Pawloose Katama Efesoonena
19
Xinkissana Appiloose katama Kʼorontoosenaki qaghina Pawloose ghuta piyyessi ammeete qaghattakki lighghipa ashsho katama Efesoonena hxafoy,
haaha katamisanakka kolladhampawhe takkayyasa xafoy,
2 hasakka na payuppa kasqadhu:
“Inta xinkisa dhukkaysatenna Nasso Kʼulkʼulloosi aʼakkatte?”
Usundhekka ina payenna:
“Ini akkadhooni,
Nasso Kʼulkʼullo qhamu qaghisakkaki ini apaqhooni” kina payeppa nu holasonki.
3 Pawloosekka ina payina:
“Emma shoxatte temalakka shoxatte?”
Usundhdhekka:
inna payenna:
“Shoxatte Yohannisetakki an shoxanni.”
4 Pawloosekka inna payi:
“Shoxatte Yohannise onke c’uppito karo Haallikkito holeetesikki hiʼasti.
Yohanisekka,
‹hossi uso kaleema okayna Iyyesusesi koro qhamu dhukkaysanenukki qalli›.”
5 Hussasi apaqhnitay makaxko Pogholho Iyyesusetakki shoxatte shoxadhe.
6 Pawloose iʼusundhe saappa xargho huusu ghapadhina Nasso Kʼulkʼullo usundheema oodhdhipa pakke pile pilepa hxuuma qalladhe payoonki.
7 Korusakka qhawho hudhdhanpa lakki kula ghaqiti.
8 Pawloose karo manne ghissoote koro Ayhutatte kulakki ashshipa leeqo izzex kulaghaqqiti qhoota Ahxase Hallikkito isi nu qaqallapa haki koronu xulti saasa shahxuntettay isi usundhe kollisa.
9 Tookke tookke kapay qhooti tiyyampawhe kodhdhe maallay waarshossi miinteemaki onke Pogholhitoosi dhappisenu dhaghghisameppa ini dhukaysanne isi kodhdhana usokka iʼusundhena kalla sikapuyi,
kolladhampawhesiisi qawnikki illeema holasipa mannesi kollinkito Tʼiranoosena kalla kuyyaqako kaasay isi usundhe kollisa.
10 Pawlooseka olissaasi haka perko lakki kula ghaqitikki kodhi,
xinkisana korossi Ayhutattepa koro ye koro Ayhutatte kodhdhu piyye Isiyanna qaaka kaasakka kʼaale Pogholhitoosi apaqhe alkasu.
Dhahxhxootaadhe Haallikko Xarghghe Pawloosettay Kodhi
11 Haallikkokka dhahxootaadhe uuma koro dhahxhxisasiki xarghghe Pawloosettay kodhi.
12 Hussa maallay kʼacʼare taakkinti laalle dhakinte Pawlooseesi kohxti kaasaasi iʼakkapa isi koro udhammattay kohxasa hissa udhamakka udhanko huusundhina isi dhdhinna,
nassidhe maghoomakka isi nu eeʼesadhapa isi ligha.
13 Korossi Ayhutatte nassidhe maghoomaasi korito lihasapa isi xayto kaasay aʼashshana kittatte tookke tookke:
“Makaxkosi Pogholho Iyyesuse Pawloose torruyittay qhama lighintenu an hune hayaani” kipayeppa nassidhe maghoomaasi isi korito lihase temmanki.
14 Qhawhossi piyye Ayhutattena kʼeesito kʼeesadheete ghula Askʼewa ana payina shampidhdhe huusu taxxanka qhamussa kulaki kodhe.
15 Naqharray nassidhesi maghoomakka ina payenna:
“Iyyesusessi an araani!
Pawloosesikka an araanina!
Hune koro yaxay?”
16 Qhawho toʼon ho nasso maghattay ghapami usundheemi sorradhipa qhocʼoorathopa ninikettay na hammaatuppa,
usundhe putu,
manneete kallakka heneqitte ghoradhonki.
17 Olissa kodhamadhi kaasay korossi Ayhutatte katama Efesonena qaghapa koro ye koro Ayhutatte kodhdhunna kaanta qhooti qhaskadhi maallay koro kaasakki ghaapi;
makaxko Pogholho Iyyesusekka uuma kaanasamu.
18 Hessi dhukkaysadhena kittatte he kishaki okayipa kodhmo huusundhi maghaasi hela puutʼonki.
19 Bhasanolawhekka matʼafadhesi bhasaneetesi illeemi holaseppa waarsho kaasa miinteema dhillonki,
matʼafadhisana xorto huusundhi pirrea kuma hudhanko hxupinki hxafni.
20 Onke hasa lighatakki kʼaale Pogholhitokka uuma ghandhaqatipa olho kaasaasi puttippa isi ashshay.
Parpe Katama Efesoonesa Haqati
21 Olissa kaasay ikkodhdhamadhi tupettay Pawloosekka piyye Mekʼodhooniyappa piyye Akkaayyana kitaʼita alighinipa karo Iyyerusaaleme kula ashsho kippayipa Nassottay dhihadhoy:
“An haha hxafi tupettay katama Roomesikka emme yegheqasa” kippayi.
