Pablo pona Jerusalén tomarabelia
21
Itsa baja, panapëjiobiweretajë ancianowi, Éfeso tomarapijiwi, Mileto tomarata, panarunarecajë baja barco ënëabereca, patanaponaenexa rowialia Cos tomarabelia. Bajaraxuacujinae, merawia pitsijawata, panapatajë abaxë epatua Rodas tomarata. Bajaraxuacujinae, abaxë icatsia panapatajë Pátara tomarabelia.
2 Bajarapatomarata icatsia pacaxitajarabajë itsabarco, pamo ponaejitsia Fenicia nacuayabelia. Bajarapamota icatsia panaponajë jane baja.
3 Nexata, patanajetarubenaejawata, pataeyetajë patatsawenonenia Chipretunaeto. Rowia panajetarubenajë Siria nacuayabelia. Nexata itsa baja, papatajë Tiro tomarata, Siria nacuata pe-ecaetomara, bajarapamo pecanajetarubenaewi bajarapatomarata juca-othopa abaxë bajarajota.
4 Tiro tomarata pacaxitajarabajë Jesús pijacuene penacujarubiwi. Nexata, bajarapamonaejawata panajinawanapajë siete pamatacabibeje, barco abaxë pewecuajucae-epato. Bajarapamonae Espíritu Santo pejamatabëcueneta yapëtaeya-exanatsi Pablo pebejiobia-exanaejawanexatsi Jerusalén tomarata. Picani asaëyata muxujiobatsi peponaeyaniwa bajarabelia, pitsacueniabiyaniwatsi.
5 Itsiata baja, icatsia siete pamatacabibejecujinae panaropobajë. Nexata, bajarapatomarapijiwi panepënaponalia pewëpajawabelia, patanepëtaenexa pataponaejawa. Nexata, mene-itapatalia, pataponaewajënaeya, tajetabota daxita Jesús peliwaisi pejumexaniataewi, pijawajiwi, pexi-ata yajawa, panubenajë patamatabacabëta, patawajëtsinexa Diosojawabelia.
6 Patanapëjiobijawata nawëwaetabiaya namata-enetsia panapëjiobaponajë. Bajaraxuacujinae baja, panarunarecajë barco ënëabereca. Bajarapamonae pijinia nawiabaponalia pijabonëjawabelia.
7 Tiro tomarata patananaropobicujinae, panapatajë Tolemaida tomarabelia. Bajarapatomarata pabajacobajë Jesús peliwaisi pejumexaniataewi. Bajarapamonaejawata panajinawanapajë caematacabi.
8 Merawia icatsia pitsijawata paponajë Cesarea tomarabelia. Bajarapatomarata patapatsicujinae, panapatajë Felipe pijabota, Jesús peliwaisi petsipaebinë jiwijawabelia. Bajaraponë siete ponëbeje diáconowiyajuwënënë,a copiaya pitapetsiwi Jerusalén tomarata. Nexata, bajaraponë pijabota panajinawanapajë.
9 Felipe xaina cuatro powabeje pexi, abaxë apopenacojiobiwaxi. Bajarapowaxi tsipaebabiaba jiwijawabelia paliwaisi Espíritu Santo jamatabëcuenecaëjëpaeya-exanatsi.
10 Itsa baja, paxainajë anijamatacabianë Felipe pijabota patanapatsicujinae, Judea nacuawerena pata Diosojumepaebinë, profeta Agabo.
11 Bajaraponë pata paxanëjawaberena. Nexata, Pablo pijacorreabocoto we-epajonotatsi. Bajarapabocotota nacobecëtabeje. Nataxucëtabeje yajawa. Nexata, Agabo jumaitsi:
—Espíritu Santo raja neyapëtaeya-exana mapacueniaje: «Jerusalén tomarata pamonae judíowi jinawanapa, mapacorreabocoto pexainaenëje cëtsianatsi bajarapacuenia. Bajaraxuacujinae, apojudíowi pecobeyabelia copatsianatsi», nejai raja Espíritu Santo —jai Agabo Pablo yabara.
12 Nexata, itsa pajumetaniji bajarapacuenia Agabo patanetsipaebijawa, paxanë patayanatsiwi, Cesarea tomarapijiwi yajawa, panacobena-asiwanë picani Pablo peponaeyaniwa Jerusalén tomarabelia.
