Timoteo nanaropota Listra tomarata, Pablo, Silas-beje, pepëta
16
Petsipaebanajetarucaecujinaebeje Siria, Cilicia nacuajawabeje, Pablo, Silas-beje, ponabeje, Derbe tomarabelia, pesiwaxainaenexabeje Jesús peliwaisi pejumexaniataewi. Xuacujinae, ponabeje Listra tomarajawabelia. Bajarapatomarata caxitajarababeje Jesús pijacuene penacujarubinë, Timoteo. Bajaraponë pena judíowa, Jesús peliwaisi pejumexaniataewa. Paxa pijinia griegonë.
2 Daxita Jesús peliwaisi pejumexaniataewi, Listra tomara, Iconio tomarapijiwibeje, Timoteo pexaniacuenia baracuaicuaijai tsabiabitsi, xaniawaetsia peponaponaejawa yabara Dioso pejitsipaecuenia.
3 Pablo jitsipa Timoteo pebarëponaejawa, Jesús peliwaisi petsipaebanajetarucaejawata. Nexata, pebarëponaewajënaeya, judíowi pijacuenia bo-upiperabëcaucutsia-exana, pebara-anaepanaeyaniwatsi pewënajudíowi, tsipaji daxita bajarapanacuapijiwi yapëtane Timoteo apopebo-upiperabëcaucutsijawatsi, paxapijinë griegonëxae.
4 Patomaranëjawa najetarubena Pablobana,a caetomarajawa canacujitsia tsipaebapona Jesús peliwaisi pejumexaniataewijawabelia, yapëtaeya-exanapona paliwaisi toyaquinatsi apóstolewi, ancianowi-ata Jerusalén tomarawerena, peyapëtaeya-exanaenexa pacuenia exanaejitsia judíowi pena-ewetsicuene yabara.
5 Bajaraxuata, daxita Jesús pijajiwi, caebitsaëto canacujitsia, bitso ajamatabëcuenesaë tsaponae Diosojawabelia. Caematacabi canacujitsianua Jesús peliwaisi ayaibitsaëto jumexaniataepona.
Pablo bemajitsinaebota tane Macedonia nacuapijinë
6 Bajaraxuacujinae, Pablobana canaëjëta picani peponaenexa Asia nacuayabelia, petsipaebinexa Jesús peliwaisi. Itsiata, Espíritu Santo apotocopatsitsi bajarabelia peponaejawa. Bajaraxuata, bajarapamonae juya pona Frigia nacuajawabelia, Galacia nacuajawabelia-ata.
7 Bajaraxuacujinae, Pablobana najetarubena Misia nacuamuxubërëa. Jamatabëpata picani Bitinia nacuajawa. Itsiata baitsi jane, Espíritu Santo apotocopatsitsi pepatsinexa bajarapanacuajawa.
8 Nexata, Misia nacua rowia xanetabuatapona Troas tomarawëpajawabelia.
9 Nexata, Troas tomarata, merawi Pablo bemajitsinaebota taenuta Macedonia nacuapijinë. Bajaraponë asaëyata junatatsi Pablo: «¡Naxatsia! Macedonia nacuayaberena ponaename, pataneyawenonaenexamë», jai.
10 Pablo bemajitsinaebota petaenutsicujinae Macedonia nacuapijinë, bepijia paxaniawaetajëb patajajawaxi, patanicabinexalia Macedonia nacuayabelia, tsipaji caejamatabëcuene paxainajë Dioso pepacuene patane-itorobijawa Macedonia nacuapijiwijawabelia, patatsipaebinexa pexanialiwaisi, Jesús peliwaisi.
Pablo, Silas-beje, tsipaebabeje Jesús peliwaisi Filipos tomarapijiwijawabelia
11 Troas tomarata panaropobajë, barcota patanaponaenexa Macedonia nacuajawabelia. Rowialia panayanicabaliajë patapatsinexa Samotraciatunaeto nacuayabelia. Merawia pitsijawata bajarajotawecua paponajë, patanapatsinexa Neápolis tomarabelia, Macedonia nacuata pe-ecaetomara.
