Jesús pijajiwi towajëta paxa Diosojawabelia
17
Jesús, pijajiwijawabelia petsipaebicujinae dowathi pejamatabëcuene-amoneyabijawa, athëbëa benaëcotsia. Nexata jumaitsi paxa Diosojawabelia:
—Axa, netocopiapata rajane baja tanetocaëjëtsimatacabimë jiwijawabelia tanecuene-itajëtsinexamë xanë nexënatonë, bitso ayaijamatabëcuene taxainaenëcuene. Bajarapijinia pacuenia nexënatonë, tacacuene-itajëtsinexa, ayaijamatabëcuene nexainaejawa, pexaniajamatabëcuene-ata nexainaenëcuene.
2 Xamë rabaja netocopatame taxainaenexa tanamatacaitorobisaë daxitajiwijawabelia, matacabi apopewerewerecaejawa tarajutsinexa daxita pamonae nerajutame.
3 Bajarapamatacabi apopewerewerecaejawa, xainaena jiwi paepatota cayapëtane xamë, caenëmë, pepoDiosonëcuenemë, xanë-ata, Jesucristonë, athëbëwetsica tane-itorobinëmëtsica mapanacuayabetsicaje.
4 »Xanë rabaja cajamatabëcuene-itajëtatsi bitso ayaijamatabëcuene nexainaejawa mapanacuapijiwijawabeliaje, paepatota weretajë baja daxita xua nitorobame tacato-exanaenexa bajarapamonaetuatuajëta.
5 Axa, icatsia nerajutsianame taxainaenexa ayaijamatabëcuene xua najuaxainatsibeje wajanajuaponaponaejawatabeje, pamatacabi abaxë ajibi mapanacuaje.
6 »Mapanacuataje, pamonae nitapetsiwi, netocopatame tajajiwinexa, xamë picani nijajiwi. Bajarapamonae xaniawaetsia cajumecowënëta nejumeliwaisita, nitorobicuenia. Xanë nexata yapëtaeya-exanajë bajarapamonaejawabelia pacuenia xamë jamatabëcuene-itsimë.
7 Bajarapamonae aeconoxae baja, yapëtane xamëjawawerena daxitaxuanë nerajutame pepitsapaejawanë xamëjawawerena; tapaebijawanë, ta-exanaejawanë-ata.
8 Daxita paliwaisi netsipaebame tayapëtaeya-exanaenexa, xanë juya tsipaebajë bajarapaliwaisi bajarapamonaejawabelia. Nexata, tatsipaebiliwaisi nejumexaniatane. Bajaraxuata, yapëtane pepacuene tapatsijawa xamëjawawetsica. Nejumexaniatanenua xamë-ata athëbëwetsica tane-itorobinëmëjawatsica.
9 Cawajëtatsi raja pamonae yabara nerajutame. Apocawajëtsitsi raja pamonae mapanacuapijicuene yabaraje pesiwanajamatabëxainaewi. Biji rajane cawajëtatsi, tanerajutsiwimë yabara, tsipaji bajarapamonae nijajiwi.
10 Daxita pamonae nijajiwi, xanë-ata tajajiwi. Daxita pamonae pijinia tajajiwi, xamë-ata nijajiwi. ¡Bajarapamonae pecajumexaniataexae taxa Diosomë, tane-itorobinëmëcuenetsica, daxitajiwi neyapëtane ayaijamatabëcuene taxainaejawa!
11 »Axa, xanë baja apoponaponaenë tsane mapanacuataje, tsipaji baja ponaejitsianë xamëjawabetsia. Itsiata baitsi jane, abaxë tajajiwi jinawanapaena mapanacuataje, itsajota nawita pibisiacuene pexanaewi. Xamë, taxamë, bitso nianeconijibinë. ¡Yajawamëre tanerajutsiwimë, nesaëta newetsinexa pibisiacuenewecua! Tojitsipajë bajarapamonae caejamatabëcuene pexainaenexa waxaitsibejejawaberena, pacuenia waxaitsibeje caejamatabëcuene xainatsibeje.
12 Itsa abaxë yajawaponaponajë bajarapamonae mapanacuataje, nesaëta ewetaponaponajë. Nexata, aponewecuanaxuabi caenë-ata. Itsiata, caenë naxuabiana, tsipaji tocopiapatsianatsi pacuenia baja cajena tajëwelia jumaitsi nijumeliwaisibaxutota bajaraponë yabara.
13 »Aeconoxae baja ponaenajë xamëjawabetsia. Itsiata, abaxë taponaponatabi-epatoyo mapanacuataje, cawajëtatsi tajajiwi pejamatabë-ëthëtojawawetsina bitso pejamatabëcuenebarëyanexa, pacuenia xanë jamatabëcuenebarëyanë.