13 Itsiata, Pablo panejumaitsi:
—¿Detsa xuajitsia panuame? Bajarapacuenia itsa pa-exaname, bitso panenajamatabëxainaeya-exaname. Aponasiwabëjanë bajarapacuenia tane-exanaejawanexa. Biji rajane, aponacaewetsinë tsane ëtanecëtsijawanexa. Nacaewetsianajënua tanebeyaxuabijawanexa Jerusalén tomarata, wajatuxanenë Jesús peliwaisi yabara —panejai Pablo.
14 Pa-asiwa-atanë tsabiabi, Pablo itsiata aponajamatabëcopatsi peponaejawa Jerusalén tomarabelia. Nexata baja, belia pacopatajë pata-asiwatsabiabijawa.
Pajumaitsinë nexata:
—Pacuenia Dioso tojitsipatsi pexanaenexatsi, be-exanaenatsi baja —pajanë.
15 Caematacabibejecujinae, paxaniawaetajë patacobecowëjawaxi. Nexata jane baja, panaropobajë Jerusalén tomarabelia.
16 Itsamonae Jesús pijacuene penacujarubiwi, Cesarea tomarapijiwi, paneyanalia. Bajarapamonae panebarëpona Mnasón, Chipretunaeto nacuapijinë, pijaboyabelia, itsajota panajinawanapaejitsianë Jerusalén tomarata. Bajaraponë copiaya Jesús peliwaisi pejumexaniataewiyajuwënënë, pamatacabijawa jiwi taxuxuaba Jesús peliwaisi pepaebanajetarubenaejawa.
Pablo barëcuaicuaijai Santiagojawabelia Jerusalén tomarata
17 Itsa papatajë Jerusalén tomarabelia, Jesús peliwaisi pejumexaniataewi panecopiapita jamatabëcuenebarëyaya.
18 Nexata, merawia pitsijawata, Pablo panebarësiwaxaina Santiagojawabelia. Bajaraponë pijabota na-ena daxita ancianowi.
19 Nexata, Pablo bajarapamonae bajacoba. Bajaraxuacujinae, nawajunupaebapona daxita pacuene Dioso exanapona apojudíowijawa, Pablo pejamatabëcuene.
20 Itsa bajarapacuenia jumetane, nexata Santiago, ancianowi yajawa, jamatabëcuenebarëya. Nexata, bajarapamonae wënëxaniata Dioso pexanaecuene yabara. Bajaraxuacujinae, Santiagobana jumaitsi Pablojawabelia:
—Patajabananë, yapëtaneme baja cajena mapacueneje. Judíowi bitso ayaibitsaëtoxaneto, miles pajiwibeje, Jesús peliwaisi pejumexaniataewi tsawanapae. Itsiata, abaxë bajarapamonae tsiteca jumecowënëtawanapa Dioso penajumecopatsiliwaisi Moisés-pijinëta.
21 Bajarapamonae raja, jumetane xamë netsipaebiliwaisi yabara. Najumetsënëtsiaya itsamonae judíowi, pepatsiwi panacuawerena xamë tsipaebanajetarucame, mapacuenia pejumaitsijawaje: «Itsa raja Pablo liwaisi tsipaebapona judíowijawa, itsanacuanëjawa pejinawanapaewi, bajaraponë itawetabiaba judíowi, pecopabinexa Dioso penajumecopatsiliwaisi Moisés-pijinëta pejumecowënëtsijawami, pecopabinexa pebo-upiperabëcaucubijawa pexi, pecatsitecaeyaniwanua wajasalinaiwi pijacuene», jai tsabiabi bajarapamonae najumetsënëtsiaya xamë yabara.
22 »Bajaraxua yabara xamë liwaisi natsixainame bajarapamonaejawabelia. ¿Detsa nexata paxanë pa-itsinë tsane, itsa bajarapamonae cawënëliwaisitane nepatsijawa?
23 Liwaisiyaniwa pajitsipajë ne-exanaejawa mapacueniaje. Majotaje cuatro ponëbeje jinawanapa, paxanëyajuwënëwi, penajamatabëcueneweretsiwi najumecapanepaeya penajumecajonenexa Diosojawabelia, nazarenocuenia pejinawanapaenexa.b Nexata, bajarapamonae ponaejitsia temploboyabelia, pexanaenexa judíowitsi wajanacatocaëjëtsicuenia Dioso penajumecopatsiliwaisi Moisés-pijinëta.
