Pedro pona Corneliojawabelia, apojudíonë-ata
10
Cesarea tomarata ponapona Cornelio, apojudíonë. Bajaraponë Italia nacuawerena pepatsiwi wajabitsaëwi pijacapitán.
2 Bajaraponë pijabopijiwi yajawa Dioso bitso yaiyataeya ponapona. Barëjumecowënëtaponaponanua Dioso penajumecopatsiliwaisi Moisés-pijinëta. Nexata, wajëcabiaba Diosojawabelia. Orijibia, palata ayaijawa yawenonaeya rajutabiaba judíowi bepejiobiwijawabelia.
3 Itsamatacabi caniwiyo-epatota, bejamatabëcuene a las tres,a Cornelio bemajitsinaebota tane Dioso pija-ángelnë pejonejawarena pijaboyarena. Nexata junataxuabatsi.
—¡Cornelio! —jaitsi.
4 Cornelio petaejawata ángelnë, bitso junawa. Cujunawi-ata, itsiata naëcolia. Nexata, yaiyataeya jumaitsi ángel-nëjawabelia:
—Tajatuxanenë, ¿detsa xua jitsipame? —jai Cornelio.
Nexata ángelnë jumaitsi:
—Newajëtabiabijawa Diosojawabelia, nerajutabiabijawa-ata penamatawenonaecuene bepejiobiwijawabelia, daxita bajaraxuanë Dioso tsitaxanepanatsi. Nexata, catotane be-ofrenda nerajutsijawa bajaraPonëjawabelia. Aponacofënëtsinua bajaraxua.
5 ¡Itorobare nijajiwi Jope tomarabelia, pecatobarëpatsinexarena Simón, ponë wënërubatsi itsawënë Pedro!
6 Bajaraponë Pedro naponapona itsanë Simón-wënënë pijabota, vacabocotonë peyacueyacuecaeya-exanaenë. Bajaraponë pijabo eca manuamene-itapata. Nexata, Pedro, itsa patsiarena, catsipaebiana pacuenia exanaejitsiamë —jai ángelnë Corneliojawabelia bemajitsinaebota.
7 A̱jena̱ pewecuaponaecujinaetsi pa-ángelnë barëcuaicuaijaitsi bemajitsinaebota, Cornelio jane baja junata anijanëbeje pijabota petonacuenebaponaponaenëtsibeje. Pematatsënëa junata caenë wajabitsaënë, peyawenonabiabinëtsi, Dioso peyaiyataenë.
8 Nexata, Cornelio petsipaebicujinae bajarapamonaejawabelia daxita pacuenia tsipaebatsi ángelnë, itoroba bajarapamonae peponaenexa jane baja Jope tomarabelia, Simón Pedro pesiwaponaenexa. Nexata baja, bajarapamonae naropoba.
9 Merawia pitsijawata, matoneje-epatota, bajarapamonae Jope tomara imoxoyotanajetarubena. Bajarapijinia paepatota Pedro pabota naponapona, junaya bajarapabojumatatsia, pewajëtsinexa Diosojawabelia.
10 Pedro, pewajëcaenë, bitso piajani. Jamatabëxane picani. Paepatota jiwi jayabawanapa pexaejawa, bajarapaepatota Pedro bemajitsinaebocuenia tsitajëtatsi.
11 Tane itaboxo penapatsijawa. Tanenua athëbëwetsica perunaejawa irabetsica ayaipanaxaneto, besábanapanaxaneto. Bajarapapanaxaneto yamaëya copatsica cuatro pa-upibeje namata-enetsia pecëtsijawa.
12 Bajarapapanaxanetotuatuajëta nubena daxitacuenewiria, cuatro pataxutabeje pejinawanapaewi, pecotobëxëta pejinawanapaewi, pepunaewi-ata, pawiriawi Dioso jani-itawetab judíowi pexaeyaniwa.
13 Nexata, Pedro jumetane athëbëwetsica pejumaitsijawa:
—¡Pedro, nonotapunare! ¡Beyaxuabare mapamonaeyajuwënëwije nexaenexa! —pejaijawa jumetane.
14 Nexata Pedro jumaitsi:
—¡Jume raja tajatuxanenë! Dioso penajumecopatsiliwaisi Moisés-pijinëta, panejani-itaweta pataxaeyaniwa bajarapitsiwiriawi pewi. Bajaraxuata, caeto-ata xanë apoxaenë patanejani-itawetsiwi —jai Pedro.
