Ana pexaniacuenia wënëxaniata Dioso pewajëtsijawata
2
Pewajëtsiawata, Ana jumaitsi Diosojawabelia mapacueniaje:—Jehová, tajamatabë-ëthëtojawawerena jamatabëcuenebarëyanë Xamëta, tsipaji nerajutame tajamatabëcuenesaënexa. Bajaraxuata, tacuaibowojotota necuenecaëjëpa tacapo̱naenexa tane-itoyawi. Bajaraxuata, bitso jamatabëcuenebarëyanënua tanecapanepaejawamë yabara.
2 »¡Ajibi itsanë pianeconijibinë pacuenia xamë Jehovámë, tsipaji ajibi itsanë Dioso xamëwecua! ¡Ajibi itsanë xamëwecua, jiwi pewetsinënexa itsacuene petocopiapatsiyaniwatsi!
3 »¡Pëtsa caejiwiyo-ata cuaicuaijai ayaijamatabëcuene jiwi nataeya, tsipaji raja Jehová daxitacuene peyapëtaeDioso! BajaraPonë jiwi pexanaecuene petocanaëjëbinë paneconiwajëto xaina, bajarapaneconiwajëtota penaneconitsia-exanaenexa.
4 »Pamonae piacuenesaëwimi, acuenesaëjibia-exanabiabatsi. Pamonae pijinia pecuenabiwitsi, acuenesaëya-exanabiabatsi icatsia.
5 »Pamonae pexaejawa ayaijawa pexainaewimi, aeconoxaeta jinawanapa ëpenacuenebita, pepitabiabinexa tsiquiripan-muxupayo. Pamonae pijinia bitso pexaejawanejewa jinawanapa picani, aeconoxae juya bitso pepenewi naexana, ayaijawa pexaeyabiabixae. Powa mawecowami, aeconoxae xaina siete pajiwibeje pexi. Juya powa ayaibitsaëto pexi pexainaewami, aeconoxae bitso najamatabëxainaeya ponapona, pexi peto-ajibixaetsi.
6 »Jehová raja jiwi tocopata petëpaejawanexa, bajarapacuenia piasaëtsawanapaenexanua. Tocopatanua jiwi petëpaenë pemëthëtsinexa, bajarapacuenia cuenecaëjëpatsi piasaëya-exanaenexanua mëthëwecua, icatsia piasaëtsaponaponaenexa.
7 »Jehová pejamatabëcueneta itsamonae apopexainaewi tsawanapae, bajarapacuenia itsamonae pecobecowë ayaijawa pexainaewi tsawanapae. Itsamonae tocopata beweliajamatabëcuenewinexa, itsamonae pijinia ayaijamatabëcuenewinexa.
8 »Jehová wecuatixita jiwi pijabepejiobitaxunaemiwecua, juya pecaeya-exanaenexatsi ayaijamatabëcuenewituatuajëta, itsamonae peyaiyataeya-exanaenexatsi.a Bajarapacuenia exanaena Jehová, tsipaji mapa-ira pexanaejawataje tsiwajënaebuata xua yotanajetarucaejitsia mapanacuaje.
9 »Jehová xaniawaetsia eweta pajiwi caejamatabëcuene xaina pexanaponaponaenexa pitorobicueniatsi. Pajiwi piajamatabëcuenebejewi juya tocaëjëta bepijia petëpaejawa, pitaquirijawabereca pejopaenexa, tsipaji raja caejiwiyo-ata apo-acuenesaë tsane, penaewetsinexa pecuenesaëta.
10 »Jehová raja werebiabiana daxita pijawajabitsaëwi. Nexata, athëbëwetsica tsi-itorobianica pianaepanaejumenë yamaxëjumecuenia, pewerewerebiabinexa.
Jehová raja peneconicanaëjëtsinë daxita mapanacuapijiwijawabelia. Nasaërajutsiananua pepopeyanacua-ewetsinëjawabelia,b ponë tsimata-epanatsi aceiterata, pejamatabëcuene-itajëtsinexa pitapetsinëcuene, bajaraponë pinijicuenesaë pexainaenënexa —jai Ana pexaniajamatabëcuene perajutsijawata Jehovájawabelia pewajëtsijawata.
11 Bajaraxuacujinae, Elcana nawiata baja pijaboyaberena, Ramá tomaraberena. Itsiata baitsi jane, bajarapamatacabi pejewaxinë nacopata baja Jehová pijabojawata, petonacuenebaponaponaenexa yajawasacerdotenë, Elí pitorobaponaponaecueniatsi.
