Pablo, Bernabébeje, tsipaebabeje Jesús peliwisi Iconio tomarapijiwijawabelia
14
Iconio tomarata pepatsicujinaebeje, Pablo, Bernabébeje, judíowi pijasinagogabotaa najoneyabeje. Bajarajota, xaniawaetsia petsipaebixaebeje Jesús peliwaisi, jiwibitsaëtoxaneto judíowi, apojudíowi-ata, jumexaniatane Jesús peliwaisi.
2 Itsiata baitsi jane, pajudíowi apojumexaniatae bajarapaliwaisi, anaeya-exana apojudíowijawabelia pejumexaniataeyaniwa Jesús peliwaisi. Orijibia, itoroba pebara-anaepanaenexa Pablo, Bernabébejejawabelia.
3 Bajarapacuenia to-exanae-atatsibeje, itsiata bajayajebi ponaponabeje bajarajota. Nexata, bajaraponëbeje aitatsacaeya tsipaebabiababeje Jesús peliwaisi ajumejunawijibia, tsipaji itaxutuajamatejemabeje Diosojawabelia pewetsinexatsibeje. Yapëtaeya-exanaponabejenua bajarapamonae Dioso pitaxutotsoniataejawatsi. Bajaraponëbeje pepaebiliwaisi Jesús yabara, bajarapatomarapijiwi peyapëtaenexa pexaniajaicuene, Dioso pesaëta caëjëpaeya-exanatsibeje pinijicuenejawanë petsita-exanaponaenexabeje.
4 Itsiata, bajarapatomarapijiwi natsanaeya jinawanapa bajaraponëbeje pepaebiliwaisita. Nexata, itsamonae jitsipa pejumexaniataenexa judíowi petsipaebiliwaisi, itsamonae pijinia apóstol-nëbeje petsipaebiliwaisi.
5 Belia, bajarapatomarapijiwi, judíowi, apojudíowi-ata, tomara pewetsiwi-ata, pejume-aebiwi Jesús peliwaisi, bara-anaepanatsibeje. Bajaraxuata, najumejaita petsimaxëpatsinexatsibeje, ibotonëta petseconaecuenia pebeyaxuabinexatsibeje.
6 Nexata, Pablo, Bernabébeje, itsa nayajumetanebeje pacuenia exanaejitsiatsibeje, najetabijirawabeje Listra tomara, Derbe tomarabejejawabelia-ata, Licaonia nacuata pe-ecaetomarabeje. Nexata, bajarapatomarabeje pepënëya pe-enaetomaraxijawa-ata najetarucabeje.
7 Daxita bajaraxuayo tsipaebanajetarucabeje pexanialiwaisi, Jesús peliwaisi.
Pablo ibotonëta tseconatsi Listra tomarata
8 Listra tomarata ponapona petaxucuenabinëtsi, ponë apopecuenecaëjëpaenëtsi peponaponaejawa penaexanaejawaweliacujinae.
9 Bajaraponë najumetaeyeca Pablo petsipaebiliwaisi. Nexata, Pablo naitaxutobabatsiaya naëcota bajaraponëjawabelia. Jamatabëcueneyapëtane pesiwanajamatabëcuenecopatsijawa Diosojawabelia petaxuxanepanaeya-exanaenexatsi.
10 Nexata, Pablo pinijijumeta jumaitsi petaxucuenabinëtsijawabelia:
—¡Nonotapunare! ¡Ponaponare baja! —jai.
Nexata bajaraponë jirewapuna. Ponapona baja.
11 Jiwibitsaëtoxanetonë itsa tane Pablo petaxuxanepanaeya-exanaejawa petaxucuenabinëmitsi, nexata bajarapamonae Licaoniajumeta, pinijijumeta jumaitsi mapacueniaje:
—¡Diosonëbeje cajena! Bewaxaitsi jiwitonëbejecuenia patsica waxaitsijawabetsica —jai bajarapamonae. Itsiata, bajaraponëbeje apojumeyapëtaebeje.
12 Bajarapanacuapijiwi xaina jumapecataeya pexanaenëbeje, Zeus, Hermes-beje. Nexata, Bernabé tanetsi beZeus-wënëdiosonë, Pablo pijinia beHermes-wënëdiosonë,b tsipaji Pablo peliwaisinamataxainaenë pepaebanajetarucaejawata.