15 Icatsia, athëbëwetsica jumaitsitsi Pedro:
—¡Pawiriawi nexaenexa ca-itorobatsi, xaema! ¡Xamë pëtsa janijunawame nexaejawa, pecajani-itawetsixae!c —jai athëbëwetsica.
16 Pedro bajarapacuenia jumaitsitsi acueyabi xuabeje napëna athëbëwetsica. Bajaraxuacujinae, bajarapapanaxaneto athëbëabetsia baja icatsia yapëcaewaya.
17 Pedro itsa abaxë canaëjëteca pajamatabëcuene yabara tsitajëtatsi bajaraxua, bajarapaepatota Cornelio pijajiwi pata pabota Pedro naponapona. Bajarapamonae nubena bajarapabo matatoyorotsia peyacaranatsi-ibopanapijibaupa pënëwerena. Pepatsiwajënaeya, namutuarena yanijobanajetarubena picani jiwijawabelia, peyapëtaenexa itsajota eca Simón, vacabocotonë peyacueyacuecaeya-exanaenë, pijabo.
18 Nexata, baupa pënëwelia ayaijumeta yanijoba. Jumaitsi:
—¿Mapabota aponaponaponae Simón, ponë wënërubatsi itsawënë, Pedro? —jai bajarapamonae.
19 Cotocaewi irajawatatsia, Pedro paepatota canaëjëbeca pajamatabëcuene xaina bemajitsinaebota petaejawa yabara. Bajarajota, Espíritu Santo jumaitsi Pedrojawabelia:
—¡Taema! Acueyabi ponëbeje cajaitanajetarubena.
20 ¡Nexata, nonotapunare! ¡Runaremeca baja nenaponaenexa bajarapamonae pepëta! Jamatejema saya ajamatabëcuenecowëbia naponaename, tsipaji raja xanë itorobarenajë bajarapamonae —jai Espíritu Santo Pedrojawabelia.
21 Nexata baja, Pedro runareca itsajotareca Cornelio pijajiwi nubena. Jumaitsi bajarapamonaejawabelia:
—Ponë pajaitame, xanë rabaja maje. ¿Detsa xua yabara panejaitanajetarubename? —jai Pedro.
22 Nexata, Cornelio pijajiwi jumaitsi Pedrojawabelia:
—Panajetarubenajë raja Cornelio, wajabitsaë pijacapitán-në, pejamatabëcueneta. Bajaraponë pexaniajamatabëcuenenë. Dioso asiwaya, peyaiyataenë. Bajaraponë asiwaya tanetsi daxita judíowi. Yaiyataeyanua copiapitabiabatsi. Cornelio, tsitanaitajëtatsi Dioso pija-ángelnë. Nexata, itorobatsi pecajunatsinexa. Cajumetaejitsia paliwaisi tsipaebijitsiamë bajaraponëjawabelia. Bajaraxuata, paxanë pacasiwaponarenatsi, pijaboyabelia nenaponaenexa —jai Cornelio pijajiwi Pedrojawabelia.
23 Nexata, Pedro copiapita bajarapamonae boyaberena pejonenexa. Bajarapamerawi abaxë namajita bajarapabota.
Bajayacunua jane baja, Pedro napona bajarapamonae pepëta. Pedro pëyanatatsi itsamonae Jope tomarapijiwi, Jesús peliwaisi pejumexaniataewi.
24 Nexata, merawia pitsijawata, Pedrobana jane baja palia Cesarea tomarabelia. Cornelio nexata pijabota yajawanuca pejunatsiwi, pijamonaewiriawi, itsamonae-ata bitso peyapëtaewitsi. Pedro jane baja barëwajënae-ewetanucatsi.
25 Pedro itsa patanajetaruca pijabopanabota, pecopiapitsijawatatsi, Cornelio pematabacabëta nucajunua Pedro pitabarata, bitso yaiyataeya bediosonëcuenia pecopiapitsinexa picani.
26 Nexata, Pedro apojitsipae bajarapacuenia bitso yaiyataeya pecopiapitsijawatsi. Maxëwaetabiaya nonotapunaeya-exana. Nexata, jumaitsi Corneliojawabelia:
—¡Nonotapunare, tsipaji raja saya xanë-ata jiwitonënë, pacuenia xamë itsimë! —jai Pedro.
