16
Jesús pijajiwi pitorobicujinae pewajunupaebinexatsi pexanaecuene yabara, icatsia jumaitsi pijajiwijawabelia:
—Bajarapacuenia pacatsipaebatsi, jiwi papeca-itoyajawanexa, panecopabiyaniwa xanëjawaberena patanesiwanajamatabëcuenecopabijawamë, papecabejiobia-exanaejawata.
2 Bajarapamonae pacacapitsapabiabiana judíowi pijasinagogabonëwecua.a Belia jane baja, itsamatacabijawabelia pacabeyejebiana, tsipaji jamatabëcuenenawëxaniabiaya jamatabëjumaitsi tsane: «Dioso nesiwajamatabëcuenebarëya tsane tatobeyejebijamatabëcuene mapamonaeje», jamatabëjai tsane paxamë yabara.
3 Bajarapacuenia paca-exanaena, tsipaji aponeyapëtae xanë. Apoyapëtae taxa-ata.
4 Bajarapacuenia tajëwelia pacatsipaebatsi, itsa pacatocopiapata bajarapacuene, patanejumenajamatabënapitsinexamë —jai Jesús pijajiwijawabelia.
Espíritu Santo pexanaecuenejawanënexa jiwijawabelia
Icatsia, Jesús jumaitsi pijajiwijawabelia:
—Tataxuxuabijawaweliacujinae jiwi liwaisi tatsipaebijawa, abaxë apopacatsipaebitsi bajarapacuene yabara, tsipaji abaxë pacayajawaponaponatsi, patacajamatabëcueneyawenonaenexa.
5 Itsiata baitsi jane, aeconoxae nawiatsianiajë tane-itorobinëtsicajawabetsia, itsanë-ata, paxamëyajuwënënë, aponeyanijobi. «¿Detsa belia ponaejitsiamë?», aponejai.
6 Biji rajane, bajarapacuenia patacanawajunupaebijawata, bitso panajamatabëxainame.
7 Xaniajanë cajena paliwaisi pacajumaitsitsi. Xanë cajena netoxanepana taponaejawa taxajawabetsia, patacato-itorobinexatsica Espíritu Santo, papecajamatabëcueneyawenonaenënexa. Itsa apopacawecuaponaetsi tsipae, nexata bajaraPonë apopatsitsica tsipae.
8 Espíritu Santo pepatsicujinaetsica, mapanacuapijiwi yapëtaeya-exanaena mapaliwaisianëje: Jiwi pibisiacuene pexanawanapaewicuene, Dioso pepopianeconijibinëcuene, Dioso penaneconitsia-exanaejawanexanua daxita pijaneconi pexainaewi.
9 Nexata, yapëtaeya-exanaenatsi pibisiacuene pexanaejiwicuene, xanëjawaberena apotanesiwanajamatabëcuenecopabixae.
10 Yapëtaeya-exanaenatsinua Dioso pepopianeconijibinëcuene, tsipaji baja xanë taxajawabetsia nawiatsinajë. Pematatsënëa baja apopanetaemë tsane.
11 BajaraPonë yapëtaeya-exanaenanua pajiwi Dioso naneconitsia-exanaejitsiatsi. Dioso baja cajena bajayajawawerena siwanajamatabëcuenewereta dowathi penaneconitsia-exanaenexa, ponë petuxanenëcuenia namatacaitorobabiaba mapanacuapijiwije, pibisiacuene pexanawanapaenexa.
12 »Ayailiwaisi picani abaxë xainajë patacatsipaebinexa. Bajarapaliwaisi abaxë apopacajamatabëcuenecaëjëpae panejumeyapëtaenexa.
13 Itsiata, pamatacabi patsianica Espíritu Santo, Ponë pepopexaniajailiwaisi pepaebinë, bajaraPonë pacajamatabëcuenematacaponaena, paneyapëtaenexa daxita pexaniajailiwaisi. BajaraPonë raja apopacayapëtaeya-exanae tsane saicaya pejamatabëcuenepijiliwaisi, biji rajane saya, daxita pacuenia taxa Dioso jumaitsi. Pacayapëtaeya-exanaenanua pacuenejawanë pewajënaeyabelia copiapataponaejitsia.
14 Espíritu Santo pejamatabëcueneta jiwi neyaiyataena, tsipaji xanë taliwaisi, pexaniajailiwaisi, pacayapëtaeya-exanaena.
15 Daxita taxa pexainaejawa, xanë-ata rabaja tajajawa. Bajaraxuata, pacatsipaebatsi Espíritu Santo papecayapëtaeya-exanaenexa xanë yabara pexaniajailiwaisicuene —jai Jesús pijajiwijawabelia.
Bitso penajamatabëxainaewimi juya pejamatabëcuenebarëyawi tsane
16 Icatsia, Jesús jumaitsi pijajiwijawabelia:
—Cae-epatoyocujinae rabaja, apopanetaemë tsane. Itsiata, itsamatacabibejecujinae icatsia panetaename. Bajaraxuacujinae jane baja, ponaenajë taxajawabetsia —jai Jesús.
17 Nexata, pijajiwiyajuwënëwi nayanijoba ëpamonae.
—¿Detsa pitsijamatabëcuene yabara nacajumaitsi mapacueniaje: «Cae-epatoyocujinae rabaja, apopanetaemë tsane. Itsiata itsamatacabibejecujinae, icatsia panetaename. Bajaraxuacujinae jane baja, ponaenajë taxajawabetsia», nacajai?