13 Zeus-wënëdiosonë pijatemplobo eca Listratomara pejonebaupa canacujitsialia. Nexata, bajaraponëbeje, bediosonëbeje petaexaetsibeje, Zeus pijatemplobota penacuenebabiabisacerdotenë capata torobeje templobo pejonebaupajawaberena. Bajarapatorobeje mataboco-itabëtsiaya tsimataruba pematono. Nexata, sacerdotenë, Listra tomarapijiwi yajawa, tobeyaxuabijitsiatsibeje picani bajarapatorobeje, bajarapawi petotajuitsinexatsibeje bajaraponëbeje pewënëta.
14 Nexata, Bernabé, Pablobeje, matapania itsa jumetanebejec bajarapacuene peto-exanaejawanexatsibeje, apotsitaxanepanaetsibeje. Penaxatatsijawabeje mipatitinaxuabarecabeje, penajamatabëcuene-itajëtsinexabeje bitso penawecua-itoyajawa bajaraxua. Cujinaejinaliabeje jiwibitsaëtoxanetonë penacaetuanaejawabelia pitawetsinexabeje. Nexata, bajarapamonaetuatuajëta, Pablo, pinijijumeta jumaitsi:
15 —¿Detsa xuajitsia bajarapacuene paneto-exanaejitsiamë? Paxanëbeje-ata raja saya pajiwitonënëbeje. Pacuenia paxamë pajamatabëcuene-itsimë, bajarasaya paxanëbeje-ata patajamatabëcuene-itsinëbeje. Bajaraxua yabara papatajopajëbeje patacatsipaebinexabeje pexanialiwaisi, paxamë panenawecuacopabinexa papiamatamobicuene pa-exanawanapame, juya panesiwanajamatabëcuenecopabinexa pepoDiosojawabelia, Ponë peyamatacabiatsitecaenë. BajaraPonë raja exana mapanacuapijicuene, itaboxopijicuene, manuamenepijicuene-ata.
16 Bajayatami, wajawajënaeya, Dioso copatsi-ata daxitanacuapijiwi pejinawanapaenexa, jinawanapa pijacuata penatojitsipaecuenia.
17 Bajarapacuenia jinawanapae-ata, itsiata Dioso apocopatsi bajarapamonae nayapëtaeya-exanaenejewa peponaponaejawa pepoDiosonëcuene. Biji rajane, pexaniacuene peto-exanabiabijawata,d nayapëtaeya-exanabiaba peponaponaenëcuene bajarapamonaejawabelia. Nexata, bajaraPonë tocopatabiaba ema perunaenexa, pe-ubijawanë petonaxaniabinexatsi, penacuaitabiabinexanua pijamatacabianëjawa, bajarapacuenia daxitajiwi pexaejawa pexainaenexa, jamatabëcuenebarëyaya pejinawanapaenexa, bajaraPonë pejamatabëcueneta —jai Pablo pamonaejawabelia picani torobitsaëto tobejitsiatsibeje.
18 Bajarapacuenia Pablo jumaitsi-ata picani bajarapamonaejawabelia, itsiata ajamatabëcuenesaë petotajuitsinexatsibeje dajubi, ofrendacuenia perajutsinexatsibeje. Bajaraponëbeje pijinia, itsiata nayajiwi-ajumesaëbeje bajarapacuenia petotajuitsiyaniwatsibeje. Nexata, bajarapamonae belia baja copaba.
19 Nexata, itsamatacabijawabelia, itsamonae judíowi, parena Listra tomaraberena, peponaewi Antioquíae tomarawerena, Iconio tomarawerena-ata. Nexata, bajarapamonae najumetsënëtsiaya neconitatsibeje Pablo, Bernabébeje, Listra tomarapijiwijawabelia. Nexata, ayaibitsaëto Listra tomarapijiwi bara-anaepana bajaraponëbejejawabelia. Bajaraxuata, Pablo tseconatsi ibotonëta. Bajaraponë jopajunua irabelia bepetëpaenë. Bajaraxuacujinae, tomarapënëyabelia robobocaliatsi, tsipaji baja bepetëpaenëf taeyabuatatsi.
