Pacuenia itsamatacabi anijanëbeje jiwi tsipaebaponaenabeje paliwaisi Dioso yapëtaeya-exanaenatsibeje, yabara peliwaisi
11
Bajaraxuacujinae, bajarapa-ángelewiyajuwënënë nerajuta piapianaebo. Nejumaitsi mapacueniaje:
—¡Nonotapunare! ¡Caponare mapanaeboje necaëjëbinexaa Dioso pijatemplobo, altar-jawa-ata! Namata-ëjëtsianamenua pajiwibeje bajarapatemplobota nawajëca Diosojawabelia.
2 ¡Itsiata, pëtsa caëjëtame templobopanabo, tsipaji bajarapapanabo Dioso tocopata abaxë apojudíowi, pamonae, apopeyaiyataewi Dioso, pejinawanapaenexa! Bajarapacuenia Dioso petocopatsixaetsi, bajarapamonae bijianaena petsapabataxuabicuenia ta-itapetsitomara, Jerusalén tomara, cuarenta y dos pajuametobeje.b Bajarapacuenia bejiobia-exanaponaena bajarapatomarata pejinawanapaewi, judíowi.
3 Bajarapamatacabianëjawa Dioso itorobiana anijanëbeje, profetanëbeje, petsipaebanajetarucaenexabeje paliwaisi Dioso yapëtaeya-exanaenatsibeje. Bajarapaliwaisi tsipaebanajetarucaenabeje jiwijawabelia mil doscientos sesenta pamatacabibeje.c Bajaraponëbeje naxatatsianabeje piayopapaëbërëjawa, bitso pesiwajamatabëcuenebëjaixaebeje tsane pamonae apopeyaiyataewi Jerusalén tomara.
4 Bajayatami, profetanëmi peyaquinaebaxutota comparación-cuenia tajëwelia jumaitsi bajaraponëbeje yabara mapacueniaje: «Anijanaebeje, olivonaebeje, anijajawabeje pijinia pitayotanucaejawabeje, nubenaena Dioso pitabarata, Ponë daxita mapanacuapijiwije pijatuxanenëd jai», —nejai ángelnë.
5 Itsajiwi itsa jamatabë-itsacueniabianatsibeje, bajaraponëbeje nayajiwitajuitsianabeje, pecuaibowojotowetsina pepitsapaecotiata, pitarunutsicotiata. Bajarapacuenia pepacuene werebiabiana pamonae picani jamatabëbeyaxuabatsibeje.
6 Bajaraponëbejee caëjëpaenatsibeje pitawetsinexabeje ema pejopaeyaniwa, daxita pamatacabibeje jiwi tsipaebanajetarucaenabeje paliwaisi Dioso yapëtaeya-exanaenatsibeje. Caëjëpaenatsibejenua mera-ata pejanara pexanaenexabeje. Caëjëpaenatsibejenua daxitawiria piayaicuene pecapitsapaenexabeje pamatacabita jitsipaenabeje.
7 Pepaebiweretsicujinaebeje jiwijawabelia, paliwaisi Dioso yapëtaeya-exanaenatsibeje, nexata bitso piayainë pitsapaenina pinijimëthëxanetojawatsina. Bajarapapiayainë tsimaxëpitsapaeninatsibeje, pebenexatsibeje. Nexata, pecuene-amoneyabijawatatsibeje, beyaxuabianatsibeje.
8 Nexata, petëpaenëbeje bocaenabeje pinijicallexanetojawata, pewënëjonetomara Jerusalén-pijicallejawata, patomarata bajayatami wajatuxanenë-ata cobematabiabarutatsi cruzajawabelia. Dioso pitapetsitomarami-ata, bajarapatomara yabara jiwi itsajawata jumaitsi tsabiabi: «Bajarapatomara cuenejëpa Sodoma, Egipto tomaramibeje», jai tsabiabi, tsipaji bajarapatomarapijiwi cuenejëpaeya bitso pibisiacuene exanawanapa.
9 Nexata, bajaraponëbeje petëpaenëbeje, bocaenabeje acueyabi pamatacabibeje epatua, tsipaji Jerusalén tomara pewetsiwi apotocopatsi tsane itsajiwi-ata pemëthëtsinexatsibeje. Nexata, daxitawiriajumewi daxitanacuanëpijiwi-ata, taeyabuatsianatsibeje.
10 Bajarapamatacabibejejawa, daxita mapanacuapijiwije, Dioso apopeyaiyataewi, jamatabëcuenebarëya tsane, petëpaexaebeje, tsipaji copiarucaena baja bajaraponëmibeje ayaicuenia pejamatabëcuene-itonotabiabijawami bajarapamonae. Bitso cajena pebarëyajamatabëcuene, fiesta exanaena. Namata-enetsia narajutsiananua amoneya itsacuenejawanë, petëpaejawabeje yabara.
