Pedro, Juan-beje, Jesús peliwaisi tsipaebabeje templobo pewetsiwijawabelia
4
Pedro, Juan-beje, itsa abaxë Jesús peliwaisi tsipaebanucabeje bajarapamonaejawabelia Portal de Salomón-wënëjawata, bajarapaepatota jemata patanajetarubena itsamonae sacerdotewi, saduceowinua, itsanë capitána yajawa, templobopijipolicíawi pewetsinë.
2 Daxita bajarapamonae bara-anaepanatsi Pedro, Juan-beje, tsipaji bajaraponëbeje Jesús peliwaisi petsipaebijawata, jumaitsibeje tsaponae:
—Jiwi tëpae-ata tsane, icatsia asaë tsane petëpaecujinae. Bajarapaliwaisi cajena pexaniajailiwaisi, tsipaji baja icatsia Jesús asaëya-exanatsi petëpaecujinae —jai tsaponaebeje.
3 Nexata, apopetsimuxuxanepanaexaetsi bajaraponëbeje pepaebiliwaisi, bajarapamonae waetabatsibeje. Caponaliatsibeje pe-etsinexatsibeje penaneconitsiwi pejebabiabibota. Merawia pitsijawata jutsijitsiatsibeje, pijaneconi petocanaëjëtsinexatsibeje, tsipaji baja bitso caniwiyo-epatotab waetabatsibeje.
4 Itsiata baitsi jane baja, jiwibitsaëtoxanetonë capanepaeya jumexaniatanetsibeje pepaebiliwaisi pewaetabiwajënaeyatsibeje. Nexata, daxita pamonae jumexaniatane Jesús peliwaisi, ëpebijiwi namata-ëjëtatsi bejamatabëcujiru cinco mil ponëbeje, namata-ëjëtsinejewa petiriawi, pejewaxi-ata.
5 Nexata, merawia pitsijawata nacaetuata judíowi pewetsiwi, pija-ancianowi, pecujarubiwinua Moisés-pijinëta penajumecopatsiliwaisi, Jerusalén tomarata.
6 Bajarajota, napatanua Anás,c sacerdotewi pepopenamatacaitorobinë, Caifás, Juan, Alejandro, itsamonae-ata sacerdotewi pijamonae.
7 Nexata, Pedro, Juan-beje, nutatsibeje daxita bajarapamonae pitabarata. Nexata, bajarapamonae jumaitsi bajaraponëbejejawabelia:
—¿Jipatsa pejamatabëcueneta paxanepanaeya-exanamebeje apopecaëjëpaenëmitsi peponaponaejawa? —jai.
8-9 Nexata, bajarapaepatota Pedro Espíritu Santo ayaicuenia jamatabëcuenecaëjëpaeya-exanatsid ajumejunawijibia pejumecanawiatsinexa mapacueniaje:
—Paxamë judíowi pane-ewetsiwi, paxamë-ata pijinia pa-ancianowimë, paneyanijobame, paneyapëtaenexa pacuenia paxanepanaeya-exanajëbeje apopecaëjëpaenëmitsi peponaponaejawa, pexaniacuene pato-exanae-atanëbeje.
10 Nexata, pacatsipaebianatsi daxita paxamë paneyapëtaenexa, daxita Israel nacuapijiwi-ata peyapëtaenexa. Maponë pane-itabarata nucaje, apopecaëjëpaenëmitsi peponaponaejawa, Jesús, Nazaret tomarapijinë, pejamatabëcueneta xanepanaeya-exanatsi, ponë picani paxamë pacobematabiabarutame cruzajawabelia. Bajaraponë baja cajena Dioso icatsia asaëya-exanatsi petëpaecujinae —jai Pedro.
11 Icatsia, Pedro jumaitsi:
—Bajarapacuenia paxamë, judíowi pane-ewetsiwi, panenaitaxutojematsijawanexa Jesús, bajayata Dioso pejumeliwaisibaxutotae tajëwelia jumaitsi mapacueniaje:
«Pa-iboto itsamonae bo-exanaewi, petsita-abejexaetsi, naitaxutojematabuata, bajarapa-iboto itsamonaenexa tonamatamotatsi, pecanacuenebinexa copiaya pebuatsi-ibotonexa boyenepanatotsotota», jai tajëwelia Dioso pejumeliwaisibaxutota paxamë yabara.
12 »Tajamonae, caenë Jesús caëjëpatsi wajanacacapanepaenexa pibisiacuene waja-exanaeneconiwecua. Bajaraxuata, Dioso itorobica Jesús, tsipaji baja ajibi pematatsënëa mapanacuataje itsanë-ata pejamatabëcueneta wajanacacapanepaenexa Diosojawabelia —jai Pedro bajarapamonaejawabelia.
13 Bajarapamonae jamatabëcuenenabenajaca itsa tane Pedro, Juan-beje, ajumejunawijibia Jesús peliwaisi petsipaebijawabeje bajarapamonaejawabelia, tsipaji yapëtane bajaraponëbeje bajayajebi apopenacujarubinëbeje peyaquinaejawa. Nexata, jamatabëjumaitsi Pedro, Juan-beje yabara: «Bajaraponëbeje cajena penaponaponaenëbeje Jesús-jawata. Bajaraxuata, tsaena bitso baja yapëtanebeje bajarapaliwaisi», jamatabëjai.
