Pedro etatsi penaneconitsiwi pejebabiabibota
12
Bajarapamatacabianëjawa abaxë Bernabé, Saulobeje, ponaponabeje Jerusalén tomarata, nacua-ewetsinë Herodes taxuxuaba pebejiobia-exanaponaejawa Jesús pijajiwiyajuwënëwi.
2 Orijibia, bajaraponë pijajiwi itoroba espadata pebeyaxuabia-exanaenexa apóstol Santiago, Juan pematapijinëmi.
3 Herodes itsa tane judíowi petsitaxanepanaejawatsi Santiago pebeyaxuabijawatsi, nexata icatsia itoroba pijajiwi Pedro pewaetabinexatsi, pebeyaxuabinexatsi picani. Bajarapacuenia Herodes exana fiestamatacabi, pafiestajawataa judíowi baxane levadurata matajërëabinejewa pexanaepan.
4 Pedro pewaetabicujinaetsi, penaneconitsiwi pejebabiabibota etatsi. Bajarapabota cuatro pabitsaëtobeje wajabitsaëwi Pedro ya-ewetsia-exanatsi. Caebitsaëtojawata cuatro ponëbeje tsaponae. Itsabitsaëto itsa pitsapa, juya itsabitsaëto ewetabiabatsi. Nexata, picani Herodes najamatabëxaina Pedro penutsinexatsi daxita judíowi pitabarata Pascuafiesta pewerewerecaecujinae, pebeyaxuabia-exanaenexatsi.b
5 Paepatowajëto Pedro eca penaneconitsiwi pejebabiabibota, daxita Jesús pijajiwi pijinia, asaëyata towajëcapona Diosojawabelia.
Dioso capanepa Pedro penaneconitsiwi pejebabiabibowecua
6 Pamatacabi Herodes jutsijitsia picani Pedro, penutsinexatsi daxita judíowi pitabarata, pebeyaxuabia-exanaenexatsi, bajarapamerawi, Pedro majitanuca anijanëbeje wajabitsaënëbeje, petuatuajëta. Bajaraponëbeje Pedro pecobecaxatatsicujinaetsibeje, yamaëcabocatsibeje anijacadenamaëtotabeje. Itsanëbeje pijinia yabaupa-ewetatsi.
7 Jemata Dioso pija-ángelnë tsitanaitajëtatsi Pedro. Nexata, penaneconitsiwi pejebabiabibo ënëtuatuajëta naitayota. Pedro pemajitanucaenë ángelnë yenejayatabatsi, penaëcotsinexa. Jumaitsi Pedrojawabelia: «¡Naxatsiayo nonotapunare!», jai ángelnë. Nexata, Pedro pecobecëtsicadenamaëtotsibeje wecobejoparecatsi baja.
8 Icatsia, ángelnë jumaitsi Pedrojawabelia: «¡Nijacorrea xaniawaetsia naepacatarërëre! ¡Nataxuxatare baja nijazapato!», jai. Bajarapacuenia pexanaecujinae Pedro, icatsia ángelnë jumaitsi: «¡Naxatare nijacamisajumawelia nenaxatatabiabijawa! ¡Nepënaponare jane baja!», jai.
9 Pedro nexata napona ángelnë pepëta. Itsiata, xaniawaetsia aponajamatabëcueneyapëtae pepacuene ángelnë pebarëponaejawatsi. Saya jamatabëjumaitsi: «Amajitsinaenë meta», jamatabëjai.
10 Bajaraponëbeje itsiata xenetsiabeje copiaya pewetecaewajabitsaënë, xuacujinae cotocaewi pewetecaewajabitsaënë-ata. Bajaraxuacujinae, pepitsapaenexabeje callejawabelia, nucajopabeje jane hierronanitota pexanaebaupaxanetojawata. Nexata, bajarapahierrobaupaxaneto pijacuata tonabaupatatsibeje. Pitsatabaliabeje jane baja callejawabelia. Nexata, callejawareca penajetarucaejawatabeje, ángelnë jemata ajibi tsajopae.
11 Pedro jane baja, xaniawaetsia itsa najamatabëcueneyapëtane, jamatabëjumaitsi: «Aeconoxae rajane baja xaniawaetsia yapëtaniji Dioso taneto-itorobijawatsica pija-ángelnë, tanecapanepaenexa Herodes pecobewecua. Nexata baja, judíowi aponetae tsane Herodes pijajiwi tanebeyaxuabijawa», jamatabëjai.
12 Pedro bajarapacuenia peyapëtaexae, caecuenia pona María pijaboyabelia. Bajarapowa Juan pena, ponë wënërubatsi itsawënë, Marcos. Bajarapowa pijabota ayaibitsaëtoxaneto Jesús pijajiwiyajuwënëwi nacaetuata, Diosojawabelia petowajëcaenexatsi Pedro.
13 Bajaraponë baupa docodocota, petobaupatsinexatsi, María pijabo panabopijibaupa. Nexata, bajarapabota penacuenebiwayo, Rodewënëwa, pitsaparena petaenexa ponë baupa docodocotanunuca.
14 Rode itsa jumeyapëtane Pedrocuene, abaxë itsiata apotobaupatsi. Biji rajane, jamatabëcuenebarëyaya caewëalia cujinaeponalia bo-ënëabelia, petsipaebinexa bajarapabota penacaetuatsiwijawabelia, Pedro baupata penucaejawa.
