora kaasay hayo Haallkitoosikki thoori,
qhawho ye eeʼe payi kaasay pukaqate thususa iʼqhaqhitte okaasi.
3 Moʼo maalla payni rafisampawhe he maghno kodhaasi ghaapisenu dhiishay he olho xeesa kodhaasi ghaapisenu qandhi.
Rafisampawhesi qhamu athu ghaapinti awooʼay?
Lammi olho xeesasi kodhma usona kantakka kaanaste attayadhintiye.
4 Uso hoosi ho olo xeesa kodhenu axawwadhi kodhampakko Haallikkito,
naqharray olho magha akkotti payni ghaapa,
moʼo mallay payni korateesi lathu ye shapadhukka,
ho maghno kodhaasi kʼatʼtʼaʼenu uso kodhampakko Haallikkito.
5 Hussa mallay kʼitʼaate ghapetta patta ye kodhdhuna qhooti kʼalpe thaani ine dheehti maallay waannaadhdhenu eeʼe paye gheeqasa.
6 Olho anna maallay kappartekka hussa mallay,
waannaadhdhekka he kodhumussa kodhenu erkame kodhampawhe Haallikkito.
7 Qhawho kaasannu olho gheeqasasi nu teexa,
hu kipirro gheeqastinu kipirro,
hu kʼaratto gheeqasinu kʼarato,
hu ghaape gheeqasiisi ghaapindha,
hu kaanaste gheeqaatisi kaanasa.
Xeere Iʼitʼtʼuyeye Ille Cʼikadhindha
8 Pukkaqe pukkaqatte ille cʼikadhe malettay ollho pilakko ho hune ghadhasna iqaghe hxura,
moʼo maalla payni qhawho qhawhoosi cʼikadha Hikeesi idhdhikkisi.
9 Hayidhdhessi “Olo maasi,
olo poghi,
olo kereqi,
olo yooki”a payapa pilekka iʼqaghe payni hayo thoʼokossi iyya “Qhawhoosi qhamo haahu kula cʼikadha”b paya takki dhikkadhi.
10 Cʼikno qhawhonu maghno ye kodhi,
hussa mallay cʼikno dhikkise hikatte.
11 Perreesi hela thaayettay husiisi kodha,
xeeressi appiʼaathe thaahundhina thayrinte hantu,
dhinko haani xeeressi payyootatte anna dhukkaysaninna kaanta hantu karo haani itʼtʼuyi.
12 Awne illighgha;
kuyyaqakokka iʼiitʼtʼuyi,
hussa maalay kodhmossi thukkankitoosi hela hxurripa maahxessi orxankito hammakitoosi urkuyni.
13 Qhamo koro kuyyaqate lallaaghma kula onke xeesattay lallaaghamni,
hiripkopa hxayyettay inni kodhdhu,
paalakuntenu ille ghaghappadhettay inni kodhdhu,
ille thamakadhepa yokkuntettay inni kodhdhu.
14 Laadhdhi Iyyesus Kristoseesi urkuya,
woʼoko sakanko hahudhina qhamu sallinu dhihadhe sakankitonu olo eeʼe paye.