12 Bajarajotacujinae, matatsënëa paponajë Filipos tomarabelia, patomara ayaitomaraxaneto daxitawecua Macedonia nacuata. Bajarapatomarata najinawanapa ayaibitsaëtoxaneto Romano nacuawerena pepatsiwi. Nexata, bajarapatomarata panajinawanapajë caematacabimaxëto.
13 Nexata, sábadomatacabic papitsapajë tomarapënëyabelia, pataponaenexa mene-itapajawabelia, patajaitsinexa itsajota nacaetuatabiabad judíowi, pewajëcabiabinexa Diosojawabelia. Pataeyejebajë petiriawi penacaetuatsijawa mene-itapata, penawajëcaenexa Diosojawabelia. Pana-enajë bajarapamonaejawata, Jesús peliwaisi patatsipaebinexa bajarapapetiriawijawabelia.
14 Bajarapapetiriawiyajuwënëwa pewënë Lidia, Tiatira tomarapijiwa. Bajarapowa penamatamotsipapaëbërë, perajejaijawa, pecanajetabiabiwa. Dioso pejitsipaecuene pexanaponaponaewa. Bajarapowa xaniawaetsia namuxuna-eweteca Pablo petsipaebiliwaisi. Nexata, Dioso jamatabëcueneyawenonatsi, pejumexaniataenexa bajarapaliwaisi.
15 Bajarapowa pabautizabajë, daxita pijabopijiwi yajawa. Patabautizabicujinae, bajarapowa ajumesaëya panejunata:
—Itsa paxamë panetaneme pepacuene Jesús peliwaisi tajumexaniataewacuene, nexata tajabota abaxë panajinawanapaename —panejai bajarapowa.
Bitso bajarapowa asaëyata panejunata patanajinawanapaenexa pijabota. Nexata, panaponajë bajarapowa pijaboyabelia, pijabota patanajinawanapaenexa.
16 Itsa matacabi paponajë icatsia mene-itapayabelia, itsajota judíowi nacaetuatabiaba penawajëcabiabinexa Diosojawabelia. Namutua patanajetarubenaejawata, panemata-enena petiriwa, dowathi peyajawaponaponaewa. Bajarapowa amoneya petonacuenebabiabiwa itsamonae. Nexata, bajarapowa xua copiapatsijitsia, pewajënaeya yapëtaeya-exanabiaba dowathi peyapëtaeya-exanaecueniatsi. Ayaijawa palata pitabiaba petsipaebabiabijamatabëcuene. Bajarapowa pejumata pijatuxanewi bajarapapalata wecuapitabiabatsi.
17 Bajarapowa caematacabi canacujitsia paxanë, Pablo-ata panepënanajetarucabiaba. Pinijijumeta wawajai tsanajetarucabiabi paxanë yabara mapacueniaje:
—Mapapebijiwije, pepo-Ayaijamatabëcuenenë Dioso pijajiwi. Pacatsipaebapona papecacapanepaeliwaisinexa pibisiacuene pane-exanaeneconiwecua —jai tsanajetarucabiabi paxanë yabara.
18 Bajarapacuenia patajinawanapaematacabianë pejumaitsitsabiabixae, Pablo bitso apotsitaxanepanaetsi. Belia, bajarapowajawabelia napënëyorotaxuaba. Anaeya dowathijawabelia jumaitsi:
—Dowathi, ca-itawetatsi Jesucristo pewënëta. ¡Wecuapitsapare baja mapowaje! —jai Pablo.
Bajarapacuenia Pablo pejumaitsijawata, dowathi baja petiriwa wecuapitsapatsi.
19 Nexata, bajarapowa pijatuxanewi itsa yapëtane baja petocopiarucaejawatsi bajarapowa pejumata palata ayaijawa penotabiabijawa, bajarapamonae waetabatsibeje Pablo, Silas-beje. Robobocaponaliatsibeje tomaratuatuajëabelia, pecaponaenexatsibeje tomara pewetsiwijawabelia.