27 Nexata, Pedro Cornelio barëcuaicuaijai tsanucaponae panabojawarena. Pedro itsa najoneya Cornelio pijaboyalia, tane jiwibitsaëtoxaneto bajarapabota penacaetuatsijawa.
28 Nexata, Pedro jumaitsi penacaetuatsiwijawabelia:
—Paxamë baja cajena xaniawaetsia payapëtaneme mapacueneje. Paxanë pajudíowinë patajasalinaiwimi apopanetocopatsi apojudíowi patayajawajinawanapaenexa, patajonenexa-ata pijaboyalia, bepatanaxuirabiwicueniad patanacopatsiyaniwa Dioso pitabarata. Itsiata baitsi jane, aeconoxaeta baja Dioso neyapëtaeya-exana tacopatsinexa bijiaya patacanaëcotsijamatabëcuenemi apopajudíowimë.
29 Bajaraxuata, itsa nijajiwi nejunata taponaenexa maberenaje, narenanë bepijia ajamatabëcuenecowëbia. Nexata, jamatabëyapëtaniji xua yabara panejunatame —jai Pedro penacaetuatsiwijawabelia.
30 Nexata, bajarajota Cornelio jumaitsi Pedrojawabelia:
—Xanë baja ajena xainajë cuatro pamatacabibeje tataecujinae ángelnë. Caniwiyo-epatota, bejamatabëcuene a las tres, tawajëtsijawata Diosojawabelia, bajarapaepatota jemata taitabarata netsitanaitajëta ángelnë, peniweniwenaejawa penaxatatsinë.
31 Nexata ángelnë nejumaitsi: «Cornelio, Dioso rabaja cajumetane newajëtsijawa. Siwajamatabëcuenebarëyaya yapëtanenua nerajutabiabijawa bepejiobiwijawabelia penamatawenonaecuene.
32 ¡Nexata, nijajiwi itorobare Jope tomarajawabelia, pecatojunatsinexa Simón, ponë wënërubatsi itsawënë, Pedro! Bajaraponë naponapona itsanë Simón, vacabocotonë peyacueyacuecaeya-exanaenë, pijabota. Bajaraponë pijabo eca manuamene-itapata. Nexata, Pedro, itsa patsiarena, catsipaebiana pacuenia exanaejitsiamë», nejai ángelnë.
33 Bajaraxuata, bepijiayo casiwaponaeya-exanatsi. Xamë baja nexata pexaniajamatabëcuenia netopatame. Bajaraxuata, newajënae daxita paxanë panacaetuatajë Dioso pitabarata. Paca-ewetatsi patacajumetaenexa daxita paliwaisi Dioso ca-itoroba patanetsipaebinexamë —jai Cornelio Pedrojawabelia.
Pedro Jesús peliwaisi tsipaeba Cornelio pijabota penacaetuatsiwijawabelia
34 Pedro jane baja taxuxuaba liwaisi petsipaebijawa. Jumaitsi:
—Matapania rajane baja yapëtaniji mapacueneje. Najëpaeyae tsaena Dioso nacatane daxitawiriawitsi.
35 Caenacuapijiwi canacujitsia, pamonae Dioso yaiyataeya jinawanapa, jumecowënëtsiajinawanapanua pacuenia Dioso itorobatsi, bajarapamonae Dioso najëpaeya tane.
36 Dioso cajena pexanialiwaisi, Jesucristo peliwaisi, panetonajumecopata paxanë Israel-pijinë papemomoxinëjawaberena, pataneyapëtaeya-exanaenexa pacuenia caejamatabëcuene paxainaejitsianë Diosojawabelia, patanesiwajamatabëcuenecaewicujinae pibisiacuene pata-exanaeneconi Jesucristo pejamatabëcueneta. Itsiata, aeconoxae yapëtaniji pacuenia Jesucristo baja daxitajiwi pijatuxanenë-ata.
37 Payapëtaneme rabaja mapacueneje. Juan, jiwibautizabinëmi, jiwi liwaisi petsipaebanajetarucaecujinae, pebautizabaponaecujinaenua, Jesús cotocaewi tsipaebanajetaruca Galilea nacuajawa, Judea nacuajawa-ata.
