Pablo tsipaeba Dioso peliwaisi Éfeso tomarapijiwijawabelia
19
Pamatacabi Apolos abaxë ponapona Corinto tomarata, bajarapamatacabi pijinia Pablo ibotsutonënacuajawawerena najetaruca, pepatsinexa Éfeso tomaraberena. Bajarapatomarata Pablo itsa pata, caxitajaraba caejiwibeje Jesús pijacuene penacujarubiwi.
2 Nexata, yanijoba bajarapamonaejawabelia:
—¿Espíritu Santo tsabaja pacatsijamatabëjunua pamatacabi pajumexaniataneme Jesús peliwaisi? —jai Pablo.
Nexata, bajarapamonae jumaitsi:
—Ajibi cajena. Caeto-ata cajena apopawënëliwaisitaenë Espíritu Santo yabara —jai bajarapamonae Pablojawabelia.
3 Nexata, Pablo jumaitsi:
—¿Detsa pitsijamatabëcuene yabara pacabautizaba? —jai Pablo.
Nexata, bajarapamonae jumaitsi:
—Paxanë panabautizabajë Juan jiwibautizabinëmi pecujarubiliwaisita —jai.
4 Pablo nexata jumaitsi bajarapamonaejawabelia:
—Juan-pijinë raja bautizabapona pamonae baja najamatabëcuenepënëyoroba Diosojawabelia, pibisiacuene pexanaejawawecua. Itsiata baitsi jane, orijibia jumaitsi tsaponae jiwijawabelia: «Pasiwanajamatabëcuenecopabianame ponëjawabelia xanë tacowëwerena patsiana, baitsi Jesús-jawabelia. Bajaraponë Cristo, ponë Dioso itorobica», jai tsaponae Juan-pijinë jiwijawabelia —jai Pablo.
5 Bajarapamonae itsa jumetane Jesús peliwaisi, nexata Pablo bautizaba petuxanenë Jesús pewënëta, penajamatabëcuene-itajëtsinexa pejumexaniataejawa bajarapaliwaisi.
6 Nexata, caenë canacujitsia Pablo petsimatanacobebuataponaejawata, Espíritu Santo tsijamatabëjoneponatsi. Jamatabëcuenecaëjëpaeya-exanatsi, pecuaicuaijainexa itsawiriajumenëta, apopecuaicuaijaijumenëmi. Dioso peliwaisi tsipaebaponanua jiwijawabelia, Espíritu Santo peyapëtaeya-exanaeliwaisitsi.
7 Daxita bajarapamonae bejamatabëcuene doce ponëbeje daxitata.
8 Éfeso tomarata Pablo peponaponaejawata, acueyabi pajuametobeje, ajumejunawijibia sinagogabotaa tsipaebaponapona Jesús peliwaisi judíowijawabelia. Pablo barënajumenotabiaba judíowi Dioso pijajiwi peyanacua-ewetsicuene yabara, Jesús pejamatabëcueneta.b Jaitabiabanua pacuenia jumexaniataeya-exanaejitsia bajarapaliwaisi bajarapamonaeJawabelia.
9 Itsamonae itsiata ajamatabëcuenetaja. Apojitsipae pejumexaniataejawa bajarapaliwaisi. Nexata, daxitajiwi pitabarata pibisiacuenia baracuaicuaijai Jesús peliwaisi, pamonae-ata Jesús peliwaisi pepënaponaewi. Bajarapacuenia pexanaexae, Pablo baja wecuanatsata. Napona Jesús peliwaisi pejumexaniataewi yajawa Tirano pija-escuelabojawabelia, saicaya penacaetuatabiabinexa. Bajarapabota nexata Pablo caematacabi canacujitsia pexanialiwaisi, Jesús peliwaisi, jiwi tsipaebabiaba.
10 Bajarapacuenia Pablo tsipaebaponapona anijawaibeje. Nexata, daxita Asia nacuapijiwi, judíowi, apojudíowi-ata, jumetane petuxanenë Jesús peliwaisi.
