Pablo najetaruca Macedonia nacuajawa, Grecia nacuajawa-ata
20
Itsa baja, Éfeso tomarapijiwi jamatabëcaewa pianaepanaejawa, nexata Pablo junata penacaetuatsinexa daxita Jesús pijacuene penacujarubiwi, pemuxujiobinexa pewajënaeyabelia piajamatabëcuenesaëtsawanapaenexa pitaxutuajamatejemajawa Dioso. Bajaraxuacujinae, napëjioba. Pona baja Macedonia nacuayabelia.
2 Pepatsicujinae bajarapanacuata, bajaraponë jane baja taenajetaruca caetomara canacujitsia, itsajota Jesús peliwaisi pejumexaniataewi jinawanapa. Pexaniacuenia muxujiobapona caebitsaëto canacujitsia Jesús pijajiwi, pewajënaeyabelia piajamatabëcuenesaëtsawanapaenexa pitaxutuajamatejemajawa Dioso. Bajaraxuacujinae, pata Grecia nacuata.
3 Bajarapanacuata ponapona acueyabi pajuametobeje. Bajaraxuacujinae, picani, Pablo barcota naponaejitsia Siria nacuayabelia. Itsiata, itsa nayajumetane Siria nacuata judíowi pewajënae-ewetsijawatsi pebeyaxuabinexatsi, Pablo najamatabëxaina icatsia pecowëya penawiatsinexa matatsënëa Macedonia nacuajawa.
4 Pamonae Pablo yanatatsi, mapewënëanëje. Pirro pexënato, Sópater, Berea tomarapijinë, Aristarco, Segundobeje, Tesalónica tomarapijinëbeje, Gayo, Derbe tomarapijinë, Timoteo, Listra tomarapijinë, Tíquico, Trófimobeje-ata, Asia nacuapijinëbeje. Daxita bajarapamonae Pablo yanatatsi. Nexata, Pablo itsa barëpata Filipos tomarata, xanë Lucasnë, necaxitajaraba.
5 Nexata, daxita pamonae Pablo yanatatsi, namataxainaeya baja ponalia Troas tomarabelia, bajarajota patane-ewetawanapaenexabeje. Paxanëbeje, Pablobeje abaxë panacopatajëbeje Filipos tomarata, Macedonia nacuata pe-ecaetomara.
6 Nexata, pepuawerewerecae baja pafiestajawa judíowi baxane levadurata matajërëabinejewa pexanaepan, matapania paxanëbeje Filipos tomarata barcota pananaropotajëbeje, pataponaenexabeje jane baja Troas tomarabelia. Cinco pamatacabibejecujinae, papaliajëbeje bajarapatomarabelia. Nexata, pamonae pane-ewetawanapabeje, bajarajota panamataëxënajëbeje baja. Nexata, abaxë Troas tomarata pajinawanapajë siete pamatacabibeje.
Peponaewajënaeya, Pablo cujaruba Dioso peliwaisi peyamatacabijawabelia, Troas tomarata
7 Troas tomarata domingomatacabi panacaetuatajë Jesús pijacuene penacujarubiwi yajawa, patanajamatabënapitsinexa xua yabara Cristo panesiwatëpa. Pablo nexata liwaisi tsipaeba merawituatuajëjawabelia, tsipaji merawia pitsijawata, bajayacunua, naropotsijitsia Mileto tomarabelia.
8 Panacaetuatajë athëbëyo pënëyatu-ucubibota, acueyabi pa-irabejejawatatsia. Bajarajotatsia pitayotsijawanë ayaijawa rubena, xaniawaetsia pitayotsinexa.
9 Nexata, pewëjëato, Eutico, ventanajawata eca. Belia, pewëjëato bitso itamajitsipaneca, Pablo bajayajebi liwaisi petsipaebixae. Nexata, Eutico baja majiteca. Pemajitecaenë jopareca acueyabi pa-irabejejawawereca. Nexata, itsa siwarunareca, peyotsinexa, caxitajaraba baja petëpaenë.
10 Nexata, Pablo siwarunareca. Tsijumabocajunua. Petëpaenë wëwaetaba. Nexata, Pablo jumaitsi Jesús pijajiwijawabelia:
—¡Pëtsa panajamatabëxainame! Asaë rabaja icatsia pewëjëato —jai Pablo.
11 Bajaraxuacujinae, Pablo icatsia caewëa junaya athëbëyo pënëyatu-ucubibojawabetsia. Bajarajotatsia, epatsënëca jane baja pan, petsicobetsanaenexa, daxita Jesús peliwaisi pejumexaniataewi pexaenexa, penajamatabënapitsinexa Jesús pesiwatëpaejawatsi. Bajarapacuenia pexanaecujinae, abaxë icatsia Pablo bajayajebi cuaicuaijai tsecae peyananianaejawabelia. Bajaraxuacujinae jane baja, pona Mileto tomarabelia.
