Pacuenia Jesús nacatonamuto paxa Diosojawabetsia
14
Jesús icatsia jumaitsi pijajiwijawabelia:
—¡Pëtsa bitso pajamatabëcuenebëjamë panenajamatabëxainaejawata, patacawecuaponaejawanexa yabara! ¡Pasiwanajamatabëcuenecopabare Diosojawabelia, xanëjawaberena-ata, patacayawenonaenexabeje!
2 Taxajawatatsia, xaina bitso pexaniabonë, panejinawanapaenexa. Itsa bajara-apo-itsi tsipae, apopacatsipaebi tsipaetsi, bajarabetsia taponaejawa, patacatsiwajënaexaniawaetsinexa itsajota papatsijitsiamë.
3 Bajarabetsia itsa pacawecuaponaenatsi, itsa pacatsiwajënaeweretsianatsinua panepatsitaxunaenexa, nexata xanë icatsia patsianicajë, patacacaponaenexatsia jane baja. Nexata, pacayajawa-ecaenatsi, itsajotatsia ecaenajë.
4 Paxamë baja payapëtaneme itsabelia ponaejitsianë. Payapëtanemenua rabaja panamuto panatopitsijitsiamë, panepatsinexa itsajotatsia ecaejitsianë —jai Jesús pijajiwijawabelia.
5 Nexata, Tomás, Jesús pijajiwitonë, jumaitsi:
—Tajatuxanenë, apopayapëtaenë cajena itsabelia ponaejitsiamë. ¿Detsa nexata pacuenia namuto payapëtaenajë, pataponaenexa itsabelia ponaejitsiamë? —jai Jesús-jawabelia.
6 Nexata Jesús jumaitsi:
—Xanë rabaja namutonë,a pepopexaniajailiwaisib taxainaenë, piasaëjamatabëcuene-ata taxainaenë. Nexata, xanënejewa itsajiwi-ata apopatsicapanepae tsane taxajawabetsia, xanëjawaberena itsa aponesiwanajamatabëcuenecopatsi.
7 Itsa paxamë panamuxuna-ewetsipame patacatsipaebiliwaisi, pepacuene paneyapëtaejitsipame, taxa-atanua payapëtaejitsipame. Matapania jane baja payapëtaneme taxa, tsipaji baja patanemenua —jai Jesús.
8 Nexata Felipe jumaitsi Jesús-jawabelia:
—Tajatuxanenë, pacawajëtatsi axa panetsitajëtsinexamë. Pajitsipajë baja cajena bitso patataejawa —jai.
9 Nexata Jesús jumaitsi bajaraponëjawabelia:
—Felipe, bajayajebi rabaja pacayajawaponaponatsi. ¿Itsiata tsaja, abaxë xaniawaetsia apopaneyapëtaemë? Pajiwi netane, bajarapajiwi taxa-ata tane. ¿Detsa xuajitsia nexata newajëcame taxa netaenexa?
10 Taxa baja cajena neyajawaponapona. Xanë-ata taxa yajawaponaponajë. ¿Abaxë tsaja jume-aebame bajaraxua? Paliwaisi pacatsipaebatsi, tajamatabëcuenepijiliwaisi baja cajena apopacatsipaebitsi. Biji rajane, Taxa, Ponë neyajawaponapona, daxita pacuenia nitoroba, bajara-ëxua exanaponaponajë.
11 ¡Panejumexaniataema, xanë tayajawaponaponaejawa taxa, bajaraPonë-ata taneyajawaponaponaejawa! Itsa jume bepanesiwanajamatabëcuenecopabamenua patacatsita-exanabiabixae pinijicuenejawanë Dioso pesaëta.
12 Xaniajanë pacuenia pacatsipaebijitsiatsi. Pajiwi nesiwanajamatabëcuenecopatsiana, bajarapajiwi exanaena pacuenia xanë exanajë. Orijibia, ayaicuene ta-exanaejawa matatoxenetsia exanaena, tsipaji xanë nawiatsianajë taxajawabetsia.
13 Daxita xua xanë tawënëta pawajëtsianame taxajawabelia, pacato-exanaenatsi cajena. Bajarapacuenia, xanë, Dioso pexënatonë, pacato-exanaenatsi, tajamatabëcuene-itajëtsinexa taxa ayaijamatabëcuene pexainaejawa.
14 Bajaraxuata, itsacuenejawayo itsa pawajëtame xanë tawënëta, pacato-exanaenatsi cajena —jai Jesús pijajiwijawabelia.
Jesús najumecapanepaeya itorobiapaebica Espíritu Santo pijajiwijawabetsica
15 Icatsia, Jesús jumaitsi pijajiwijawabelia:
—Itsa pane-asiwamë, pa-exanabiabianame pacuenia paca-itorobatsi.
16 Xanë pacatowajëtsianatsi taxajawabelia itsanë juya papecato-itorobinexatsica, Ponë pacajamatabëcueneyawenonaponaponaejitsia daxitamatacabijawabelia.