11 Bajarapamatacabianëjawa Dioso pesaëta pinijicuenejawanë exanapona, Pablojawata.
12 Nexata, piawitanewi pijamonae, Pablo pijapañueloxi, penaxatabijawanë-ata, xuanë Pablo naperabëcajayaba, tocaponabiaba piawitanewi petsiperabëbuatsinexa. Bajarapacuenia pexanaejawata, Dioso jamatejemaya-exanabiabatsi. Dowathiwi peyajawajinawanapaewi-ata Dioso wecuacapitsapabiabatsi.
13-14 Bajarapamatacabianëjawa pijinia, itsamonae judíowi, tomaranëjawa penajetarubenaewi, pata-othopa baja Éfeso tomarata. Bajarapamonae pejitsipaewi pexanaejawa Jesús pewënëta, jiwi dowathi pewecuacapitsapaponaenexa. Bajarapamonae siete ponëbeje, Esceva, sacerdotewi penamatacaitorobinë,c ëpexi tsawanapae. Nexata, bajarapamonae itsa tane dowathi peyajawaponaponaenë, jumaitsi dowathijawabelia:
—¡Dowathi, paca-itawetatsi, ponë Pablo wajunupaebapona, petuxanenë Jesús pewënëta! ¡Wecuapitsapare baja maponëje! —jai.
15 Itsiata, paepatota bajarapamonae Jesús pewënëta itaweta dowathiwi, juya jumecanawiatatsi mapacueniaje:
—Yapëtaniji raja Jesús. Yapëtaniji Pablo-ata. Itsiata, paxamë apopacayapëtaetsi. ¿Detsa jane paxamë papamonaemë pija? —jai dowathi Esceva pexijawabelia.
16 Nexata, bajarajota dowathi peyajawaponaponaenë pejamatabëcuene-itorobicueniatsi, tsimaxëjirewarenatsi bajarapamonae. Pinijisaëta tsaquibabiatsi. Bajarapacuenia pexanaejawatatsi wejumatiticatsi penaxatabijawanë. Belia bajarapamonae pebejawatatsi, yawajënëya jumasa rëcëpeca dowathi peyajawaponaponaenë pijabowecua.
17 Nexata, daxita Éfeso tomarapijiwi, judíowi, apojudíowi-ata, itsa wënëliwaisitane pacuenia dowathi peyajawaponaponaenë exanatsi Esceva pexi, bajarapatomarapijiwi bitso jamatabëcuenenajunawiaca. Nexata, daxita bajarapamonae ayaicuenia wënëyaiyatane wajatuxanenë Jesús.
18 Pewënëliwaisitaexae bajarapacuenia, ayaibitsaëtoxaneto Jesús peliwaisi pejumexaniataewi, patapona Pablobanajawaberena, penawecuapaebaponaenexa pibisiacuene pexanabiabijawami.
19 Orijibia, ayaibitsaëto penajorobiwi capata pecanacuenebibaxutonë, petajuitsinexa. Bajarapabaxutonëmi picani ayaimatamota natocomuata. Itsiata bajarapamonae tajuita isotota, daxitajiwi pitabarata. Bajarapabaxutonëmi itsa comuata, namatamota cincuenta mil ponëbeje palatanëanë,d bitso penamatamotsinëanë.
20 Nexata, bajarapacuenia Jesús peliwaisi yacaëjëpapona baja daxitanacuanëjawa. Orijibia, bajarapaliwaisi pejamatabëcueneta, ayaibitsaëto tsaponae pejumexaniataewi Jesús peliwaisi.
21 Bajaraxuacujinae, Pablo najamatabëxaina peponaenexa Jerusalén tomarabelia. Peponaenë najetarucaejitsia Macedonia nacuajawa, Acaya nacuajawa-ata, petaenajetarucaenexa Jesús peliwaisi pejumexaniataewi bajarapanacuanëjawa. Bajaraxuacujinae jane baja, ponaejitsia Jerusalén tomarabelia. Bajarapacuenia peyapëtaeya-exanaecujinae pebarënacuenebiwijawabelia, jumaitsi: «Tapatsicujinae Jerusalén tomarabelia, ponaenajë icatsia Roma tomarabelia-ata», jai.
