Ananías, pijawa Safirabeje, tëpabeje, penajumetsënëtsixaebeje Espíritu Santojawabelia
5
Bajarapamatacabijawa, naponaponabeje Jesús pijajiwituatuajëta Ananías, pijawa Safirabeje. Bajarapajiwibeje yajuwënëcanajetabeje pija-ira.
2 Nexata, Ananías pija-iramatamoyajuwënëpalata muetsia copata. Bajaraponë, pijawabeje caejamatabëcuene najuaxainabeje, bajarapacuenia pexanaenexabeje. Bajaraxuacujinae, Ananías peyajuwënëcopatsipalata calia apóstolewijawabelia. Nexata, Ananías jumaitsi apóstolewijawabelia:
—Taja-ira raja yajuwënëcanajetajë. Nexata, pacarajutsijitsiatsi daxita bajarapa-iramatamopalata, panetsicobetsanaenexa wajanajuajinawanapaewijawabelia —jai.
3 Nexata, Pedro jumaitsi bajaraponëjawabelia:
—Ananías, ¿detsa xuajitsia tocopatame dowathi pecajamatabëcuene-itorobijawa, nenajumetsënëtsinexa Espíritu Santojawabelia? Xamë baja cajena nija-iramatamo palata yajuwënëcopatame.
4 Nija-irami necanajetsiwajënaeya, nija-ira baja cajena picani saicaya. Xua nija-iramatamo pitame, nijajawa baja cajena. ¿Detsa xuajitsia nexata mapacuenia neyamaxë-itojorobijawa najamatabëxainameje? Ëpaxanëjawaberena baja cajena aponajumetsënëtsimë. Najumetsënëtame baja cajena Diosojawabelia-ata —jai Pedro.
5 Ananías paepatota jumetane bajarapacuenia Pedro pejumaitsijawa, petëpaenë irata jopa. Nexata, daxita pamonae wënëliwaisitane bajarapacuenia Ananías petëpaejawa, pinijicuenia jamatabëcuenenajunawiaca.
6 Nexata, pabota Ananías petëpaenë boca, bajarapaboyarena pewëjëawi jonena. Mataquiona petëpaenë. Bajaraxuacujinae, capitsapalia pemëthëtsinexa.
7 Bajaraxuacujinae, bexëa, acueyabi pahorabejecujinae, Ananías-pijinë pijawa jonena, abaxë apoyapëtaenejewa pamona pewecuatëpaejawatsi.
8 Pedro icatsia yanijoba bajarapowajawabelia. Jumaitsi:
—¡Netsipaebare! ¿Xaniajai tsabaja? ¿Mapamatamotaje pacanajetamebeje panija-iramibeje? —jai Pedro.
Nexata bajarapowa jumaitsi:
—Xaniajai rabaja. Bajarapacuenia pacanajetajëbeje —jai bajarapowa.
9 Nexata, Pedro jumaitsi bajarapowajawabelia:
—¿Detsa xuajitsia amonabeje panajamatabëcuenejëpamebeje, panenajumetsënëtsinexabeje Espíritu Santojawabelia? ¡Namuxuna-ewere! Jumia rabaja nawiabanajetarubena rabaja amonami pemëthëcaewitsilia. Bajarapamonae icatsia xamë-ata cacaponaelia, pecamëthëtsinexa —jai Pedro.
10 Nexata, bajarajota Pedro pitabarata bajarapowa-ata icatsia petëpaewa irata jopa. Itsa jonena pewëjëawi penawiabanajetarubenaewi, Ananías-pijinë pemëthëcaewilia, caxitajarababuata petëpanucaewa. Nexata, icatsia bajarapamonae capitsapalia bajarapowa pemëthëtsinexa pamonami pemëthëmuxuneneta.
11 Nexata, daxita Jesús pijajiwi, itsamonae-ata, pamonae bajarapajiwibeje petëpaejawa wënëliwaisitanetsi, bitso junawa.
Apóstolewi tsita-exanapona Dioso pesaëta pinijicuene pexanaejawanë
12 Apóstolewi tsita-exanapona Dioso pesaëta pinijicuene pexanaejawanë Jerusalén tomarapijiwi pitabarata. Daxita Jesús peliwaisi pejumexaniataewi tsiteca nacaetuatabiaba templobopijipanabota, Portal de Salomón-wënëjawata.
