Pawloose Katama Kʼorontoosenna
18
Xaysa tupettay Pawloose katama Atenanukki haqipa karo katama Kʼorontoose kula ashshoy.
2 Ikkatamisana hxafina qhawho Ayhutatte ho piyye Pantʼosena dhaladhi ho ana payi Akʼilaasikki tayi.
Qhawhusakka Nukusassi nikusadhdheete ana payi Kʼelawtoose koro Ayhutatte kaasay qhamu katama Roomenna lighninu hayo lihasi kula naxaye tuusu Priskʼila illay piyye Itʼaliyanu hanna okayi.
Hussa maallay Pawloosekka usundhe kulakki ashshipa ille hiʼonki.
3 Usokka qhamo huusundhi ho tunkaana teela qhooti kodhdhi maallay usundhe qalli kodhdhipa isi na qale kodhadha.
4 Kuyyaqako hxaysinkitona mannessi ghissoote koro Ayhutattena kula isi ashshayyapa isi koro Ayhutattepa koro Krikatee qalle torruyadhapa qhamu dhukkaysanenukka isi kokisadha.
5 Sillaasepa Tʼimothoose ippiyye Mekʼodhooniyanu okayena Pawloose kollise tuusuusi ikkokisipa “Iyyesuse Uso qhamu Kristoose kodhdhisa” isi koro Ayhutattenu torruyapa inni kollisana oladhu.
6 Naqharray koro Ayhutatte torrakko inna haqisipa isi dhaghisana laalle tuususikki hisisipa hasa payu “Lammi k’eeqhte taahundhi pukkaqate taahundhina!
Ano qhoota haahundhi maallay anu kasqatamni,
lammi xaynu koru karo piyye koro ye koro Ayhutatte kodhdhu kulakka an ashshini!”
7 Hussa maallay haahanu illighipa karo manne qhawhossi ana payi Titos Iyostʼoose kula ashshoy,
qhawhusakka qhawho Haallikko kaanasa,
manne huusukka manne ghissoote koro Ayhutattena kaanta.
8 Qhawhossi manne ghissootattena wannito kodhdhi Kʼerspoose ana payi ahxke huusu manneete kaasa illakki Pogholho dhukkaysadhi,
koro katama Kʼorontʼosenna ho kisha Pawuloose iʼkʼaale torruyana apaqhipa dhukkaysadhu,
shoxatteka shoxadhu.
9 Pogholhokka Pawloosena awnate raettaki hasa na payi:
“Olo ghaapima qalli!
Olo kʼampayi!
10 Ano ho qaleye!
Katamina kittatte koro kisha an sheeghi,
qhawho ho kohxna toʼokokka ye qaghi.”
11 Hussa maallay Pawloose kʼaale Hallikkitoosi ini koro kollisana perko tookkopa karo ihhaama poghghi.
12 Kaaliyoosekka piyye Akkayiyanna tanynya kodhdhina koro Ayhutatte illeemi holipa Pawlooseema haqu,
karo manne qhaqhitate kulakka ashshonkittay.
13 Hasakka na payonki “Haadhi qhawhu onke hikke ye payutakki koro qhamu Haallikkoosi kaanasni kodhi!”
14 Pawloose immalse holasenu gharsadhina Kaaliyoose koro Ayhutattena ina payi:
“Hune he koro Ayhutatte kodhdha!
Dhekusa itʼtʼoste ho qhoota maghnito taakkinti dhappitte hiʼaasa payni ahxay kisse tahundhisi dhupaytetakki an hunena apaqhasni,
15 naqharray dheekko hahundhi qhoota kʼaalatepa qhoota makaxeete pana qhoota hikke tahundhi mallaki adhihate payni hxaso haahundhi!
Ano olho hasa lighanu qhaqhitte qhaqhesi anu woi.”
16 Hasi payipa qakkatte tanynyadhetena miinatte usundheesi lihasu.
17 Haattay koro kaasay wannitossi manne ghissoote koro Ayhutattena ana Sostinese payisi ighghapeppa manne qhaqhitate miinteema tubhbhayonki,
olissa kaasay ihasa kodhamadhana Kaaliyoose ye olo qallukka.
Pawloose Katama Antʼokiya Kulakki Holi
18 Pawloose katama Kʼorontosesa kuyyaqqe kishaki hesi dhukkaysadha kapeema oladhi tupettay iʼusundheesi nakayisadhipa karo piyye Soriya kula ashshoy,
Priskʼilapa Akʼilakka Uso qali qaghe,
naqharray qhooti Haallikkonu silatto xuli maallay ye ashshuna qharaʼita xayto ana payina Kinkiraoose saamattekki ihela kaso ghuni.a
19 Ikkatama Efesoonena hxafina Priskʼilapa Akʼilaasi haamati hxuri,
uso kapay manne ghissoote koro Ayhutatte kaleema xullippa koro Ayhutatte qale torruyadhe paayyu.
20 Qhamu usundhe qale ghayininu iʼuso watadhana iʼiishi.
21 Naqharray ina payina:
“Woʼoko Hallikkito kodhdhiti payni kuyyaqako pile an hollapa okkaya.”
Nakaleema katama Efesoone kulakki konkooma hadhdhipa ashshoy.
22 Katama Kʼisariyanna hxafnittay,
hahanu karo katama Iyyerusaaleme kula ashshoppa toʼokunkossi koro dhukkaysadhana nakayho payu tupettay ihholipa karo katama Antʼokiya kula oodhu.
23 Haamakka kuyyaqqe qhacʼa salu,
xaysa tupettay piyye Kelatiyapa piyye Firkiyana kitaʼita illalaghamipa isi koro dhukkaysadhaasi dhiktisa.
Apiloose Katama Efesooneppa ho Kʼorontoosenna
24 Qhawhosi katama Iskintiriyana dhaladhi makaxko huusu Apiloose ana payi qhawho piyye Ayhutattenakki karo katama Efesoone kula hxafi,
usokka qhawho Matʼaaffe Kʼulkʼullawheesi tomooma kolladhipa isi pareema qalliite ara.
25 Qhawho onke Pogholhitosikka kolladhipa Nasso Kʼulkʼullotakka isi shaʼapa qhoota Iyyesusessi tomooma isi torruyapa isi koro kollisa,
ikkodhdhitama kapay uso qhoota shoxadhe Yohannise kaaʼita pattaakki ari.
26 Usokka shahxuntetaakki mannessi ghissoote koro Ayhutatena kalla kʼaale Hallikkito torruye paayi,
naqharray Priskʼilapa Akʼila iʼuso apaqhenna iʼooqeppa manne huusundhi kula ashshonkittappa onke Haallikkitoosi pareema nu ishshighonkippa nu hiʼasonki.
27 Apiloose ikkaro piyye Akkayiya kula ashshanko woʼana korossi dhukkaysadha uso qale qaghakka qhamu ashshininu iʼuso dhiktise,
koro piyyisanakka qhamu usoosi hayhunkottay akkaninukka taptapee nu tooxonki,
ina kanta hxafinakka hessi teexakko Hallikkitottay dhukkaysadhenu kʼarkʼarsa kodhdhu.
28 Iyyesuse qhamu Kristoose kodhdhisa Kʼaalesi Matʼaafe Kʼulkʼullito kittattesi isi torruyapa tamakadhe dhammatakka korossi Ayihutattesi putu.