Pablo nawajunupaeba pejanagobernadornë Festo pitabarata
25
Festo itsa patajopa Cesarea tomarata, pexanaenexatsi gobernadornë, Félix pecowëta pewetsinexa, acueyabi pamatacabibeje pexainaecujinae, pona Jerusalén tomarabelia.
2 Nexata, Jerusalén tomarata sacerdotewi penamatacaitorobiwi, judíowi-ata, pamonae petuxanewi, Pablo neconitatsi pepëya gobernadornë Festojawabelia.
3 Bajarapamonae pinijicuenia wajëta gobernadornë Festojawabelia pitorobinexa pijajiwi petocaponaenexatsirena Pablo Jerusalén tomaraberena, peneconicanaëjëbinexatsi. Bajarapacuenia wajëta saya, tsipaji bajarapamonae najamatabëcuenewereta picani Pablo pebeyaxuabia-exanaenexa namuto-epatota, pecanajetarubenaejawatatsi.
4 Itsiata, Festo jumaitsi bajarapamonaejawabelia:
—¡Jume! Pablo raja naneconitsiaponapona Cesarea tomarata. Xanë raja caematacabibejecujinae ponaejitsianë Cesarea tomarabelia.
5 Paxamë papecanamatacaitorobiwi, tapëta naponaena Cesarea tomarabelia, Pablo pibisiacuene itsa exana, peneconitsinexa bajarajotalia —jai Festo bajarapamonaejawabelia.
6 Bajarapacuenia gobernadornë Festo pejumaitsicujinae, bajaraponë abaxë ponapona Jerusalén tomarata ocho pamatacabibeje, itsa jume, diez meta pamatacabibeje. Xuacujinae jane baja, pona Cesarea tomarabelia. Pepatsicujinae, merawia pitsijawata bajaraponë eca, itsajota nacua-ewetsinë ecabiaba, jiwi penaneconitsia-exanaenexa. Nexata, pijajiwi itoroba petocapatsinexatsi Pablo.
7 Pablo itsa jonena, nexata judíowi, Jerusalén tomarawerena pepatsiwi, matatoyorotsia imoxoyotatsi Pablo. Najumetsënëtsiaya neconitatsi be-ayaineconi pexainaenë. Itsiata baitsi jane, xua yabara picani Pablo neconitatsi, bajarapamonae apojumenamatamotsi peneconitsijawatsi.
8 Nexata, Pablo nayapijiwicuaicuaijai:
—Itsapibisiacuene-ata apo-exanaenë Dioso penajumecopatsiliwaisi Moisés-pijinëjawabelia, templobojawabelia, Romano nacua pewetsinëjawabelia-ata —jai Pablo Festojawabelia.
9 Nexata, Festo, judíowi pesiwajamatabëcuenebarëyanexatsi, yanijoba Pablojawabelia mapacueniaje:
—¿Jitsipame tsaja neponaejawa Jerusalén tomarabelia, bajarajotalia tacaneconitsinexa mapacuene yabaraje? —jai Festo.
10 Pablo nexata jumaitsi:
—Xamë rabaja, Romano nacua pepopewetsinë catocopata, nenaneconitsia-exanaenexa pibisiacuene pexanaewi. Nexata, xanë nucajë nitabarata majotaje. ¡Caecuenia neneconicanaëjëre paneconi xainajë! Bajaraxuata, apobene-itorobimë itsajawabelia tanenaneconitsia-exanaenexamë. Orijibia, xamë xaniawaetsia yapëtaneme itsapibisiacuene apota-exanaejawa judíowijawabelia.