24 Nexata, xamë bajarapamonae barëponaename temploboyabelia. Bajarajotalia barënajamatabëcuenexaniawaetsianame niajamatabëcuenesaënexa Diosojawabelia. Tomatamotsianamenua bajarapamonae daxita xua wajëcaejitsiatsi bajarapacuenia pexanaenexa, daxitamatana̱mi pematacasibinexatsi-ata, penajamatabëcuene-itajëtsinexa penacajonejawa Diosojawabelia. Daxita bajarapacuenia itsa barë-exanaename, nexata daxita judíowi cayapëtaena xaniawaetsia nejumecowënëtsijawa Dioso penajumecopatsiliwaisi Moisés-pijinëta. Yapëtaenanua najumetsënëtsiaya pecabaracuaicuaijaitsabiabijawa pajudíowi jume-aeba Jesús peliwaisi.
25 »Xua ajena paca-itorobatsi, apojumaitsinë apojudíowi pexanaenexa bajaraxua. Bajarapamonae tsicarucatsi pexanaenexa saya pacuenia patoyaquinajëc apojudíowi, Jesús peliwaisi pejumexaniataewi. Bajarapabaxutota pajumaitsinë mapacueniaje: «¡Pëtsa paxaneme jumapecataeya pexanaenëanëjawabelia ofrendacuenia perajutsiyajuwënëwijawanë, pejajawanë, cuaibocuetsanaeya pebeyaxuabinë pewijawanë-ata! ¡Pëtsa pibisiacuene panewitota pa-exaname paxamë apopanenacojiobiwi! ¡Paxamë pijinia panenacojiobiwi-ata, pëtsa pibisiacuene panawecua-exaname panewitota itsajiwijawabelia!», pajanë patatoyaquinaejawata apojudíowijawabelia, pecatsitecaeyaniwa judíowitsi daxita wajajumecowënëtsicuene —jai Santiagobana Pablojawabelia.
Pablo templobota waetabatsi, penaneconitsiwi pejebabiabibota pe-etsinexatsi
26 Santiagobana pitorobicueniatsi, merawia pitsijawata, Pablo barëpona cuatro ponëbeje temploboyabelia. Templobo pejonewajënaeya, barënajamatabëcuenexaniawaeta. Bajaraxuacujinae, Pablo temploboyalia barëjoneya, petsipaebinexa sacerdotewijawabelia pamatacabibeje jinawanapaejitsia nazarenowicuenia. Yapëtaeya-exananua dajubi rajutsiaya petotajuitsinexa altar-jumata Diosojawabelia, petowerewerecaematacabitsi nazarenowicuenia pejinawanapaejawa. Nexata, picani, daxita bajaraxuanë Pablo cobecowëmatamotsijitsia pecanajetsiwijawabelia.
27 Pepuaweretanajetarubenae baja siete pamatacabibeje, nazarenowicuenia pejinawanapaejawa, Pablo jane baja, cuatro ponëbeje, barëpata templobota, Diosojawabelia rajutsiaya petotajuitsinexa dajubi altar-jumata. Bajarapitsijawata Pablo tanetsi judíowi, Asia nacuawerena pepatsiwi. Bajarapamonae peliwaisita anaeya-exanapona daxita Jerusalén tomarapijiwi, pianaepanaenexa Pablojawabelia. Nexata, daxita bajarajota penacaetuatsiwi, judíowi, nacobenawaetabatsi Pablo.
28 Nexata, bajarapamonae wawajai pinijijumeta. Najumetsënëtsiaya jumaitsi:
—Tajamonae judíowi, ¡naxatsia, paneyawenonare! Maponëje daxitanacuanëjawa liwaisi tsipaebanajetaruca apowajanacanatsixanepanaeliwaisicuenia, apojudíowi wajanaca-itoyanexa waxaitsi judíowitsi. Itawetaponanua Dioso penajumecopatsiliwaisi Moisés-pijinëta jiwi pejumecowënëtsiyaniwa. Mapatemplobo-ataje apoyaiyatae, tsipaji apojudíowi-ata barëjoneyabiabad mapatemploboyarenaje. Bajarapacuenia pexanaexae, mapatemploboje bepenaxuirabibocuenia nacopata Dioso pitabarata. Bajaraponë cajena pexanaecuene abeje —jai najumetsënëtsiaya judíowi Pablo yabara.
29 Bajarapacuenia wawajaiya jumaitsi, tsipaji baja copiaya bajarapajudíowi Pablo tanetsi pebarëponaponaejawa Jerusalén tomarata, apojudíonë, Trófimo, Éfeso tomarapijinë. Nexata, bajarapamonae jamatabëjumaitsi: «Pablo raeta apojudíonë barëjunua mapatemploboyarenaje», jamatabëjai Trófimo yabara. Itsiata, Pablo cajena apobarëjone Trófimo temploboyalia.