13 Daxita Jerusalén tomarapijiwi pexaniacuenia yaiyataeyabiabi-ata Jesús peliwaisi pejumexaniataewijawabelia, itsiata, pamonae pejume-aebiwi abaxë Jesús peliwaisi, junawa bajarapamonae yajawa penanajuanacaetuatsijawa.
14 Pewajënaeyabelia jiwibitsaëtoxaneto jumexaniataepona Jesús peliwaisi, pebijiwi, petiriawi-ata. Nexata, daxita bajarapamonae nanacaetuatabiaba Jesús peliwaisi pejumexaniataewijawabelia.
15 Apóstolewi pexanaponaexae Dioso pesaëta pinijicuene pexanaejawanë, itsamonae tocapatabiabatsi piawitanewi callejawaberena. Tojebabiabatsi camata, itsa jume, betulimacuenejawanëta. Nexata, Pedro itsa najetaruca callejawa, piawitanewi jitsipabiaba Pedro pejayatsijawatsi, itsa jume, pitacaënae-ata petsijopaejawatsi bajarapamonae pejamatejemanexa piawitanejawawecua.
16 Orijibia, jiwibitsaëtoxanetonë patabiaba Jerusalén tomaraberena, imoxoyo pe-enaetomaraxijawawerena penaropobiwi. Bajarapamonae Pedro tocapatabiabatsi piawitanewi, itsamonaenua dowathi pecanacuenebiwitsi, bitso pebejiobia-exanaewitsinua. Daxita bajarapamonae Pedro, itsamonae apóstolewi yajawa, Dioso pesaëta jamatejemaya-exanabiaba.
Sacerdotewi pepopenamatacaitorobinë taicaeya-exana apóstolewi, penaneconitsia-exanaenexa
17 Bajarapacuenia pecuenetaexae, sacerdotewi pepopenamatacaitorobinë, pamonae-ata yajawaponapona, saduceowi,a pinijicuenia bara-anaepana apóstolewijawabelia, pecueneca-ëbixae.
18 Bajaraxuata, itoroba templobopijipolicíawi petaicaenexa apóstolewi. Jebatsi penaneconitsiwi pejebabiabibota.
19 Itsiata baitsi jane, bajarapamerawi Dioso pija-ángelnë tobaupanatsi penaneconitsiwi pejebabiabibobaupanë. Nexata, ángelnë pematacapitsapaecujinaelia, jumaitsi apóstolewijawabelia:
20 —¡Paponare templobojawabelia! Bajarajotalia patsipaebianame mapaliwaisijeb jiwijawabelia: «Dioso rajutsiana matacabi apopewerewerecaejawac jiwijawabelia, Jesús piasaëya-exanaexae petëpaejawawecua», pajamë tsane —jai ángelnë.
21 Apóstolewi itsa jumetane bajarapacuenia ángelnë pejumaitsijawa, nexata ajena matacabi tsina, ponalia templobojawabelia. Nexata, templobota Jesús peliwaisi jiwi tsipaebanubena.
Bajarapaepatota, pijinia sacerdotewi pepopenamatacaitorobinë, peyajawaponaponaewi-ata barënacaetuata itsabojawata. Nexata, junata penacaetuatsinexa bajarapabota judíowi pija-ancianowi, judíowi pecujarubiwi-ata, pebarëcanaëjëtsinexa apóstolewi pijaliwaisi. Xuacujinae, itoroba templobopijipolicíawi petocaponaenexatsirena apóstolewi penaneconitsiwi pejebabiabibojawawerena, petonubinexatsi bajarapamonae pitabarata.
22 Nexata, templobopiji-policíawi itsa ponalia, apocaxitajarabi apóstolewi penaneconitsiwi pejebabiabibota. Nexata, nawiabarena cobesa, petsipaebinexa pewetsiwi penacaetuatsiwijawabelia.