12 Nexata, pewëjëato, Eutico, piasaënë barënawiabatsi pijaboyabelia. Bajaraxua yabara barëya bitso daxita Jesús pijajiwi.
Pablobana naropoba Troas tomarata, pepatsinexa Mileto tomarabelia
13 Paxanë Pablo panenamataxainaeya-exana, barcota menia patanaponaenexa Asón tomarabelia. Pablo pijinia matatsënëa najetarucaejitsia. Bajaraponë itsa pata Asón tomarata, patayapitsinexa.
14 Nexata jane baja, itsa pata Asón tomarata, Pablo baja payapitajë. Nexata baja, panajuaponajë Mitilene tomarabelia.
15 Mitilene tomaracujinae, itsa pananaropobajë merawia pitsijawata, paxenebajë Quíotunaeto. Icatsia, merawia pitsijawata, panapatajë Samos-tunaetota pe-ecaetomarata. Bajarajotacujinae icatsia pananaropobajë, patanapatsinexa Trogilio tomarabelia. Bajarapatomarawecua patananaropobicujinae, caematacabicujinae, icatsia panapatajë jane baja Mileto tomarabelia.
16 Pablo rowia jamatabëxeneta Éfeso tomara, Asia nacuata pe-ecaetomara, tsipaji apojamatabëponaponae bajayajebi bajarapanacuata. Bepijia jamatabëpata Jerusalén tomarabelia, Pentecostés-fiestawajënaeya.
Pablo Mileto tomarata liwaisi tsipaeba Éfeso tomarawerena pepatsiwi, ancianowijawabelia
17 Éfeso tomarajawabelia peponaeyaniwa, Pablo tonajume-itoroba Mileto tomarawelia ancianowi pepatsinexarena.
18 Nexata baja, ancianowi itsa parena Miletojawaberena, Pablo jumaitsi bajarapa-ancianowijawabelia:
—Paxamë baja cajena payapëtaneme Dioso pijacuene tonacuenebijawa Asia nacuata, tapatsimatacabijawaweliacujinae.
19 Bajarapacuenia Dioso pijacuene tonacuenebaponaponajë beweliajamatabëcuenenënë nataeya. Bitso siwanueyabiabajë tataejawata pamonae xaniawaetsia apojinawanapae Dioso pitabarata. Bitso bejiobinë tsabiabi, tsipaji judíowi jamatabënebeyaxuababiaba. Bajarapacuenia tonacuenebajë, xaniawaetsia tatoweretsinexa daxita pacuenia wajatuxanenë Jesús nitoroba.
20 Nexata, apopacawecua-asiwatsi caeliwaisi-ata Dioso peliwaisi patacatsipaebijawata. Biji rajane, Dioso peliwaisi papecajamatabëcueneyawenonaenexa pacatsipaebabiabatsi itsajota nacaetuatabiaba daxitajiwi, panijabonëjawa-ata.
21 Nexata, asaëya tsipaebabiabajë judíowi, apojudíowi-ata, daxita bajarapamonae pecopabinexa pibisiacuene pexanabiabijawa, penajamatabëcuenepënëyorobinexa Diosojawabelia, pesiwanajamatabëcuenecopabinexanua wajatuxanenë Jesucristojawabelia.
22 Mara jotacujinaeje ponaenajë Jerusalén tomarabelia, Espíritu Santo tane-itorobixae. Itsiata, xaniawaetsia apoyapëtaenë xua netocopiapatsijitsia Jerusalén tomaratalia.
23 Caejawa yapëtaniji. Caetomara canacujitsia itsa xuayo najetarucabiabajë, Espíritu Santo neyapëtaeya-exanapona Jerusalén tomarapijiwi tane-etsijawanexa penaneconitsiwi pejebabiabibota. Pacuenia-ata nebejiobia-exanaejitsia.
24 Xanë cajena apojunawinë bajarapacuene netocopiapataponae-ata, tanebeyaxuabijawanexa. Itsiata baitsi jane, caejawa siwabëjanë, xaniawaetsia tatoweretsinexa pacuenia wajatuxanenë Jesús nitoroba. Bajaraxuata, jamatabëpaebajë daxitajiwijawa pexanialiwaisi, Jesús peliwaisi, paliwaisi nacayapëtaeya-exana Dioso wajanaca-itaxutotsoniataejawa Jesucristo pejamatabëcuene. Bajarapacuenia itsa toweretsipajë, nexata apobëjanë tsipae nebeyaxuabijitsia-ata.
25 »Panejumetaema: Paxamë rabaja patacatsipaebiwi Dioso pewetsijawanexa daxita pijajiwi, caejiwi-ata rabaja paxamëyajuwënëjiwi matawëjëa aponetae tsane.
26 Itsajiwi paxamëyajuwënëjiwi itsa naxuabiana Diosowecua, aponaxuabi tsane xanë tajamatabëcueneta,
27 tsipaji baja xanë daxita Dioso peliwaisi xaniawaetsia baja cajena pacatsipaebatsi. Caeliwaisiyo-ata apopacawecua-asiwatsi.