11 Itsiata baitsi jane, acueyabi pamatacabibeje epatua itsa xainabeje petëpaecujinaebeje, icatsia Dioso asaëya-exanaenatsibeje petëpaejawawecua. Nexata, daxita cajena pamonae petaeyabuatsiwitsibeje petëpanucaejawabeje, bitso cujunawianatsibeje.
12 Bajaraxuacujinae, bajaraponëbeje jumetaenabeje, athëbëwetsica pinijijumeta pejumaitsijawatsibeje: «Pajunaiminabeje», pejaijawatsibeje. Nexata, bajaraponëbeje junaeniabeje athëbëabetsia itarërëbotuatuajëjawatsia. Daxita pitoyawitsibeje pëtaenubenaenatsibeje.
13 Bajarajane paepatota, ayaicuenia ira najëabiana. Nexata, Jerusalén tomarata ayaijawa bonë othopaena. Itsajota diez pabobeje najua-ena, caebo yajuwënëjopaponaena. Nueve pabobeje pijinia nacopataponaena. Siete mil pijinia pajiwibeje tëpaena, ira penajëabijawata. Jerusalén tomarata penacopabiwi, bitso cajena junawiana. Nexata, pecajunawi wënëxaniatsiaya Diosojawabelia jumaitsi tsane: «Diosomë, ayaijamatabëcuenenëmë bitso», jai tsane pecajunawi Diosojawabelia, athëbëtatsia pe-ecaenëjawabelia.
14 Anijapiayaicuenebeje rabaja panepa. Itsiata baitsi jane, icatsia itsajawa, acueyabijawa, piayaicuenejawa, bepijia najetarucaena.
Pacuenia siete ángelnë oba pijatrompeta, yabara peliwaisi
15 Sietenë jane baja, ángelnë, oba pijatrompeta. Nexata, athëbëwetsica pinijijumeta jumetaniji, pejumaitsijawa mapacueniaje:
«Copiapata jane baja, Wajatuxanenë Cristobeje, Diosobeje, peyanacua-ewetaponaponaejawabeje daxitanacuanëpijiwi, daxitamatacabijawabelianexa», pejaijawa jumetaniji athëbëwetsica.
16 Nexata, veinticuatro ponëbeje ancianowi, pe-enaewi pijatronota, Dioso pitabarata, daxita bajarapamonae irataeya bobena, penajamatabëcuene-itajëtsinexa asiwaya peyaiyataejawa Dioso.
17 Irataeya jumaitsi tsanubenae Diosojawabelia:
«Xamë, Petuxanenëmë, Diosonëmë, niajamatabëcuenesaënë daxita mapanacuanë pewetsiwiwecuaje. Xamë baja cajena, neponaponaenë daxitacuene ne-exanaewajënaeya. Ajena mapamatacabita-ataje, abaxë ponaponame. Daxitamatacabijawabelianexa-ata tsiteca neponaponaenë tsane. Pexaniajamatabëcuene pacarajutatsi, tsipaji baja taxuxuabame pinijisaëta newetaponaponaenexa daxita mapanacuanëpijiwije.
18 Daxita mapanacuanëpijiwije bitso cabara-anaepana. Bajaraxuata, tocopiapatatsi baja pamatacabi tsiwajënaecanaëjëtame, nenaneconitsia-exanaenexa daxita bajarapamonae, piasaëwi, petëpaewimi-ata. Tocopiapatatsinua baja pamatacabi tsiwajënaecanaëjëtame nijajiwijawabelia nerajutsinexa pexaniacuenejawanë pecatonacuenebawanapaematamo, pamonae profetawi, pamonaenua asiwaya pecawënëliwaisiyaiyataewi, ayaijamatabëcuene pexainaewi, beweliajamatabëcuene pexainaewi-ata. Nexata, pexaniacuene rajutsianame nijajiwijawabelia. Juya, werebiabianame daxita pamonae bijiana mapanacuapijiwije, pejamatabëcuenebijianaejawata Dioso peliwaisiwecua, pibisiacuene pexanawanapaenexa», jai tsanubenae irataeya ancianowi Diosojawabelia.
19 Nexata, athëbëtatsia Dioso pijatemplobo nabaupata. Bajarapatemplobo ënëtatsia taeyabuatsiajë Dioso penajumeliwaisixaniawaetsibaula.f Yamaxë binepajunujunua. Ayaicuenia-ata najumetajunujunua. Iranua najëaba. Bitso pecainejebimatarejetonë, granizojawanë, irabetsica othopaica pinijicuenia.