17 Bajarapa-Espíritu Santo yabara jumaitsinë, pepopexaniajailiwaisi jiwi peyapëtaeya-exanaenë. Pamonae mapanacuapijicuene jamatabëcuene-enatsi, Espíritu Santo apotsijamatabë-ecaetsi, tsipaji apotae, apoyapëtaenua peponaponaecuene. Itsiata baitsi jane, paxamë payapëtaneme baja, tsipaji baja bajaraPonë pacayajawaponapona. BajaraPonë papecatsijamatabë-ecaexae, payajawajinawanapaename papecajamatabëcueneyawenonaponaponaenexa daxitamatacabijawabelia.
18 »Nexata, ponae-atanë tsane taxajawabetsia, itsiata apopacacopatsitsi tsane, panija-epato ëpaxamë panejinawanapaenexa. Icatsia raja patsianicajë,c patacayajawaponaponaenexa.
19 Caematacabibejecujinae baja, mapanacuajiwije aponetae tsane. Itsiata, icatsia paxamë panetaename. Xanë piasaëjamatabëcuene taxainaexae, tajamatabëcueneta, paxamë-ata pasaëmë tsawanapae tsane daxitamatacabijawabelianexa.
20 Espíritu Santo pepatsimatacabitsica, paxamë payapëtaename taxa, paxanëbeje, caenë panaexanajëbeje. Paxamë pijinia pataneyajawajinawanapaexaemë, xanë-ata pijinia patacayajawaponaponaexae, becaejiwi naexanatsi.
21 Pajiwi caeliwaisi xaina pexanaenexa ta-itorobiliwaisi, bajarapajiwi najamatabëcuene-itajëta xaniajaiya tane-asiwajawa. Pajiwi bajarapacuenia niasiwa, taxa juya bajarapacuenia asiwatsi. Nayapëtaeya-exanaenajënua bajarapajiwijawabelia pitsijamatabëcuene taxainaenëcuene —jai Jesús pijajiwijawabelia.
22 Itsanë Judas-wënënë, (itsiata apoJudas Iscariote), jumaitsi Jesús-jawabelia:
—Tajatuxanenë, ¿detsa xuajitsia ëpaxanë panetsitanaitajëtsianame? ¿Detsa xuajitsia apotsitanaitajëtsimë tsane itsamonaejawabelia? —jai.
23 Jesús nexata jumaitsi Judas-jawabelia:
—Pajiwi niasiwa, exanaponaponaena ta-itorobicuenia. Bajarapajiwi juya taxa asiwa tsanetsi. Nexata, paxanë, taxabeje, bajarapajiwi payajawaponaenajëbeje.
24 Pajiwi aponiasiwa, bajarapajiwi aponejumecowënëtsi tsane tatsipaebiliwaisi. Bajarapaliwaisi xanë apotajumeliwaisi. Taxa raja, ponë nitorobica, pejumeliwaisi —jai Jesús Judas-jawabelia.
25 Icatsia, Jesús jumaitsi pijajiwijawabelia:
—Mapacuenia pacatsipaebatsije baja, abaxë patacayajawaponaponae-epato.
26 Itsiata, itsamatacabi itsanë papecajamatabëcueneyawenonaponaponaenënexa Taxa tawënëta pacato-itorobianica. BajaraPonë raja Espíritu Santo pacacujarubaponaena daxitaxuanë abaxë pacatsisajina paneyapëtaejawa. Pacanajamatabënapitsia-exanaenanua daxita paliwaisi pacatsipaebaponatsi.
27 »Patacanapëjiobijawata jitsipajë mapaliwaisije patacatonajumepuenetsijawa: Pacatsijamatabërutatsi bëpënëa panejamatabëcuenexanepanaejawa. Apopacarajutsitsi pitsijamatabëcuenebarëyajawa xaina mapanacuapijiwije, xua bepijia werewerecaejitsia. Biji rajane, xanë pajamatabëcuenexanepanaejawa xainajë, bëpënëa pacatsijamatabëcuenerutatsi. ¡Bajaraxuata, pëtsa pajamatabëcuenebëjamë, pacujunawamenua itsacuenejawa!
28 Panejumetaneme rabaja patacajumaitsijawa mapacueniaje: «Xanë baja ponaenajë taxajawabetsia. Itsiata baitsi jane, icatsia pacasiwapatsianicatsi», patacajaijawa. Itsa bitso pane-asiwamë tsipae, nexata pasiwajamatabëcuenebarëyamë tsipae taponaejawanexa taxajawabetsia, tsipaji bajaraPonë ayaijamatabëcuenenë xanëwecua.
29 Bajarapacuenia pacatsipaebatsi taponaewajënaeya. Itsa pacatocopiapatsiana patacajumaitsicowëya, patacatsipaebiliwaisi panejumexaniataename.
30 »Aponecuenecaëjëpae rabaja pematatsënëa liwaisi patacatsipaebaponaenexa, tsipaji rabaja imoxoyo dowathi tanetsimaxëpatsinexa, ponë mapanacuapijiwi pijatuxanenëje. Itsiata baitsi jane, bajaraponë xanë aponejamatabëcuenematatoxenetsicapanepae tane-itorobinexa.
31 Biji rajane, bajarapacuenia netocopiapatsiana mapanacuapijiwije peyapëtaenexa taxa Dioso bitso ta-asiwajawa, tato-exanaejawanua tane-itorobicuenia.
»¡Panonobapunare! ¡Ponatsi baja mapacowëwecuaje! —jai Jesús pijajiwijawabelia.