Jesús pijajiwi itapeta siete ponëbeje diáconowinexa
6
Jesús pijacuene penacujarubiwi, pewajënaeyabelia ayaibitsaëtoxanetonë tsaponae. Daxita judíowi-ata, itsiata, itsamonae griegojume pecuaicuaijaiwi,a itsamonae pijinia hebreojume pecuaicuaijaiwi. Nexata, caematacabi canacujitsia pacujinae apóstolewi rajutabiaba penamatawenonaejawanë bitso bepejiobiwijawabelia, pamonae griegojume pecuaicuaijaiwi apotsitaxanepanaetsi beweliacuenia peyawenonaponaejawatsi papetiriawi pamonajiwi pewecuatëpaewanëtsi. Nexata, cuenecarapuabiaya jumaitsi judíowijawabelia:
—Apóstolewi itsa tsicobetsanabiaba pexaejawa pamonajiwi pewecuatëpaewanëtsijawabelia, xuawajëtonë panijawiriawijawabelia rajutabiaba, bajaraxuawajëtonë patajawiriawijawabelia aporajutabiabi —jai griegojume pecuaicuaijaiwi hebreojume pecuaicuaijaiwijawabelia.
2 Doce ponëbeje, apóstolewi, itsa nayajumetane pebaracuaicuaijawatsi, nexata junata penacaetuatsinexa daxita pamonae Jesús pijacuene penacujarubiwi, bajarapaliwaisi pexanebinexa. Nexata baja, itsa nacaetuata daxita bajarapamonae, apóstolewi jumaitsi bajarapamonaejawabelia:
—Tajamonae, apopanetoxanepanae cajena paxanë patacopabijawa jiwi patatsipaebabiabijawa Dioso peliwaisi, juya xaniawaetsia patatsicobetsanabiabinexa pexaejawa bitso penamatawenonaewijawabelia.
3 Bajaraxuata, patajamonaemë Cristo pejamatabëcueneta, bepa-itapetame, paxamëyajuwënëwi, siete ponëbeje, caejamatabëcuene pexainaewi, Espíritu Santo bitso pejamatabëcuenecaëjëpaeya-exanaewitsi, bitso petsiyapëtaewinua pexanaejawanexa. Nexata, bajarapamonae paxanë patocopatsianajë bepejiobiwijawabelia petsicobetsanabiabinexa penamatawenonaecuene.
4 Paxanë juya patsitecawanapaenajë patawajënaeyabelia patawajëcabiabijawa Diosojawabelia, patatsipaebabiabinexanua Dioso peliwaisi jiwijawabelia —jai apóstolewi penacaetuatsiwijawabelia.
5 Nexata, daxita bajarapamonae itsa jumetane apóstolewi bajarapacuenia pejumaitsijawa, tsitaxanepanatsi. Nexata, itapeta bajarapamonaeyajuwënëwi mapamatabëxëyoje. Itapeta Esteban, ponë bitso Dioso pitaxutuajamatejemanë, Espíritu Santo bitso pejamatabëcuenecaëjëpaeya-exanaenëtsi. Itapetanua Felipe, Prócoro, Nicanor, Timón, Parmenas, Nicolás-ata. Nicolás itsanacuapijinë, Antioquía tomarapijinë. Apojudíonë-ata, itsiata, judíowicuenia najumecowënëtaponapona.
6 Daxita bajarapamatabëxëyo pitapetsicujinaetsi, nubatsi apóstolewi pitabarata. Nexata, apóstolewi, caenë canacujitsia, pematabocotojumawereca nacobebuatanubena, Diosojawabelia petowajëtsijawata.
7 Nexata jane baja, apóstolewi, itsamonae yajawa, Dioso peliwaisi jiwi tsipaebapona Jerusalén tomarata. Nexata, Jerusalén tomarata ayaibitsaëtoxaneto tsaponae Jesús pijacuene penacujarubiwi. Sacerdotewi-ata ayaibitsaëto jumexaniataepona Jesús peliwaisi.
Diácono Esteban waetabatsi, penaneconitsia-exanaenexatsi Jesús peliwaisi pepaebixae
8 Dioso bitso pexaniacuenia yawenonabiabatsi Esteban. Nexata, bajaraponë tsita-exanabiaba Dioso pesaëta pinijicuene pexanaejawanë, daxitajiwi pitabarata.
9 Esteban Jesús peliwaisi petsipaebaponaponaejawata, itsamonae barënajume-anaenotatsi, pamonae nacaetuatabiaba judíowi penacaetuatabiabibota, Esclavos Libertados-wënëb sinagogabojawata. Bajarapamonae judíowi pepatsiwi Cirene nacuawerena, Alejandría tomarawerena, Cilicia nacuawerena, itsamonae pijinia Asia nacuawerena.
10 Itsiata, bajarapamonae asaëya barënajume-anaenotsi-ata Esteban-jawabelia, apocuenecaëjëpaetsi peliwaisi-amoneyabijawa, tsipaji Espíritu Santo jamatabëcueneyawenonatsi xaniawaetsia pejumecanawiatsinexa bajarapamonaejawabelia. Bajaraxuata, juya bajarapamonae Esteban apojumecanawiatsicapanepaetsi.
11 Nexata, bajarapamonae matamota itsamonae najumetsënëtsiaya Esteban peneconitsinexatsi jiwijawabelia. Nexata, pematamotsiwi, najumetsënëtsiaya jane baja jumaitsi jiwijawabelia Esteban yabara:
—Pajumetaniji pibisiacuenia Esteban pebaracuaicuaijaitsabiabijawa Moisés-pijinë, Dioso-ata —jai bajarapamonae Esteban yabara.
12 Bajarapacuenia bajarapamonae pejumaitsixae, nexata daxitajiwi, judíowi pija-ancianowi, judíowi pecujarubiwi-ata, anaepana Esteban-jawabelia. Nexata, Esteban cujibarenatsi. Waetabatsi. Caponaliatsi penutsinexatsi pitabarata sacerdotewi penamatacaitorobiwi, judíowi pija-ancianowi, judíowi pecujarubiwi-ata.
13 Nexata, icatsia, bajarapamonae junata pamonae jane baja matamota najumetsënëtsiaya peneconitsinexatsi Esteban. Nexata, bajarapamonae itsa pata, jumaitsi Esteban yabara:
—Mara ponëje Esteban apocueranae Dioso apopejitsipaecuenia pebaracuaicuaijaitsabiabijawa Dioso pijatemplobo. Apocueranaenua Dioso penajumecopatsiliwaisi-ata Moisés-pijinëta pebaracuaicuaijaitsabiabijawa.
14 Pajumetaniji maponëje pejumaitsijawa mapacueniaje: «Jesús, Nazaret tomarapijinë, xuabianica mapatemploboje. Dioso penajumecopatsiliwaisi-ata Moisés-pijinëta wajajumecowënëtsijawa, nacacopabia-exanaena Jesús», jai maponëje —jai najumetsënëtsiaya Esteban yabara pamonae matamotatsi.
15 Nexata, sacerdotewi penamatacaitorobiwi, judíowi pija-ancianowi, judíowi pecujarubiwi-ata, naëcobarëcëpatsi Esteban. Nexata, bajarapamonae Esteban pitabaranaëcobarëcëpaejawatatsi, betsita-ángelnë-itabaratsi.