Pacuenia Juan tane ángelnë pecobenanucaejawa cuyalatobaxutoyo, yabara peliwaisi
10
Icatsia, taniji itsa-ángelnë, bitso piasaënë, athëbëwetsica perunaejawatsica mapanacuayabetsicaje. Bajarapa-ángelnë itarërëbotuatuajëta najetaruca. Natsimatatsënërutanajetaruca arawalibo. Itabaranaitayotanajetarucanua, pacuenia cotia-itsi matacabipijijuameto. Petopabeje pijinia cotiatsobia, pacuenia cotia-itsi isoto.
2 Cuyalatobaxutoyo baxupatanuca. Pecujuanenia pataxu nataxunutanuca manuameneboxowereca. Petsawenonenia pijinia pataxu nataxunutanuca irajumawereca.
3 Nexata, wawajai tsaxuabi ayaijumeta. Pacuenia newëthë bafiaba, bajarajume-itsi. Pewawajaitsaxuabicujinae, siete payamaxëbeje najumeta athëbëtatsia.
4 Yamaxë penajumetsicujinae, yaquinaejitsianë picani pajamatabëcuene yabara neyapëtaeya-exana yamaxë penajumetsijawa. Itacarajeta athëbëwetsica jumetaniji, tanejumaitsijawa mapacueniaje:
—¡Muetsia saya xainare pajamatabëcuene yabara cayapëtaeya-exana yamaxë penajumetsijawa! ¡Pëtsa yaquiname bajarapaliwaisi! —nejai athëbëwetsica.
5 Bajaraxuacujinae, ángelnë, ponë nataxunutanuca manuameneboxowereca, irajumawereca-ata, bajaraponë nacobeyotanuca athëbëabetsia, pecujuanenia pacobe.
6 Nexata, nacobeyotsiaya najumecapanepaeya pexaniajaijumeta jumaitsi tsanucae:
—Dioso pewënëta, ponë daxitamatacabijawabelianexa peponaponaenë, ponë caecuenia pexanaenë-ata mapanacuaje, itaboxo, manuamene-ata, bajarapacuenia mapanacuapijicueneje, itaboxopijicuene, manuamenepijicuene-ata yajawa pexanaenë, bajaraPonë pitabarata pacajumaitsitsi mapacueniaje: «Dioso pematatsënëa aponajamatabëcuenecataitsi tsane. Copiapatsijitsia rabaja pacuenia bajaraPonë tajëwelia najamatabëxaina pexanaenexa.
7 Nexata, paepatota siete ángelnë obiana pijatrompeta, bajarapaepatota rajane baja, Dioso taxuxuabiana pexanaejawa pacuenia baja cajena tajëwelia najamatabëxaina pexanaponaenexa jiwijawabelia, penaneconitsia-exanaponaejawata pijaneconijamatabëcuene. Muetsia pexainabuatsiliwaisimi itajëtsiana. Copiapatsiana jane baja pacuenia bajayata Dioso tajëwelia najumecapanepaeya jumaitsi profetawimijawabelia,» —jai tsanucae nacobeyotsiaya ángelnë.
8 Copiaya pajume jumetaniji athëbëwetsica tanejumaitsijawa, icatsia nejumaitsi mapacueniaje:
—¡Ponë ángelnë nataxunutanuca manuameneboxowereca, irajumawereca-ata, bajarapa-ángelnë cujiremelia! ¡Wecuapire pacuyalatobaxutoyo bajarapaponë baxupatanuca! —nejai athëbëwetsica.
9 Nexata, cujiliajë ángel-nëjawabelia. Wajëtajë tanerajutsinexa bajarapacuyalatobaxutoyo.
Tanerajutsijawata nejumaitsi mapacueniaje:
—¡Ãjã, pire baja! ¡Xaema! Mapacuyalatobaxutoyoje cuaiboxaicaename, pacuenia jabëra. Itsiata baitsi jane, necotsorotuabereca atsaxa tsane —nejai ángelnë.
10 Nexata baja, bajarapacuyalatobaxutoyo wecuapitajë. Xaniji jane baja. Taxaecujinae baja, cuaiboxaicajë, pacuenia jabëra. Itsiata baitsi jane, taquijonicujinae, tacotsorotuabereca atsaxa.
11 Nexata, icatsia ángelnë nejumaitsi:
—Orijibia, catsicaruca netsipaebijawa pacuenia Dioso siwanajamatabëxaina daxitanacuanëpijiwi, daxitawiriajumewi, caenacua canacujitsia, pewetsiwi-ata yabara, caenacua canacujitsia, pewetsinëanë-ata yabara —nejai ángelnë.