Josué
Israel-pijinë pemomoxi pita matapania Dioso perajutsiapaebi-ira
Jehová tocopata Josué penamatacaitorobinënexa Israel-pijinë pemomoxi
1
Moisés petëpaecujinae, Jehová pijajiwitonëmi, nexata Jehová barëcuaicuaijai Josuéjawabelia, pexënato Nun. Josué raja peyawenonabiabinë Moisés-pijinëmi. Jehová jumaitsi bajaraponëjawabelia mapacueniaje:2 —Tajajiwitonë Moisés rabaja tëpa. Nexata, ajenaconoxae xamë mapaJordán-mene barënicabianame daxita Israel-pijinë pemomoxi, paneponaenexa pa-irajawabelia pacarajutsijitsiatsi. 3 Pacuenia baja xanë tajëwelia najumecapanepaeya jumaitsinë Moisés-pijinëmijawabelia ira patacarajutsinexa, bajarapacuenia pacato-exanaenatsi. Nexata, daxita panacuaxijawa panajetarubenaename, xanë pacarajutsianatsi. 4 Mapitsinacuawajëto pacarajutsianatsi panijanacuanexa: Pa-ira najetaruca Neguev petsewitusatonacuajawawetsina, pecopiarucaenexa Líbano nacua petsutonëjawabetsia. Bajarapacuenia pijinia Mediterráneo manuamenejawaweliacujinae, daxita heteomonae pejinawanapaenacua yajawa, Éufrates menejawabelia pepatsinexa. Daxita bajarapa-iraxaneto panijanacua tsane. 5 Xanë cayajawa tsanetsi, pacuenia tajajiwitonë Moisés yajawanë tsabiabi. Nexata, itsamonae-ata apocuenecaëjëpaetsi tsane pecacueneyacaranatsijawa nebarënawajabitsaëtsiyaniwa. Xanë caeto-ata apocacopatsi tsanetsi nija-epato cayawenonaenejewatsi. 6 ¡Acuenesaëmëre! ¡Jamatabëcuene-aitatsacamërenua, tsipaji raja xamë matacaponaename Israel-pijinë pemomoxi penawajabitsaëtsijawata bajarapanacuata pejinawanapaewijawabelia, netotsanaejawabelia Israel-pijinë pemomoxi irayajuwënëjawanë caenë pemomoxibitsaëto canacujitsia, pacuenia tajëwelia najumecapanepaeya jumaitsinë panijasalinaiwimijawabelia, paxamë papemomoximë panecanacopataponaenexa panija-iracuenia, panecuene-amoneyabicujinae pija-iranë pexainaewimi! 7 Xanë saya caejawa cawajëtatsi bajarapacuenia tacayawenonaenexa. Catojitsipatsi niajamatabëcuenesaëjawa, nejamatabëcuene-aitatsacajawa-ata nexanaenexa xua cajumaitsitsi. Bajarapacuenia xaniawaetsia jumecowënëtabiabianame peca-itorobicuenia daxita paliwaisianë najumecopatajë tajajiwitonë Moisés-pijinëmijawabelia. Bajarapaliwaisianëwecua apobe-exanaemë itsacuenia patacatonajumecopatsiliwaisiwecua, jamatejema xaniawaetsia pecatopitsapabiabinexa daxitaxuanë exaname. 8 Bajarapaliwaisianë napënajumaitsimë tsabiabi tsane. Bajarapacuenia caematacabi canacujitsia, caemerawi canacujitsia-ata, canaëjëtsiaya ponaponabiabianame nenajamatabënapitabiabijawata. Nexata, exanaponaponaename daxitaxua catonajumecopatatsi bajarapaliwaisita. Bajarapacuenia itsa exanaponaponaename, nexata daxita ne-exanaecuene pexaniacuenia catopitsapanajetarucaena. 9 Xanë raja Jehovánë nijaDiosonë ca-itorobatsi niacuenesaëjawa, nejamatabëcuenesaëjawa-ata. ¡Nexata, pëtsa junawame! ¡Pëtsa jamatabëcuenefaefaenamenua, tsipaji raja xanë nijaDioso Jehovánë cayajawa tsanetsi daxita itsabelia ponaponame! —jai Jehová Josuéjawabelia pejonewajënaeya Canaán nacuajawabelia.
