Pedro, Jesús pejamatabëcueneta, xanepanaeya-exana apopecaëjëpaenëtsi peponaponaejawa
3
Nexata, itsamatacabi, Pedro, Juan-beje, naponabeje templobojawabelia caniwiyo-epatota, bejamatabë a las tres, penawajëcaenexabeje Diosojawabelia, paepatota judíowi nawajëcabiaba Diosojawabelia caematacabi canacujitsia.
2 Itsa pata templobojawata, bajarapabopijibaupajawata taeyetabeje apopecaëjëpaenëtsi peponaponaejawa penaexanaejawaweliacujinae. Bajaraponë capatabiabatsi pijamonae, pe-etabiabinexatsi caematacabi canacujitsia templobobaupamuxuneneta, Pexaniabaupawënëjawata. Nexata, bajaraponë amoneya palata wajëcabiabeca bajarapabaupajawa pejoneponaewijawabelia.
3 Nexata, itsa bajaraponë taeyeca Pedro, Juan-beje pejonenajetarucaejawabeje templobojawaberena, wajëqueca palata.
4 Nexata, Pedro, Juan-beje naëcotabeje bajaraponëjawabelia. Nexata, Pedro jumaitsi bajaraponëjawabelia:
—¡Panetaemabeje! —jai Pedro.
5 Nexata, bajaraponë naitaxutocaewetsiaya jamatabëjumaitsi tsecae: «Nerajutsianabeje meta itsacuenejawayo», jamatabëjai tsecae.
6 Pedro nexata jumaitsi bajaraponëjawabelia:
—Palata, oro-ataa raja apoxainaenë. Itsiata baitsi jane, xua xainajë, carajutsianatsi. Jesucristo, Nazaret tomarapijinë, pewënëtab cajumaitsitsi mapacueniaje: ¡Nonotapunare! ¡Ponaponare baja! —jai Pedro.
7 Nexata, bajaraponë pecujuanenia pacobe, Pedro cobewaetabiayotsia. Bajarajota, bajaraponë caecuenia anijaneniabeje asisaëreca.
8 Nexata, bajaraponë jirewajunua. Petaxuta nuca. Ponapona jane baja. Bajaraxuacujinae, bajaraponë jirewanajetarucaeya templobo-ënëabelia najoneya Pedro, Juan-beje pepëta. Wënëxaniatsiaya jumaitsi tsanajetarucae Diosojawabelia: «Diosomë, bitso ayaijamatabëcuenenëmë, tsipaji baja nexanepanaeya-exaname», jai tsanajetarucae Diosojawabelia.
9 Nexata, daxitajiwi tanetsi peponaponaejawa. Jumetanetsinua pexaniajamatabëcuene perajutsijawa Diosojawabelia.
10 Bajarapamonae itsa tanetsi, yapëtanetsi palata pewajëcabiabecaenëmi templobobaupajawata, Pexaniabaupawënëmuxuneneta. Nexata, daxita bajarapamonae itsa tane bajaraponë baja pexanepanaejawa, bitso jamatabëcuenenajunawiaca.
Pedro tsipaeba Jesús peliwaisi jiwijawabelia templobo-ënëtuatuajëta, Portal de Salomón-wënëjawata
11 Nexata, jamatabëcuenenabenajacaeya jiwi ayaibitsaëto itaxutua-othopatsi templobopijipanabota, Portal de Salomón-wënëjawata. Bajarajota, Pedro, Juan-beje, najuamaxëwaetabanucatsibeje, ponë apopecuenecaëjëpaenëmitsi peponaponaejawa. Pedro pexanepanaeya-exanaecujinae, bajaraponë apocopatsitsibeje.
12 Nexata, Pedro, itsa tane bajarapamonae pejamatabëcuenenabenajacaejawa, bajaraponë jumaitsi bajarapamonaejawabelia:
—Tajamonae, Israel-pijinë papemomoximë, ¿detsa xuajitsia pajamatabëcuenenabenajacame maponë yabaraje? ¿Detsa xuajitsia bitso panenaëcobamebeje mapacueniaje? Paxanëbeje yabara meta pajamatabëjumaitsimë mapacueniaje: ‘Maponëbeje xanepanaeya-exanabeje apopecaëjëpaenëmitsi peponaponaejawa, tsipaji baja caëjëpatsibeje bajarapacuene pexanaenexabeje, itsa jume, tsipaji meta Dioso pitabarata aneconijibia ponaponabeje,’ pajamatabëjamë meta paxanëbeje yabara. Paxanëbeje raja patajamatabëcuenetabeje apopa-exanaenëbeje.
13 Biji rajane, Jesús exana bajarapacuene, tsipaji wajasalinaiwi baja cajena Abraham-pijinë, Isaac-pijinë, Jacob-pijinë, pijaDioso tocopata pexënato Jesús bitso ayaijamatabëcuene pexainaenënexa daxitawecua. Bajarapacuenia Dioso to-exanae-ata Jesús, paxamë itsiata patocopatame wajanacayanacua-ewetsiwi pecobeyabelia. Nexata, wajanacayanacua-ewetsinë Pilato copatsijitsia-ata Jesús, itsiata, paxamë pa-ajumesaëmë, pane-itoyaxae, pecopatsiyaniwatsi
14 Apopawajëcaemë Pilatojawabelia pecopatsinexatsi Jesús, itsacueneneconiyo apopexainaenë, pepopianeconijibinë.c Caranata biji, pa-ajumesaëmë panewajëcaejawa Pilatojawabelia pibisiacuene pexanaenë, jiwibenë, pecopatsinexatsi penaneconitsiwi pejebabiabibowecua.