22 Nexata, Pablo itoroba Macedonia nacuayabelia anijanëbeje pijajiwitonëbeje, Timoteo, Erastobeje. Bajaraponë pijinia abaxë nacopata caematacabibejecuenia Asia nacuata.
Pablo, Éfeso tomarata, Demetriobana jamatabëbeyaxuabatsi
23 Pablo itsa abaxë ponapona Asia nacuata, Éfeso tomarapijiwi bitso anaepana Jesús peliwaisi pejumexaniataewijawabelia, Demetrio pejamatabëcueneta.
24 Bajaraponë palatananitota templobo jumapecataeya exanabiaba, tsiquiriboxi, Artemisae jumapecataeya pexanaediosowa, pijatemplobo jumapecataeya. Demetrio, bajarapaboxi pebarënacuenebiwi yajawa, bitso ayaicuenia palata barëpitabiaba bajarapaboximatamo.
25 Nexata, bajaraponë junata pebarënacaetuatsinexa daxita pebarënacuenebabiabiwi bajarapaboxi, itsamonae-ata, jumapecataeya pexanaejawanë penacuenebiwi. Nexata, Demetrio jumaitsi bajarapamonaejawabelia:
—Paxamë rabaja payapëtaneme mapacueneje. Jumapecataeya waja-exanabiabijawanë wajacanajetabiabixae, xaniawaetsia jinawanapatsi, namatawenonaenejewatsi itsacuenejawa.
26 Pataneme rabaja. Pajumetanemenua baja Pablo pejumaitsitsaponaejawa daxita Asia nacuajawa jiwi xua exana pecobeta jumapecataeya pexanaenëanë, apopexaniajaidiosowicuene. Nexata, jiwi ayaibitsaëtoxaneto mapatomarapijiwije, Asia nacuapijiwi-ata jumexaniataepona Pablo bajarapacuenia petsipaebaponaejawa.
27 Bajarapacuenia jiwi ayaibitsaëto itsa jumexaniataeponaena Pablo petsipaebiliwaisi, bajarapamonae aponacacomuatsi tsane wajadiosowa, Artemisa, pijatemploboxi wajanacuenebijawanë. Belia, Artemisa, pinijijamatabëcuene pexainaediosowa, pijatemplobo-ata, apoyaiyatae tsipae. Cuenecopiarucaeya-exanaejitsipatsi jiwi yaitataeya pematabacabëta petonubenabiabijawa, pewajëcabiabijawata Artemisajawabelia, petaexae beweliasaë pexainaejawa. Aponacatoxanepanae cajena wajacuenecopatsijawa bajaraxua, tsipaji daxita Asia nacuapijiwi, daxitanacuanëpijiwi-ata, bajarapajumapecataeya pexanaediosowa yaiyataeyabiaba —jai Demetrio tsiquiritemploboxi jumapecataeya pexanabiabiwijawabelia.
28 Nexata, bajarapamonae itsa jumetane bajarapacuenia Demetrio pejumaitsijawa, bitso anaepana. Pinijijumeta wawajaiya jumaitsi:
—¡Pinijijamatabëcuene raja pexainaediosowa Artemisa, Éfeso tomarapijiwitsi wajadiosowa! —jai tsaponae bajarapamonae.
29 Nexata, belia daxita Éfeso tomarapijiwi, xaniawaetsia yapëtaenejewa xua yabara jiwi wawajai tsanubenae, muxunapata bajarapataxunaeta. Nexata, bajarapamonae Gayo, Aristarcobeje, Macedonia nacuapijinëbeje, ponëbeje Pablo yanatatsi, waetabatsibeje. Daxitajiwi waetabiaya nacobenacaponatsibeje pinijiboxanetojawabelia, itsabelia baja cajena daxita tomarapijiwi nacaetuatabiaba.
30 Pablo picani najonejitsia bajarapabojawabelia, peyajiwicuaicuaijainexa peyanatsinëtsibeje penacaetuatsiwijawabelia. Itsiata, Jesús pijacuene penacujarubiwi apocopatsitsi.
