Jesús tsipaeba Nicodemojawabelia, pacuenia jiwi benaexana bepejananaexanaejiwiyocuenia
3
Bajarapamatacabijawa, ponapona Nicodemowënënë, judíowi pewetsiwiyajuwënënë, fariseoliwaisijawabelia penajumecajonenë.
2 Itsamatacabi, merawi, bajaraponë pona Jesús-jawabelia, peyanijobinexa petsipaebanajetarucaeliwaisi yabara. Pepatsicujinae, Jesús-jawabelia jumaitsi:
—Necujarubinë, pacayapëtanetsi baja cajena athëbëwetsica Dioso peca-itorobinëcuenetsica, patanetsipaebaponaenexamë Dioso pejumeliwaisi. Dioso itsa apocayajawaponaponae tsipae, apocacuenecaëjëpae tsipae, nexanaponaponaenexa papinijicuenejawanë exanaponame. Bajaraxuata, payapëtaniji Dioso peca-itorobijawa —jai Nicodemo Jesús-jawabelia.
3 Nexata, Jesús jumaitsi bajaraponëjawabelia:
—Xaniajanë pacuenia catsipaebijitsiatsi. Pajiwi Dioso pejamatabëcueneta icatsia bepejananaexanaejiwiyo aponaexanae tsane, bajarapajiwi apojone tsane Dioso peyanacua-ewetsicuenejawabelia —jai Jesús.
4 Nexata Nicodemo jumaitsi:
—¿Detsa jane pacuenia penaweretsijiwi baja icatsia bepejananaexanaejiwiyo naexanaejitsipa? ¡Apocaëjëpaetsi rabaja icatsia pejonejawa pena pecototualia, penaexanaenexa icatsia bepejananaexanaejiwiyo! —jai.
5-6 Jesús pejumecanawiatsijawata jumaitsi:
—Xaniajanë pacuenia catsipaebijitsiatsi. Pajiwi mera,a pejamatabëcueneta aponaexanae, Espíritu Santo pejamatabëcueneta-ata aponaexanae tsane bepejananaexaenaejiwiyo, apojone tsane Dioso pijajiwi peyanacua-ewetsinacuajawata. Pajiwi naexana pena pecototowerena, peperabësaëjumali yajawanaexana.b Itsiata, pajiwi naexana Espíritu Santo pejamatabëcueneta, piaitawajamatabëcuene yajawanaexana. Bajarapacuenejawatabeje penaexanaejiwi jonena Dioso peyanacua-ewetsinacuajawabelia.
7 ¡Tacajumaitsijawa yabara pëtsa jamatabëcuenenabenajacame: «Xamë-ata baja cajena namatawenoname icatsia nenaexanaejawa bepejananaexanaejiwiyocuenia», tacajaijawa jamatabëcuenenabenajacame pëtsa!
8 Yapëtaneme jowibo penajetarucaejawa itsabelia jamatabënajetaruca. Saya jumetaneme ëpijume. Itsiata, apoyapëtaemë itsawerena najetaruca, itsabelia-ata pona. Bajarapijinia pacuenia, apoyapëtaemë pacuenia jiwi Espíritu Santo pejamatabëcueneta naexanaeya-exanatsi bepejananaexanaejiwi —jai Jesús Nicodemojawabelia.
9 Nexata, icatsia Nicodemo jumaitsi Jesús-jawabelia:
—¿Detsa pacuenia itsi tsipae bajaraxua? —jai.
10 Nexata Jesús jumaitsi:
—Xamë picani Israel nacuapijiwi necujarubabiabinë. ¿Itsiata tsaja, apojumeyapëtaemë paliwaisi catsipaebatsi?
11 Xaniajanë pacuenia catsipaebijitsiatsi. Paxanëbeje,c Juan, jiwibautizabinë, jiwijawabelia patsipaebaponajëbeje patayapëtaeliwaisibeje, xua-ata pepacuene patanijibeje. Itsiata baitsi jane, patacatsipaebiliwaisianëbeje, apopanejumexaniataemë.
12 Nexata, xamë itsa aponejumexaniataemë tacatsipaebijawa xua Dioso exanapona mapanacuataje, ¿detsa nexata pacuenia nejumexaniataejitsipame itsa tacatsipaebijawa yabara xua Dioso exanapona athëbëtatsia?