23 Nexata, templobopijipolicíawi jumaitsi bajarapamonaejawabelia:
—Itsa papaliajë penaneconitsiwi pejebabiabibojawabelia, daxitabaupanë xaniawaetsia nabaupaxatabanubena. Bajarajota, nubena picani baupanë pewetanubenaewi. Itsiata baitsi jane, itsa pabaupatajë, caenë-ata, apóstolnë, apo-ecae bajarapabo ënëtuatuajëalia —jai policíawi.
24 Nexata, templobopijipolicíawi pijacapitán, sacerdotewi penamatacaitorobiwinua, itsa jumetane bajarapacuenia policíawi pejumaitsijawa, bajarapamonae jamatabëjumaitsi: «¿Detsa meta nexata itsi apóstolewi?»,d jamatabëjai bajarapamonae.
25 Nexata, bajarapaepatota itsanë pebi parena, templobojawawerena peponaenë. Jumaitsi bajaraponë bajarapamonaejawabelia:
—¡Panejumetaema! Pamonae picani pajebame penaneconitsiwi pejebabiabibota, bajarapamonae cajena templobotalia, jiwijawabelia tsipaebanubena Jesús peliwaisi —jai bajaraponë.
26 Nexata, templobopijipolicíawi pijacapitán barëlia pijajiwi, apóstolewi icatsia petaicaenexa. Itsiata, xaniawaetsia caponarena bajarapamonae, tsipaji cujunawa jiwi petseconaeyaniwatsi ibotonëta, pamonae namuxuna-eweta apóstolewi petsipaebiliwaisi.
27 Itsa baja apóstolewi caparenatsi, nexata nubatsi sacerdotewi penamatacaitorobiwi, judíowi pija-ancianowi, judíowi pecujarubiwi-ata pitabarata. Nexata, bajarajota sacerdotewi pepopenamatacaitorobinë jumaitsi apóstolewijawabelia:
28 —Paxanë baja cajena, paca-itawetatsi picani matawëjëa jiwi panetsipaebiyaniwa Jesús peliwaisi. ¿Itsiata, tsabaja cajena apopanejumecowënëtsimë? ¡Pataema jane pacuenia Jerusalén tomarata yacaëjëpapona panetsipaebiliwaisi! Paxamë jamatabëpaneneconitame Jesús pebeyaxuabijawatsi yabarae —jai sacerdotewi pepopenamatacaitorobinë apóstolewijawabelia.
29 Nexata, Pedro, itsa-apóstolewi yajawa, jumecanawiata mapacueniaje:
—Paxanë panamatawenonajë patajumecowënëtsinexa xua Dioso pane-itoroba, patawënajiwi penamatacaitorobiwi-ata patane-itorobijawawecua.
30 Paxanë baja cajena payapëtaniji paxamë Jesús panebeyaxuabijawa, pamatacabi pacobematabiabarutame cruzajawabelia.f Itsiata, wajasalinaiwimi pijaDioso, Jesús icatsia asaëya-exanatsi petëpaecujinae.
31 Bajaraxuacujinae, Jesús piasaëya-exanaecujinaetsi, Dioso pecujuanenia ecaeya-exanatsi, ayaijamatabëcuenenëcuenia daxita jiwi peyaiyataenexatsi, bajarawetsica pewetsinexa jiwi. Tocopatatsi pematacaponaenexa Israel-pijinë pemomoxi penajamatabëcuenepënëyorotsinexa Diosojawabelia, pibisiacuene pexanabiabijawawecua. Tocopatatsinua jiwi pecapanepaenexa pijaneconiwecua, tsipaji Dioso jitsipa Jesús pejamatabëcueneta daxitajiwi aneconijibia petaenexa.
32 Daxita xua tocopiapatatsi Jesús paxanë raja pataniji, Espíritu Santo-ata. Nexata, bajarapacuene yabara jiwijawabelia itsa patsipaebaponajë, Espíritu Santo paneyajawa tsabiabi, tsipaji Dioso cajena rajutapona Espíritu Santo pamonaejawabelia jumecowënëta Dioso —jai Pedro, itsa-apóstolewi yajawa, daxita bajarapamonaejawabelia.
