Jesús nacuenewajunupaeba uvamacanaecuenia
15
1-2 Jesús namutua pebarënajetarucaejawata, jumaitsi pijajiwijawabelia:
—Xanë rabaja pexaniawiria uvamacanaenë. Nexata, paxamë, patajajiwimë, bepatamaxëranamë. Pacuenia pe-ubijawa pewetsinë xaniawaetsia eweta, bajarapijinia pacuenia taxa naca-eweta. Uvamacanae pewetsinë bawecuacaucuba piacuaijibimaxëranaxi, penacopabinexa ëpexaniamaxërananë. Pamaxërananë pijinia xaina pecuai, bawecuacaucuba piabejejawanë, matatoxenetsia ayaijawa petonacuaitsinexatsi. Bajarapijinia pacuenia, taxa Dioso pacawecua-ajibia-exanaena piabejejawanë, nawitsia panecapitsapaenexa pexaniacuenejawanë.
3 Paxamë rabaja, bajarapacuenia Taxa pacawecua-ajibia-exana papibisiajamatabëcuenejawanë pacacuenecaranatabiaba, panejumexaniataejawata paliwaisi pacatsipaebatsi.
4 Paxamë daxita matacabi itsa paneyajawajinawanapaename, xanë-ata pacayajawaponaponaenatsi. Pamaxërana cajena apotabunucae tsipae peponaejawabelia, bajarapamaxërana aponacuaitsi. Bajarapijinia paxamë-ata pa-itsimë tsipae, itsa xaniawaetsia apopaneyajawajinawanapaemë.
5 »Xanë rabaja bepepo-uvamacanaenë. Paxamë pijinia bepatamaxërananëmë. Nexata, pajiwi caejamatabëcuene xainaponaponaa xanëjawaberena, xanë-ata pijinia yajawaponaponaenajë. Bajarapajiwi pexaniacuenejawanë ayaicuenia nacuenecapitsapabiabiana. Itsiata, xanënejewab apopacacuenecaëjëpae, paxamë panijacuata pexaniacuene pane-exanaenexa.
6 Pajiwi, caejamatabëcuene apoxainaponaponae xanëjawaberena, bajarapajiwi petsewimaxëranacuenenia xuabianatsi. Pacuenia uvabacabo pewetsinë wecuacaucubabiaba petsewimaxërananë, caetuatanua, pexuabinexa isotojawabelia, bajarapijinia pacuenia taxa Dioso exanaenatsi Xanë pamonae aponeyajawajinawanapae tsane.
7 »Itsa paxamë caejamatabëcuene paxainawanapame xanëjawaberena, nexata patacacujarubiliwaisi pacatsijamatabëcuene-ecaena. Bajaraxuata panejitsipaecuene itsa pawajëtabiabianame taxa Diosojawabelia, pacato-exanaena.
8 Paxamë taxa Dioso pejitsipaecuenia, nawitsia pexaniacuenejawanë panetsita-exanawanapaejawata jiwijawabelia. Nexata, jiwi yaiyataenatsi taxa Dioso. Daxita jiwi pacayapëtaenanua patajajiwimëcuene.
9 Pacuenia taxa niasiwa, bajarapijinia pacuenia xanë-ata paca-asiwatsi. ¡Bajaraxuata, pana-asiwamëre tsawanapae!
10 Ta-exanaexae taxa tane-itorobicuenia, natoyapëtaniji tane-asiwajawa. Bajarapijinia pacuenia, paxamë-ata payapëtaename pataca-asiwajawa, itsa pa-exanawanapaename pacuenia paca-itorobatsi.
11 Daxita bajaraxuanë pacatsipaebatsi, paxamë panejamatabëcuenewënëcaenexa pabarëyajamatabëcuene xanë xainajë. Bajarapacuenia pacatojitsipatsi, ayaicuenia panejamatabëcuenebarëyatsawanapaenexa —jai Jesús pijajiwijawabelia.
12 Icatsia, Jesús jumaitsi:
—Mapacuenia paca-itorobatsi pane-exanawanapaenexaje: ¡Paxamë patajajiwimë, pacaenëmë canacujitsia, namata-enetsia pana-asiwamëre tsawanapae, pacuenia xanë paca-asiwatsi!
13 Pajiwi bitso asiwa peyapëtaejiwitsijawabelia, bajarapajiwi benajamatabëcuene-itajëta peyapijiwinacaewetsijawata pebeyaxuabinexatsi. Ajibi bajarapapexanaejawawecua itsacuenejawa, xua yabara najamatabëcuene-itajëtsijitsia bitso piasiwacuene itsajiwijawabelia.
14 Paxamë panajamatabëcuene-itajëtame patajamonaemëcuene, itsa pa-exanawanapame pataca-itorobicuenia.
15 Aeconoxae baja bepatajajiwicueniamë apopacataetsi, tsipaji petuxanewi ba-apoyapëtaeya-exanae daxita xuanë exanaejitsia pijajiwijawabelia Biji rajane, bepatajamonaemëcuenia pacataeponaponatsi, tsipaji pacayapëtaeya-exanatsi daxita pacuenia taxa nitoroba ta-exanaenexa.