13 Itsajiwi-ata cajena apoponae Dioso pijanacuayabetsia, caewëa penawiatsinexatsica, pecayapëtaeya-exanaenexa pacuenia itsi athëbëtatsia. Xanë saya, caenënë, Daxitajiwi Pematapijinënë, tapatsinëtsica athëbëwetsica, necuenecaëjëpa patacayapëtaeya-exanaenexa pacuenia itsi.
14 »Pacuenia bajayata, petusatonacuata Moisés-pijinë jomo jumapecataeya pexanaenë, naejawata athëbëyo ruta, jomo pesiniwitsi petaejawata piasaënexa, bajarapijinia pacuenia, Daxitajiwi Pematapijinënë-ata, athëbëyo nerutsiana cruzajawabelia tatëpaenexa.
15 Nexata, pajiwi nesiwanajamatabëcuenecopatsiana xanëjawaberena, aponaxuabi tsane. Biji rajane, xainaena matacabi apopewerewerecaejawa —nayabarajai Jesús pijacuata Nicodemojawabelia.
Xua Dioso to-exana, mapanacuapijiwije piasiwajamatabëcuene
16 Icatsia, Jesús pijacuata nayabarajumaitsi Nicodemojawabelia:
—Pinijicuenia Dioso mapanacuapijiwije piasiwaxae, to-itorobica pepocaenë pexënato mapanacuayabetsicaje, Diosowecua bajarapamonae penaxuabiyaniwa. Nexata, pajiwi siwanajamatabëcuenecopatsiana Dioso pexënatojawabelia, aponaxuabi tsane. Biji rajane, bajarapajiwi xainaena matacabi apopewerewerecaejawa.
17 Dioso apo-itorobitsica pexënato mapanacuayabetsicaje, penaneconitsia-exanaenexa mapanacuapijiwije, biji rajane, pecapanepaenexa pibisiacuene pexanaeneconimiwecua, bajaraPonë pejamatabëcueneta
18 Nexata, pajiwi siwanajamatabëcuenecopatsiana Dioso pexënatojawabelia, bajarapajiwi Dioso aponaneconitsia-exanaetsi tsane, pibisiacuene pexanaeneconimi yabara. Itsiata, pajiwi aposiwanajamatabëcuenecopatsi tsane Dioso pexënatojawabelia, Dioso tocaëjëtsiana penaneconitsia-exanaejawanexatsi, apopesiwanajamatabëcuenecopatsixae pexënatojawabelia.
19 Maxua yabaraje mapanacuapijiwi naneconita Diosojawabelia, apopejumexaniataexae Pecotia Pexainaenë petsipaebiliwaisitsi. BajaraPonë patajopaica jane baja mapanacuayabetsicaje, pexaniajailiwaisita jiwi pejamatabëcuene-itayotsinexa. Mapanacuapijiwije bitso piasiwaxae pibisiacuene pexanaejawanexa, jumetae-ata bajarapaliwaisi, apojitsipae pejamatabëcuene-itayotsinexatsi. Caranata saya asiwa pitaquirijamatabëcuene.
20 Daxita pamonae pibisiacuene exanawanapa, bitso cuene-itoya Pecotia Pexainaenë, pejamatabëcuene-itayotsiyaniwatsi pexaniajailiwaisita. Bajaraxuata, apopatsi bajaraPonëjawaberena, itsamonae pewënëtaeyaniwatsi daxita pexanaecuenemi, xuanë Dioso tsitapibisiacuenetsi.
21 Pamonae pijinia, exanawanapa pexaniajailiwaisi pitorobicueniatsi, bajarapamonae pata Pecotia Pexainaenëjawaberena, pejamatabëcuene-itayotsinexatsi. Bajarapamonae apocujunawi itsamonae pewënëtaejawatsi papexaniacuene exanawanapa, tsipaji Dioso yawenonaponatsi bajarapacuenia pexanawanapaenexa —nayabarajai Jesús pijacuata Nicodemojawabelia.
Juan, jiwibautizabinë, wajunupaeba Jesús yabara
22 Jesús, Nicodemobeje penabarëcuaicuaijaicujinaebeje, itsamatacabijawabelia, Jesús, pijajiwi yajawa, pona Judea nacuayabelia. Bajarapanacuata bajayajebi pijajiwi barëponapona. Bajarajota, bajarapamonae jiwi bautizabapona.
23 Juan pijinia itsamonae bautizabaponapona Enón tomarata, Salim tomara imoxoyojawata pe-ecaetomara. Bajarajota, Juan jiwi bautizabaponapona, tsipaji bajarajota nawita meramatathaibëanë. Nexata pebautizabaponaejawata, jiwi topataponatsi pebautizabinexa.
