Pablo nawajunupaeba gobernadornë Félix pitabarata
24
Pablo Cesarea tomarata wajabitsaë pecapatsicujinaetsi, cinco pamatacabibejecujinae, Ananías, sacerdotewi pepopenamatacaitorobinë, parena Cesarea tomaraberena, judíowi pija-ancianowi, abogadonë-ata yajawa, ponë wenërubatsi Tértulo. Nexata, daxita bajarapamonae nubena gobernadornë Félix pitabarata, peneconitsinexatsi jane baja Pablo.
2 Wajabitsaë itsa caparenatsi Pablo penacaetuatsijawata, Tértulo taxuxuaba peneconitsijawatsi gobernadornë Félix-jawabelia mapacueniaje:
—Xamë, gobernadornëmë, xaniawaetsia newetsixae mapanacuaje, paxanë pajudíowinë bajayajebi aliwaisijibia pajinawanapajë. Xamë nejamatabëcueneta daxita mapanacuapijicuene, piabejejawanëmi, canaëjëtsiaya xanebia-exanaponame pewajënaeyabelia.
3 Bajaraxuata, barëyaya pacacopiapitabiabatsi, ayaijamatabëcuenenëxaemë, daxita patanesiwaxainaejawatamë, panacuanëjawa pajinawanapajë neyanacua-ewetsinacuata.
4 Cae-epatoyo saya ajena pacajamatabë-itonotsianatsi. ¡Pexaniacuene paneto-exanare, patanenamuxuna-ewetsinexamë caejumeyobeje!
5 Payapëtaniji baja cajena maponëje Pablo bitso piacujirubejenëcuene. Daxitanacuanëjawa, itsaxuayo judíowi jinawanapa, bajaraponë peliwaisita anaeya-exanapona, penawecuanatsanaenexa. Mara ponëje Nazaret tomarapijinëmia petsipaebiliwaisi pejumexaniataewi, penamatacaitorobinëje.
6 Mara ponëje Dioso pijatemplobo Jerusalén tomaratalia jamatabëbijiana picani, bepenaxuirabibo penacopatsinexa Dioso pitabarata, pebarëjonejawata apojudíonë templobo-ënëalia. Bajaraxuata, pawaetabajë, patananeconitsia-exanaenexa pajudíowinë patajaliwaisi patane-itorobicuenia.
7 Jamatabëpabeyaxuabajë picani, patanetsitananeconitsixae. Itsiata baitsi jane, itacarajeta wajabitsaë pepopewetsinë, comandante Lisias, barëpata pijajiwi. Pinijisaëta paneyacajërëta Pablo. Nexata, comandante Lisias panejumaitsi: «Pajiwi jamatabëneconita Pablo, ponae gobernadornë Félix-jawabelia bajaraponë pitabarata peneconitsinexa», panejai.
8 Nexata, xamë, itsa yanijobianame maponëje Pablo, yapëtaename baja daxita pexaniajaijawa xua pacatsipaebatsi, Pablo pexanaejawa yabara —jai Tértulo gobernadornë Félix-jawabelia.
9 Judíowi, bajarajota Tértulo pemuxuneneta penubenaewi-ata, bajarapacuenia daxita jumaitsi Félix-jawabelia.
10 Bajarapamonae penajumeweretsicujinae, gobernadornë Félix nacobeyota, juya Pablo penawajunupaebinexa. Nexata, Pablo jumaitsi:
—Yapëtaniji baja cajena xamë ponaponame bajayajebi mapanacuapijiwije nenaneconitsia-exanabiabijawa juez-nëcuenia. Bajaraxuata, barëyanë tacanacuenewajunupaebinexa ajena xua exanaponaponajë.
11 Itsa xamë jitsipame neyapëtaejawa taxaniajaijawa, nexata yanijobianame itsamonaejawabelia. Ajena raja abaxë saya xainajë doce pamatacabibejeb tapatsicujinae Jerusalén tomarata, tanajamatabëcuene-itajëtsinexa Diosojawabelia, pijatemplobota ta-asiwajawa, tayaiyataejawa-ata, pejitsipaecuenia tato-exanaejawata.
12 Mapamonaeje aponetae anaeya tabarënajumenotsijawa itsamonaejawabelia templobota, judíowi pijasinagogabonëjawa-ata. Aponetaenua tomaranëjawa jiwi ta-anaeya-exanaponaejawa tatsipaebiliwaisita.
13 Caejiwi-ata bajarapamonaeyajuwënëjiwi acuenebi peyapëtaeya-exanaenexa pexaniajaicuene xua yabara neneconita xamë nitabarata, tsipaji aponetaec bajarapacuenia ta-exanaejawa.
14 Caejawa yabara itsiata bajarapamonae xaniajai. Xanë baja cajena tajumecowënëtaponaponaenë patajasalinaiwi pijaDioso, xua bajarapamonae wënëruba pejanaliwaisi, aitothiacuenia pecujarubiliwaisi. Bajarapamonae ayaicuenia itoya bajarapaliwaisi. Bajarapacuenia jumecowënëtsiaponaponae-atanë Dioso, xanë tsiteca jumexaniataniji Dioso penajumecopatsiliwaisi Moisés-pijinëta, profetawi-ata, peyaquinaeliwaisianë.
15 Pacuenia bajarapamonaeyajuwënëwi jumexaniatane Dioso icatsia piasaëya-exanaejawanexa petëpaewimi, pexaniajamatabëcuenewimi, pibisiajamatabëcuenewimi-ata, bajarapacuenia xanë-ata jumexaniataniji.