Josué barënaxaniawaeta Israel-pijinë pemomoxi penawajabitsaëtsinexa Canaán nacuapijiwijawabelia
10 Nexata, bajaraxuacujinae Josué itoroba daxita pewetsiwi Israel-pijinë pemomoxi. Jumaitsi:
11 —Paponaename daxita panijamonaejawa panetsipaebinexa penatoxaniawaetsinexa pemarue pijanamutonexa, tsipaji raja acueyabimatacabita nicabianatsi Jordán mene itsapanabelia, wajapitsinexa jane baja waja-iracuenia, pa-ira Jehová Dioso nacarajutsiapaeba —jai pewetsiwijawabelia.
12 Bajarapacuenia-ata Josué barëcuaicuaijai Rubén-pijinë pemomoxijawabelia, Gad-pijinë pemomoxijawabelia, bajarapacuenia itsabitsaëto Manasés-pijinë pemomoxiyajuwënëwijawabelia-ata mapacueniaje:
13 —¡Panajamatabënapire xua paca-itoroba Moisés, Jehová pijajiwitonëmi, pacujinae pacajumaitsi Jehová Dioso papecarajutsijawanexa paxamë mapa-irataje panejinawanapaenexa, matapania jane baja, panenacuera-ewetsinexa! 14 Nexata, papecajumaitsicowëya, papuenebanubianame majotaje panijawajiwi, bajarapacuenia panexi-ata, panijadajubi-ata pa-irajawata Moisés-pijinë imata pacarajutaa paxamë, panejinawanapaenexa Jordán-mene itsapanawelia. Itsiata baitsi jane, daxita pamonae pebijiwi, pamonae cuenecaëjëpatsi penawajabitsaëtsinexa, daxita bajarapamonae notsiana pecanawajabitsaëtabiabijawanë, namataxainaeya peponaenexa, pejamatabëcueneyawenonaenexa panijamonae pecuene-amoneyabinexa Canaán nacuapijiwi. 15 Bajarapacuenia pajamatabëcueneyawenonaponaename panijamonae, matapania Jehová perajutsijawabeliatsi bajarapamonae-ata pa-irajawata jinawanapaejitsia nacuera-ewetsiaya, pacuenia baja paxamë pacarajuta panecanacopataponaenexa. Pacujinae bajarapamonae-ata jamatejema pita bajarapa-iranë, itsajota Jehová rajutsiapaebatsi pejinawanapaenexa, bajaraxuacujinae matapania paxamë panawiabaponaenimica mapa-itsapana-irajawabetsicaje, panejinawanapaenexa panija-irajawata, pa-iraboca daxita Jordán menemuxubërëjawa itsawetsina juameto pitsapabiaba, bajarapa-iranë panepitsinexa panija-iracuenia, Jehová pijajiwitonë Moisés-pijinë papecarajutsicuenia —jai Josué.
16 Nexata, bajarapamonae jumecanawiata mapacueniaje:
—Pa-exanaenajë daxita pacuenejawanë panetonajumecopatame pata-exanabiabinexa. Paponaenajë itsabelianua pane-itorobame. 17 Pacuenia Moisés-pijinëmi pajumecowënëtabiabajë copiayami, bajarapacuenia xamë-ata pacajumecowënëtabiabianatsi. Caejawa rajane paxanë pacatojitsipatsi Jehová pecayajawajawa, pacuenia Moisés-pijinë yajawatsi copiaya. 18 Pamonae apojitsipae tsane pecajumecowënëtsijawa xua itorobame, nexata bajarapamonae apopecajumecowënëtsijamatabëcuene naneconitsiaya patocaëjëtajë petëpaejawa. Xamë pijinia pacatojitsipatsi niacuenesaëjawa, niajamatabëcuenesaëjawanua —jai Rubén-pijinë pemomoxi, Gad-pijinë pemomoxibeje, bajarapacuenia itsabitsaëto Manasés-pijinë pemomoxiyajuwënëwi-ata Josuéjawabelia.
C2-C10 […]