15 Ponë Dioso itorobica wajanacarajutsinexa matacabi apopewerewerecaejawa, bajaraponë caranata pabeyaxuabame. Itsiata baitsi jane, Jesús petëpaecujinae, Dioso icatsia asaëya-exanatsi. Bajarapacuene patataexae, pacatsipaebatsi.
16 Maponëje, apopecaëjëpaenëmitsi peponaponaejawa, pesiwanajamatabëcuenecopatsixae Jesús-jawabelia,d pepacuene baja xanepanaeya-exanatsi pane-itabarata, panetaeyabiabinë, paneyapëtaenë —jai Pedro.
17 Icatsia, Pedro jumaitsi Cristo yabara:
—Tajamonae, yapëtaniji pacuene pacabarë-exana itsamonae, papeca-ewetsiwi yajawa. Bajarapacuenia pa-exaname xaniawaetsia apopaneyapëtaexae bajaraponë yabara. Bajaraxuata, pabeyaxuabame Jesús.
18 Bajarapacuenia panebeyaxuabijawata, Dioso copiapatsia-exana jane baja xua tajëwelia wajunupaeba profetawimi Cristoe yabara. Bajarapamonaemi wajunupaeba pacuenia Cristo bitso bejiobia-exanaejitsiatsi, daxitajiwi pecapanepaenexa pijaneconiwecua.
19 ¡Nexata, xaniawaetsia aeconoxae paneyapëtaexae Jesús peliwaisi, panajamatabëcuenepënëyorore baja pibisiacuene pane-exanaejawawecua Diosojawabelia, panesiwanajamatabëcuenecopatsinexa Jesucristojawabelia! Nexata, pibisiacuene pane-exanaeneconimi, Dioso pacawecua-ajibia-exanaena.
20 Bajarapacuenia itsa pa-exanawanapaename, Dioso pacayawenonaena pexaniacuenia panejinawanapaenexa. Orijibia, itsamatacabi Dioso athëbëwetsica icatsia itorobianica Jesús, ponë bajayata Dioso itapeta papecayawenonaenexa, papecayanacua-ewetsinexanua, pacuenia tajëwelia Dioso najumecapanepaeya jumaitsi profetawi pejamatabëcueneta.
21 Maparucaeje abaxë Jesús eca athëbëtatsia. Matapania pamatacabi Dioso xanebijitsia daxitacuene, Jesús icatsia patsianica, pacuenia profetawi bajayata tajëwelia wajunupaeba.
22 Wajasalinaiwimijawabelia baja cajena bajayata tajëwelia profeta Moisés-pijinë Jesús yabara jumaitsi mapacueniaje: «Pacuenia xanë nitoroba profetanënexanë, bajarapacuenia icatsia wajatuxanenë Dioso itorobiana itsanë profetanë. Paxamë bajaraponë panemomoxiyajuwënënë tsane. Nexata, bajarapaprofetanë paliwaisi pacatsipaebiana, panamuxuna-ewetsianame, xaniawaetsia panejumecowënëtsinexa.
23 Nexata, daxita pamonae apojumecowënëtsi tsane bajarapaprofetanë petsipaebiliwaisi, Dioso tsatsiana bajarapamonae pijajiwiwecua, pewerebiabinexa», jai Moisés-pijinë wajasalinaiwimijawabelia Jesús yabara —jai Pedro bajarapamonaejawabelia.
24 Icatsia, Pedro jumaitsi:
—Xua baja aeconoxae mapamatacabitaje copiapatapona, bajaraxua yabara bajayata tajëwelia wajunupaebapona daxita profetawimi Samuel-pijinëjawaweliacujinae mapamatacabijawaberenaje.
25 Paxamë panejumexaniataexae profetawimi pepaebiliwaisi, bepapemomoximë. Nexata, xua Dioso najumecapanepaeya jumaitsi perajutsinexa panijasalinaiwimijawabelia, bajaraxua paxamë Dioso pacarajutsiana. Bajayata tajëwelia Dioso jumaitsi wajasalinainëmi Abraham-pijinëjawabelia Jesús yabara: «Caenë nemomoxiyajuwënënë itorobianajë jiwi peyawenonaenexa. Nexata, nemomoxiyajuwënënë pexaniacuenia yawenonaenaf daxitanacuanëpijiwi», jai Dioso tajëwelia Abraham-pijinëmijawabelia Jesús yabara.
26 Dioso baja cajena, Israel-pijinë papemomoximë, copiaya paxamëjawabetsica Dioso pexënato pacato-itorobica profetanëcuenia,g pexaniacuenia papecayawenonaenexa, pacaejiwimë canacujitsia panenajamatabëcuenepënëyorotsinexa pibisiacuene pane-exanaejawawecua —jai Pedro bajarapamonaejawabelia, Portal de Salomón-wënëjawata.