33 Nexata, daxita bajarapamonae itsa jumetane bajarapacuenia Pedrobana pejumaitsijawa, bitso anaepana. Jamatabëbeyejebatsi picani apóstolewi.
34 Itsiata, apobeyejebitsi, tsipaji bajarapamonaeyajuwënënë judíowi pecujarubinë, Gamaliel-wënënë,g nonotapuna daxita penajuawi pitabarata. Bajaraponë fariseonë, Dioso penajumecopatsiliwaisi Moisés-pijinëta pecujarubinë. Daxitajiwi peyaiyataenëtsi. Nexata, Gamaliel itoroba wajabitsaë apóstolewi cae-epatoyo pecapitsapaenexatsilia.
35 Nexata, apóstolewi pecowëta, Gamaliel jumaitsi penajuawijawabelia:
—¡Tajamonae judíowi, panajamatabëxainare xaniawaetsia! ¡Pëtsa pa-exaname pacuenia panajamatabëxainame mapamonaejawabeliaje!
36 ¡Panajamatabënapire pacuenia Teudas-pijinëmi bajayata exanatsi! Bajaraponëmi picani nacua pewetsinënexa, ayaijamatabëcuenenë bitso jamatabënaexana. Nexata, picani pijajiwinexa pënajinawanapatsi cuatrocientos ponëbeje. Itsiata, Teudas-pijinëmi wajabitsaë beyaxuabatsi. Bajaraponëmi pepënajinawanapaewitsi, pamonae pijajiwinexa picani, daxita nacayajateca. Nexata baja, copiaruca bajarapacuenemi.
37 Bajaraxuacujinae, icatsia pamatacabi gobierno pejamatabëcueneta daxitajiwi namata-ëjëta. Bajarapamatacabi Judas-pijinëmi, Galilea nacuapijinëmi, bajarapijinia pacuenia jiwi ayaibitsaëtoxaneto pënajinawanapatsi. Bajaraponëmi-ata wajabitsaë beyaxuabatsi. Nexata, daxita pepënajinawanapaewitsi nacayajateca. Nexata baja, copiaruca bajarapacuenemi-ata.
38 Bajaraxuata nexata, mapamonaeje apóstolewi yabara pacatsipaebijitsiatsi. ¡Pëtsa pa-itsacueniabame bajarapamonae! Itsa bajarapamonae peneta mapanacuapijiwi pejamatabëcueneta tsipaebawanapaje, bepijia petsipaebiliwaisi werewerecaena.
39 Itsa jume, Dioso pejamatabëcueneta bajarapamonae bajarapaliwaisi jiwi itsa tsipaebawanapa, nexata acuenebi tsipae paxamë bajarapacuene panewerewerecaeya-exanaejawa. Belia ayaineconi panatsi-exanaejitsipame Diosojawabelia —jai Gamaliel daxita penajuawijawabelia.
40 Nexata, daxita bajarapamonae jumecowënëtatsi Gamaliel. Apóstolewi icatsia caewëalia pejonenexalia junaliatsi. Bajaraxuacujinae, apóstolewi, caenë canacujitsia, ayaicuenia jumatitibabeponatsi penaneconitsiwi pejumaconitabiabimacata. Itawetatsi icatsia matawëjëa jiwi petsipaebiyaniwa Jesús peliwaisi. Bajaraxuacujinae, copabatsi jane baja peponaenexa.
41 Apóstolewi nexata pitsaparena bajarapabowecua. Barëyaya ponalia, tsipaji Dioso tocopatatsi bajarapacuenia pebejiobia-exanaponaenexatsi,h Jesús pijajiwixae.
42 Nexata, caematacabi canacujitsia templobota, jiwi pijabonëjawa-ata, apóstolewi asaëya Jesús peliwaisi tsipaebapona jiwijawabelia. Cujarubaponanua pacuenia Dioso itorobica Jesucristo jiwi pecapanepaenexa.