11 Itsa pepacuene naneconitsipajë tatëpaejawabelianexa, nexata aponajamatabëxainaenë tsipae tawecuapanepaenexa tatëpaejawa. Itsiata baitsi jane, pacuenia mapamonae neneconitsia jumaitsije, apoxaniajai cajena. Nexata, acuenebi itsajiwi-ata tanecopatsinexa mapamonae pecobeyabeliaje, saya aneconijibia tanebeyaxuabinexa. Nexata jane baja, xanë cawajëtatsi tane-itorobinexamë nijatuxanenëjawabelia, Romano nacua pepopewetsinëjawabelia, bajaraponë pitabarata taneneconitsinexa —jai Pablo gobernadornë Festojawabelia.
12 Nexata, Festo barëcuaicuaijai pijajiwi, pejamatabëcueneyawenonaewitsi, peyapëtaenexa pacuenia exanaejitsia. Bajaraxuacujinae, jumaitsi Pablojawabelia:
—Xamë newajëtame taca-itorobinexa tajatuxanenëjawabelia, Romano nacua pepopewetsinëjawabelia, bajaraponë pitabarata pecaneconitsinexa pibisiacuene itsa exaname. Nexata, bajaraponëjawabelia ponaename —jai Festo Pablojawabelia.
Pepopeyanacua-ewetsinë Agripa nasiwaxaina Festojawabelia
13 Pablo pewajëtsicujinae gobernadornë Festojawabelia pitorobinexatsi Romano nacua pepopewetsinëjawabelia, caematacabibejecujinae, pepopeyanacua-ewetsinë Agripa,a pijawa Bereniceb yajawa, parena Cesarea tomaraberena, pebajacobinexabeje Festo, pejanagobernadornëxae.
14 Agripa, Berenicebeje caematacabibeje ponaponabeje Cesarea tomarata. Nexata, gobernadornë Festo tsipaeba Agripajawabelia Pablo yabara. Bajaraponë jumaitsi:
—Majotaje xainajë Pablo, naneconitsia peponaponaenë penaneconitsiwi pejebabiabibota. Félix abaxë mapanacua itsa ewetaje, bajaraponë naneconitsia-exanatsi.
15 Nexata, itsa ponajë Jerusalén tomarabelia, sacerdotewi penamatacaitorobiwi, judíowi pija-ancianowinua, neconitatsi Pablo xanëjawaberena. Bajarapamonae newajëta xanë tatocopatsinexa, bajaraponë pebeyaxuabinexatsi.
16 Nexata, xanë jumaitsinë bajarapamonaejawabelia: «Romano nacua raja pepopewetsinë pejamatabëcueneta apopacopatsinë itsajiwi-ata pebeyaxuabinexatsi, abaxë xaniawaetsia payapëtaenejewanë paneconi xaina. Bajaraxuata, itsajiwi pibisiacuene itsa exana, namatawenona pecuenetaewitsi pitabarata copiaya peneconitsinexatsi. Xuacujinae, pajiwi naneconita, bajarajota xanepana penayajiwicuaicuaijainexa paneconi yabara neconitatsi», janë bajarapamonaejawabelia.
17 »Nexata, pajudíowi yajawaparenajë Cesareajawawerena, merawia pitsijawata, xanë copiaya joneyajë ta-ecaenexa itsajota ecabiabajë jiwi itsa naneconitsia-exanaejitsianë. Nexata, tajajiwi itorobajë tanetocapatsinexa Pablo xanëjawaberena.
18 Itsiata baitsi jane, pamonae Pablo neconitatsi, itsa pata, aponeconitsitsi pibisianeconi pexainaejawa gobiernojawabelia yabara, pacuenia picani xanë canaëjëtajë.
19 Biji saya, judíowi neconitaponatsi Dioso pejumecowënëtsicuene yabara, pewajunupaebixaenua Jesús-wënënë petëpaecujinae, icatsia Dioso piasaëya-exanaejawatsi.
20 Nexata, xaniawaetsia apoyapëtaenë pacuenia exanaejitsianë bajarapacuene yabara. Nexata, yanijobajë Pablojawabelia itsa jitsipa peponaejawa Jerusalén tomarabelia, bajarajotalia peneconicanaëjëtsinexatsi.