14 Nexata, petaexae apopecaëjëpaenëmitsi peponaponaejawa penanucaejawa Pedro, Juan-bejejawata, bajarapamonae acuenebi pejumaitsijawa: «¡Jume raja! Jesús raja pejamatabëcueneta apoxanepanae maponëje», pejaijawa. Acuenebinua piajumematamobia-exanaenexa bajaraponëbeje pepaebiliwaisi.
15 Nexata, bajarapamonae Pedro, Juan-beje, cae-epatoyo nawecuacapitsapatsibeje, pecowëta ëpamonae penajumejaitsinexa pacuenia exanaejitsia bajaraponëbeje pexanaejawa yabara.
16 Nexata, Pedro, Juan-beje, pecowëta, bajarapamonae najumaitsi:
—¿Detsamë raja pacuenia exanaenatsi bajaraponëbejejawabelia? Daxita Jerusalén tomarapijiwi xaniawaetsia yapëtane bajaraponëbeje pexanepanaeya-exanaejawabeje apopecaëjëpaenëmitsi peponaponaejawa. Nexata, acuenebi jiwijawabelia wajajumaitsijawa: «Apoxanepanaeya-exanaebeje raja bajaraponëbeje», wajajaijawa.
17 Pinijicuenia waxaitsi bajaraponëbeje itawetsianatsi petsipaebiyaniwabeje matawëjëa Jesús peliwaisi itsajiwiyojawabelia-ata. Nexata, bajarapacuenia apotsipaebibeje baja tsane itsamonaejawabelia Jesús peliwaisi —najai bajarapamonae Pedro, Juan-beje pecowëta.
18 Nexata, icatsia Pedro, Juan-beje caewëalia junaliatsibeje. Nexata jane baja, bajarapamonae jumaitsi bajaraponëbejejawabelia:
—¡Pëtsa baja icatsia matawëjëa pa-exanamebeje itsacuenejawa Jesús pewënëta! ¡Pacoparebejenua baja jiwi panetsipaebaponaejawabeje Jesús peliwaisi! —jai bajarapamonae.
19 Nexata, Pedro, Juan-beje, jumecanawiatsiajumaitsibeje:
—¡Paxamë panijacuata panajamatabëxainare, Dioso pitabarata itsa panetoxanepanabeje paxamë patacajumecowënëtsijawabeje, Dioso patajumecowënëtsijawabejewecua!
20 Dioso patane-itorobixaebeje, apoxanepanae patacopatsijawabeje jiwi patatsipaebaponaejawabeje xua patanijibeje, paliwaisi-ata pajumetanijibeje —jaibeje bajarapamonaejawabelia.
21 Icatsia, judíowi pewetsiwi orijibia atiobiaya itawetatsibeje, jiwi petsipaebaponaeyaniwabeje Jesús peliwaisi. Bajaraxuacujinae, copatatsibeje baja peponaenexabeje, tsipaji apocaxitajarabi pacuenia naneconitsia-exanaejitsiatsibeje, pecujunawixae penacaetuatsiwi. Bajaraponëbeje pexanaecuene yabara daxitajiwi jumaitsi tsaponae wënëxaniatsiaya Diosojawabelia:
—Diosomë, bitso ayaijamatabëcuenenëmë —jai tsaponae bajarapamonae.
22 Bajarapacuenia daxitajiwi pexaniajamatabëcuene rajutapona Diosojawabelia, tsipaji Dioso pesaëta pinijicuene pexanaejawata, Pedro, Juan-beje, xanepanaeya-exanabeje apopecaëjëpaenëmitsi peponaponaejawa, bajaraponë xainae-ata cuarenta pawaibeje pematatsënëa penaexanaecujinae.
Jesús peliwaisi pejumexaniataewi wajëca Diosojawabelia pejamatabëcuenecaëjëpaeya-exanaenexatsi, ajumejunawijibia Jesús peliwaisi pepaebaponaenexa
23 Itsa baja Pedro, Juan-beje, judíowi pewetsiwi copatatsibeje peponaenexabeje, nawialiabeje baja itsabelia jinawanapa Jesús peliwaisi pejumexaniataewi. Nexata, bajaraponëbeje tsipaeba bajarapamonaejawabelia daxita pacuenia sacerdotewi penamatacaitorobiwi, judíowi pija-ancianowi-ata jumaitsitsibeje. Nawajunupaebabejenua pitawetsijawatsibeje Jesús peliwaisi jiwijawabelia petsipaebaponaeyaniwabeje.
24 Nexata, Jesús peliwaisi pejumexaniataewi itsa jumetane bajaraponëbeje penawajunupaebijawabeje, bajarapaepatota daxita bajarapamonae Pedrobana najamatabëcuenejëpaeya wajëca Diosojawabelia. Daxita bajarapamonae pewajëcaejawata Diosojawabelia, jumaitsi mapacueniaje: «Xamë, Diosomë, ayaijamatabëcuenenëmë daxitawecua. Nexanaenë itaboxo, ira, manuamene, daxita xua yajawa exaname caejawa canacujitsia.