14 Xanë baja tsipaebajë tajajiwi paliwaisi netocopatame tatsipaebinexa. Bajarapamonae jumexaniatane bajarapaliwaisi. Nexata, tajajiwi apopejamatabëcuenejëpaexae, mapanacuapijiwi itoyatsi, tsipaji apoxainae mapanacuapijiwi pecanaëjëtsijamatabëcueneje, pacuenia xanë-ata mapanacuapijiwi pecanaëjëtsijamatabëcuene apojamatabëcuenejëpaenë.
15 Apocawajëtsitsi raja, nejutsinexa tajajiwi mapanacuawecuaje. Biji rajane, cawajëtatsi necaranatabiabinexa dowathiwecua, ponë piajamatabëcuenebejenë.
16 Pacuenia xanë apomapanacuapijinënëje, bajarapijinia pacuenia tajajiwi-ata apomapanacuapijiwinexaje.a
17 Taxa Diosomë tsatsianame tajajiwi mapanacuapijiwiwecuaje, peponijajiwinexa. Nejumeliwaisi, pexaniajailiwaisita, jamatabëcueneyawenonaename nijacuene pexanawanapaenexa.
18 Pacuenia xamë nitorobame pexaniajailiwaisi tatsipaebinexa mapanacuapijiwijawabeliaje, bajarapijinia pacuenia juya, xanë-ata tajajiwi itorobajë pexaniajailiwaisi petsipaebinexa mapanacuapijiwijawabeliaje.
19 Bajarapamonae yabara, taponaponae-epato mapanacuataje, canarajutatsi xamëjawabelia, ënejitsipaecuenia tacato-exanaenexa. Bajarapacuenia exanajë, tajajiwi-ata xamëjawabelia pexaniajailiwaisita penajamatabëcuenerajutsinexa, ënejitsipaecuenia pexanawanapaenexa.
20 »Itsiata, apocawajëtsitsi ëtajajiwi yabara. Cawajëtatsinua pamonae-ata bexëajawabelia nesiwanajamatabëcuenecopabijitsia xanëjawaberena, pejumexaniataexae tajumeliwaisi, tajajiwi petsipaebijawata.
21 Nexata, cawajëtatsi daxita bajarapamonae caejamatabëcueneliwaisi penajuaxainaenexa,b pacuenia xanë, xamë, taxamë, caejamatabëcueneliwaisi najuaxainatsibeje. Bajarapacuenia tojitsipajë bajarapamonae caejamatabëcueneliwaisi penajuaxainaejawa waxaitsibejejawaberena, mapanacuapijiwi pecuenetaejawatatsi, pejumexaniataenexa xamë athëbëwetsica tane-itorobinëmëcuenetsica.
22 Xanë rajutajë tajajiwijawabelia, payaiyataejamatabëcuene, xamë nerajutame, caejamatabëcuene penajuaxainaenexa, pacuenia waxaitsibeje caejamatabëcuene najuaxainatsibeje.
23 Tojitsipajë tajajiwi caejamatabëcueneliwaisi penajuaxainaenexa, xanë pacuenia caejamatabëcuene xainajë bajarapamonaejawabelia. Pacuenia pijinia xamë caejamatabëcuene xainame xanëjawaberena. ¡Bajarapacuenia caejamatabëcueneliwaisi itsa najuaxainaena, daxita mapanacuapijiwije pecuenetaejawatatsi, yapëtaena xamë athëbëwetsica tane-itorobinëmëcuenetsica, niasiwajawanua tajajiwi, pacuenia xanë-ata niasiwamë!
24 »Axa, jitsipajë pamonae-ata nerajutame penajinawanapaenexa itsabelia ponaejitsianë, taneyajawajinawanapaenexa, taneyapëtaenexanua bitso ayaijamatabëcuene taxainaejawa. Xamë baja cajena nacua nexanaewajënaeya-ata, xamë niasiwamë. Bajaraxuata, ayaijamatabëcuenenënë nexaname.
25 Axa, itsaneconi-ata aponexainaenë. Mapanacuapijiwije apocayapëtae, pacuenia jamatabëcuene-itsimë. Itsiata, xanë cayapëtanetsi. Tajajiwi, mapamonaeje, neyapëtane baja xamë athëbëwetsica tane-itorobijawamëtsica.
26 Xanë, tajajiwi yapëtaeya-exanajë baja ayaijamatabëcuene nexainaenëcuene. Abaxë itsiata, pewajënaeyabelia yapëtaeya-exanaponaenajë, pecacueneyapëtaeponaenexa, namata-enetsia pena-asiwanexa, pacuenia xamë niasiwamë, peyapëtaenexanua tayajawaponaponaecuene —jai Jesús petowajëtsijawata paxa Diosojawabelia pijajiwi yabara.