18 ¿Detsa meta xua yabara pejumaitsijume: «Cae-epatoyocujinae rabaja, apopanetaemë tsane», nacajai? Apojumeyapëtaetsi cajena xua yabara nacajumaitsi —najai Jesús pijajiwi.
19 Jesús jamatabëcueneyapëtane pacuenia picani pijajiwi jamatabëyanijobatsi. Nexata jumaitsi bajarapamonaejawabelia:
—Pacajumaitsitsi mapacueniaje: «Cae-epatoyocujinae rabaja, apopanetaemë tsane. Itsiata, itsamatacabibejecujinae icatsia panetaename», patacajaijawa. ¿Baja tsaja pajume yabara panayanijobame?
20 Xaniajanë pacuenia pacatsipaebijitsiatsi. Xanë itsa tëpaenajë, apopanetaemë tsane. Nexata paxamë panuename. Bitso xanëjitsia panajamatabëxainaename. Mapanacuapijiwije juya barëya tsane, tatëpaejawa yabara. Itsiata baitsi jane, paxamë patanewënuewimë, icatsia bitso panesiwajamatabëcuenebarëyamë tsane, itsa panetaename.
21 Pamatacabi tocopiapatatsi petiriwa pewixaenotsijawatsi penacueto pewecuanaexanaenexatsi, bitso bayanajamatabëxaina. Itsiata, penacueto pewecuanaexanaecujinaetsi, pewixae aponajamatabënapitsi. Panacueto baja wecuanaexanatsi, siwajamatabëcuenebarëya.
22 Bajarapijinia pacuenia, paxamë-ata pa-itsimë tsane. Bitso panajamatabëxainaename tatëpaejawa yabara. Xanë itsiata, icatsia pacacaxitajarabianatsi, paxamë patanetaejawatamë pajamatabëcuenebarëyamë tsane. Nexata, itsajiwi-ata apocaëjëpaetsi tsane papecawecua-ajibia-exanaenexa panejamatabëcuenebarëyajawa.
23 »Bajarapamatacabi, apopaneyanijobimë baja tsane itsacuenejawayo-ata. Xaniajanë pacuenia pacatsipaebijitsiatsi. Patajajiwixaemë, taxa pacarajutsiana daxita xua tawënëta pawajëtabiabianame.
24 Abaxë tawënëta taxajawabelia apopawajëtsimë itsacuenejawayo-ata. ¡Aeconoxae rajane baja, tawënëta pawajëtabiabare taxajawabelia! Nexata, bajaraPonë pacarajutsiana xua pawajëtsianame, bitso panejamatabëcuenebarëyanexa panejamatabë-ëthëtowetsina —jai Jesús pijajiwijawabelia.
Jesús raja jamatabëcuene-amoneyaba dowathi
25 Icatsia, Jesús jumaitsi pijajiwijawabelia:
—Pacatsipaebabiabatsi baja cajena, najumematayatsiaya pecuene cataeliwaisianëta. Itsiata, itsamatacabi bajarapacuenia liwaisi apopacatsipaebi tsanetsi. Biji rajane, jumenapebetsiaya pacatsipaebianatsi taxa peliwaisi yabara.
26 Bajarapamatacabi, pematatsënëa baja apopanamatawenonaemë tsane xanë patacatowajëtabiabinexa taxajawabelia. Paxamë panijacuata pawajëtabiabianame tawënëta bajaraPonëjawabelia, baja tsipaji patajajiwimë.
27 Taxa paca-asiwa, tsipaji paxamë pane-asiwamë. Pajumexaniatanemenua bajaraPonë tane-itorobinëcuenetsica.
28 Xanë baja cajena, taxajawawetsica tapatsinëtsica mapanacuayabetsicaje. Nexata, icatsia ponaenajë mapanacuawecuaje, tanawiatsinexatsia baja taxajawabetsia —jai pijajiwijawabelia.
29 Nexata pijajiwi jumaitsi:
—Aeconoxae rajane baja, jumenapebetsiaya panetsipaebame, canacuenebinejewamë pecuenecataeliwaisianë.
30 Nexata baja, pacajamatabëcueneyapëtanetsi daxitacuene neyapëtaenëcuene. Orijibia, xamë panejamatabëcueneyapëtaneme, paliwaisi picani jamatabëpacayanijobatsi. Bajaraxuata, pacajumexaniatanetsi baja Dioso athëbëwetsica peca-itorobinëcuenetsica —jai Jesús pijajiwi.
31 Jesús nexata jumaitsi pijajiwijawabelia:
—¿Matapania jane baja, panejumexaniataneme taxa Dioso athëbëwetsica tane-itorobinëcuenetsica? —jai.
32 Copiapata rabaja, xua pacatsipaebatsi pane-exanaejawanexa. Imoxoyo rabaja pewajënae panenacayajatsinexa xanëwecua, panenawiabinexa panijabonëjawabelia. Panexuabanutsianamenua caenënë. Itsiata baitsi jane, caenënë aponacopatsinë tsane, tsipaji taxa Dioso neyajawa.
33 —Bajarapacuene tajëwelia paneyapëtaenexa, pacatsipaebatsi baja cajena. Nexata, xanëjawaberena patanesiwanajamatabëcuenecopabixaemë, jamatabëcuenexanepanaeya pajinawanapaename. Mapanacuata panejinawanapae-epato, mapanacuapijiwije pacabejiobia-exanabiabiana. Itsiata, pajamatabëcuenesaëmë tsawanapae tsane, tsipaji xanë baja jamatabëcuene-amoneyabajë dowathi, ponë namatacaitorobabiaba mapanacuapijiwije, pibisiacuene pexanaeya-exanaenexa —jai Jesús pijajiwijawabelia.