21 Itsiata baitsi jane, Pablo newajëta ta-itorobinexa Roma tomarajawabelia, bajarajota wajatuxanenëbeje, Romano nacua pepopewetsinë, peneconicanaëjëtsinexatsi. Itsiata, abaxë xanë mapatomarataje Pablo naneconitsiaya ponaponaeya-exanajë tacaxinaejawabelia pamota itorobijitsianë. Bajaraxuacujinae, itorobianajë wajatuxanenëbeje, César Augustojawabelia —jai gobernadornë Festo.
22 Nexata, pepopeyanacua-ewetsinë Agripa jumaitsi Festojawabelia:
—Xanë-ata jitsipajë tajumetaejawa Pablo penawajunupaebijawa —jai Agripa.
Nexata, gobernadornë Festo jumaitsi bajaraponëjawabelia:
—Merawia rabaja jumetaename Pablo penawajunupaebijawa —jai.
23 Nexata, merawia pitsijawata pepopeyanacua-ewetsinë Agripa, pijawa Berenicebeje bitso naitabëtabeje, peyanacua-ewetsiwi pena-itabëtsicuenia. Nexata, naponabeje jiwi penacaetuatabiabiboxanetojawabelia. Pëyanatatsibeje wajabitsaë pepopewetsiwi, itsamonae Cesarea tomarapijipetuxanewi-ata. Penacaetuatsiboxanetojawalia pebarëjonecujinaebeje, gobernadornë Festo pijajiwi itoroba petocaponaenexatsirena Pablo.
24 Nexata, Pablo penawajunupaebiwajënaeya, Festo jumaitsi pepopeyanacua-ewetsinë Agripajawabelia, itsamonaejawabelia-ata:
—Agripa, peponeyanacua-ewetsinë, daxita paxamë-ata majotaje wajanajuanacaetuatsiwi, pataneme rabaja mapapebi nuca pane-itabarataje. Ayaibitsaëto judíowi, Jerusalén tomarapijiwi, bajaraponë neconitatsi xanëjawaberena Jerusalén tomaratalia. Bajara-icatsia pamonae tapëta naponarena Cesarea tomaraberena, bajara-icatsia pacuenia peneconitsinexatsi xanëjawaberena. Bajarapamonae wawajaiya nejumaitsi tsabiabi: «Pajitsipajë Pablo pebeyaxuabinexatsi», nejai tsabiabi.
25 Itsiata baitsi jane, xanë apoyapëtaenë paneconi yabara beyaxuabijitsiatsi. Maponë newajëta picani ta-itorobinexa tajatuxanenëjawabelia, Romano nacua pepopewetsinëjawabelia, bajaraponë pitabarata peneconitsinexatsi, itsa pibisiacuene exana. Bajaraxuata, itorobijitsianë bajaraponëjawabelia, juya peneconicanaëjëtsinexatsi.
26 Itsiata baitsi jane, apoyapëtaenë pacuene yabara toyaquinaejitsianë tajatuxanenëjawabelia. Bajaraxuata, daxita paxamë pane-itabarata Pablo penucaenexa pacatocapatatsi maberenaje, paneyanijobinexa paneconi yabara naneconita. Matatoxenetsia itsapewetsiwiwecua neyapëtaexae judíowi pecuene, jitsipajë xamë Agripa, nacua newetsinë, neyanijobinexa bajaraponë. Bajarapacuenia daxita paxamë paneyanijobicujinae, xanë yapëtaenajë xua yabara naneconita. Nexata, bajarapaliwaisi toyaquinaenajë tajatuxanenëjawabelia, bajaraponë peyapëtaenexa paneconi yabara Pablo itorobijitsianë bajaraponëjawabelia.
27 Acuenebi ta-itorobijawa maponëje tajatuxanenëjawabelia, yapëtaeya-exanaenejewanë paneconi yabara itorobijitsianë —jai Festo, pepopeyanacua-ewetsinë Agripajawabelia.