25 Xamë Diosomë, bajayata Espíritu Santo pejamatabëcueneta tajëwelia yapëtaeya-exaname patajasalinainëmi David-pijinë Jesús yabara. Nexata, nijajiwitonë David-pijinë jumaitsif mapacueniaje:
»¿Detsa xuajitsia itsanacuanëpijiwi, pamonae apojudíowi, bitso bara-anaepanaeya nacaetuatabiaba petsimaxëpatsinexa Dioso pijajiwijawabelia? ¿Detsa xuajitsia pijinia judíowi saya jema najamatabëxainabiaba pexanaenexa xua apocaëjëpaetsi pexanaenexa Diosojawabelia?
26 »Bajarapacuenia exana, tsipaji pinijinacuanë pewetsiwi, tomaranë pewetsiwi-ata, caejamatabëcuene xaina xamë Diosomë, nijacuene pecatobijianaenexa. Najamatabëxainanua pebejiobia-exanaenexa Cristo, ponë itorobiapaebimica jiwi pecapanepaenënexa», jai David-pijinë Espíritu Santo pejamatabëcueneta, Jesús pebejiobia-exanaejawanexatsi yabara.
27 »¡Xaniajai baja cajena! Mapatomarataje Herodes, Poncio Pilatobeje,g barënacaetuatabeje itsanacuanëpijiwi, pamonae apojudíowi, judíowi-ata yajawa, penajumejaitsinexa pacuenia beyaxuabijitsiatsi nexënato Jesús, ponë itapetame Mesías-nexa.h Bajarapacuenia copiapata jane baja, xua bajayata tajëwelia David-pijinë wajunupaeba bajaraponë yabara.
28 Nexata, bajarapamonae exanatsi daxita pacuenia baja cajena bajayata nexënato tocopatame pexanaenexatsi.
29 Patajatuxanenë, yapëtaneme pacuenia aeconoxae judíowi pewetsiwi atiobiaya pane-itaweta jiwi patatsipaebaponaeyaniwa nexënato peliwaisi. Itsiata, pacawajëcatsi patanejamatabëcuenecaëjëpaeya-exanaenexamë, paxanë, panijajiwinë, ajumejunawijibia jiwi patatsipaebaponaenexa nexënato peliwaisi.
30 Orijibia, patomarata patsipaebianajë nexënato peliwaisi, jamatejemaya-exanaename piawitanewi, pinijicuene tsita-exanamenua jiwi peyapëtaenexa bitso ayaijamatabëcuene nexainaenëcuene. Bajarapapinijicuene exanaename nexënato Jesús pewënëta»,i jai Pedrobana pewajëcaejawata Diosojawabelia.
31 Itsa baja bajarapamonae wereta pewajëcaejawa Diosojawabelia, bajarajota ira nanequetajaraba. Daxita bajarapamonae Espíritu Santo ayaicuenia jamatabëcuenecaëjëpaeya-exanatsi,j nexata ajumejunawijibia jane baja, jiwi tsipaebapona Jesús peliwaisi.
Jesús peliwaisi pejumexaniataewi pexainaejawanë daxita nacobenaxaina
32 Daxita pamonaek Jesús peliwaisi pejumexaniataewi, najamatabëjëpaeya jinawanapa. Nexata, xua xaina aponajamatabëxainae caejiwi pexainaenexa. Biji rajane, xua xaina, daxita nacobenaxaina.
33 Apóstolewi pijinia asaëya tsipaebabiaba jiwijawabelia Jesús peliwaisi, pacuenia icatsia Dioso asaëya-exanatsi wajatuxanenë Jesús petëpaecujinae. Dioso bitso pexaniacuenia yawenonabiabatsi daxita bajarapamonae.
34 Nexata bajarapamonaetuatuajëta, caenë-ata apoyajuwënëbejiobi pexainaejawa yabara, tsipaji Jesús peliwaisi pejumexaniataewituatuajëta, pamonae pexainaewi iranë, bonë-ata, bajaraxuanë canajetabiaba. Nexata, bajarapamonae xua canajeta, bajarapamatamopalata capatabiaba.
35 Nexata, bajarapapalata rajutabiaba apóstolewijawabelia. Apóstolewi juya tsicobetsanabiaba penajuajinawanapaewijawabelia pacuenia baja caejiwi canacujitsia namatawenonapona.
36 Bajarapamonaeyajuwënënë itsanë pewënë José, Chipretunaetota penaexanaenë, Levípijinë pemomoxiyajuwënënë. Bajaraponë apóstolewi wënërubatsi itsawënë, Bernabé. Bajarapawënë hebreojumeta pejumaitsijume: «Jiwi pejamatabëcuenebarëyaya-exanaenë», pejaijume.
37 Nexata, José-ata pija-ira canajeta. Bajaraxuacujinae, capata pija-iramatamopalata, perajutsinexa apóstolewijawabelia.