Elí pexënatobeje, sacerdotenëbeje-ata, pibisiacuene exanaponaponabeje
12 Elí pexënatobeje, Ofni, Finees-beje, bitso piacuenebejenëbeje naexana. Nexata, apotsitanamatamotsitsi peyaiyataenexa xua Jehová pijacuene. 13 Beweliacuenianua taeyabiaba sacerdotecuene jiwi petonacuenebinexa. Pexaniacuenia apo-exanaebeje Dioso pitorobicueniatsi. Caranata saya, itsa capata itsanë dajubinë tajuitsiaya perajutsinexa Jehovájawabelia, paepatota abaxë setapona bajarapawijawa, pijajiwitonë itorobabiaba, pepitsinexa bajarapawiyajuwënëjawa piasiawijawa. Bajaraponë cobenanajetarucabiaba pecacuatsijawa. 14 Nexata, pawaxita seteta dajubiwi, bajarapacacuatsijawata waxijawalia itacabëtabiaba, pecacuatsinexa pewijawa. Bajarapacuenia jutabiaba pesetsiwaxijawawerena bajarapawijawa, perajutsinexa sacerdotenëjawabelia, Jehová picani apopetocopatsiwitotsi-atac sacerdotewinexa. Bajarapacuenia exanabiababeje daxita israelitawijawabelia pacujinae pata Jehová pijacarpabojawata, Silo tomarata, petajuitabiabinexa dajubi Diosojawabelia. 15 Bajarapacuenia-ata, abaxë dajubinasitsijawad wecuatsatsinejewa, xua tajuitsijitsia piniji-altar-jawata, nexata petonacuenebinëtsi sacerdotenë patabiaba, pejumaitsinexa ponëjawabelia capata dajubinë petotajuitsinexatsi: «Nerajure pewijawa tatosebijawanexa sacerdotenë, tsipaji bajaraponë baja apocawecuapitsi tsane neyajuwënësetsiwijawa. Saya namatawenona piasiajawa», jai tsabiabi. 16 Itsa bajarapadajubi pecapatsinë jumecanawiatsipa: «Copiaya ra jane abaxë rajutsiaya betajuitajë bajarapanasitsijawa Diosojawabelia. Bajaraxuacujinae xanepana nepitsijawa xuajitsipame», itsa jai tsipae, nexata bajaraponë jumaitsi tsabiabi: «Jume. Nerajure caecuenia. Itsa aponerajutsimë tsane, nexata xanë pitsianajë tajacuata xua jitsipajë», jai tsabiabi. 17 Nexata bajarapacuenia, Elí pexënatobeje pexanaexaebeje, bitso pinijineconi natsi-exanaponabeje Jehová pitabarata. Bajaraponëbeje beweliacuenia taeyabiaba padajubiwi rajutsijitsia Jehovájawabelia. Yaiyataeya apo-exanabiabibeje pacuenia Jehová tonajumecopata Moisés-pijinëta, pexanabiabinexa picani.
18 Samuel juya bajarapamatacabijawa, pejewaxinëyo-ata abaxë, xaniawaetsia tonacuenebaponapona Jehová pijacuene peyawenonaenëcuenia sacerdotenë. Naxatatabiaba xuanë sacerdotewi Dioso pijabo-ënëta penacuenebijawata banaxataba. Baitsi, pecorobë-ucutsi-efod-wënëjawa, pexanaejawa linowiriapanata naniawelia naxatatabiaba. 19 Pena to-exanabiabatsi tsiquiritúnicanawayo, penaxatabiabijawanexa, pecobeta pexanaejawayo. Itsa caewai canacujitsia pena ponabiaba templojawabetsia, pamona yajawa, dajubi petotajuitabiabinexabeje Jehovájawabelia, nexata tocaponabiaba bajarapamatacabijawa bajarapanaxatatsijawa. 20 Nexata sacerdotenë, Elí, caewai canacujitsia pexaniacuene cuenewajunupaebabiaba Elcana, pijawayajawa, Jehová pewënëta. Jumaitsi tsabiabi: «Jehová, carajuta nexi mapapetiriwajawata, juya netopuenetsinexa bajarapanacuetonëyo petonacuenebinexa Jehová», jai tsabiabi pecuenewajunupaebijawata. Bajarapacuenia petowajunupaebicujinaetsibeje, nawiatabiababeje pijabojawabelia. 21 Nexata jane baja, Jehová yawenonabiaba pexaniacuenia Ana. Nexata, bajarapowa xainapona itsamonae pexi, acueyabi ponëbeje pebijiwi, bajarapacuenia-ata anijawabeje petiriwabeje. Bajarapawainëjawa pijinia, Samuel witsabapona pewajënaeyabelia Jehová pitabarata.
22 Bajarapacujinaeta baja Elí bitso perujunë tsaponae. Itsa bajaraponë jumetane xua pexënatobeje exanaponaponabeje daxita israelitawijawabelia Silojawata, siwajamatabëcuenebëjai tsabiabi. Siwajamatabëcuenebëjainua daxita papibisiacuene exanaponaponabeje pewitota papetiriawi nacuenebawanapae Jehová pijacarpabobaupajawata. 23 Nexata, bajaraponë jumaitsi pexënatobejejawabelia:
—Daxitajiwi bitso pacawënëbaracuaicuaijaibeje xanëjawaberena papibisiacuene pane-exanaponaponaejawabeje yabara. ¿Detsa xuajitsia bajarapitsicuenia paxamëbeje pa-exanaponaponamebeje? 24 ¡Pacoparebeje baja pibisiacuene pane-exanaponaponaejawabeje! Xanë pexaniacuene apopacawënëtaetsibeje. Caranata daxita israelitawi pacabaracuaicuaijaibeje bitso pibisiacuene pane-exanaejawabeje yabara. 25 Xua paxamëbeje pa-exanaponamebeje, pibisiacuene pato-exanabiabamebeje Jehovájawabelia. Itsajiwiyo itsa to-exanaejitsipa pibisiacuene pewënajiwitonëjawabelia, nexata Dioso yawenonaeya toxanebijitsipatsi penasiwajamatabëcaewinexabeje. Itsiata baitsi jane, pajiwi pibisiacuene exana Jehovájawabelia, ¿detsa pajiwi nexata juya jamatabëcueneyawenonaeya tocuaicuaijaitsibeje tsipae? ¡Ajibi cajena! —jai Elí.
Itsiata baitsi jane, bajaraponëbeje apojumecowënëtsi pacuenia paxa jumaitsitsibeje, tsipaji baja Jehová tocaëjëta bajaraponëbeje, petëpaejawanexabeje pijaneconijamatabëcuene.
26 Bajarapaepatota pijinia, Samuel witsabapona. Daxita xua Samuel exanaponapona, Jehová siwajamatabëcuenebarëyatsi, bajarapacuenia jiwi-ata. 27-36 […]
C3—C7 […]