20 Itsiata baitsi jane, Jesús pijacuene penacujarubiwi Listra tomarata pejinawanapaewi, pexuababuatsinëtsi matatoyorotsia petaenubenaejawata, bajaraponë nonotabapuna icatsia. Caewëarena jonena Listra tomaraberena. Merawia pitsijawata Pablo, Bernabébeje, ponabeje baja Derbe tomarabelia.
21 Nexata, Derbe tomarata nacopatabeje caematacabibeje, petsipaebaponaponaenexabeje pexanialiwaisi, Jesús peliwaisi. Bajarajota, jiwibitsaëtoxaneto pejumexaniataexae bajarapaliwaisi, cujarubabeje Jesús pijacuene. Bajaraxuacujinae, icatsia nawiatanajetarucabeje Listra tomarajawa, Iconio tomarajawa, Antioquía tomarajawa-ata.
22 Bajarapatomaranëjawa Jesús pijacuene penacujarubiwijawabelia ajamatabëcuenesaëya-exanaponabeje. Muxujiobaponabejenua pewajënaeyabelia ajamatabëcuenesaëya pecatsitecawanapaenexa Jesucristojawabelia pitaxutuajamatejemajawa, itsamonae bejiobia-exanae-atatsi. Nexata jumaitsi tsaponaebeje:
—Wajapatsiwajënaeya Dioso pijanacuayabetsia, dowathi pejamatabëcueneta, pinijicuenia jiwi mapanacuataje nacabejiobia-exanaponaena —jaibeje tsaponae bajarapamonaejawabelia.
23 Pablo, Bernabébeje, Jesús pijajiwi barënacaetuatabeje, pexaejawa xaenejewa pebarënawajëcaenexabeje Diosojawabelia. Bajaraxuacujinae, caetomara canacujitsia to-itapetaponabeje ancianowi, Jesús pijajiwi pewetsinexa. Nexata, peponaewajënaeyabeje, penapëjiobijawata, towajëtaponabeje Diosojawabelia, peyawenonaenexatsi pamonae wajatuxanenë Jesús-jawabelia siwanajamatabëcuenecopaba pecapanepaenexatsi.
Pablo, Bernabébeje, nawiatabeje Antioquía tomarabelia, Siria nacuata pe-ecaetomara
24 Pablo, Bernabébeje, Pisidia nacua pexenetsicujinaebeje, patabeje Panfilia nacuayabelia.
25 Nexata, Perge tomarata, Jesús peliwaisi jiwi tsipaebabeje. Bajaraxuacujinae, icatsia patabeje Atalia tomarata, manuamene-itapata pe-ecaetomara.
26 Nexata, Atalia tomarata naropotabeje menia barcota. Nawiataponaliabeje jane baja Antioquía tomarabelia, Siria nacuata pe-ecaetomara, itsawerena bajaraponëbeje naropotabeje Jesús peliwaisi pepaebanajetarucaenexabeje. Jesús pijajiwi, Antioquía tomarata pejinawanapaewi, penaropotsiwajënaeyabeje, tsimatanacobebuatatsibeje Dioso peyawenonaponaenexatsibeje jiwi petsipaebanajetarucaejawatabeje Jesús peliwaisi. Pablo, Bernabébeje, petoweretsixaebeje daxita pacuenia Dioso itorobatsibeje, nawiatanajetarucabeje icatsia.
27 Itsa baja Antioquía tomarata patabeje, junatabeje penacaetuatsinexa daxita Jesús pijajiwi, petsipaebinexabeje pijanamuto yabara. Nexata, tsipaebabeje daxita pacuenia Dioso yawenonaponatsibeje. Nawajunupaebabejenua pacuenia Dioso tocopatatsibeje apojudíowijawa petsipaebanajetarucaenexabeje Jesús peliwaisi, bajarapamonae-ata pejumexaniataenexa bajarapaliwaisi.
28 Nexata, Pablo, Bernabébeje, Antioquía tomarata bajayajebi naponaponabeje Jesús peliwaisi pejumexaniataewijawata.