22 Hussa maallay hessi uso qale kodhadhana kittatte Tʼimothoosepa Erastʼosesi karo piyye Mekʼodhooniya kula eraku uso kapay piyye Isiyasa kuyyaqqe takayya oladhu.
23 Xinkissana qhoota Onke Pogholhito kollisatte kaaʼita katama Efesonesa tiyye dhammaki haqi.
24 Qhawho toʼon ho Temetroose ana payi ho siple pirratte tubhapa mannessi kilanko Artʼimisenu lighnaadhe kanasameesi siplisa pirrattena isi kodhdhappa uso pa korossi ille qale kodhadhennu kodhatte dhamma isi okaasa.
25 Hussa maallay qhawhusa,
kodhampawhe huusupa koro pile ho kodhmo huusu ligha kodhadha kaasakki illeema holasipa hasa napayu:
“Hune koro Efesoone!
Ine qhama kodhmuttay shorokumnisa aʼaranku.
26 Qhawhu ana Pawloose payi ‹lighnidhi aʼxarghe qhawhitota kodhdhi halikaane qandhikka› kippayipa piyyadhe takkaayya malettay katama Efesonena patta ye kodhdhuna piyye Isiya kaasay koro dhammaasi gharisuppa dhappisusa hune pukkaqate tahundhina olho ahhiiteppa isa apaqhanku.
27 Onke hasa lighatakki kodhmo haanisi dhafi,
hussa patta ye kodhdhunna mannessi Artʼimiise dhamma piyye Isiyappa piyye qhatʼete kaasay kaanase olho latuki kodhdhineppa haqhonki payyo,
holuppa kaanaste tiisika ihaqhnay.”
28 Korossikka iʼolissaasi apaqhina immiroodhdhipa,
“Artʼemise Efesoone te dhammay!”
payonkippa kʼiiqonki.
29 Waarsho kaasakka isi illena kitaʼita oraqhamapa korossi piyye Mekʼetoniyana Pawloose qale aʼashsha;
Kayiyoosepa Arstʼirokosesi ghapponkippa xayto waarsho illa holi kula isi sitapa ashokittay.
30 Pawloosekka ahxay xaytossi waarsho qaghi kulakki ashshanko woʼi,
kolladhampawhe kapay ina dhawrase.
31 Rafisanpawhesi ahxase Isiyanna kittatte tookke tookke he dhalitto huusu kodhdhe Pawloose kulakki qhawho erakeppa hasa na payonkippa waatadhonki:
“Xaytusa waarsho illeema holi kula inna ashuppa he hiʼasay”.
32 Warshosikka iʼille oraaqhapa qhawho kaasay pukkaqate pukkaqatenu isi qalladhapa isi riirana koro kishakka olhuna maallay illeema holiisi ye ari.
33 Koro piyye Ayhutattena qhawhossi ana payi Iskindhirosesikki warshito kittatte haqiseppa koro miinteema itʼtʼosonki,
qhamu usundheesi tomooma tiyamninu rironki,
usokka qhamu nu tiyyamninuki woʼipa waarsho kaasay qhamu kʼampayninu xarghottay nu hiʼaasu.
34 Naqharray uso qhamu qhawho piyye Ayhutattena kodhdhisa koro kaasay iʼupadhi tupettay “Artʼemise Efesoone te dhammay!”
payonkippa koro kaasay ikkitto toʼokottay saate lakki kula qaghiti kʼiiqu.
35 Dhikkatate tooxampakosi katamisana,
waarshossisi issalisipa napayu “Hune koro katama Efesoonena!
Mannesi Artʼemiise Dhammapa lighno hiisi moontonu oodhdhi waarsho katama Efesoonena qhamu tiqadhisa yaxa kiye ari.
36 Oliisi qhawho marmana qhooti yeqaghi maallay kʼanpayapa waadheettay olho magha kodheete kaalla he tiqitadhonku.
37 Koro ho manne kilankitoosi ye saru takkinti waakko haanisikka ye dhaghisusika tayte ghappitepa okasanku.
38 Temetʼirosepa korussa uso qale siple tubha qhawho yaxasi kaki dheehe woʼe payni manne qhaqhitate haadhi qhashshane;
he qhaqhitte qhaqhakka iqagha,
lammi dheeko hahundhiisi itʼtʼoose aʼalkasnanku.
39 Olho pile ho aitʼtʼoose woote kaki qagha payni onke hikkatetakki hune emmamini.
40 Hasa kiyye kodhdhu payni oli kuyyu kodhamadhi maallay ‹paripe ihhaqise› qhamu olo paynipa ahikkettay ine kasqadhunu ikkoro ghaapisay,
‹rakusa moyto saappeete ippaayyadhi› apaynipa aʼine kasqadhu payni olho an holasnani ini sheeghini.”
41 Hasa inna payipa korossi illeema holiisi illena kaalla pulu.