16 Bajaraxuata, bitso jitsipajë najamatabëcuenebijianaenejewanë xaniawaetsia taponaponaejawa, Dioso pitabarata, daxitajiwi-ata pitabarata.
17 »Bajayajebi wecuaponaponajë Jerusalén tomarata. Pamatacabi icatsia patajopajë, tocanajetarucajë palata tarajutsinexa bepejiobiwi, judíowiyajuwënëwi, tarajutsinexanua ofrenda Diosojawabelia templobota.
18 Bajarajane xuacujinae, ponajë templobojawabelia tarajutsinexa ofrenda. Paepatota weretajë baja tanajamatabëcuenexaniawaetsijawa Diosojawabelia, pajudíowinë patanetonajumecopatsicuenia Dioso pejumeliwaisibaxutota, bajarapaepatota judíowi, Asia nacuapijiwi, necaxitajaraba templobota. Bajarajota, apoyajawanucaenë ayaibitsaëto. Daxita templobopijiwi yãĩjai. Ajumejibia saya jinawanapa. Caejiwi-ata apo-anaeya-exanaenë tatsipaebiliwaisita templobota.
19 Biji rajane, pamonae judíowi, Asia nacuawerena pepatsiwi, cuenematapita jiwi pianaepanaeya-exanaejawa. Nexata, bajarapamonae itsa necuenetane pibisiacuene ta-exanaejawa, beparena jane baja maberenaje taneneconitsinexa.
20 Bajarapamonae itsa apopatsi, nexata mapamonae penubenaewije, wecaeta-itabëta catsipaebi paneconi netocaxitajaraba, pamatacabi nucajë pitabarata sacerdotewi penamatacaitorobiwi, judíowi pija-ancianowi, judíowi pecujarubiwi-ata.
21 Saya meta caeliwaisiyo bajarapamonae catsipaebiana xanë taliwaisi, tsipaji pamatacabi nucajë bajarapapewetsiwi pitabarata, ayaijumeta jumaitsinë: «Mapamatacabitaje paxamë paneneconitsianame, tsipaji jumexaniataniji Dioso icatsia piasaëya-exanaenexa jiwi petëpaecujinae», janë. Nexata, meta bajarapacuenia tajumaitsijawa yabara bajarapamonae jamatabëneneconita xamëjawabelia —jai Pablo Félix-jawabelia.
22 Gobernadornë Félix xaniawaetsia yapëtane papejanaliwaisi yabara Pablo jumaitsi. Itsiata, apojitsipae caecuenia penaneconitsia-exanaejawa Pablo, yanijobinejewa Lisias-jawabelia. Nexata, Félix jumaitsi Tértulobanajawabelia, Jerusalén tomarawerena pepatsiwijawabelia:
—Itsa patsiarena wajabitsaë pijacomandante, Lisias, yapëtaenajë pacuenia exanaejitsianë Pablojawabelia —jai.
23 Nexata, Félix itoroba wajabitsaë pijacapitán-jawabelia xaniawaetsia pebarë-ewetsinexa, Pablo penajetabijirawiyaniwa. Tocopatanua peponaponaenexa cëtsinejewatsi, peyapëtaewitsinua pesiwaxainaenexatsi, perajutsinexatsinua penamatawenonaejawaxi.
24 Bajaraxuacujinae, caematacabibejecujinae, gobernadornë Félix icatsia pata pijawa yajawa, Drusila.d Bajarapowa judíowa. Patabeje peyanijobinexabeje Pablo, Jesús peliwaisi yabara. Nexata, Félix itoroba pijajiwitonë petojunatsinexatsi Pablo. Nexata, itsa Pablo pata bajarapajiwibeje pitabarata, bajaraponë tsipaeba bajarapajiwibejejawabelia, jiwi pesiwanajamatabëcuenecopabaponaejawanexa Jesucristojawabelia.
25 Itsiata, itsa Pablo paeba pacuenia Dioso itoroba jiwi pejinawanapaenexa, pibisiacuene exanaenejewa Dioso pitabarata, pacuenia jiwi benajamatabëcuenecataita pibisiacuene pexanaeyaniwa, pacuenianua itsamatacabi Dioso naneconitsia-exanaejitsia daxita pibisiacuene pexanaewi, nexata gobernadornë Félix najunawiaca. Nexata, bajarajota bajaraponë jumaitsi Pablojawabelia:
—¡Pitsapare baja abaxë! Icatsia, cajunatsianatsi itsajota cuenesajinajë, pematatsënëa tanetsipaebinexamë bajaraxua yabara —jai.
26 Gobernadornë Félix jamatabëjumaitsi Pablo yabara: «Pablo meta nerajutsiana palata, tacopatsinexa penaneconitsijawawecua», jamatabëjai. Bajaraxuata, napëna pijajiwi itorobabiaba Pablo petojunatsinexatsi, pebarëcuaicuaijainexatsi.
27 Anijawaibeje bajarapacuenia Félix pijajiwi itorobabiaba Pablo petojunatabiabinexatsi, itsiata Pablo aporajutsiapaebi palata, pepitsapaenexa. Belia baja, Félix wecuapitsapa gobernadornëcuene, juya Porcio Festo penacopatsinexa Félix pecowëta. Félix baja pitsapae-ata, itsiata Pablo apotocopatsitsi pepitsapaenexa penaneconitsijawawecua, tsipaji jitsipa judíowi pesiwajamatabëcuenebarëyanexatsi.