16 Paxamë raja apopane-itapetsimë patanepënaponaewinexamë. Biji rajane, xanë paca-itapetatsi patajajiwinexamë. Bajaraxuata, xanë paca-itorobatsi taliwaisi panetsipaebawanapaenexa, panecapitsapaenexanua pexaniacuenejawanë,c xua Dioso pejitsipaecuenejawanë, apopewerewerecaejawanënexa. Bajarapacuenia pane-exanawanapaexae tsane, daxita pacuene tawënëta pawajëtsianame taxa Diosojawabelia, pacarajutsiana cajena.
17 Mapacueneje paca-itorobatsi pane-exanawanapaenexa: «¡Namata-enetsia pana-asiwamëre tsawanapae!» —jai Jesús pijajiwijawabelia.
Jesús pitoyajawatsi mapanacuapijiwije
18 Bajarapacuenia Jesús pepaebiweretsicujinae pijajiwijawabelia, namata-enetsia pena-asiwajawanexa, icatsia jumaitsi:
—Mapanacuapijiwi, Dioso apopejumexaniataewije, itsa paca-itoya tsane, panajamatabënapitsianame xanë baja cajena copiaya tane-itoyajawa bajarapamonae.
19 Paxamë itsa pajamatabëcuenejëpaejitsipame mapanacuapijiwije pena-asiwacuene, nexata bajarapamonae paca-asiwa tsipae. Itsiata baitsi jane, xanë apomapanacuapijinënëje paca-itapetatsi mapanacuapijiwiwecua, patajajiwinexamë. Nexata, paxamë patajajiwixaemë, bajarapamonae apopajamatabëcuenejëpaemë. Bajaraxua yabara, paca-itoya tsane.
20 Panajamatabënapitabiabianame xua patacajumaitsijawami: «Ponë pijatuxanenë tonacuenebaponapona, apojamatabëcuenematatoxenetsi», patacajaijawa. Xanë pacuenia nebejiobia-exana itsamonae, paxamë-ata bajarapacuenia pacabejiobia-exanaena. Xanë pacuenia nejumexaniatane tatsipaebiliwaisi itsamonae, paxamë-ata bajarapacuenia pacajumexaniataena panetsipaebiliwaisi.
21 Bajarapacuenia paca-exanaena mapanacuapijiwije, xanë patajajiwixaemë, tsipaji apoyapëtae Dioso, ponë nitorobica.
22 »Xanë itsa apopatsinëtsica tsipae mapanacuayabetsicaje, itsa apotsipaebinënua tsipae paliwaisi Dioso netocopata tatsipaebinexa mapanacuapijiwijawabeliaje, bajarapamonae aponaneconitsi tsipae Diosojawabelia. Itsiata, tapatsixaetsica baja, bajarapamonae pejume-aebixae tatsipaebiliwaisi, apoxainae penacaranatsiliwaisi, Dioso penaneconitsia-exanaeyaniwatsi.
23 Pamonae xanë nitoyanaëcota, bajarapamonae itoyanaëcota taxa-ata.
24 Bajarapamonaejawata Dioso pesaëta pinijicuene ta-exanaejawa tsita-exanabiabajë, xuanë itsajiwi-ata apo-exanae mapanacuataje. Bajarapacuenia itsa apotsita-exanaenë tsipae, bajarapamonae aponaneconitsi tsipae Diosojawabelia. Itsiata, tae-ata bajarapapinijicuenejawanë, aponejumexaniatae Cristonëcuene. Biji rajane, Xanë nitoyanaëcota.Taxa-ata itoya. Bajaraxuanë yabara naneconita Diosojawabelia.
25 Daxita xuanë taneto-exanaejawanënexa, tajëwelia Dioso pejumeliwaisibaxutota jumaitsi mapacueniaje: «Bajarapamonae nitoya tsane, apoxainae-atanë xua yabara-itoyajitsia», jai tajëwelia Dioso pejumeliwaisibaxutota xanë yabara —jai Jesús pijajiwijawabelia.
26 Icatsia, Jesús jumaitsi:
—Pamatacabi pacato-itorobianicatsi Ponë papecajamatabëcueneyawenonaenënexa, itorobianicajë taxa Diosojawawetsica. BajaraPonë raja Espíritu Santo, pexaniajailiwaisi pepaebinë. BajaraPonë xaniawaetsia newajunupaebiana.
27 Bajarapijinia pacuenia, paxamë-ata xaniawaetsia panewajunupaebianame, tsipaji baja cajena xanë paneyajawajinawanapame tataxuxuabijawaweliacujinae jiwi liwaisi tatsipaebijawa —jai Jesús pijajiwijawabelia.