24 Bajarapacuenia Juan jiwi bautizabaponapona, abaxë itsa apo-etsitsi penaneconitsiwi pejebabiabibota.
25 Bajarapamatacabijawa, Juan pijajiwiyajuwënëwi anaeya barënajumenota judíonëjawabelia, xua jiwi toxanepanaejitsiatsi pexanaejawanexa, penawecua-ajibia-exanaenexa xua yabara bepenaxuirabiwi jinawanapa Dioso pitabarata.
26 Bajaraxuacujinae, pijajiwi parena Juan-jawaberena, petsipaebinexatsi Jesús yabara. Jumaitsi:
—Necujarubinë, Ponë caxitajarabame Jordán-mene itsapanatalia, Ponë wajunupaebame paxanëjawaberena Cristocuene, bajaraPonë-ata aeconoxae jiwi bautizabapona. Nexata, daxitajiwi pona bajaraPonëjawabelia, waxaitsijawaberenawecua —jai.
27 Nexata, Juan jumaitsi pijajiwijawabelia:
—Xuawajëto xaina caejiwi canacujitsia, bajarapacuenia xaina Dioso perajutsixaetsi.
28 Paxamë panejumetaeyabiabame tajumaitsitsabiabijawa jiwijawabelia mapacueniaje: «Xanë raja apoCristonë, Ponë Dioso athëbëwetsica itorobijitsiatsica jiwi pecapanepaenexa. Saya raja tane-itorobinë Cristo pewajënaeya, taliwaisipaebanajetarucaenënexa», tajaitsabiabijawa.
29 Cristo raja bepejananacojiobinënexa. Xanë pijinia bitso betaneyapëtaenë bajaraPonë. Nexata, yapëtanetsi ponë pijajarawa xaina, bapita bajarapowa. Peyapëtaenëtsi pijinia namuxunabarëya tsecae, pejumetaejawata penajumeliwaisicajonejawabeje penapitsijawabejenexa. Bajarapijinia pacuenia, xanë-ata, aeconoxae bitso jamatabëcuenebarëyanë, itsa wënëliwaisitaniji jiwi peponaejawa Jesús-jawabelia.
30 BajaraPonë pewajënaeyabelia toxanepanatsi jiwi matatoxenetsia ayaijamatabëcuenenë petaejawatsi, xanë juya bajaraPonëwecua beweliajamatabëcuenenë tanetaejawa —jai Juan pijajiwijawabelia.
Juan tsipaeba pijajiwijawabelia, Jesús athëbëwetsica pepatsinëcuene yabara
31 Icatsia, Juan jumaitsi pijajiwijawabelia:
—Athëbëwetsica pepatsinë, bitso cajena ayaijamatabëcuenenë daxitajiwi matatoxenetsia. Pamonae naexana mapanacuataje, bajarapamonae saya cuaicuaijai tsabiabi ëmapanacuapijicuene yabaraje; xua taewanapa. Itsiata baitsi jane, Ponë athëbëwetsica pepatsinë, bajaraponë daxitajiwi matatoxenetsia bitso pejumenamatamotsinë.
32 BajaraPonë tsipaebabiaba, pacuene tane, paliwaisi-ata jumetane athëbëtatsia, itsiata ayaibitsaëto jume-aebatsi.
33 Pajiwi jumexaniatane athëbëwetsica pepatsinë pepaebiliwaisi, najamatabëcuene-itajëta pejumexaniataejawa Dioso pexaniajailiwaisi pepaebinëcuene.
34 Ponë Dioso itoroba pejumewajunupaebinexatsi jiwijawabelia, paebabiaba Dioso pejumeliwaisi, tsipaji Dioso rajutatsi Espíritu Santo, pejamatabëcueneyawenonaponaenexatsi daxitacuenejawalia, wecua-asiwanejewa itsacuenejawayo-ata Espíritu Santo pijajawa.
35 Dioso bitso asiwa pexënato. Nexata, tocopata daxitacuene penamatacaitorobinënexa.
36 Bajaraxuata, pajiwi siwanajamatabëcuenecopata Dioso pexënatojawabelia, bajarapajiwi xainaena matacabi apopewerewerecaejawa. Pajiwi pijinia aposiwanajamatabëcuenecopatsi Dioso pexënatojawabelia, bajarapajiwi matacabi apopewerewerecaejawa apoxainae tsane. Biji rajane, Dioso bara-anaepanaena bajarapajiwi, penaneconitsia-exanaenexa daxitamatacabijawabelia —jai Juan pijajiwijawabelia.