28 »¡Bajaraxuata, paxamë xaniawaetsia nayajiwitaeya pajinawanapare, Dioso pejitsipaecuenia!a ¡Bajarapacuenia-ata yajiwitaeya pa-ewetawanapare Jesús pijajiwi, pacuenia oveja pexainaewi xaniawaetsia ewetawanapa pija-ovejabitsaëto! Bajarapamonaetuatuajëta raja pacanuba Espíritu Santo, paneto-ewetsinexa wajatuxanenë Jesús, pamonae natocomuata pijanata.
29 Bajarapacuenia paca-itorobatsi pane-ewetsinexa, tsipaji cajena yapëtaniji xanëcujinae, penajetarubenaejawanexa Dioso pejumeliwaisiwecua saicayacuenia petsipaebiwi. Pacuenia pianaepanaelobomonaeb werenepona daxita ovejabitsaëto itaxutotsoniataenejewa, bajarajamatabëcuene-itsi tsane daxita Jesús pijajiwijawabelia pepaebiliwaisita pewerewerecaeya-exanaenexa.
30 Orijibia, paxamëyajuwënëwi-ata saicayacuenia Dioso pejumeliwaisiwecua tsipaebaponaena, bepexanialiwaisicuenia itajara, peyamaxë-itojorobinexa Jesús pijajiwiyajuwënëwi. Nexata, itsamonae nawecuanatsanaena pexaniajailiwaisiwecua, juya bajarapamonae peliwaisipënaponaenexa.
31 ¡Bajaraxuata, nayajiwitaeya pajinawanapare! ¡Xaniawaetsia pa-ewetawanapare Jesús pijajiwi! ¡Panajamatabënapire pacuenia xanë baja cajena acueyabi pawaibeje, caematacabi canacujitsia, merawi yajawa-ata, apocopatsinë patacamuxujiobijawa pacaejiwimë canacujitsia, bitso pataca-asiwaxae! Itsajawata, ya-itaxutonueya pacamuxujiobabiabatsi. Pacuenia xanë pacato-exanatsi, bajarapijinia pacuenia pa-ewetawanapaename Jesús pijajiwi —jai Pablo Éfeso tomarapiji-ancianowijawabelia.
32 Icatsia, Pablo jumaitsi:
—Tajamonae, nexata baja pacacopatatsi Dioso pecobeyabelia, papeca-ewetsinexa. Pacatocopatatsinua Dioso wajanaca-asiwajawa wajanacayapëtaeya-exanaeliwaisijawabelia, papecajamatabëcueneyawenonaenexa caematacabi canacujitsia xaniawaetsia panejinawanapaejawa. Bajarapaliwaisi panejumexaniataejawata, pacajamatabëcuenenaweretsia-exanaponaena Dioso pijacuenejawata. Pacajamatabëcuene-asaëya-exanaenanua Diosojawabelia. Nexata, bajarapaliwaisi pejamatabëcueneta, itsamatacabijawabelia pacabarëyamë tsane daxita xua Dioso toxainac perajutsinexa pamonae aneconijibia tane.
33 Xanë itsa naponaponajë paxamëjawata, aponajamatabëxainaenë tanaxainaeyabinexad itsanë pijapalata, penaxatabijawa-ata.
34 Biji rajane, payapëtaneme tajacuata tanacuenebijawa, tanamatawenonaejawaxi tanatocomuataponaenexa, tayajawaponaponaewi-ata tatocomuatsinexa.
35 Bajarapacuenia ta-exanaejawata, pacatsitanacuene-itajëtatsi baja cajena paxamë-ata pacuenia bepanacuenebame, paneyawenonaenexa itsamonae bitso bepejiobiwi. Bepanajamatabënapitame xua wajatuxanenë Jesús jumaitsi bajaraxua yabara. Jumaitsi: «Bitso jamatabëcuenebarëya tsane itsamonaejawabelia perajutabiabiwi,e pepitsijiwiwecua itsajiwi perajutsijawatsi», xua jai Jesús —jai Pablo ancianowijawabelia.
36 Itsa baja, Pablo najumewereta bajarapacuenia petsipaebijawa, daxita ancianowi pematabacabëta barënuca, pebarënawajëtsinexa Diosojawabelia.
37 Bajaraxuacujinae, Pablo peponaewajënaeya, ancianowi nua ayaicuenia. Nexata, Pablo itsa napëjioba, bajarapamonae ya-itaxutonueya waetabiaya itabaratsutsuneponatsi.
38 Bitso najamatabëxaina, tsipaji Pablo jumaitsi: «Apopanetaemë rabaja tsane matawëjëa», jai. Bajaraxuacujinae, bajarapamonae Pablo pënaxuabaliatsi barcojawabelia.