<<    <     1 SAMUEL     3     >    >> 
Jehová junata Samuel
3
Itsa abaxë pewëjëato Samuel, Jehová pijacuene tonacuenebaponapona pacuenia cuenecujarubanajetarucatsi Elí. Bajarapamatacabijawa Jehová bitso apoyapëtaeya-exanabiabi pejumeliwaisi itsamonaejawabelia-ata. Bitso bewelia yapëtaeya-exanabiaba majitsinaebocuenia. 2-3 Elí baja bitso perujunë tsanajetarucae, nexata bitso itaxutotsëcënapona. Xaniawaetsia baja apotae. Itsamatacabi, pamerawijawa Elí majitanuca pijaboyojawata, Samuel pijinia bajarapamerawi majitanuca Jehová pijacarpabojawata, pabota Jehová penajumeliwaisixaniawaetsibaula bocabiaba. Itsiata baitsi jane, abaxë lamparajawanë naitayotarubena bajarapabo-ënëta. 4 Nexata Jehová junata:
—¡Samuel! —jaitsi Jehová.
Nexata Samuel jumecanawiata:
—Marajotabocajëje —jai. 5 Bepijiayo cujinaejinalia itsabelia Elí boca. Nexata, jumaitsi bajaraponëjawabelia:
—Marajota nucajëje. ¿Dexua yabara xamë nejunatame? —jai Samuel.
Nexata Elí jumecanawiata:
—Apocajunatsitsi baja cajena. Nawiaremelia nebocaejawabelia —jai.
Nexata, Samuel nawialia pebocaenexa. 6 Icatsia bajaraxuacujinae Jehová junatatsi:
—¡Samuel! —jaitsi.
Nexata, bajaraponë icatsia namatacotapuna. Pona icatsia Elí pebocaejawabelia. Jumaitsi:
—Marajota nucajëje. ¿Detsa xua yabara nejunatame? —jai.
—Xanë ra apocajunatsitsi —jaitsi. Nawiaremelia icatsia nemajitsinexa —jai Elí.
7 Samuel bajarapacujinaeta abaxë xaniawaetsia Jehová apojumeyapëtae, tsipaji bajaraPonë apobarëcuaicuaijaitsi. Matapania jane baja, pijacujaya jumetane Jehová pejunatsijawatsi. 8 Icatsia xuacujinae, acueyabijawa Jehová junata Samuel. Nexata bajaraponë pona Elíjawabelia pejumaitsinexa:
—Xamë ra majotaje nexainame. ¿Dexua jitsipame tacato-exanaejawa? —jai.
Elí matapania yapëtane Jehová pejunuatsijawatsi bajaraponëyo. 9 Nexata jumaitsi Samuel-jawabelia:
—Liamëre baja nemajitsinexa. Nexata itsa icatsia cajunatsiana, jumecanawiatsianame mapacueniaje: «Cuaicuaijamëre Jehová. Cajumetanetsi rabaja», jamë tsane —jai Elí.
Nexata, Samuel bajaraxuacujinae pona pemajitsinexa icatsia. 10 Bajaraxuacujinae, Jehová itsa najetaruca, nucajopa imoxoyojawata. Icatsia, bajaraponë junata pacuenia junatapona copiaya:
—¡Samuel, Samuel! —jai Jehová.
Nexata Samuel jumecanawiata:
—Cuaicuaijamërë. Nijajiwitonë ra cajumetane —jai.
11 Nexata Jehová jumaitsi:
—Imoxoyo raja pewajënae ta-exanaejawanexa jiwi pebenajacaecuenenexatsi Israel-pijinë pemomoxituatuajëta. Nexata daxita pamonae jumetaena bajarapaliwaisi, bitso peca-amuxujitsibi yaneconecojai tsane. 12 Nexata jane baja, xanë tocopiapatsi-exanaenajë Elíjawabelia, pijamonae yajawa, daxita pacuenia najumecapanepaeya jumaitsinë tajëweliaa tato-exanaenexa tananeconitsia-exanaematacabijawabelia. 13 Xanë, Jehovánë, yapëtaeya-exana baja Elíjawabelia tananeconitsia-exanaenexa daxitamatacabijawabelia, bajaraponë, pijamonae yajawa, pexënatobeje papibisiacuene exanaponaponabeje pejamatabëcuene. Bajaraponë picani yapëtane pexënatobeje bitso pibisiacuenia tanewënëbaracuaicuaijaijawa, itsiata apocuenexanetsibeje.b 14 Bajaraxuata, xanë tajëwelia najumecapanepaeya jumaitsinë tatocopiapatsia-exanaenexa pibisiacuene Elíjawabelia, pijamonae yajawa. Bajarapacuenia xanë apotawecua-ajibia-exanaejawanexa bajarapamonae pijaneconi caeto-ata, xanëjawaberena capatsi-ata tsipae dajubi petajuitsinexa pijaneconijamatabëcuene, itsa jume, ofrendajawanë nerajutabiabi-ata tsipae —jai Jehová.
15 Bajarapacuenia pejumaitsicujinaetsi, Samuel xuacujinae icatsia majita peyananianaejawabelia. Bajaraponë penamatacotsicujinae baja bajayacunua, nexata bajarapaepatota Jehová pijabo baupata. Itsiata baitsi jane, Samuel bitso junawa petsipaebinexa Elíjawabelia pacuenia bajaraponë majitsinaebocuenia tane. 16 Itsiata baitsi jane, Elí junata asiwayacuenia Samuel pejumaitsinexa:
—Samuel, pexaniacuene ne-exanaename —jai Elí.
Nexata, jumecanawiata:
—Marajota nucajëje. Xua jitsipame, nejumaitsimërë —jai Samuel.
17 Elí nexata yanijoba:
—¿Detsa paliwaisi cajumaitsi Jehová? Pexaniacuene cawajëtatsi newecuamatayatsinejewamë bajarapaliwaisi. Dioso raja cananeconitsia-exanaejitsipa pinijicuenia itsa xamë newecuamatayatsipame caejume-ata xua daxita cajumaitsi tanetsipaebiyaniwamë —jai Elí.
18 Samuel nexata tsipaeba daxita xua yapëtaeya-exanatsi, wecuamatayatsinejewa itsacueneliwaisi-ata. Nexata Elí jumaitsi ayaijumeta yaiyataeya:
—BajaraPonë rabaja Jehová. Exanae bajaraPonë pacuenia tsitaxanepanatsi —jai.
19 Paepatota Samuel witsabanajetaruca, Jehová yawenonanajetarucatsi. Nexata, daxita paliwaisianë Samuel tsipaeba Jehová peyapëtaeya-exanaejawanëtsi, bajarapaliwaisianë toxaniajai tsabiabitsi. 20 Daxita Israel-pijinë pemomoxi itsa xuayo jinawanapa, Dan nacuajawawetsiacujinae Beerseba nacuajawabelia, yapëtane bajarapamonae pexaniajaicuenia petonacuenebijawa profetacuene, Jehová pijaprofetanë. 21 Bajaraxuacujinae, Jehová icatsia tsitanaitajëta Silojawata. Bajarajota, bajaraponë jane baja, xaniawaetsia tsitanaitajëta, peyapëtaeya-exanaenexanua pijumeliwaisi Samuel-jawabelia. Bajaraxuacujinae, Samuel tsipaeba daxita Israel-pijinë pemomoxijawabelia.