30 Nexata, Asia nacuawerena pepatsijudíowi, bajarapacuenia Pablo yabara penajumetsënëtsixae, daxita Jerusalén tomarapijiwi, bitso bara-anaepanatsi. Nexata, daxita bajarapamonae tsimaxëparenatsi pewaetabinexatsi. Robobocatsi wayafuabelia templobo-ënëwecua, pebeyaxuabinexatsi picani. Nexata, templobo pewetsiwi baupaxanetonë bepijia wecuabaupaxataba, pianaepanaewi pejoneyaniwa.
31 Paepatota picani bajarapamonae Pablo beyaxuabijitsiatsi, bajarapaepatota itsamonae tsipaeba wajabitsaë pepopewetsinë, comandantejawabelia, pacuenia daxita Jerusalén tomarapijiwi bitso anaepanawanapa.
32 Nexata, comandante bepijia barëlia pijajiwi wajabitsaëwi, wajabitsaëwi pijacapitánwie yajawa. Cujinaejina jiwi penacaetuatsijawabelia. Nexata, judíowi itsa tane comandante wajabitsaëwi pebarëpatsijawa, copaba baja pebejawatsi Pablo.
33 Nexata, comandante Pablo cujirenatsi. Waetabia-exanatsi pijajiwi. Nexata, itoroba pijajiwi Pablo pecëtsinexatsi anijacadenamaëtotabeje. Bajaraxuacujinae, yanijoba judíowijawabelia.
—¿Detsa maponëje? ¿Detsa xuanua exana maponëje? —jai comandante.
34 Nexata, bajarapajiwibitsaëtoxanetonëyajuwënëwi comandantejawabelia najuatsipaebanubena pinijijumeta, itsiata caeliwaisicuenia aponeconitsitsi Pablo. Nexata, comandante apojumetae xaniawaetsia, bitso jiwi penajuawawajaixae. Nexata, comandante itoroba wajabitsaë Pablo pecaponaenexatsi wajabitsaë pijaboyabelia.
35 Pablo capatatsi wajabitsaë pijabo-itapata. Bajarapabo pepënëwelia xaina be-escaleracuenia pexanaejawa. Nexata, bajarajota Pablo wajabitsaë nacobenayotsiaya cajunayatsi, wajabitsaë pijaboyalia pecajonenexatsi, tsipaji icatsia bajarajota picani Pablo jiwi bejitsiatsi, bitso pianaepanaexae.
36 Jiwibitsaëtoxanetonë Pablo barabocabuataponatsi. Wawajai tsabuataponae bajarapamonae.
—¡Pabeyaxuare! —jai tsabuataponae Pablo yabara.
Pablo nawajunupaeba judíowibitsaëtoxanetojawabelia
37 Itsa baja Pablo wajabitsaëwi pijaboyalia cajonejitsiatsi, nexata Pablo griegojumeta jumaitsi comandantejawabelia:
—¡Netocopare tacatsipaebinexa caejumeyo! —jai Pablo.
Nexata, comandante jumaitsi:
—¿Xamë tsaja cuaicuaijamë griegojume?
38 ¿Xamë tsaja apo-Egipto nacuapijinëmë? ¿Xamë tsaja imata jiwi aponenamatacaitorobinë, pianaepanaenexa gobiernojawabelia? ¿Xamë tsaja imata penamaxëwanitsiwi cuatro mil ponëmaxëto apobarënajetabijirawimë petusatonacuayabelia? —jai comandante Pablojawabelia.
39 Nexata, Pablo jumaitsi:
—¡Jume raja! Xanë raja saicaya judíonënë, Tarso tomarapijinënë. Bajarapatomara cajena pinijitomara, daxita Cilicia nacuata pe-enaetomaranëwecua. ¡Pexaniacuene neto-exanare! ¡Netocopare liwaisi tatsipaebinexa mapamonaejawabeliaje! —jai Pablo.
40 Nexata, comandante tocopatatsi liwaisi petsipaebinexa. Pablo penucaenë wajabitsaë pijabo pepënëwelia be-escaleracuenia pexanaejawajumata, nacobeyota jiwi pemoyanexa. Nexata baja, jiwi itsa moya, Pablo nawajunupaeba bajarapamonaejawabelia hebreojumeta.