31 Bajarapijinia pacuenia itsamonae Asia nacuapijiwi pewetsiwiyajuwënëwi, Pablo peyapëtaewitsi, asaëya tonajume-itorobarenatsi penajoneyaniwa bajarapaboyabelia, pebeyaxuabiyaniwatsi.
32 Éfeso tomarapijiwi penacaetuatsijawata, naliwaisijëpaeya apocuaicuaijai. Nexata, pewawajaijawata itsamonae itsaliwaisicuenia wawajaiya jumaitsi tsaponae. Itsamonae pijinia itsaliwaisicuenia wawajai tsaponae, tsipaji jiwi ayaibitsaëtoxaneto apoyapëtae paliwaisi yabara nacaetuata.
33 Nexata, bajarapabitsaëtotuatuajëta penanacaetuatsijudíowi, itapeta pewënajudíonë, Alejandro, peyapijicuaicuaijainexatsi Éfeso tomarapijiwijawabelia. Nexata, bajaraponë pënatorotajarabatsi daxitajiwi pitabarata penucaenexa. Nexata, Alejandro nacobeyota jiwi pemoyanexa, petsipaebinexa Éfeso tomarapijiwijawabelia pianaepanaeyaniwa daxita judíowijawabelia, Pablobana pejamatabëcuene.
34 Itsiata baitsi jane, bajarapamonae itsa yapëtane judíonëcuene, apotocopatsi pecuaicuaijainexa. Biji rajane, wawajaiya jumaitsi tsaponae anijahorabejecuenia mapacueniaje: «¡Pinijijamatabëcuene raja pexainaediosowa Artemisa, waxaitsi Éfeso nacuapijiwitsi wajadiosowa!», jai tsaponae bajarapamonae.
35 Bajaraxuacujinae, nexata tomara jane baja pewetsinë, secretarionë, daxitajiwi moya-exana. Nexata, jume-itawetsiaya jumaitsi:
—PaÉfesotomarapijiwimë, daxitanacuanëpijiwi baja cajena yapëtane wajanacatocopatsijawa waja-ewetsinexa mapatomarataje pe-ecaebo, pinijijamatabëcuene pexainaediosowa, Artemisa pijatemplobo. Daxitanacuanëpijiwi baja cajena yapëtanenua diosojumape-ibotowa,f Artemisa, athëbëwetsica pejopaejawa mapatomarataje.
36 Xaniajai, bajarapa-iboto athëbëwetsica jopa cajena wajadiosowanexa. Acuenebi itsajiwi-ata: «Jume», pejaijawa bajaraxua yabara. ¡Nexata, pajamatejemamëre! ¡Pëtsa abaxë itsacuene pa-exaname copiaya panajamatabëxainaenejewamë xaniawaetsia!
37 Mapapebibeje paxamë pacapatameje, apopenacobetoxotsinëbeje templobopijijawa. Pibisiacuenia apobaracuaicuaijaibejenua wajadiosowa Artemisa —jai secretarionë Éfeso tomarata penacaetuatsiwijawabelia.
38 Icatsia, jumaitsi bajarapamonaejawabelia:
—Demetriobana itsajiwi itsa jamatabëneconita, nexata ponae, peneconitsinexa juez-monae pitabarata. Bajarasaya xua juez-monae ewetawanapa.
39 ¡Itsa apopaneconitsijitsiamë jiwi, saya itsa panacaetuatame itsacueneliwaisiyo yabara, nexata saya rowialia papaebare xaniawaetsia daxitajiwi penacaetuatsijawata, pacuenia gobierno naca-itoroba!
40 Xaniajanë pacuenia pacatsipaebijitsiatsi. Ajena mapamatacabitaje, mapacuenia itsa exanaponaejitsipatsije, nacananeconitsia-exanaejitsipa gobierno, tsipaji itsacueneneconi itsajiwi xainaenejewa, mapacuenia anaeya nacaetuatatsije —jai secretarionë penacaetuatsiwijawabelia.
41 Itsa baja bajaraponë najumewereta bajarapacuenia petsipaebijawa, itoroba baja daxitajiwi penawiabinexa pijabonëjawabelia.