38 Payapëtanemenua pacuenia Jesús, Nazaret tomarapijinë, Dioso tsimatarunaeya-exanatsi Espíritu Santo, pesaëtanua jamatabëcuenecaëjëpaeya-exanatsi pinijicuenejawanë pexanaenexa. Bajarapacuenia Dioso peto-exanaexaetsi, Jesús exanapona pexaniacuenejawanë jiwijawabelia. Jamatejemaya-exanaponanua daxita pamonae bejiobia-exanatsi wixaeta, dowathi pejamatabëcueneta, tsipaji bajaraponë Dioso yajawaponaponatsi.
39 »Paxanë, pa-apóstolewinë, pataniji baja daxita xua Jesús exanapona Judea nacuata, Jerusalén tomarata-ata. Patanijinua pacuenia itsamonae beyaxuabatsi Jesús, pecobematabiabarutsijawata cruzajawabelia.
40 Itsiata baitsi jane, Jesús, petëpaenë pemëthëtsicujinaetsi, acueyabimatacabita Dioso icatsia asaëya-exanatsi. Tocopatatsinua Jesús patanetsitanaitajëtabiabinexa paxanëjawaberena.
41 Itsiata, Jesús apotsitanaitajëtsi daxitajiwijawabelia. Ëpaxanëjawaberena saya panetsitanaitajëtabiaba, tsipaji tajëwelia baja cajena Dioso pane-itapeta patawajunupaebiwinexa patataejawa Jesús petëpaecujinae icatsia piasaëjawa. Bajaraxuata, Jesús petëpaecujinae, icatsia itsa asaë, panetsitanaitajëtabiaba, patanebarëxaenexa, patanebarëmatawëjëa-apaenexanua.f
42 Nexata, Jesús pane-itoroba patatsipaebaponaenexa daxitajiwijawabelia pexanialiwaisi, Jesús peliwaisi. Pane-itorobanua patatsipaebaponaenexa Dioso pejamatabëcueneta itsamatacabi Jesús penaneconitsia-exanaejawanexag daxita pijaneconi pexainaewi, piasaëwi, petëpaewimi-ata.
43 Ëpaxanë apopawajunupaebinë Jesús peliwaisi. Bajayata-ata Diosojumepaebiwimi, profetawi, tajëwelia wajunupaebapona Jesús pejamatabëcueneta Dioso pewecua-ajibia-exanaejawanexa pibisiacuene pexanaeneconimi, pajiwiyo jumexaniataneh Jesús peliwaisi —jai Pedro Cornelio pijabota penacaetuatsiwijawabelia.
Espíritu Santo tsijamatabëjunuatsi apojudíowi-ata, pacuenia tsijamatabëjunua judíowijawabelia
44 Pedro abaxë liwaisi petsipaebanucaejawata Corneliobanajawabelia, Espíritu Santo tsijamatabëjunuatsi daxita pamonae jumetaeyena Pedro petsipaebiliwaisi.
45 Nexata, judíowi, Jesús peliwaisi pejumexaniataewi, Pedro peyajawapatsiwi, itsa tane bajarapacuene, jamatabëcuenenabenajacanubena bitso, tsipaji Dioso rajuta apojudíowi-ata Espíritu Santo petsijamatabëjonenexatsi.
46 Yapëtane Espíritu Santo petsijamatabëjonejawatsi Corneliobana, tsipaji bajarapamonae cuaicuaijai itsawiriajumenëta, apopecuaicuaijaijumenëmi, Dioso pexaniacuenia pewënëxaniatsinexa,i ayaijamatabëcuenenë yabara.
47 Bajarapacuenia petaejawata, Pedro jumaitsi peyajawapatsiwijawabelia:
—Pacuenia waxaitsi Dioso nacarajuta Espíritu Santo, bajarapijinia pacuenia mapamonae-ata rajutatsi Espíritu Santo. Bajaraxuata, acuenebi itsajiwi-ata pitawetsijawa bajarapamonae pebautizabijawa merata —jai Pedro.
48 Nexata, Pedro peyajawapatsiwi itoroba penabautizabinexa Corneliobana, Jesucristo pewënëta. Pebautizabicujinae, bajarapamonae asiwatsi abaxë Pedrobana caematacabibeje bajarajota penajinawanapaenexa.j