20 Nexata, nutatsibeje juez-monae pitabarata, pijaneconi jane baja petocanaëjëbinexatsibeje. Bajarapamonae najumetsënëtsiaya jumaitsi juez-monaejawabelia:
—Mapajudíonëbeje, anaepanaeya-exanaponaponabeje, wajatomarapijiwi.
21 Orijibia, tsipaebaponabeje wajanacuapijiwi pejumecowënëtsinexa paliwaisi waxaitsi Romano nacuapijiwitsi aponacatocopatsi wajajumecowënëtsinexa —jai najumetsënëtsiaya Pablo, Silas-beje yabara.
22 Bajarapanajumetsënëtsiliwaisi pejumetaexae, jiwi ayaibitsaëtoxaneto, bajarajota pejumetaenubenaewi, bara-anaepanatsibeje Pablo, Silas-beje. Nexata, juez-monae itoroba wajabitsaë pewejumajonotsinexatsibeje penaxatatsijawa, ayaicuenia pejumaconitsinexatsibeje naebota.
23 Pejumaconitsicujinaetsibeje, juez-monae icatsia itoroba wajabitsaë penaneconitsiwi pejebabiabibota pe-etsinexatsibeje. Bajarapamonae itoroba penaneconitsiwi pejebabiabibo pewetsinëjawabelia, xaniawaetsia pewetsinexatsibeje bajarapabo-ënëtuatuajëta, pepitsapaeyaniwabeje.
24 Bajarapacuenia pitorobixaetsi, pewetsinë xaniawaetsia pewetsinexa, Pablo, Silas-beje etatsibeje pënëyatu-ucubijawanë pecopiarucaejawatareca. Orijibia, sixataliatsibeje cepowënëjawata, naitabarataeya pewojorutsitablapabejetusatualia.
25 Nexata, merawituatuajëta bajaraponëbeje Diosojawabelia nawajëquecabeje. Naxëanecabejenua Diosojumewajianë. Itsamonae pijinia penaneconitenaewi bajarapabota, jumetanetsibeje penaxëanecaejawabeje.
26 Bajarapacuenia pexanaejawatabeje, jemata ira najëabapeneta pinijicuenia. Penaneconitsiwi pejebabiabibo, daxitabo, nanequebeca. Caecuenia daxita bajarapabopijibaupanë pijacuata nabaupana. Daxita penaneconitsiwi pacadenamaëtonëta cobecëbejebatsi,e wecobe-othopatsinua.
27 Penaneconitsiwi pejebabiabibo pewetsinë naëcotapuna pemajitecaenëmi. Nexata, itsa tane daxita baupanë penabaupanaejawa, nawemarajonotaxuabina pija-espada, penabeyaxuabinexa picani. «Daxita meta baja rëcëpeca penaneconitsiwi», pejamatabëjaixae.
28 Nexata, bajarajota itacarajeta Pablo pinijijumeta jumaitsi tsaxuabi:
—¡Pëtsa nabeyaxuabame! Daxita raja patananeconitsiwi panubenajë —jai Pablo.
29 Nexata, penaneconitsiwi pejebabiabibo pewetsinë itoroba pijajiwitonë petocarenanexatsi pitayotabiabijawa. Petocarenacujinaetsi, cujinaereca bo-ënëabereca, itsabereca Pablobana nubena. Bajaraponë pematabacabëta nucajunua Pablo, Silas-beje, pitabarata. Bitso neconecojai tsanucae pecajunawi.
30 Bajaraxuacujinae, bajaraponë barëpitsapaliatsibeje Pablo, Silas-beje. Nexata, bajaraponë jumaitsi:
—¿Detsa xua exanaenajë Dioso tanecapanepaenexa, pibisiacuene ta-exanaejamatabëcuene Dioso tanenaneconitsia-exanaejawanexawecua? —jai bajaraponë.