15 Itsiata, bajarapamonae jume-aebatsi. Jumaitsi:
—¡Camatajemaba raja saya! —jai.
Itsiata, icatsia Rode jumaitsi:
—¡Xaniajanë raja pepacuene! Pedro raja nucalia baupa pënëwerena —jai.
Bajarapamonae nexata jumaitsi:
—ApoPedro raeta. Pewetsi-ángelnëtsic raeta —jai.
16 Pecuaicuaijaitsanubenaejawata, Pedro tsiteca baupa docodocotanunuca. Nexata jane baja, bajarapamonae matapania tobaupata Pedro pejonenexarena. Bajarapamonae itsa tane Pedro, jamatabëcuenenajunawiaca.
17 Nexata, Pedro nacobeyota bajarapamonae pemoyanexa. Bajaraponë tsipaeba pacuenia Dioso pejamatabëcueneta capanepatsi penaneconitsiwi pejebabiabibowecua. Jumaitsi:
—Patsipaebianame mapaliwaisije Santiagojawabelia,d itsamonae Jesús pijajiwijawabelia-ata —jai.
Bajaraxuacujinae, Pedro pitsapalia. Pona baja itsajawabelia.
18 Itsa baja matacabi tsina, pawajabitsaëwi Pedro ewetabiabatsi penaneconitsiwi pejebabiabibota, bitso jamatabëcuenebëjai, tsipaji apoyapëtae itsabelia Pedro pona.
19 Nexata, Herodes itoroba itsamonae wajabitsaë pejaitsinexatsi Pedro. Bajarapamonae apopecaxitajarabixae, nexata Herodes yanijoba pawajabitsaëwijawabelia picani Pedro ewetabiabatsi, peyapëtaenexa pacuenia pitsapa penaneconitsiwi pejebabiabibowecua. Itsiata, bajarapamonae xaniawaetsia apopetsipaebixae, Herodes anaeya itoroba itsamonae wajabitsaë bajarapamonaemi pebeyejebinexatsi, pijaneconijamatabëcuene. Nexata baja, beyejebatsi. Bajaraxuacujinae, nacua-ewetsinë Herodes wecuapona Judea nacua, Cesarea tomarabelia, peponaponaenexa bajarajotalia.
Pacuenia nacua-ewetsinë Herodes tëpa, be-ayaijamatabëcuenenë penataexae
20 Nacua-ewetsinë Herodes itsa ponapona Cesarea tomarata, bara-anaepana bitso Tiro tomarapijiwi, Sidón tomarapijiwijawabelia-ata. Nexata, apocopatsi bajarapatomarabejepijiwi pecomuacaenexa pexaejawa pijanacuajawaberena. Bajaraxuata, bajarapatomarabejepijiwi siwanajamatabëcueneyanaba, xaniawaetsia pebarëcuaicuaijainexa nacua-ewetsinë Herodes-jawabelia, tsipaji jitsipa icatsia petocopatsinexatsi pecomuacaenexa pexaejawa. Pepatsiwajënaeya Herodes pijabota, bajarapamonae muetsia palata rajuta Blastojawabelia, Herodes pijabo peto-ewetsinëtsi. Bajarapamonae jitsipa, petocuaicuaijainexatsi Herodes-jawabelia, pesiwajamatabëcuenecaewinexatsi pebara-anaepanaejawamitsi. Nexata, Blasto jejai. Tocuaicuaijai Herodes-jawabelia, icatsia pebarajamatabëxanepanaenexa bajarapatomarabejepijiwijawabelia.
21 Nexata, pamatacabi Herodes tocaëjëta bajarapatomarabejepijiwi pepatsinexa pijaboyabelia, bajarapamatacabi Herodes naitabëtsia naxatata nacua-ewetsinë penaxatatsicuenia. Bajaraponë eca jane baja, nacua-ewetsinë pe-ecaejawata. Bajaraxuacujinae jane baja bajarapatomarabejepijiwi barëcuaicuaijai. Nexata, penacaetuatsiwi pitabarata pexaniajamatabëcuenenëcuenia naliwaisipaeba.
22 Nexata, penacaetuatsiwi wawajaiya Herodes yabara jumaitsi:
—¡Maponëje nacabarëcuaicuaijaije, apojiwitonë! ¡Diosonë tsaena! —jai tsaponae Herodes yabara.
23 Bajarapacuenia pejumaitsijawa Herodes apopejume-itawetsixae, apopitorobixaenua juya Dioso pewënëxaniatsinexa, bajarapaepatota Dioso pija-ángelnë naneconitsia-exanatsi. Tocopatatsi oro pe-ënëwereninexatsi. Nexata, oro pe-ënëwerenijawatsi yatëpa.
24 Daxita bajarapacuenia Herodes Jesús peliwaisi pejumexaniataewi bejiobia-exanaponae-atarena, itsiata apocopabi petsipaebaponaejawa Jesús peliwaisi daxitanacuanëjawa. Nexata, Jesús pijajiwi ayaibitsaëtoxaneto tsaponae pewajënaeyabelia.
25 Bernabé, Saulobeje palata petocaponaewijawabelia, itsa baja nacueneweretabeje Jerusalén tomarata, nawiatabeje baja icatsia Antioquía tomarabelia. Barëliabejenua Juan, ponë wënërubatsi itsawënë Marcos.e