31 Nexata bajaraponëbeje jumaitsibeje:
—¡Siwanajamatabëcuenecopare pepopetuxanenë Jesucristojawabelia! Bajarapacuenia itsa exanaename, Dioso cacapanepaena nijaneconiwecua pecananeconitsia-exanaejawaminexa. Bajarapijinia pacuenia, capanepaenatsinua nijabopijiwi, itsa siwanajamatabëcuenecopabiana Jesucristojawabelia —jaibeje.
32 Nexata, Pablo, Silas-beje, tsipaebabeje bajaraponëjawabelia Jesús peliwaisi, daxita pijabopijiwijawabelia-ata.
33 Bajarapamerawi-epatota penaneconitsiwi pejebabiabibo pewetsinë, Pablo, Silas-beje, jumawajënëquiatatsibeje. Bajaraxuacujinae, Pablo, Silas-beje, bautizababeje bajaraponë, pijabopijiwi yajawa.
34 Nexata, bajaraponë pijaboyabelia barëliatsibeje. Pexaejawa rajutatsibeje. Bajaraponë, pijabopijiwi yajawa, pinijicuenia jamatabëcuenebarëya, pesiwanajamatabëcuenecopatsixae Jesucristojawabelia.
35 Nexata, merawia pitsijawata, bajayacunua, juez-monae itorobalia wajabitsaë penaneconitsiwi pejebabiabibo pewetsinëjawabelia pejumaitsinexa:
—Capitsapaename pina baja Pablo, Silas-beje —pejainexa.
36 Nexata, bajaraponë jumaitsi Pablojawabelia:
—Juez-monae rabaja netonajume-itorobarena patacacapitsapaenexabeje. ¡Paponarebeje baja xaniawaetsia! —jai.
37 Itsiata baitsi jane, Pablo jumaitsi juez-monae pitorobiwajabitsaëwijawabelia:
—Juez-monae naneconita pijatuxanewijawabelia, paxanëbejejawaberena-ata, tsipaji abaxë copiata xaniawaetsia yapëtaenejewa paneconi paxainajëbeje, paxanëbeje paRomanonacuapijinë-atanëbeje,f itoroba paxamëyajuwënëwi patanejumaconibabenexabeje, daxita tomarapijiwi pitabarata. Bajaraxuacujinae, pane-etabeje mapabotaje. Nexata, aeconoxae saya paxamë paca-itorobarena pepëya patanecapitsapaenexamëbeje. Bajarapacuene cajena apoxanepanae pexanaejawa. Bajarapamonae ponaerena pijacuata patanecapitsapaenexabeje —jai Pablo juez-monae pitorobiwajabitsaëwijawabelia.
38 Nexata, wajabitsaë tsipaeba juez-monaejawabelia pacuenia Pablo jumaitsi. Nexata, bajarapamonae itsa jumetane Pablo, Silas-beje, Romano nacuapijinëbejecuene, bitso jamatabëcuenenajunawiaca.
39 Nexata, parena bajarapamonae. Jumaitsi bajaraponëbejejawabelia:
—Pauranë paxamëbejejawabelia, wajabitsaë patacatsi-itorobixae papecaconitsinexabeje, papeca-etsinexabejenua penaneconitsiwi pejebabiabibota —jai juez-monae.
Nexata, bajarapamonae pijacuata capitsapatsibeje Pablo, Silas-beje, penaneconitsiwi pejebabiabibowecua. Barajamatabëcuenexanepanaeya itorobatsibeje peponaenexabeje baja tomarawecua.
40 Pecapitsapaecujinaetsibeje, ponabeje baja Lidia pijaboyabelia. Bajarapowa pijabota, itsa tanebeje Jesús peliwaisi pejumexaniataewi, muxujiobabeje piajamatabëcuenesaënexa Diosojawabelia. Bajaraxuacujinae, ponabeje baja bajarapatomarawecua.